Savdo xizmati koʻrsatish sifati va madaniyatini oshirish, “Chorsu savdo markazi” savdo kompleksida isteʼmol tovarlari bilan chakana savdoni amalga oshiruvchi tadbirkorlar uchun qulay shart-sharoitlar yaratish maqsadida Vazirlar Mahkamasi qaror qiladi:

1. Toshkent shahar hokimligi tomonidan Oʻzbekiston Respublikasi Davlat mulki qoʻmitasi hamda Moliya vazirligi bilan birgalikda Vazirlar Mahkamasining 2000-yil 24-iyundagi 242-son qarorini bajarish yuzasidan ochiq aksiyadorlik jamiyati shaklidagi “Chorsu savdo markazi” (keyingi oʻrinlarda “Chorsu savdo markazi” ochiq aksiyadorlik jamiyati deb ataladi) savdo kompleksi tashkil etilganligi va quyidagilar uning asosiy vazifalari etib belgilanganligi maʼlumot uchun qabul qilinsin:

“Chorsu savdo markazi” ochiq aksiyadorlik jamiyatiga tegishli savdo va omborxona maydonlarini isteʼmol tovarlari, birinchi navbatda, jismoniy shaxslar tomonidan respublika hududiga keltiriladigan isteʼmol tovarlari bilan mayda ulgurji va chakana savdoni tashkil etish uchun yuridik va jismoniy shaxslarga ijaraga berish;

boshqa manfaatdor tashkilotlar va korxonalar bilan birgalikda savdoning yuqori sifati va madaniyatini taʼminlovchi transport, bank xizmatlari, maishiy va boshqa xizmatlar kompleksini tashkil etish;

ijaraga oluvchilar uchun zarur moddiy-texnik, texnologik va tashkiliy shart-sharoitlar yaratish, savdo kompleksi hududida sotuvchilar va xaridorlarga zarur axborot xizmatlari, shu jumladan isteʼmol tovarlariga talab va taklif konyunkturasi toʻgʻrisida axborot xizmatlari koʻrsatish;

“Chorsu savdo markazi” ochiq aksiyadorlik jamiyati hududida savdo faoliyatini amalga oshirishni xohlovchi tadbirkorlar oʻrtasida muntazam ravishda keng reklama va zarur tushuntirish ishlarini olib borish.

2. Oʻzbekiston Respublikasi Davlat mulki qoʻmitasi, Moliya vazirligi va Toshkent shahar hokimligining:

“Chorsu savdo markazi” ochiq aksiyadorlik jamiyatining eʼlon qilingan aksiyalariga ochiq obuna boʻlishdan tushadigan pul mablagʻlari jamiyat tomonidan uning balansidagi binolar va inshootlarni rekonstruksiya qilishga va texnika bilan qayta jihozlashga yoʻnaltirilishi;

“Chorsu savdo markazi” ochiq aksiyadorlik jamiyati hududida savdo faoliyatini amalga oshiruvchi va xizmatlar koʻrsatuvchi jismoniy shaxslar faoliyati Vazirlar Mahkamasining 1999-yil 2-avgustdagi 373-son qarori bilan tasdiqlangan Oʻzbekiston Respublikasi hududida joylashgan chakana bozorlar, savdo markazlari va savdo komplekslarida jismoniy shaxslar tomonidan chakana savdo qilish va xizmatlar koʻrsatish Tartibiga muvofiq amalga oshirilishi toʻgʻrisidagi taklifiga rozilik berilsin.

3. Oʻzbekiston Respublikasi Davlat soliq qoʻmitasi “Chorsu savdo markazi” ochiq aksiyadorlik jamiyati hududida jismoniy shaxslar daromadlaridan soliqning toʻliq va oʻz vaqtida undirilishini taʼminlash uchun tayanch punkt tashkil etsin. Davlat soliq xizmatining koʻrsatib oʻtilgan tayanch punkt shtatida boʻlmagan mansabdor shaxslarining jismoniy shaxslar tomonidan “Chorsu savdo markazi” ochiq aksiyadorlik jamiyati hududida tadbirkorlik faoliyati daromadidan belgilangan soliqning oʻz vaqtida toʻlanishi ustidan nazoratni amalga oshirishlari taqiqlansin.

4. Oʻzbekiston Respublikasi tijoat banklari “Chorsu savdo markazi” ochiq aksiyadorlik jamiyati hududida valyuta almashtirish punktlari, shuningdek pul mablagʻlarini qabul qilish kassalari ochsinlar.

6. Mazkur qarorning bajarilishini nazorat qilish Bosh vazir oʻrinbosari M. Z. Usmonov hamda Toshkent shahar hokimi R. M. Shoabdurahmonov zimmasiga yuklansin.