Qishloq va suv xoʻjaligini davlat tomonidan boshqarilishini maqbullashtirish va samaradorligini oshirish, masʼuliyat sohalarini aniq chegaralash va oydinlashtirish, ushbu sohada dolzarb va muayyan muammolarni hal etish uchun mavjud kuch va vositalar bilan oqilona taʼminlash maqsadida, shuningdek, Oʻzbekiston Respublikasida Maʼmuriy islohotlar konsepsiyasi bilan belgilangan vazifalarga muvofiq:

1. Maʼlumot uchun qabul qilinsinki, Oʻzbekiston Respublikasi Prezidentining 2018-yil 9-fevraldagi F-5208-sonli farmoyishi bilan tegishli respublika komissiyasi tuzilgan va suv xoʻjaligi tizimini isloh qilish hamda suv xoʻjaligi tarmogʻini boshqarishni takomillashtirishga oid asosiy yoʻnalishlar belgilab berilgan.

2. Oʻzbekiston Respublikasi Qishloq va suv xoʻjaligi vazirligi negizida:

Oʻzbekiston Respublikasi Qishloq xoʻjaligi vazirligi;

Oʻzbekiston Respublikasi Suv xoʻjaligi vazirligi tashkil etilsin.

3. Oʻzbekiston Respublikasida Maʼmuriy islohotlar konsepsiyasini amalga oshirish komissiyasi hamda Suv xoʻjaligi tizimini isloh qilish va suv xoʻjaligi tarmogʻini boshqarishni takomillashtirish boʻyicha takliflarni tayyorlash respublika komissiyasi (A.N. Aripov) bir oy muddatda qishloq va suv xoʻjaligini amaldagi boshqarish tizimini har tomonlama oʻrganish va kompleks tahlil etish natijalari asosida, shuningdek, ilgʻor xorijiy tajribani hisobga olgan holda Oʻzbekiston Respublikasi Qishloq xoʻjaligi vazirligi hamda Oʻzbekiston Respublikasi Suv xoʻjaligi vazirligi faoliyatini tashkil etish boʻyicha Oʻzbekiston Respublikasi Prezidenti qarorining loyihasini kiritsin.

4. Oʻzbekiston Respublikasi Vazirlar Mahkamasining ijro etuvchi tuzilmasidagi Oʻzbekiston Respublikasi Bosh vazirining oʻrinbosari — Oʻzbekiston Respublikasi qishloq va suv xoʻjaligi vaziri — Qishloq va suv xoʻjaligi, qishloq xoʻjaligi va oziq ovqat mahsulotlarini qayta ishlash masalalari kompleksi rahbari lavozimi tugatilsin.

5. Vazirlar Mahkamasi ijro etuvchi tuzilmasiga Oʻzbekiston Respublikasi Bosh vazirining oʻrinbosari — Qishloq va suv xoʻjaligi, qishloq xoʻjaligi va oziq-ovqat mahsulotlarini qayta ishlash masalalari kompleksi rahbari lavozimi kiritilsin.

6. Qishloq xoʻjaligi vazirligi, Suv xoʻjaligi vazirligi Adliya vazirligi bilan birgalikda ikki oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisi takliflarni Oʻzbekiston Respublikasi Vazirlar Mahkamasiga kiritsin

7. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.