Hujjat 09.03.2018 00 sanasi holatiga
Amaldagi versiyaga o‘tish
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Hukumatining ayrim qarorlariga oʻzgartirishlar va qoʻshimchalar kiritish, shuningdek, baʼzi qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “HunarmaNdchilikni yanada rivojlantirish va hunarmaNdlarni har tomonlama qoʻllab-quvvatlash chora-tadbirlari toʻgʻrisida” 2017-yil 17-noyabrdagi PF-5242-son Farmoni, “Oʻzbekiston Respublikasi Savdo-sanoat palatasi faoliyatini tashkil etishni takomillashtirish toʻgʻrisida” 2017-yil 19-iyundagi PQ-3068-son va ““HunarmaNd” uyushmasi faoliyatini yanada takomillashtirish chora-tadbirlari toʻgʻrisida” 2017-yil 17-noyabrdagi PQ-3393-son qarorlari)
Oʻzbekiston Respublikasi Prezidentining “Hunarmandchilikni yanada rivojlantirish va hunarmandlarni har tomonlama qoʻllab-quvvatlash chora-tadbirlari toʻgʻrisida” 2017-yil 17-noyabrdagi PF-5242-son Farmoni, shuningdek, “Oʻzbekiston Respublikasi Savdo-sanoat palatasi faoliyatini tashkil etishni takomillashtirish toʻgʻrisida” 2017-yil 19-iyundagi PQ-3068-son va ““Hunarmand” uyushmasi faoliyatini yanada takomillashtirish chora-tadbirlari toʻgʻrisida” 2017-yil 17-noyabrdagi PQ-3393-son qarorlari ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Hukumatining 1-ilovaga muvofiq ayrim qarorlariga oʻzgartirishlar va qoʻshimchalar kiritilsin.
2. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Moliya vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 7-mart,
186-son
Vazirlar Mahkamasining 2018-yil 7-martdagi 186-son qaroriga
1-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirishlar va qoʻshimchalar
1. Vazirlar Mahkamasining 2009-yil 8-apreldagi 102-son qarori bilan tasdiqlangan Davlat mulkini ijaraga berish toʻgʻrisidagi Nizomning (Oʻzbekiston Respublikasi QT, 2009-yil, 4-son, 26-modda) 10-bandiga quyidagi tahrirdagi ikkinchi xatboshi qoʻshilsin:
“Bunda, hunarmandlar uchun davlat mulki obyektlari uchun ijara toʻlovi belgilangan eng kam toʻlovning 50 foizi miqdorida belgilanadi”;
ikkinchi — toʻqqizinchi xatboshilar tegishli ravishda uchinchi — oʻninchi xatboshilar deb hisoblansin.
Keyingi tahrirga qarang.
2. Vazirlar Mahkamasining 2009-yil 29-iyuldagi 216-son qarori bilan tasdiqlangan Yuridik shaxs tashkil etmasdan oilaviy tadbirkorlikni va hunarmandchilik faoliyatini amalga oshirish tartibi toʻgʻrisidagi Nizomning (Oʻzbekiston Respublikasi QT, 2009-yil, 7-son, 58-modda):
a) 6-bandidagi “ushbu Nizomga ilovaga muvofiq” soʻzlari “Oʻzbekiston Respublikasi Prezidentining “Hunarmandchilikni yanada rivojlantirish va hunarmandlarni har tomonlama qoʻllab-quvvatlash chora-tadbirlari toʻgʻrisida” 2017-yil 17-noyabrdagi PF-5242-son Farmoniga 1-ilovaga muvofiq” soʻzlari bilan almashtirilsin.
b) 9-bandiga quyidagi mazmundagi xatboshi qoʻshilsin:
“Bunda, “Usta-shogird” maktabi oʻquvchisi sifatidagi ish davri 25 yoshga yetgunga qadar eng kam oylik ish haqining kamida 2,5 barobari miqdorida sugʻurta toʻlovi toʻlangan taqdirda mehnat stajiga qoʻshiladi”;
v) 16-bandiga quyidagi mazmundagi xatboshi qoʻshilsin:
“Hunarmandchilik subyektlari — “Hunarmand” uyushmasining aʼzolari:
hunarmandchilik faoliyati mahsulotlari (tovar, ish, xizmatlar)ni ishlab chiqarish va sotishda qatʼiy belgilangan soliqdan ozod etiladi;
yoshga doir pensiya va nafaqa oluvchilar Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga sugʻurta badali toʻlovidan ozod etiladi;
qishloq joylarda roʻyxatdan oʻtgan va faoliyatini amalga oshirayotgan hunarmandlar oʻz faoliyatining dastlabki ikki yili mobaynida Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga belgilangan sugʻurta badalining 50 foizini toʻlaydi”.
g) ilova oʻz kuchini yoʻqotgan deb hisoblansin.
3. Vazirlar Mahkamasining “Davlat mulki obyektlarini xususiylashtirish tartibi toʻgʻrisidagi nizomlarni tasdiqlash haqida” 2014-yil 6-oktabrdagi 279-son qarorida (Oʻzbekiston Respublikasi QHT, 2014-yil, 41-son, 506-modda):
a) Davlat koʻchmas mulk obyektlarini sotish tartibi toʻgʻrisidagi Nizomga quyidagi mazmundagi III2-boʻlim qoʻshilsin:
“III2. Hunarmandlar tomonidan davlat koʻchmas mulk obyektini sotib olish
293. Davlat koʻchmas mulk obyektlari xususiylashtirish dasturi doirasida hunarmandlarga baholangan qiymatda ochiq savdolarga qoʻyilmasdan toʻgʻridan-toʻgʻri oldi-sotdi shartnomasi tuzish asosida sotiladi.
Bunda, davlat koʻchmas mulk obyekti hunarmandga kamida 5 yil mobaynida faqat hunarmandchilik faoliyatini amalga oshirish uchun hunarmandning koʻchmas mulk obyektini xususiylashtirish boʻyicha buyurtmanomasi va “Hunarmand” uyushmasining iltimosnomasiga asosan, davlat koʻchmas mulk obyektini sotuvga qoʻyish toʻgʻrisidagi eʼlon ommaviy axborot vositalarida berilishi mobaynida belgilangan tartibda sotilishi mumkin.
294. Bir nechta hunarmandlar bir koʻchmas mulk obyektga ega boʻlish istagini bildirgan taqdirda, bu obyekt ushbu hunarmandlar ishtirokidagi ochiq savdolar orqali belgilangan tartibda sotiladi. Savdolar ushbu Nizomda belgilangan tartibga asosan oʻtkaziladi.
295. Koʻchmas mulk obyektini xususiylashtirish toʻgʻrisidagi ariza boʻlmasa yoki hunarmandning davlat koʻchmas mulk obyektini oldi-sotdi shartnomasini tuzishni rad etsa, ushbu obyekt tanlov oʻtkazish yoʻli bilan belgilangan tartibda sotiladi.”;
b) Davlat mulki obyektlarini xaridor tomonidan investitsiyaviy va ijtimoiy majburiyatlar qabul qilinishi sharti bilan “nul” xarid qiymati boʻyicha sotish tartibi toʻgʻrisida Nizomga quyidagi mazmundagi VI1 boʻlim qoʻshilsin:
“VI1. Davlat koʻchmas mulk obyektini hunarmandlarga “nul” xarid qiymati boʻyicha sotish
391.Xususiylashtirish dasturi doirasida “nul” xarid qiymati boʻyicha sotiladigan davlat mulki obyekti hunarmandlarga dastlabki investitsiyaviy majburiyatlarni bajarish sharti bilan toʻgʻridan-toʻgʻri muzokaralar oʻtkazish orqali sotiladi.
Bunda, “nul” xarid qiymati boʻyicha sotiladigan davlat mulki obyekti hunarmandga kamida 5 yil mobaynida faqat hunarmandchilik faoliyatini amalga oshirish uchun hunarmandning davlat mulki obyektini xususiylashtirish boʻyicha buyurtmanomasi va “Hunarmand” uyushmasining iltimosnomasiga asosan, “nul” xarid qiymati boʻyicha sotiladigan davlat mulki obyektini sotuvga qoʻyish toʻgʻrisidagi eʼlon ommaviy axborot vositalarida berilishi mobaynida belgilangan tartibda sotilishi mumkin.
392. Bir nechta hunarmandlar “nul” xarid qiymati boʻyicha sotiladigan bitta davlat mulki obyektga ega boʻlish istagini bildirgan taqdirda, bu obyekt ushbu hunarmandlar ishtirokidagi ochiq savdolar orqali belgilangan tartibda sotiladi. Savdolar ushbu Nizomda belgilangan tartibga asosan oʻtkaziladi.
393. Obyektini xususiylashtirish toʻgʻrisidagi ariza boʻlmasa yoki hunarmandning “nul” xarid qiymati boʻyicha sotiladigan davlat mulki obyektini oldi-sotdi shartnomasini tuzishni rad etsa, ushbu obyekt tanlov oʻtkazish yoʻli bilan belgilangan tartibda sotiladi.”.
Vazirlar Mahkamasining 2018-yil 7-martdagi 186-son qaroriga
2-ILOVA
Oʻzbekiston Respublikasi Hukumatining oʻz kuchini yoʻqotgan deb hisoblanayotgan ayrim qarorlari
ROʻYXATI
1. Vazirlar Mahkamasining “Hunarmand” xalq hunarmandlari uyushmasini tashkil etish va uning faoliyati masalalari” toʻgʻrisida 1997-yil 4-iyundagi 282-son qarori.
2. Vazirlar Mahkamasining “Musavvir” ilmiy-ishlab chiqarish markazi toʻgʻrisidagi Nizomni tasdiqlash haqida” 1997-yil 10-iyuldagi 346-son qarori.
3. Vazirlar Mahkamasining “Oʻzbekiston Savdo-sanoat palatasi faoliyatini tashkil etishni taʼminlash chora-tadbirlari toʻgʻrisida” 2004-yil 22-sentabrdagi 441-son qarori.
4. Vazirlar Mahkamasining “Oʻzbekiston Respublikasining xoʻjalik yurituvchi subyektlari tomonidan xorijiy mamlakatlardagi ular tashkil etgan savdo uylari, vakolatxonalar, korxonalar orqali, shuningdek Oʻzbekiston Respublikasi Savdo-sanoat Palatasining xorijiy mamlakatlaridagi savdo-investitsiya uylari orqali olib chiqilayotgan tovarlarni bojxonada rasmiylashtirish tartibi toʻgʻrisidagi Nizomni tasdiqlash haqida” 2005-yil 9-avgustdagi 189-son qaroriga 2-ilovaning 3-bandi (Oʻzbekiston Respublikasi QT, 2005-yil 8-son, 40-modda).
5. Vazirlar Mahkamasining “Oʻzbekiston Respublikasi Hususiylashtirilgan korxonalarga koʻmaklashish va raqobatni rivojlantirish Davlat qoʻmitasi huzuridagi xususiylashtirilgan korxonalarga koʻmaklashish jamgʻarmasi mablagʻlarini shakllantirish, taqsimlash va ulardan foydalanish tartibi toʻgʻrisidagi nizomni tasdiqlash haqida” 2017-yil 19-iyundagi 391-son qaroriga 2-ilovaning 5-bandi (Oʻzbekiston Respublikasi QT, 2017-y., 6-son, 106-modda).
(Qonun hujjatlari maʼlumotlari milliy bazasi, 09.03.2018-y., 09/18/186/0865-son; 15.12.2023-y., 09/23/660/0938-son)