Hujjat 15.05.2018 00 sanasi holatiga
Amaldagi versiyaga o‘tish

Oʻzbekiston Respublikasi Prezidentining

Qarori

Davlat aktivlarini boshqarish tizimini takomillashtirish chora-tadbirlari toʻgʻrisida

Ustav fondida davlat ulushi ustuvor boʻlgan davlat korxonalari va boshqa yuridik shaxslar (keyingi oʻrinlarda davlat korxonalari deb yuritiladi) ustuvor sohalarda, eng avvalo, yoqilgʻi-energetika, agrosanoat, togʻ-kon komplekslarida, mashinasozlik, transport, kimyo sanoati, telekommunikatsiya sohalarida hal qiluvchi oʻrinlarni egallagan holda milliy iqtisodiyotda muhim rol oʻynaydi.

Shu bilan birga, bugungi kunda davlat korxonalariga oʻz vazifalarini toʻliq bajarish va mamlakatni ijtimoiy-iqtisodiy va texnologik rivojlantirishga koʻmaklashish imkonini bermaydigan qator muammolar mavjud. Xususan:

birinchidan, korporativ boshqaruv jarayonida davlat korxonalarining boshqaruv organlarida ijro etuvchi hokimiyatning sohaviy komplekslari va davlat boshqaruv organlari rahbarlari ishtiroki oqibatida yuzaga keladigan manfaatlar toʻqnashuvining mavjudligi;

ikkinchidan, davlat korxonalarida optimal boshqaruv qarorlari qabul qilish, moddiy-texnika, moliyaviy va mehnat resurslaridan oqilona va samarali foydalanishni taʼminlovchi investitsiyaviy jarayonlarni boshqarishning yoʻlga qoʻyilgan tizimi mavjud emasligi;

uchinchidan, korporativ boshqaruvning shaffof emasligi, davlat korxonalarining moliyaviy va xoʻjalik faoliyatini muntazam tahlil qilish, ularga yuklatilgan vazifa va funksiyalarning bajarilishi va natijadorligini samarali nazorat qilish amaliyotining mavjud emasligi;

toʻrtinchidan, davlat korxonalarining korporativ va loyiha boshqaruvi sohasidagi rahbar xodimlari va mutaxassislarini tayyorlash, qayta tayyorlash va malakasini oshirish tizimining samarasiz ekanligi.

Davlat aktivlarini boshqarishning samaradorligini yanada oshirish, davlat korxonalari faoliyatini takomillashtirish, ularning Oʻzbekiston Respublikasini iqtisodiy, texnologik va ijtimoiy jihatdan yanada rivojlantirishdagi rolini oshirish maqsadida:

Keyingi tahrirga qarang.

1. Davlat korxonalari faoliyatini tashkil etishda keng koʻlamli oʻzgarishlarni amalga oshirish, shuningdek, davlat aktivlarining qiymatini va ularni boshqarish samaradorligini oshirishni koʻzda tutuvchi davlat korxonalarini transformatsiya qilish dasturlarini amalga oshirishning xalqaro tajribasi maʼlumot uchun qabul qilinsin.

Keyingi tahrirga qarang.

2. Oʻzbekiston Respublikasi Prezidenti huzuridagi Loyiha boshqaruvi milliy agentligi, Moliya vazirligi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasining quyidagilarni nazarda tutuvchi 2018 — 2020-yillarda ustav fondida davlat ulushi ustuvor boʻlgan davlat korxonalari va boshqa yuridik shaxslarni transformatsiya qilish dasturini (keyingi oʻrinlarda — Dastur) amalga oshirish toʻgʻrisidagi taklifiga rozilik berilsin:

boshqaruv xodimlariga yuklatilgan vazifalarning sifatli va oʻz vaqtida bajarilishi uchun ularning masʼuliyatini taʼminlovchi korporativ boshqaruv tizimini joriy etish;

davlat korxonalari faoliyati samaradorligini taʼminlash boʻyicha tashabbuslarni amalga oshirish;

davlat korxonalari rahbarlari va mutaxassislarining kasbiy koʻnikmalarini, jumladan tegishli tarmoqlar boʻyicha yetakchi xorijiy korporatsiyalar bilan tajriba almashinishni tashkil etish orqali rivojlantirish;

davlat korxonalarini transformatsiya qilish tadbirlarini amalga oshirishda loyiha boshqaruvi vositalaridan foydalanish.

Keyingi tahrirga qarang.

3. Belgilab qoʻyilsinki:

Oʻzbekiston Respublikasi Prezidenti huzuridagi Loyiha boshqaruvi milliy agentligi Dasturning strategik maqsadlari va muhim vazifalarni aniqlash va tasdiqlash, shuningdek, uni amalga oshirish masalalari boʻyicha qarorlar qabul qilishga vakolatli Loyiha ofisi (keyingi oʻrinlarda — Loyiha ofisi) funksiyalarini bajaradi;

Dasturning amal qilishi “Oʻzbekneftgaz”, “Oʻzkimyosanoat”, “Oʻzbekenergo”, “Oʻzbekgidroenergo”, “Olmaliq kon-metallurgiya kombinati”, “Oʻzbekiston temir yoʻllari” aksiyadorlik jamiyatlari, “Oʻzbektelekom” AK, “Navoiy kon-metallurgiya kombinati” DK, “Oʻzbekiston havo yoʻllari” MAK va AT Xalq bankiga (keyingi oʻrinlarda — davlat kompaniyalari) tatbiq qilinadi.

Loyiha ofisiga Dasturning amal qilishi muddatini uzaytirish, shuningdek, unga boshqa davlat korxonalarini kiritish boʻyicha takliflarni belgilangan tartibda kiritish huquqi berilsin.

Keyingi tahrirga qarang.

4. Belgilansinki, Dasturni amalga oshirish davrida:

Oʻzbekiston Respublikasi Vazirlar Mahkamasining davlat kompaniyalarining boshqaruv organlarini shakllantirish boʻyicha;

Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi huzuridagi Davlat aktivlarini boshqarish markazining davlat kompaniyalariga nisbatan;

Oʻzbekiston Respublikasi Moliya vazirligining AT Xalq bankiga nisbatan vazifa, funksiya va huquqlari Loyiha ofisiga oʻtkaziladi.

Loyiha ofisi Dasturning ijrosi boʻyicha oʻz faoliyatini Oʻzbekiston Respublikasi Vazirlar Mahkamasi, Moliya vazirligi hamda Xususiylashtirilgan korxonalarga koʻmaklashish va raqobatni rivojlantirish davlat qoʻmitasidan mustaqil ravishda amalga oshiradi.

Keyingi tahrirga qarang.

5. Oʻzbekiston Respublikasi Moliya vazirligining Moliya bozori va davlat aktivlari boʻyicha daromadlar tushumini nazorat qilish boshqarmasi tugatilsin hamda boʻshayotgan 5 ta shtat birligi Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi huzuridagi Davlat aktivlarini boshqarish markaziga oʻtkazilsin.

6. Loyiha ofisiga Dasturni amalga oshirish doirasida quyidagi vakolatlar berilsin:

Dasturga muvofiq davlat kompaniyalarining tashabbuslarini ishlab chiqish va joriy etish;

davlat kompaniyalarining moliya-xoʻjalik faoliyati toʻgʻrisidagi axborotlarni, shu jumladan, tijorat, bank, soliq sirlarini va boshqa cheklangan axborotlarni oʻz ichiga oluvchi maʼlumotlarni soʻrab olish;

davlat kompaniyalarining faoliyatini, shu jumladan ularning tashabbuslarini amalga oshirish nuqtai nazaridan muntazam tahlil qilish;

korporativ boshqaruvning samarali tizimini, biznes-jarayonlarni takomillashtirish, asosiy ishlab chiqarish, maʼmuriy va operativ jarayonlarni optimallashtirish, zamonaviy menejment va resurslarni boshqarishni joriy qilish orqali yoʻlga qoʻyish.

Keyingi tahrirga qarang.

7. Quyidagilar:

Dasturni amalga oshirish masalalari boʻyicha Loyiha ofisining qarorlari davlat kompaniyalari tomonidan ijro etilishi uchun majburiy hisoblanadi;

Loyiha ofisi Dasturda nazarda tutilgan tadbirlarni amalga oshirish sifati va muddatlari ustidan monitoring oʻtkazadi;

davlat kompaniyalarining budjetini shakllantirish Loyiha ofisi bilan majburiy kelishilishi lozim.

Loyiha ofisi Dastur amalga oshirilishining borishi toʻgʻrisidagi maʼruzani har yili Oʻzbekiston Respublikasi Loyiha boshqaruvining yagona milliy axborot tizimini joriy etish boʻyicha Muvofiqlashtiruvchi kengashga taqdim qiladi.

Keyingi tahrirga qarang.

8. Loyiha ofisi davlat kompaniyalari bilan birgalikda ikki oy muddatda:

Loyiha ofisi ishining reglamenti;

Dasturni amalga oshirish boʻyicha “yoʻl xaritalari”ni ishlab chiqish va belgilangan tartibda tasdiqlashni taʼminlasin.

Belgilansinki, Dasturni amalga oshirish tadbirlarini moliyalashtirish davlat kompaniyalarining shaxsiy mablagʻlari hisobidan amalga oshiriladi.

Keyingi tahrirga qarang.

9. Oʻzbekiston Respublikasi Korporativ boshqaruv ilmiy-taʼlim markazi (keyingi oʻrinlarda — Markaz) balansidagi binolari, inshootlari va boshqa moddiy-texnika qimmatliklari bilan birgalikda Loyiha ofisiga berilsin.

Keyingi tahrirga qarang.

Oʻzbekiston Respublikasi Korporativ boshqaruv ilmiy-taʼlim markazining Vasiylik kengashi tarkibi va tashkiliy tuzilmasi 1 va 2-ilovalarga muvofiq tasdiqlansin.

10. Belgilansinki, Markaz mavjud vakolatlari bilan bir qatorda:

davlat organlari va boshqa tashkilotlar xodimlarini loyiha boshqaruvi masalalari boʻyicha oʻqitishni tashkil etadi;

davlat organlari va boshqa tashkilotlar xodimlarining loyiha boshqaruvi hamda davlat xaridlari sohalarida malakasini oshirish boʻyicha maxsus qisqa muddatli taʼlim dasturlarini ishlab chiqadi;

Keyingi tahrirga qarang.

loyiha boshqaruvi hamda davlat xaridlari sohalarida kadrlar zaxirasini shakllantiradi;

Keyingi tahrirga qarang.

loyiha boshqaruvi hamda davlat xaridlari sohalarida davlat organlari va boshqa tashkilotlar xodimlarini sertifikatlash tizimini ishlab chiqadi va amalga joriy etadi;

Keyingi tahrirga qarang.

loyiha boshqaruvi hamda davlat xaridlarining xalqaro va milliy standartlari boʻyicha oʻquv qoʻllanmalar, axborot beruvchi adabiyotlar va boshqa materiallar ishlab chiqishni amalga oshiradi.

Keyingi tahrirga qarang.

11. Markazda 2018/2019 oʻquv yilidan boshlab:

har yilgi qabul kvotalari 40 kishidan iborat boʻlgan magistratura taʼlim dasturi asosida “Loyiha boshqaruvi” (“Project management”) mutaxassisligi boʻyicha toʻlov-kontrakt asosida oʻqitish;

davlat organlari va boshqa tashkilotlar xodimlarini loyiha boshqaruvi hamda davlat xaridlari sohalari boʻyicha tayyorlash, qayta tayyorlash va ularning malakasini oshirish yuzasidan imtihonlarni muvaffaqiyatli topshirgan taqdirda belgilangan namunadagi sertifikatlar berilgan holda, maxsus kurslar tashkil etilsin.

Keyingi tahrirga qarang.

12. Oʻzbekiston Respublikasi Oliy va oʻrta maxsus taʼlim vazirligi Oʻzbekiston Respublikasi Prezidenti huzuridagi Loyiha boshqaruvi milliy agentligi bilan birgalikda belgilangan tartibda:

magistrlar tayyorlash sohasidagi zamonaviy tendensiyalarni hisobga olgan holda, “Loyiha boshqaruvi” magistratura mutaxassisligi boʻyicha kadrlar tayyorlash sohasida oliy taʼlim davlat taʼlim standartini tasdiqlasin;

Oliy taʼlim yoʻnalishlari va mutaxassisliklari klassifikatoriga “Loyiha boshqaruvi” magistratura mutaxassisligini kiritsin.

13. Markaz ikki oy muddatda kadrlar tayyorlash, qayta tayyorlash va ularning malakasini oshirish boʻyicha oʻquv rejalarini xorijda qisqa muddatli stajirovkalar oʻtashni va loyiha boshqaruvi hamda davlat xaridlari sohasidagi yetakchi xorijiy mutaxassislarni keng jalb qilishni nazarda tutgan holda ishlab chiqsin va Oʻzbekiston Respublikasi Prezidenti huzuridagi Loyiha boshqaruvi milliy agentligi bilan kelishgan holda tasdiqlasin.

Keyingi tahrirga qarang.

14. Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga 3-ilovaga muvofiq oʻzgartish va qoʻshimchalar kiritilsin.

15. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi Oʻzbekiston Respublikasi Prezidenti huzuridagi Loyiha boshqaruvi milliy agentligi, Moliya vazirligi, Adliya vazirligi va boshqa manfaatdor idoralar, shuningdek, davlat kompaniyalari bilan birgalikda ikki oy muddatda qonun hujjatlariga mazkur qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

16. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti Davlat maslahatchisining birinchi oʻrinbosari B.M. Mavlonov va Oʻzbekiston Respublikasi Prezidenti huzuridagi Loyiha boshqaruvi milliy agentligi direktori Sh.M. Sadikov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 12-may,

PQ-3720-son

Oʻzbekiston Respublikasi Prezidentining 2018-yil 12-maydagi PQ-3720-son qaroriga
1-ILOVA

Korporativ boshqaruv ilmiy-taʼlim markazining Vasiylik kengashi

TARKIBI

1.	Sh.M. Sadikov	—	Oʻzbekiston Respublikasi Prezidenti huzuridagi Loyiha boshqaruvi milliy agentligi direktori, Kengash raisi
2.	B.A. Xodjayev	—	Oʻzbekiston Respublikasi iqtisodiyot vaziri, Kengash raisining oʻrinbosari
3.	M.B. Nurmurodov	—	Oʻzbekiston Respublikasi Markaziy banki raisi
4.	R.A. Gulyamov	—	Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisi
5.	I.U. Majidov	—	Oʻzbekiston Respublikasi oliy va oʻrta maxsus taʼlim vaziri
6.	A.I. Axmedxodjayev	—	Oʻzbekiston Respublikasi axborot texnologiyalari va kommunikatsiyalarini rivojlantirish vaziri
7.	V.Yu. Pak	—	Oʻzbekiston Respublikasi moliya vazirining oʻrinbosari
8.	B.F. Ganixodjayev	—	Korporativ boshqaruv ilmiy-taʼlim markazi direktori, Kengash kotibi

Izoh: Vasiylik kengashi aʼzolari boshqa ishga oʻtgan taqdirda mazkur lavozimlarga yangidan tayinlangan shaxslar yoxud zimmasiga tegishli funksiyalarni bajarish yuklangan shaxslar ushbu kengash tarkibiga kiritiladi.

Oʻzbekiston Respublikasi Prezidentining 2018-yil 12-maydagi PQ-3720-son qaroriga
2-ILOVA

Korporativ boshqaruv ilmiy-taʼlim markazining

TASHKILIY TUZILMASI

Jami — 52 nafar, shu jumladan boshqaruv xodimlari — 27 nafar, professor-oʻqituvchilar — 25 nafar.

Oʻzbekiston Respublikasi Prezidentining 2018-yil 12-maydagi PQ-3720-son qaroriga
3-ILOVA

Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga kiritilayotgan oʻzgartish va qoʻshimchalar

1. Oʻzbekiston Respublikasi Prezidentining 2015-yil 30-sentabrdagi “Korporativ boshqaruv ilmiy-taʼlim markazi faoliyatini tashkil etish chora-tadbirlari toʻgʻrisida”gi PQ-2414-son qarorining rus tilidagi matnida:

a) 1-band quyidagi tahrirda bayon etilsin:

“1. Opredelit osnovnimi zadachami i napravleniyami deyatelnosti Nauchno-obrazovatelnogo sentra korporativnogo upravleniya:

osushestvleniye s shirokim uchastiyem professorsko-prepodavatelskix kadrov vedushix obrazovatelnix uchrejdeniy ekonomicheski razvitix stran spetsialnix kratkosrochnix programm po povisheniyu kvalifikatsii upravlencheskix kadrov i spetsialistov v sfere korporativnogo upravleniya, ovladeniyu imi sovremennimi metodami menedjmenta, marketinga i biznes-administrirovaniya;

organizatsiyu obucheniya rabotnikov gosudarstvennix organov i inix organizatsiy po voprosam proyektnogo upravleniya;

razrabotku spetsialnix kratkosrochnix obrazovatelnix programm po povisheniyu kvalifikatsii rabotnikov gosudarstvennix organov i inix organizatsiy v sfere proyektnogo upravleniya i gosudarstvennix zakupok;

podgotovku visokokvalifitsirovannix spetsialistov na osnove mejdunarodnix standartov proyektnogo upravleniya po obrazovatelnoy programme magistraturi po spetsialnosti “Proyektnoye upravleniye” (“Project management”);

podgotovku visokokvalifitsirovannix spetsialistov v oblasti upravleniya biznesom i korporativnogo upravleniya na osnove ispolzuyemix v ekonomicheski razvitix stranax obrazovatelnix programm magistraturi po spetsialnosti “Upravleniye biznesom” (“Master of Business Administration — MBA”);

formirovaniye kadrovogo rezerva v sfere proyektnogo upravleniya i gosudarstvennix zakupok;

razrabotku i vnedreniye sistemi sertifikatsii rabotnikov gosudarstvennix organov i inix organizatsiy v oblasti proyektnogo upravleniya i gosudarstvennix zakupok;

razrabotku uchebnix posobiy, spravochnoy literaturi i drugix materialov po mejdunarodnim i natsionalnim standartam proyektnogo upravleniya i gosudarstvennix zakupok;

vnedreniye v uchebniy protsess sovremennix mejdunarodnix standartov i metodov podgotovki upravlencheskix kadrov s shirokim ispolzovaniyem peredovix pedagogicheskix i informatsionno-kommunikatsionnix texnologiy, v tom chisle distansionnogo obucheniya;

glubokoye izucheniye na sistemnoy osnove peredovogo zarubejnogo opita v sfere proyektnogo i korporativnogo upravleniya, menedjmenta i gosudarstvennix zakupok, a takje podgotovku predlojeniy po sovershenstvovaniyu zakonodatelstva v etoy sfere;

ustanovleniye tesnix svyazey i razvitiye sotrudnichestva s vedushimi zarubejnimi obrazovatelnimi uchrejdeniyami i kompaniyami, realizatsiyu s nimi sovmestnix partnerskix programm po dalneyshemu sovershenstvovaniyu uchebno-metodicheskoy raboti po podgotovke i povisheniyu professionalnogo urovnya upravlencheskix kadrov v sfere proyektnogo i korporativnogo upravleniya”;

b) 3-bandning uchinchi va toʻrtinchi xatboshilari quyidagi tahrirda bayon etilsin:

“yavlyayetsya yuridicheskim litsom v forme uchrejdeniya i v svoyey deyatelnosti podchinyayetsya i podotcheten Natsionalnomu agentstvu proyektnogo upravleniya pri Prezidente Respubliki Uzbekistan;

osushestvlyayet na platno-kontraktnoy osnove podgotovku, perepodgotovku i povisheniye kvalifikatsii upravlencheskix kadrov po spetsialnim obrazovatelnim programmam “korporativnoye upravleniye dlya rukovodyashix rabotnikov”, “proyektnoye upravleniye i gosudarstvennie zakupki”, a takje po obrazovatelnim programmam magistraturi po spetsialnostyam “Proyektnoye upravleniye” (“Project management”) i “Upravleniye biznesom” (“Master of Business Administration — MBA”) s vidachey po okonchanii obucheniya sootvetstvuyushix dokumentov gosudarstvennogo obrazsa. Pri etom na period obucheniya v Sentre za obuchayushimisya soxranyayetsya zanimayemaya doljnost po osnovnomu mestu raboti”;

v) 4-bandning ikkinchi va uchinchi xatboshilari, shuningdek qarorga 1 va 2-ilovalar oʻz kuchini yoʻqotgan deb hisoblansin;

g) 5-bandning birinchi xatboshisidan “R.S. Azimov” soʻzi chiqarib tashlansin.

2. Oʻzbekiston Respublikasi Prezidentining 2017-yil 27-iyuldagi PQ-3150-son qarori bilan tasdiqlangan Oʻzbekiston Respublikasi Prezidenti huzuridagi Loyiha boshqaruvi milliy agentligi toʻgʻrisidagi nizomda:

a) quyidagi mazmundagi 7¹-band bilan toʻldirilsin:

“7¹. 2018 — 2020-yillarda ustav fondida davlat ulushi ustuvor boʻlgan davlat korxonalari va boshqa yuridik shaxslarni transformatsiya qilish dasturini (keyingi oʻrinlarda Dastur deb yuritiladi) amalga oshirish doirasida Agentlikka Dasturda ishtirok etuvchi ustav fondida davlat ulushi ustuvor boʻlgan davlat korxonalari va boshqa yuridik shaxslarga (keyingi oʻrinlarda davlat kompaniyalari deb yuritiladi) nisbatan quyidagi vazifalar yuklatiladi:

investitsiya aktivlarining ishonchli boshqaruvchilari va davlatning ishonchli vakillarining davlat mulkini samarali boshqarish boʻyicha faoliyatining natijadorligi monitoringini olib borish;

davlat kompaniyalarining davlat paketlari (ulushlari) boʻyicha, shu jumladan, ularni davlatning ishonchli vakillariga, boshqaruvchi kompaniyalarga va xoʻjalik boshqaruvi organlariga ishonchli boshqaruvga berish yoʻli bilan aksiyador (qatnashchi)ning huquqlarini roʻyobga chiqarish;

davlat kompaniyalari faoliyati samaradorligini, birinchi navbatda, ishlab chiqarishni modernizatsiyalash va texnik jihatdan qayta jihozlash, mahsulot tannarxini pasaytirish, mehnat unumdorligini oshirish, sifatni boshqarishning zamonaviy tizimlarini joriy etish hisobiga oshirish yuzasidan chora-tadbirlar kompleksini ishlab chiqish va ularni amalga oshirishda qatnashish;

davlat kompaniyalari tomonidan dividendlarning Oʻzbekiston Respublikasi Davlat budjetiga oʻz vaqtida va toʻliq hajmda toʻlanishini taʼminlashga koʻmaklashish”;

b) 8-band quyidagi mazmundagi “k” — “m” kichik bandlar bilan toʻldirilsin:

“k) investitsiya aktivlarining ishonchli boshqaruvchilari va davlatning ishonchli vakillarining davlat mulkini samarali boshqarish boʻyicha faoliyatining natijadorligi monitoringini olib borish sohasida:

muassislar (aksiyadorlar, qatnashchilar) va ishonchli boshqaruvchilar tomonidan taqdim etiladigan hisobotlar va axborot, shu jumladan idoralararo elektron hujjat aylanishi vositasida olinadigan hisobotlar asosida davlat kompaniyalarining moliya-xoʻjalik faoliyatini tahlil qiladi, davlat kompaniyalarining biznes-rejasi parametrlari muntazam ravishda bajarilmagan taqdirda esa, ijro etuvchi organi tarkibini almashtirish tashabbusi bilan chiqadi;

auditorlik tashkilotlari tomonidan taqdim etilgan hujjatlarni koʻrib chiqish yakunlari boʻyicha davlat kompaniyalarida tashqi auditni oʻtkazish uchun auditorlik tashkilotlari tanlovini amalga oshiradi va tasdiqlaydi;

davlat kompaniyasi moliya-xoʻjalik faoliyatini auditorlik tekshirish yoki ular faoliyatining maxsus masalasi boʻyicha auditorlik tekshirishini oʻtkazish tashabbusi bilan chiqadi;

davlat kompaniyalari ijro etuvchi organi va kuzatuv kengashi rahbarlarining korporativ boshqarishning sifatli tizimini joriy etish boʻyicha hisobotlarini Agentlikda vaqti-vaqti bilan eshitishni tashkil etadi;

har chorakda davlat kompaniyalari, shuningdek ishonchli boshqaruvchilar faoliyatini samaradorligi haqida tahliliy materialllar tayyorlaydi;

l) davlat kompaniyalarining davlat paketlari (ulushlari) boʻyicha, shu jumladan, ularni davlatning ishonchli vakillariga, boshqaruvchi kompaniyalarga va xoʻjalik boshqaruvi organlariga ishonchli boshqaruvga berish yoʻli bilan aksiyador (qatnashchi)ning huquqlarini roʻyobga chiqarish sohasida:

qonun hujjatlariga muvofiq Oʻzbekiston Respublikasi nomidan aksiyalarning davlat paketi (ulushlari) boʻyicha davlat kompaniyalarining aksiyadori (qatnashchisi) huquqini amalga oshiradi, shuningdek ushbu huquqlarni ishonchli boshqaruvchilarga beradi;

davlat kompaniyalari, shu jumladan, chet eldagi joylashganlari, boshqaruv organlarida oʻziga egalik qilish va foydalanish uchun berilgan aksiyalarning davlat paketlari (ulushlar) boʻyicha aksiyador (qatnashchi) sifatida davlat manfaatlarini ifodalaydi;

tanlov asosida aksiyalarning davlat paketlarini (ulushlarini) ishonchli boshqaruvga beradi, ularni davlatning ishonchli vakillariga, davlat va xoʻjalik boshqaruvi organlariga berish hollari bundan mustasno;

davlat kompaniyalaridagi davlat ulushini boshqarish boʻyicha ishonchli boshqaruvchilar bilan, qonun hujjatlarida nazarda tutilgan hollarda esa, boshqa yuridik shaxslar bilan shartnomalar tuzadi;

davlat kompaniyalari aksiyadorlari (qatnashchilari) umumiy majlisida ishtirok etish uchun ishonchli boshqaruvchilarga, davlat vakillariga va Agentlik xodimlariga ishonchnomalar beradi;

davlat kompaniyalari boshqaruv organlari majlislari kun tartibi masalalari yuzasidan ovoz berish siyosati boʻyicha ishonchli boshqaruvchilarga va davlat vakillariga koʻrsatmalar beradi;

m) davlat kompaniyalari faoliyati samaradorligini, birinchi navbatda, ishlab chiqarishni modernizatsiyalash va texnik jihatdan qayta jihozlash, mahsulot tannarxini pasaytirish, mehnat unumdorligini oshirish, sifatni boshqarishning zamonaviy tizimlarini joriy etish hisobiga oshirish yuzasidan chora-tadbirlar kompleksini ishlab chiqish va ularni amalga oshirishda qatnashish sohasida:

davlat mulkini boshqarish masalalari boʻyicha qonun hujjatlarida belgilangan tartibda davlat organlari bilan oʻzaro hamkorlik qiladi;

davlat kompaniyalari moliya-xoʻjalik faoliyatini tahlil qiladi, shuningdek ularni moliyaviy sogʻlomlashtirish choralarini koʻradi;

davlat kompaniyalarining samarali biznes-rejalari ishlab chiqilishiga koʻmaklashadi va ularning parametrlari bajarilishi monitoringini olib boradi;

aksiyadorlik jamiyatlarini boshqarishda aksiyadorlar va kuzatuvchi kengashlarning rolini tubdan oshirishga, minoritar aksiyadorlarning huquqlarini himoya qilishni taʼminlashga, davlat kompaniyalarining moliya-xoʻjalik faoliyati natijalari yuzasidan ijro etuvchi organlarning aksiyadorlar oldidagi javobgarligini kuchaytirishga yoʻnaltirilgan korporativ boshqarish tizimini yanada takomillashtirish chora-tadbirlarini koʻradi;

davlat kompaniyalarini samarali boshqarishni taʼminlash uchun ularni korporativ boshqarishning eng yaxshi ilgʻor tajribasini joriy etish ishlarini olib boradi;

davlat kompaniyalari faoliyatining iqtisodiy samaradorligini, shu jumladan, ularning moliyaviy natijalarini oshirish choralarini koʻradi;

ishlab chiqarishni modernizatsiyalash, texnologik qayta jihozlash va kengaytirish jarayonlariga zarur investitsiyalarni jalb etish uchun davlat kompaniyalarining qimmatli qogʻozlarini chiqarish tashabbusi bilan chiqish orqali fond bozorining rivojlanishiga koʻmaklashadi;

davlat aktivlarini boshqarish samaradorligini oshirish, korporativ boshqarishni rivojlantirish sohasida konsalting xizmatlari koʻrsatadi;

soliqlar va boshqa majburiy toʻlovlar boʻyicha Oʻzbekiston Respublikasining Davlat budjeti, davlat maqsadli jamgʻarmalariga, ish haqi va dividendlar boʻyicha muddati oʻtgan qarzdorlik vujudga kelganda, shuningdek biznes-reja boʻyicha asosiy parametrlar ketma-ket ikki chorak davomida bajarilmagan hollarda davlat kompaniyasining kuzatuv kengashiga davlat kengashining ijro etuvchi organi bilan mehnat munosabatlarini davom ettirish maqsadga muvofiqligi toʻgʻrisidagi masalani kiritadi;

mahalliy davlat hokimiyati organlari bilan birgalikda rivojlangan mamlakatlarning ilgʻor tajribalarini joriy etish, davlat kompaniyalari, davlatning ishonchli vakillari, investitsiya aktivlarini ishonchli boshqaruvchilarning bilim darajasi va boshqaruv qobiliyatini oshirish yoʻli bilan korporativ boshqaruv va davlat aktivlarini samarali boshqarishni rivojlantirish bilan bogʻliq kurslar, seminarlar, “davra suhbatlari” va boshqa tadbirlar tashkil etadi;

korporativ boshqaruv tizimini takomillashtirish va davlat kompaniyalarini boshqarish samaradorligini oshirishga yoʻnaltirilgan tadbirlar boʻyicha takliflar tayyorlaydi;

davlat aktivlarini samarali boshqarish, korporativ boshqaruvning zamonaviy metodlarini joriy etish, menejment sifatini oshirish boʻyicha, shuningdek davlat kompaniyalaridagi davlat vakillarining faoliyatini tartibga soluvchi normativ-huquqiy hujjatlar loyihalarini tayyorlashda ishtirok etadi;

davlat kompaniyalariga ularning rivojlanishida koʻmaklashadi”;

v) quyidagi mazmundagi 10¹-band bilan toʻldirilsin:

“10¹. Dasturni amalga oshirish doirasida Agentlikka davlat kompaniyalariga nisbatan quyidagi huquqlar beriladi:

Dasturga muvofiq davlat kompaniyalarining tashabbuslarini ishlab chiqish va joriy etish;

zarur hollarda davlat organlari, jumladan huquqni muhofaza qilish organlari, boshqa davlat tashkilotlari va davlat kompaniyalaridan Agentlikka yuklatilgan vazifa va funksiyalarni bajarish uchun zarur boʻlgan axborot va materiallarni, shu jumladan, tijorat, bank, soliq sirlarini va boshqa cheklangan axborotlarni oʻz ichiga oluvchi maʼlumotlarni soʻrash va olish;

qoʻyilgan vazifalarni tezkor hal qilish uchun ilmiy-tadqiqot, auditorlik, advokatlik, konsalting va boshqa tashkilotlarni, korporativ boshqaruv, menejment, moliya va qimmatli qogʻozlar sohasida ish tajribasiga ega boʻlgan mustaqil ekspertlar va mutaxassislarni belgilangan tartibda jalb qilish;

davlat kompaniyalari faoliyatini, jumladan muvaffaqiyatli oʻtgan milliy va xalqaro tajriba asosida davlat ularning tashabbuslarining amalga oshirilishi nuqtai nazaridan doimiy tahlil qilib borish;

korporativ boshqaruvning samarali tizimini, jumladan biznes-jarayonlarni takomillashtirish, asosiy ishlab chiqarish, maʼmuriy va operativ jarayonlarni optimallashtirish, zamonaviy menejment va resurslarni boshqarishni joriy etish orqali yoʻlga qoʻyish;

davlat mulkini, zarur holda joyiga chiqqan holda, xatlovdan oʻtkazish va undan foydalanish samaradorligini monitoring qilish;

davlat organlari va tashkilotlari orasidan davlat kompaniyalarining kuzatuv kengashlariga nomzodlarni tanlash;

oʻz vakolatlari doirasida davlat kompaniyalarining ustav fondidagi davlat aksiyalari paketini (ulushini) oʻzgartirish boʻyicha buyruqlar chiqarish;

ishonchli boshqaruvchilarga davlatning aksiyador (ishtirokchi) sifatidagi huquqlari buzilishini va (yoki) uning oqibatlarini bartaraf etish toʻgʻrisida, dastlabki holatni tiklash toʻgʻrisida bajarilishi majburiy boʻlgan koʻrsatmalar berish, shuningdek ularning ijrosini nazorat qilish;

davlat kompaniyalarining ustav fondidagi davlat ishtirokini optimallashtirish boʻyicha takliflar kiritish”.

Keyingi tahrirga qarang.

3. Vazirlar Mahkamasining 2015-yil 27-oktabrdagi “Korporativ boshqaruv ilmiy-taʼlim markazining samarali faoliyatini taʼminlashga doir tashkiliy chora-tadbirlar toʻgʻrisida”gi 305-son qarorida (Oʻzbekiston Respublikasi QT, 2015-y., 10-son, 94-modda):

a) 2-bandda:

quyidagi mazmundagi ikkinchi xatboshi bilan toʻldirilsin:

“Korporativ boshqaruv ilmiy-taʼlim markazining (keyingi oʻrinlarda Markaz deb ataladi) muassisi Oʻzbekiston Respublikasi Prezidenti huzuridagi Loyiha boshqaruvi milliy agentligi hisoblanadi”;

ikkinchi — yettinchi xatboshilar tegishincha uchinchi — sakkizinchi xatboshilar deb hisoblansin;

uchinchi xatboshidagi “Korporativ boshqaruv ilmiy-taʼlim markazining (keyingi oʻrinlarda Markaz deb ataladi)” degan soʻzlar “Markaz” degan soʻz bilan almashtirilsin;

sakkizinchi xatboshidagi “Oʻzbekiston Respublikasi Vazirlar Mahkamasining” degan soʻzlar “Markaz Vasiylik kengashining” degan soʻzlar bilan almashtirilsin;

b) 1-ilovada:

2-bandning ikkinchi xatboshisi quyidagi tahrirda bayon etilsin:

“Markaz oʻz faoliyatida Oʻzbekiston Respublikasi Prezidenti huzuridagi Loyiha boshqaruvi milliy agentligiga boʻysunadi va hisobot beradi”;

11-band quyidagi tahrirda bayon etilsin:

“11. Boshqaruv kadrlari va mutaxassislarni tayyorlash, qayta tayyorlash va ularning malakasini oshirishning samarali tizimini tashkil etish, shuningdek biznesni boshqarish, loyiha va korporativ boshqaruv sohasida fundamental va amaliy ilmiy tadqiqotlar olib borish Markazning asosiy maqsadi hisoblanadi”;

12-band quyidagi tahrirda bayon etilsin:

“12. Quyidagilar Markazning asosiy vazifalari va faoliyat yoʻnalishlari hisoblanadi:

korporativ boshqaruv sohasida, iqtisodiy rivojlangan mamlakatlarning yetakchi taʼlim muassasalari professor-oʻqituvchi kadrlarining keng ishtirokida boshqaruv kadrlari va mutaxassislarining malakasini oshirish, ularning menejment, marketing va biznesni boshqarishning zamonaviy usullarini egallashi boʻyicha maxsus qisqa muddatli dasturlarni amalga oshirish;

davlat organlari va boshqa tashkilotlar xodimlarini loyiha boshqaruvi masalalari boʻyicha oʻqitishni tashkil etish;

davlat organlari va boshqa tashkilotlar xodimlarini loyiha boshqaruvi va davlat xaridlari sohasidagi malakasini oshirish boʻyicha maxsus qisqa muddatli taʼlim dasturlarini ishlab chiqish;

loyiha boshqaruvi xalqaro standartlari asosida “Loyiha boshqaruvi” (“Project management”) mutaxassisligida magistratura taʼlim dasturlari boʻyicha yuqori malakali mutaxassislar tayyorlash;

“Biznesni boshqarish” (“Master of Business Administration — MVA”) mutaxassisligi boʻyicha iqtisodiy rivojlangan mamlakatlarda foydalaniladigan magistratura taʼlim dasturlari asosida biznesni boshqarish va korporativ boshqaruv sohasida yuqori malakali mutaxassislar tayyorlash;

loyiha boshqaruvi va davlat xaridlari sohasida kadrlar zaxirasini shakllantirish;

loyiha boshqaruvi va davlat xaridlari sohasida davlat organlari va boshqa tashkilotlar xodimlarini sertifikatlash tizimini ishlab chiqish va amalga joriy etish;

loyiha boshqaruvi va davlat xaridlarining xalqaro va milliy standartlari boʻyicha oʻquv qoʻllanmalar, maʼlumot beruvchi adabiyotlar va boshqa materiallar ishlab chiqish;

ilgʻor pedagogika va axborot-kommunikatsiya texnologiyalaridan keng foydalangan holda oʻquv jarayoniga boshqaruv kadrlari tayyorlashning zamonaviy xalqaro standartlari va usullarini joriy etish;

loyiha boshqaruvi va korporativ boshqaruv, menejment va davlat qurilishi sohasida ilgʻor xorijiy tajribani tizimli asosda chuqur oʻrganish, shuningdek mazkur sohada qonunchilikni takomillashtirish boʻyicha takliflar tayyorlash;

yetakchi xorijiy taʼlim muassasalari va kompaniyalar bilan mustahkam aloqalar oʻrnatish va hamkorlikni rivojlantirish, ular bilan loyiha boshqaruvi va korporativ boshqaruv sohasida boshqaruv kadrlari tayyorlash va ularning professional saviyasini oshirish boʻyicha oʻquv-metodik ishlarni yanada takomillashtirish yuzasidan qoʻshma hamkorlik dasturlarini amalga oshirish”;

13-bandda:

ikkinchi xatboshi “Vazirlar Mahkamasining” degan soʻzlardan oldin “Oʻzbekiston Respublikasi Prezidenti huzuridagi Loyiha boshqaruvi milliy agentligining” degan soʻzlar bilan toʻldirilsin;

yettinchi xatboshi “biznesni boshqarish” degan soʻzlardan keyin “loyiha” degan soʻz bilan toʻldirilsin;

sakkizinchi xatboshi “tuzilmalarning” degan soʻzdan keyin “loyiha boshqaruvi” degan soʻzlar bilan toʻldirilsin;

15-bandning birinchi xatboshisidagi “Oʻzbekiston Respublikasi Vazirlar Mahkamasining” degan soʻzlar “Markaz Vasiylik kengashining” degan soʻzlar bilan almashtirilsin;

19-bandda:

quyidagi mazmundagi ikkinchi xatboshi bilan toʻldirilsin:

“Markaz direktorini tayinlaydi va lavozimidan ozod qiladi, Markaz direktorining taqdimnomasiga muvofiq direktor oʻrinbosarlari nomzodlarini kelishadi”;

ikkinchi — oltinchi xatboshilar tegishincha uchinchi — yettinchi xatboshilar deb hisoblansin;

v) 2-ilovada:

2-band quyidagi tahrirda bayon etilsin:

“2. Markazga toʻlov-kontrakt asosida magistrlar qabul qilishning har yilgi kvotasi quyidagi miqdorda belgilanadi:

“Loyiha boshqaruvi” (“Project management”) mutaxassisligi boʻyicha — 40 kishi;

“Biznesni boshqarish” (“Master of Business Administration — MBA”) mutaxassisligi boʻyicha — 40 kishi”;

3-band quyidagi tahrirda bayon etilsin:

“3. Markaz oʻqitishni toʻlov-kontrakt asosida:

“Loyiha boshqaruvi” (“Project management”) mutaxassisligi boʻyicha magistraturaning bir yillik taʼlim dasturiga muvofiq;

“Biznesni boshqarish” (“Master of Business Administration — MBA”) mutaxassisligi boʻyicha magistraturaning ikki yillik taʼlim dasturiga muvofiq amalga oshiradi.

Oʻqitish yakuni boʻyicha davlat namunasidagi tegishli hujjatlar beriladi”;

4-banddagi “xoʻjalik boshqaruvi organlari va tadbirkorlik boshqa subyektlarining rahbar xodimlari hamda mutaxassislari” degan soʻzlar “davlat va xoʻjalik boshqaruvi organlari, mahalliy davlat hokimiyati organlari, boshqa tashkilotlarning rahbar xodimlari hamda mutaxassislari, shuningdek yakka tartibdagi tadbirkorlar” degan soʻzlar bilan almashtirilsin;

10-bandning ikkinchi xatboshisidagi “ijro etuvchi hokimiyat” degan soʻzlar “davlat hokimiyati” degan soʻzlar bilan almashtirilsin;

21-bandda:

quyidagi mazmundagi uchinchi xatboshi bilan toʻldirilsin:

“imtihonlarni muvaffaqiyatli topshirganda belgilangan namunadagi sertifikat bergan holda loyiha boshqaruvi va davlat xaridlari sohasida davlat organlari va boshqa tashkilotlarning xodimlarini tayyorlash, qayta tayyorlash va malakasini oshirish”;

uchinchi xatboshi toʻrtinchi xatboshi deb hisoblansin;

g) 3-ilovaning 3-bandi ikkinchi xatboshisidagi “biznesni boshqarish” degan soʻzlar “samarali davlat boshqaruvi va biznes maʼmuriyatchiligi, loyiha” degan soʻzlar bilan almashtirilsin.

(Qonun hujjatlari maʼlumotlari milliy bazasi, 15.05.2018-y., 07/18/3720/1218-son, 21.06.2018-y., 07/18/3794/1378-son; 06.12.2019-y., 07/19/4544/4111-son)