Hujjat 13.02.2001 00 sanasi holatiga
Amaldagi versiyaga o‘tish
Oʻzbekiston Respublikasi Vazirlar Mahkamasining
qarori
UY-JOY MULKDORLARI ShIRKATINING NAMUNAVIY USTAVINI VA UY-JOYLARNI UY-JOY MULKDORLARI ShIRKATI BOShQARUVIGA BERISh VA UY-JOY FONDINI SAQLASh VA TUZATISh MASALALARIDA DAVLAT HOKIMIYATI ORGANLARI BILAN OʻZARO HAMKORLIK QILISh TARTIBI TOʻGʻRISIDAGI NAMUNAVIY NIZOMNI TASDIQLASh HAQIDA
Keyingi tahrirga qarang.
“Uy-joy mulkdorlarining shirkatlari toʻgʻrisida”gi Oʻzbekiston Respublikasi Qonunining 5-moddasiga va Oʻzbekiston Respublikasi Vazirlar Mahkamasining “Aholiga kommunal xizmat koʻrsatish tizimida iqtisodiy islohotlarni chuqurlashtirish konsepsiyasini tasdiqlash toʻgʻrisida” 1998-yil 3-noyabrdagi 461-son qaroriga muvofiq Vazirlar Mahkamasi qaror qiladi:
1. Quyidagilar:
— Uy-joy mulkdorlari shirkatining Namunaviy ustavi 1-ilovaga muvofiq;
Keyingi tahrirga qarang.
— Uy-joylarni uy-joy mulkdorlari shirkati boshqaruviga berish va uy-joy fondini saqlash va tuzatish masalalarida davlat hokimiyati organlari bilan oʻzaro hamkorlik qilish tartibi toʻgʻrisidagi Namunaviy nizom 2-ilovaga muvofiq tasdiqlansin.
Keyingi tahrirga qarang.
Oldingi tahrirga qarang.
2. Oʻzbekiston “Oʻzkommunxizmat” agentligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda uy-joy mulkdorlari shirkatlarini tegishli normativ hujjatlar bilan taʼminlashda hamda ularning huquqiy hujjatlari toʻgʻri rasmiylashtirilishida zarur yordam koʻrsatsin.
Keyingi tahrirga qarang.
(2-band Oʻzbekiston Respublikasi Vazirlar Mahkamasining 2001-yil 13-fevraldagi 74-son qarori tahririda — OʻR QHT, 2001-y., 3-4-son, 13-modda)
3. Moliya vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda har yili budjetni shakllantirishda uy-joylarning umumiy foydalaniladigan joylarini va muhandislik kommunikatsiyalarini mukammal tuzatish uchun uy-joy mulkdorlari shirkatlariga qonun hujjatlarida belgilangan tartibda moliyaviy mablagʻlar ajratilishini nazarda tutsin.
Keyingi tahrirga qarang.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B. S. Hamidov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1999-yil 4-oktabr,
454-son
Vazirlar Mahkamasining 1999-yil
4-oktabrdagi 454-son qaroriga
1-ILOVA
Uy-joy mulkdorlari shirkatining
NAMUNAVIY USTAVI
Ushbu Ustav uy-joy mulkdorlari shirkatlari ustavlarining namunaviy qoidalaridan iboratdir.
Uy-joy mulkdorlari shirkatining (bundan keyin matnda “Shirkat” deb yuritiladi) Ustavi uy-joy mulkdorlarining tashabbuskor guruhi tomonidan chaqirilgan Shirkatning taʼsis majlisida qabul qilinadi. Ustavni tasdiqlash Shirkatning taʼsis majlisi protokolida qayd etiladi, protokolni majlis raisi imzolaydi.
Uy-joy mulkdorlarining shirkati bitta uyda yoki yaqin, zich joylashgan, umumiy yer uchastkasi va infratuzilma elementlari bir boʻlgan bir necha uyda yoxud uyning boshqa qismlaridan alohida kirish joyi boʻlgan, kamida bitta blok-seksiya hajmidagi mustaqil qismida turar joy mulkdorlaridan kamida yarmining xohishiga koʻra tuziladi.
1. ShIRKATNING NOMI VA JOYLAShGAN OʻRNI
1.1. Shirkat oʻz nomiga ega boʻlishi kerak, uning nomida shuningdek Shirkatning tashkiliy-huquqiy shakli va faoliyat turi (“Uy-joy mulkdorlarining shirkati”) koʻrsatilgan boʻladi.
1.2. Shirkatning joylashgan oʻrni uni davlat roʻyxatidan oʻtkazgan joy tomonidan belgilanadi. Shirkat pochta manziliga ega boʻlishi kerak, Shirkatning hududidagi obodonlashtirilgan turar joy boʻlmagan uylar bilan aloqasi shu manzil boʻyicha amalga oshiriladi.
2. ShIRKAT FAOLIYATINING MAQSADI VA PREDMETI
2.1. Birgalikdagi boshqaruv bilan uydan foydalanishni, saqlashni taʼminlash, uydan umumiy foydalanish obyektlariga egalik qilish va ulardan foydalanish shartlarini, tartibini belgilash, umumiy boʻlgan mol-mulkni zarur sanitariya, yongʻindan saqlash va texnik holatda saqlashni taʼminlash Shirkatni tuzishning maqsadi hisoblanadi.
2.2. Quyidagilar Shirkat faoliyatining predmeti hisoblanadi:
uy-joy fondiga xizmat koʻrsatish va uni taʼmirlashni taʼminlash;
uy-joy mulkdorlarini, shuningdek uy-joylarni yollovchilarni va ijarachilarni kommunal xizmatlar bilan taʼminlash;
uy-joy mulkdorlari va ularning oila aʼzolari, shuningdek, yollovchilar va ijarachilar tomonidan uy-joylardan, umumiy foydalaniladigan joylar va uylar atrofidagi hududdan foydalanish qoidalariga rioya qilinishini taʼminlash;
uylar, binolar va inshootlardan foydalanish, ularni taʼmirlash, yoniga qoʻshimcha qurish va rekonstruksiya qilish boʻyicha ishlar yuzasidan buyurtmachi rolini bajarish;
uylar yonidagi hududni obodonlashtirish va koʻkalamzorlashtirish boʻyicha tadbirlarni amalga oshirish;
joylardagi davlat hokimiyati organlarida, fuqarolarning oʻzini oʻzi boshqarish organlarida, sudlarda, shuningdek, boshqa yuridik shaxslar va fuqarolar bilan oʻzaro munosabatlarda uy-joy mulkdorlarining umumiy manfaatlarini ifodalash;
uy-joy mulkdorlarining huquq va manfaatlarini himoya qilish;
qonun hujjatlariga va ustavga muvofiq boshqa faoliyatni amalga oshirish.
3. ShIRKATNING HUQUQIY MAQOMI
3.1. Shirkat Oʻzbekiston Respublikasining qonun hujjatlariga, shuningdek ushbu Ustavga muvofiq tuzilgan va faoliyat koʻrsatadigan notijorat tashkilot hisoblanadi.
3.2. Shirkat yuridik shaxs hisoblanadi, oʻz nomi yozilgan shtampga, muhrga va blanklarga, shuningdek, bank hisob raqamlariga ega boʻladi.
3.3. Shirkat alohida mol-mulkka ega boʻladi va oʻz majburiyatlari boʻyicha ushbu mol-mulk bilan javob beradi, oʻz nomidan mulkiy va shaxsiy nomulkiy huquqlarni amalga oshiradi, majburiyatlar oladi hamda sudda, xoʻjalik sudida va xolis hakamlar sudida daʼvogar va javobgar boʻladi.
Shirkat oʻz aʼzolari majburiyatlari boʻyicha javob bermaydi. Shirkat aʼzolari Shirkat majburiyatlari boʻyicha javob bermaydi.
3.4. Shirkat quyidagi huquqlarga ega:
3.4.1. Umumiy mol-mulkni, shuningdek Shirkat mulki boʻlgan uylarni boshqarish va/yoki ularga xizmat koʻrsatish va ulardan foydalanish yuzasidan istalgan jismoniy shaxs bilan yoki istalgan mulkchilik shaklidagi tashkilot bilan faoliyatning tegishli turi boʻyicha shartnoma tuzish.
3.4.2. Shirkat ehtiyojlari uchun taʼmirlash-foydalanish ishlarini mustaqil ravishda amalga oshirish.
3.4.3. Shirkatning yillik daromadlari va xarajatlari, shu jumladan, umumiy mol-mulkdan foydalanish va ularni taʼmirlash boʻyicha zarur xarajatlar, shuningdek, qonun hujjatlarida hamda Shirkat Ustavida belgilangan boshqa maqsadlarga xarajatlar smetasini belgilash.
3.4.4. Qabul qilingan yillik daromadlar va xarajatlar smetasi asosida har bir mulkdor uchun uyning umumiy maydonida unga tegishli boʻlgan maydonga muvofiq, foydalanish xarajatlari boʻyicha toʻlovlar miqdorlarini belgilash.
Yillik daromadlar va xarajatlar smetasi umumiy majlis tomonidan qabul qilingandan va tasdiqlangandan keyin Shirkatning har bir aʼzosi tomonidan foydalanish xarajatlarini toʻlash majburiydir.
3.4.5. Shirkat aʼzolari uchun ishlarni bajarish va ularga xizmat koʻrsatish.
3.4.6. Amaldagi qonun hujjatlarida nazarda tutilgan tartibda va shartlarda banklar kreditlaridan foydalanish.
3.4.7. Mulkdorlarning qonun bilan himoyalanadigan huquq va manfaatlariga xilof boʻlmagan hollarda umumiy mol-mulk obyektlarini foydalanishga yoki cheklangan foydalanishga (servitutga) berish.
3.4.8. Shirkatdagi uyga egalik qilish.
3.4.9. Shirkat Ustavida nazarda tutilgan maqsadlarga sarflanadigan maxsus jamgʻarmalar tashkil etish.
3.4.10. Qonun hujjatlariga va Shirkat Ustaviga muvofiq xoʻjalik faoliyati bilan shugʻullanish.
3.4.11. Shirkatning umumiy mol-mulk obyektlarini shaharsozlik norma va qoidalariga muvofiq belgilangan tartibda rekonstruksiya qilish.
3.4.12. Ajratilgan yer uchastkalarida shaharsozlik norma va qoidalariga muvofiq qurilishni amalga oshirish.
3.4.13. Asbob-uskunalarni, jihozlarni va boshqa moddiy boyliklarni sotib olish, sotish va berish, almashtirish, ijaraga berish, shuningdek, agar ular ishdan chiqqan yoki maʼnaviy eskirgan boʻlsa ularni qonun hujjatlarida belgilangan tartibda hisobdan chiqarish.
3.4.14. Oʻz faoliyati maqsadlariga muvofiq jismoniy va yuridik (shu jumladan, xorijiy jismoniy va yuridik) shaxslar bilan shartnomalar, kontraktlar, bitimlar tuzish; shartnomalar boʻyicha qabul qilingan majburiyatlarni bajarish.
3.4.15. Shirkatning maqsadi va vazifalariga javob beradigan boshqa harakatlarni amalga oshirish hamda bitishuvlar tuzish.
3.5. Shirkat quyidagilarga majbur:
3.5.1. Qonun va meʼyoriy hujjatlar, shuningdek ushbu Ustav talablarining bajarilishini taʼminlash.
3.5.2. Shartnoma majburiyatlarini amaldagi qonun hujjatlarida nazarda tutilgan tartibda bajarish.
3.5.3. Uy-joylarning va uylar yonidagi hududlarning zarur sanitariya-texnikaviy holatda saqlanishini taʼminlash.
3.5.4. Uy-joy fondidan texnikaviy foydalanishning yagona qoida va normalariga rioya etgan holda uy-joylarga xizmat koʻrsatish va ularni taʼmirlashni tashkil qilish.
3.5.5. Shirkatning barcha aʼzolari tomonidan uy-joylardan foydalanish, ularni va uylar yonidagi hududlarni saqlash qoidalari bajarilishini taʼminlash.
3.5.6. Agar Shirkat aʼzolari kommunal xizmatlar haqini Shirkat hisob raqamlari orqali toʻlashsa, koʻrsatiladigan kommunal xizmatlar hamda umumiy mol-mulkni saqlash va taʼmirlash boʻyicha foydalanish xarajatlari uchun majburiy toʻlovlarning oʻzining bank hisob raqamiga oʻz vaqtida tushishini taʼminlash.
3.5.7. Shirkatning yillik daromadlar va xarajatlar smetasini belgilash.
3.5.8. Umumiy mol-mulkka egalik qilish va ulardan foydalanish shartlari va tartibini belgilashda Shirkatning barcha aʼzolari manfaatlariga rioya qilinishini taʼminlash.
3.5.9. Shirkat aʼzolarining uy-joy munosabatlaridagi, shuningdek, Shirkat aʼzolarining uchinchi shaxslar bilan boshqa munosabatlaridagi manfaatlarini qonun hujjatlarida nazarda tutilgan tartibda ifodalash.
3.5.10. Shirkat qonun hujjatlarida nazarda tutilgan boshqa majburiyatlarni bajarishi mumkin.
4. ShIRKATGA AʼZOLIK. ShIRKAT AʼZOLARINING HUQUQ VA MAJBURIYATLARI
4.1. Jismoniy va yuridik shaxslar — uy-joylar mulkdorlari Shirkat aʼzolari hisoblanadilar.
4.2. Uy-joy umumiy mulk huquqi bilan bir nechta mulkdorga tegishli boʻlsa, u holda ular Shirkat bir aʼzosining huquq va majburiyatlariga ega boʻladilar.
4.3. Uy-joy mulkdorlarida Shirkatga aʼzolik Shirkat joylardagi davlat hokimiyati organlarida belgilangan tartibda davlat roʻyxatidan oʻtkazilgan vaqtdan boshlab paydo boʻladi.
4.4. Shirkatning balogʻatga yetmagan aʼzolari manfaatlarini ularning ota-onalari, vasiylari yoki homiylari ifodalaydilar. Qonun hujjatlarida nazarda tutilgan hollarda Shirkatning balogʻatga yetmagan aʼzolari nomidan xatti-harakatlar vasiy yoki homiy organlar roziligi bilan amalga oshiriladi.
4.5. Shirkatning majburiyatini muntazam ravishda bajarmayotgan yoki zarur darajada bajarmayotgan yoxud oʻz xatti-harakatlari bilan Shirkat maqsadlariga erishishga toʻsqinlik qilayotgan aʼzosi qonun hujjatlarida belgilangan tartibda javobgarlikka tortilishi yoki Shirkat aʼzolari umumiy majlisining ovozlarning uchdan ikki qismi bilan qabul qilingan qaroriga binoan Shirkatdan chiqarilishi mumkin.
4.6. Fuqaroning vafoti, yuridik shaxsning tugatilishi, mol-mulkning begonalashtirilishi munosabati bilan yoki boshqa asoslarga koʻra 4.1-bandda koʻrsatilgan mol-mulkka Shirkat aʼzosining egalik qilish huquqi toʻxtatilgan vaqtdan boshlab Shirkatga aʼzolik toʻxtatiladi.
4.7. Yuridik shaxs — Shirkat aʼzosi qayta tashkil etilganda yoxud fuqaro — Shirkat aʼzosi vafot etganda huquqiy vorislar (merosxoʻrlar) uy-joyga egalik qilish huquqi paydo boʻlgan vaqtdan boshlab Shirkatga kiradilar.
4.8. Shirkat aʼzosidan uy-joyni yangi sotib olgan xaridor uy-joyga egalik qilish huquqi paydo boʻlgan vaqtdan boshlab Shirkat aʼzosi boʻladi va Ustavda belgilangan, Shirkat aʼzosidan oʻziga oʻtgan huquq va majburiyatlarga ega boʻladi.
4.9. Shirkat aʼzosi quyidagi huquqlarga ega:
oʻz mulkini Shirkatning boshqa aʼzolari bilan kelishmasdan mustaqil ravishda tasarruf etish;
Shirkat faoliyatida ham shaxsan, ham oʻz vakili orqali qatnashish, shuningdek Shirkatning boshqaruv organlariga saylash va saylanish;
Shirkat faoliyatini takomillashtirish, uning organlari ishidagi kamchiliklarni bartaraf etish boʻyicha takliflar kiritish;
uy-joyni yollovchiga yoki ijarachiga ovoz huquqini, shuningdek uy-joyga egalik qilish va undan foydalanish huquqi bilan bogʻliq huquq va majburiyatlarni berish, bundan Shirkat Ustaviga oʻzgartirish va qoʻshimchalar kiritish masalalari boʻyicha ovoz berish huquqi mustasno. Uy-joyni yollovchi yoki ijaraga oluvchi tomonidan Shirkat aʼzosi majburiyatlari bajarilmagan yoki zarur darajada bajarilmagan taqdirda Shirkat oldida uy-joyning mulkdori javob beradi;
umumiy mulkka yetkaziladigan zararning oldini olish munosabati bilan qilingan xarajatlarni Shirkat mablagʻlari hisobidan undirish;
Shirkat faoliyati, uning mol-mulki va qilingan xarajatlari toʻgʻrisida maʼlumotlar olish;
kommunal xizmatlar haqini hamda koʻchmas mulk uchun qonunda belgilangan soliqlarni Shirkatning hisob raqami orqali toʻlash, agar bunday qaror Shirkat aʼzolarining umumiy majlisida qabul qilingan boʻlsa.
4.10. Shirkat aʼzosi amaldagi qonun hujjatlarida va ushbu Ustavda nazarda tutilgan boshqa huquqlarga ham egadir.
4.11. Shirkat aʼzosi quyidagilarga majbur:
4.11.1. Ushbu Ustav, Shirkat aʼzolari Umumiy majlisining va Shirkat Boshqaruvining talablarini bajarish.
4.11.2. Uy-joydan belgilangan maqsadda foydalanish.
4.11.3. Uy-joylarni va uylar yonidagi hududni saqlashning texnik, yongʻindan saqlash hamda sanitariya qoidalari va normalariga rioya qilish.
4.11.4. Uyning umumiy maydonidagi oʻziga tegishli kvartira maydoni ulushiga mutanosib ravishda umumiy mol-mulkni saqlash va taʼmirlash boʻyicha sarf-xarajatlarda qatnashish hamda xarajatlarni qoplash uchun zarur boʻlgan badallarni, shuningdek kommunal xizmatlar haqini oʻz vaqtida toʻlash.
4.11.5. Oʻzining mulki boʻlgan uy-joyni zarur holatda saqlash va uni joriy taʼmirlashni oʻz hisobidan amalga oshirish.
4.11.6. Umumiy mulk obyektlaridan faqat belgilangan maqsadda, ushbu obyektlardan foydalanish boʻyicha boshqa mulkdorlarning huquq va manfaatlarini buzmasdan foydalanish.
4.11.7. Umumiy mulk obyektlarini tiklash zarur boʻlganda yoki Shirkat aʼzolarining koʻchmas mulkiga yetkazilishi mumkin boʻlgan zararning oldini olish uchun uy-joyning qismlariga bemalol kirishni taʼminlash.
5. ShIRKATNING UMUMIY MOL-MULKI
5.1. Mulkdorlar umumiy mol-mulkka egalik qiladilar, undan foydalanadilar va uni qonun hujjatlarida belgilangan doirada tasarruf etadilar.
5.2. Uy-joyning bittadan ortiq mulkdorlarga xizmat koʻrsatuvchi umumiy uylari, kvartiralararo zinapoya toʻsiqlari, zinapoyalar, liftlar, lift shaxtalari va boshqa shaxtalar, yoʻlaklar, tomlar, texnik qavatlar, toʻsuvchi asosiy konstruksiyalar, shuningdek, binoning mexanik, elektr, santexnika va kvartiralar tashqarisida yoki ichida joylashgan hamda bittadan ortiq kvartiraga xizmat koʻrsatuvchi boshqa muhandislik asbob-uskunalari, uylar yonidagi koʻkalamzorlashtirish va obodonlashtirish elementlariga ega boʻlgan yer uchastkalari, shuningdek Shirkatning koʻchmas mulki yagona majmuiga xizmat koʻrsatishga va uni saqlashga moʻljallangan boshqa mol-mulklar Shirkatning umumiy mol-mulklari hisoblanadi.
5.3. Shirkatning umumiy mol-mulki koʻp kvartirali uydagi kvartiralar mulkdorlarining ulushli mulkida boʻladi, umumiy foydalanishdagi yer uchastkalari bundan mustasno.
5.4. Shirkatning umumiy mol-mulki Shirkat aʼzosining kvartiraga mulkiy huquqidan alohida holda begonalashtirilmaydi.
5.5. Umumiy mol-mulkning ayrim obyektlari Shirkat aʼzolari umumiy majlisining uning aʼzolari ovozlari umumiy sonining toʻrtdan uch qismi bilan qabul qilingan qarori asosida boshqa shaxslarga foydalanish uchun berilishi mumkin, bunda ular tomonidan ushbu mol-mulkdan foydalanish uy-joylar mulkdorlarining huquqlarini va qonun bilan himoyalanadigan manfaatlarini buzish bilan bogʻliq boʻlmasligi kerak.
Kvartiralararo zinapoya toʻsiqlari, zinapoyalar, liftlar, lift shaxtalari va boshqa shaxtalar, yoʻlaklar, texnik qavatlar, asosiy va yordamchi toʻsiq konstruksiyalari, mexanik, elektr, santexnika hamda kvartiralar tashqarisida yoki ichida boʻlgan va bittadan ortiq mulkdorga xizmat koʻrsatuvchi muhandislik asbob-uskunalari, shuningdek, kirib kelish yoʻllarining, piyodalar yoʻlkalarining barcha uchastkalari, umumiy foydalaniladigan boshqa joylar (boʻlinmaydigan, begonalashtirilmaydigan mol-mulklar) begonalashtirilmaydi va foydalanishga berilmaydi.
5.6. Har bir mulkdor uchun Shirkatning umumiy mulki huquqidagi boʻlinmaydigan (begonalashtirilmaydigan) umumiy koʻchmas mulk ulushi Shirkatdagi unga tegishli uylar ulushiga mutanosibdir, u tomonlarning bitishuviga koʻra umumiy maydonning kvadrat metrlari hisobida yoxud boshqacha shaklda belgilanishi mumkin.
Mulkdorlarning umumiy koʻchmas mulkning boʻlinadigan (begonalashtiriladigan) qismidagi ulushini belgilash va oʻzgartirish tartibi tomonlarning bitishuviga koʻra, tomonlardan har birining ushbu mulkning paydo boʻlishidagi va koʻpayishidagi hissasiga qarab yoxud fuqarolik qonun hujjatlari normalari bilan belgilangan boshqacha tartibda belgilanadi.
5.7. Qonunda nazarda tutilgan asoslar boʻyicha Shirkat tomonidan sotib olingan barcha mulklar Shirkat aʼzolarining umumiy mulkida turuvchi mulklar hisoblanadi.
5.8. Shirkatning har bir aʼzosi yoki uning mulkida boʻlgan kvartirani sotuvchi vakili kvartirani sotib oluvchini sotuvchi Shirkat aʼzosi ekanligi hamda Ustavda belgilangan, tegishli ravishda sotib oluvchiga oʻtadigan huquq va majburiyatlarga tegishli ravishda ega boʻlishi haqida xabardor qilishga majburdir.
5.9. Shirkatdagi uy-joylar mulkdorlari umumiy mol-mulkni saqlash va taʼmirlash xarajatlarini uyning umumiy maydonidagi oʻziga tegishli kvartira maydoni ulushiga mutanosib ravishda toʻlaydilar.
5.10. Mulkdorning oʻziga tegishli uy-joydan foydalanmasligi yoxud umumiy mol-mulkdan foydalanishni rad etishi uy-joy mulkdorini umumiy mol-mulkni saqlash va taʼmirlash umumiy xarajatlarida qatnashishdan toʻliq yoki qisman ozod qilish uchun asos hisoblanmaydi.
6. ShIRKAT MABLAGʻLARINI VA JAMGʻARMALARINI TAShKIL ETISh HAMDA ULARDAN FOYDALANISh, ShIRKAT AʼZOLARINING UMUMIY MOL-MULKNI SAQLASh VA TAʼMIRLASh XARAJATLARINI MABLAGʻ BILAN TAʼMINLAShDA QATNAShIShI
6.1. Shirkat mablagʻlari:
Shirkat aʼzolarining ixtiyoriy badallaridan;
xoʻjalik faoliyati daromadlaridan;
qonun hujjatlariga muvofiq boshqa tushumlardan iborat boʻladi.
6.2. Shirkat umumiy majlis qaroriga koʻra Shirkat Ustavida nazarda tutilgan vazifalarga muvofiq maqsadlarga sarflanadigan maxsus jamgʻarmalar tashkil etishi mumkin. Maxsus jamgʻarmalar tashkil etish tartibini umumiy majlis belgilaydi.
6.3. Uy-joyning mulkdorlari (yollovchilari) va ijarachilari suv, issiqlik, gaz, elektr, issiq suv taʼminoti, kanalizatsiya hamda oʻzlariga koʻrsatilgan boshqa kommunal xizmatlar boʻyicha xarajatlarni toʻlaydilar. Toʻlov yakka tartibdagi hisoblagichlar boʻyicha ham, Shirkat aʼzolarining oʻzaro kelishuviga koʻra jamoa boʻlib foydalaniladigan hisoblagichlar boʻyicha ham yoki belgilangan norma boʻyicha amalga oshirilishi mumkin.
6.4. Kommunal xizmatlar uchun toʻlov ham Shirkatning hisob raqami orqali, ham bevosita xizmat koʻrsatuvchi tashkilotlar hisob raqami orqali, uy-joy mulkdorining qaroriga koʻra amalga oshiriladi.
6.5. Shirkat aʼzolari hisoblanadigan uy-joyning mulkdorlari va yollovchilari uy-joyni (kvartirani) saqlash hamda taʼmirlashga doir foydalanish xarajatlari toʻlovi boʻyicha imtiyozlardan Oʻzbekiston Respublikasi Vazirlar Mahkamasi tomonidan belgilangan tartibda foydalanadilar.
6.6. Umumiy majlis har yili Shirkat daromadlari va xarajatlarini tasdiqlayotganda Shirkat har bir aʼzosining xarajatlarga va maxsus yigʻimlarga nisbatan majburiyatini aniqlaydi hamda ularni undirish vaqtini va tartibotini belgilaydi.
6.7. Umumiy mol-mulkni saqlash va taʼmirlash xarajatlari Shirkat aʼzolari tomonidan har oyda, oʻtgan oydan keyingi oyning 10-kunidan kechikmay toʻlanadi hamda uy-joyni, uy yonidagi hududni va Shirkat aʼzolarining umumiy mulki boʻlgan obyektlarni boshqarish, saqlash, taʼmirlash va ulardan foydalanishga sarflanadi.
Shirkatning umumiy mol-mulkini saqlash va taʼmirlash boʻyicha foydalanish xarajatlariga quyidagilar kiradi:
uy xoʻjaligini saqlash xarajatlari;
xizmat koʻrsatuvchi xodimlarni taʼminlash xarajatlari;
umumiy foydalaniladigan joylarni joriy taʼmirlash;
mashinalar, asbob-uskunalar, jihozlar va boshqa mol-mulklarni toʻliq tiklashga amortizatsiya ajratmalari;
toʻliq taʼmirlash;
boshqaruv apparatini saqlash xarajatlari.
Shirkatning joriy xarajatlari bilan bogʻliq toʻlovlar Shirkat aʼzolarining umumiy majlisi tasdiqlagan daromadlar va xarajatlar smetasiga muvofiq amalga oshiriladi. Joriy xarajatlarning rejalashtirilgan miqdori Shirkat Boshqaruvining roziligi bilan yoxud Shirkat aʼzolari umumiy majlisining tegishli qarori mavjud boʻlganda koʻpaytirilishi mumkin.
6.8. Shirkat aʼzosi uy-joydan uzoq vaqt foydalanmaganligi sababli majburiy toʻlovlarni toʻlashni rad etishi, shuningdek, umumiy mulkning ayrim obyektlaridan foydalanishni (umumiy foydalaniladigan joylarni saqlash boʻyicha foydalanish xarajatlarini) hamda koʻrsatilgan kommunal xizmatlar (issiqlik taʼminoti)ni rad etishi mumkin emas.
6.9. Shirkat aʼzosi mulkni boshqa shaxsga bergan taqdirda uy-joyga egalik qilish huquqini boshqa shaxsga bergungacha barcha majburiy toʻlovlarni toʻlashga majburdir.
6.10. Uy-joy egasi qonun hujjatlarida belgilangan majburiy toʻlovlarni toʻlash boʻyicha oʻz majburiyatlarini bajarmagan yoki zarur darajada bajarmagan taqdirda Shirkat mulkdorga nisbatan Shirkatga yetkazilgan zararlarni undirish talablari bilan daʼvo qoʻzgʻatishga haqlidir.
6.11. Shirkat aʼzolari Shirkat aʼzolarining umumiy mulki boʻlgan obyektlarni oʻz hisobidan yaxshilashga haqlidirlar.
6.12. Uy-joy mulkdorlarining shirkati, zarurat boʻlganda, Shirkatning qurilayotgan obyektlarini mablagʻ bilan taʼminlash uchun maxsus jamgʻarma tashkil etishi mumkin. Bu holda Shirkat aʼzolari uyning umumiy maydonidagi oʻziga tegishli kvartira maydoni ulushiga mutanosib miqdorda mablagʻ qoʻshadilar.
Mazkur jamgʻarmaga ajratmalar Shirkat aʼzolarining umumiy majlisi belgilagan tartibda ajratiladi. Maxsus jamgʻarmaga yoʻnaltirilgan mablagʻlar Shirkat aʼzosi mulk huquqi bilan oʻziga tegishli uyni sotganda unga qaytarilmaydi, balki maxsus jamgʻarma mablagʻlaridagi ulushi sifatida yangi mulkdorga oʻtadi.
6.13. Yangi obyektlar qurish toʻgʻrisidagi qaror Shirkat aʼzolarining umumiy majlisi tomonidan, Shirkat aʼzolari umumiy sonining kamida toʻrtdan uch qismi ovozi bilan qabul qilinadi.
6.14. Sugʻurta tur va xillarini belgilovchi ixtiyoriy sugʻurta boʻyicha dasturlarni Shirkat aʼzolarining umumiy majlisi tasdiqlaydi.
Shirkat Boshqaruvi Shirkat aʼzolarining umumiy mulki boʻlgan obyektlarni, Shirkatning bevosita oʻz mulki boʻlgan asbob-uskunalar, mol-mulklarni sugʻurta qilish dasturini ijro uchun qabul qiladi va samarali amalga oshiradi.
Sugʻurta boʻyicha dasturlar Shirkat aʼzolari mulkini hamda Shirkatning oʻz mulkini himoya qilishni taʼminlashi kerak.
6.15. Shirkatning xoʻjalik faoliyatidan olingan daromadlar birinchi navbatda Shirkat aʼzolari tomonidan majburiy toʻlovlar toʻlanmagan hollarda, yoxud tasdiqlangan xarajatlar smetasiga muvofiq Shirkat qarzlarini qoplashga yoʻnaltiriladi.
Shirkatning xoʻjalik faoliyatidan olingan foyda Shirkat aʼzolari oʻrtasida taqsimlanmaydi.
6.16. Shirkatning mablagʻlari boshqa tushumlardan, shu jumladan, Shirkatga istalgan jismoniy va yuridik shaxs tomonidan topshiriladigan mablagʻlardan shakllantirilishi mumkin.
6.17. Har yili, umumiy mulk boʻlgan obyektlarni foydalanishga topshirish, saqlash va tuzatish uchun daromadlar miqdorlari aniqlangandan, moliya yili natijalari yakunlangandan soʻng, Shirkat Boshqaruvi kelgusi moliya yili uchun daromadlar va xarajatlar smetasini tuzadi va Shirkatning har bir aʼzosining toʻlovlarini belgilaydi.
Kelgusi yil uchun daromadlar va xarajatlar smetasi joriy yilning 15-dekabrigacha tuziladi.
Shirkatning daromadlari va xarajatlari smetasi va ular yuzasidan toʻlovlarning miqdorlari kelgusi moliya yili uchun Shirkat aʼzolari tomonidan Boshqaruv tomonidan umumiy majlis tasdigʻiga kiritiladi. Shirkatning yillik daromadlari va xarajatlari smetasini tasdiqlash uchun chaqiriladigan Shirkat aʼzolarining umumiy yigʻilishi kelgusi moliya yili uchun Shirkatning yillik xarajatlari va daromadlari smetasining loyihasi Shirkat aʼzolariga yuborilgandan soʻng 10 kun oʻtgandan keyingina oʻtkazilishi mumkin.
6.18. Shirkat quyidagi maʼlumotlarni oʻz ichiga olgan moliya hujjatlarini yuritishi shart:
a) barcha pul tushumlari va xarajatlari hisob-kitobi;
b) har bir turar joy uchun shaxsiy varaqa, unda mulkdor haqidagi quyidagi maʼlumotlar koʻrsatiladi:
jismoniy shaxslar uchun — familiyasi, ismi, otasining ismi, yashash joyi va tugʻilgan sanasi;
yuridik shaxslar uchun — toʻliq nomi, yuridik manzili va hisob-kitob varaqasi, shuningdek, umumiy xarajatlardagi hamda majburiy toʻlovlardagi ulushi, shu jumladan, qoʻshimcha badallari;
v) umumiy mulk boʻlgan obyektlarni saqlash, ulardan foydalanish va ularni taʼmirlash haqiqiy qiymatining hisobi;
g) Shirkatning joriy balansi;
d) joriy va kelgusi yilda nazarda tutilgan kapital xarajatlarning hisobi.
6.19. Shirkat belgilangan tartibda umumiy mulk boʻlgan obyektlarni saqlashni, ulardan foydalanishni, ularni taʼmirlashni va rekonstruksiya qilishni amalga oshiradi.
6.20. Shirkatning har bir aʼzosi Shirkatga yoki/va Shirkat aʼzolariga ular yoki uning oila aʼzolari, yoxud mazkur binoda boʻlgan boshqa shaxs tomonidan Shirkat aʼzolarining umumiy mulki boʻlgan obyektlarga yoki alohida turar joylarga ehtiyotsizlik yoki atayin qilingan xatti-harakatlar natijasida yetkazilgan zararni, shu jumladan, turar joydan foydalanish, uni taʼmirlash natijasida keltirilgan ziyonni toʻlashi kerak.
Mazkur talablar Shirkat aʼzosiga bogʻliq boʻlmagan holda paydo boʻlgan sabablarga koʻra bino yongan, avariyaga uchragan yoxud koʻchmas mulk boshqacha jismonan yoʻq qilingandan soʻng uni tiklash zaruriyati paydo boʻlgan hollarga joriy etilmaydi.
6.21. Uylar atrofidagi obyektlarni rekonstruksiya qilish, buzish va turar joyning tashqi koʻrinishini oʻzgartirish qonun hujjatlari bilan belgilangan tartibda boshqaruv organlarining tegishli ruxsatisiz amalga oshirilishi mumkin emas.
7. ShIRKATNING XOʻJALIK FAOLIYATI
7.1. Shirkat notijorat tashkiloti sifatida xoʻjalik faoliyatini faqat mazkur Ustavga muvofiq Shirkat maqsadlariga xizmat qilishiga va muvofiqligiga koʻra amalga oshirishi mumkin.
7.2. Ustavda nazarda tutilgan maqsadga erishish uchun Shirkat xoʻjalik faoliyatining quyidagi turlarini amalga oshirishi mumkin:
Shirkatdagi koʻchmas mulkka xizmat koʻrsatishni, undan foydalanishni va taʼmirlashni boshqarish;
xoʻjalik imoratlari va boshqa imoratlarni qurish;
Shirkat mulkida boʻlgan asbob-uskunalar, anjomlar va boshqa moddiy boyliklarni ijaraga berish.
7.3. Shirkat mazkur ustavda va qonun hujjatlarida nazarda tutilmagan xoʻjalik faoliyati bilan shugʻullanishga haqli emas.
8. ShIRKATNING BOShQARUV ORGANLARI
8.1. Quyidagilar:
Shirkat aʼzolarining umumiy majlisi;
Shirkat Boshqaruvi;
taftish komissiyasi (taftishchi) Shirkatning boshqaruv organlari hisoblanadi.
8.2. Yilda kamida bir marta chaqiriladigan Shirkat aʼzolarining umumiy majlisi Shirkatni boshqarishning yuqori organi hisoblanadi.
Shirkatning joriy faoliyatiga rahbarlik qilish Shirkat Boshqaruvi tomonidan amalga oshiriladi.
8.3. Taftish komissiyasi (taftishchi) Shirkatni nazorat qilish organi hisoblanadi.
9. ShIRKAT AʼZOLARINING UMUMIY MAJLISI
9.1. Yillik umumiy majlis Shirkatning moliya yili tugagandan soʻng 60 kundan kechiktirmay chaqiriladi.
Shirkat aʼzolarining navbatdan tashqari umumiy majlisi Boshqaruvning, Shirkatda ovozlar umumiy sonining 10 va undan ortiq foiziga ega boʻlgan Shirkat aʼzolarining tashabbusi bilan, shuningdek, taftish komissiyasi (taftishchi) yoki joylardagi davlat hokimiyati organlarining talablariga binoan chaqirilishi mumkin.
9.2. Shirkat aʼzolarining umumiy majlisini oʻtkazish toʻgʻrisidagi xabar yozma holda yuboriladi va har bir Shirkat aʼzosiga tilxat bilan yoxud pochta joʻnatmalari orqali (buyurtma xat bilan) Shirkat aʼzosi tomonidan yozma holda koʻrsatilgan manzil boʻyicha topshiriladi. Xabarnoma Shirkat aʼzolarining umumiy majlisini oʻtkazish sanasigacha kechi bilan 10 kun oldin yuboriladi.
Umumiy majlis oʻtkazilishi toʻgʻrisidagi xabarnomada:
umumiy majlis kimning tashabbusiga koʻra chaqirilayotganligi;
majlis oʻtkaziladigan joy va uning vaqti;
majlisning kun tartibi;
daromadlar va xarajatlar smetalarini tasdiqlashda turar joy mulkdorlariga koʻrsatib oʻtilgan smetalarni koʻrib chiqish uchun xabarnoma bilan birga joʻnatish koʻrsatiladi.
Umumiy majlis kun tartibida koʻrsatilmagan masalalarni muhokama qilish uchun kiritishga haqli emas.
9.3. Shirkatning har bir aʼzosi umumiy yigʻilishda bitta ovozga ega boʻladi.
9.4. Umumiy majlis, agar unda Shirkat aʼzolarining ovozlari umumiy sonining yarmidan koʻpiga ega boʻlgan Shirkat aʼzolari qatnashayotgan boʻlsa, vakolatli boʻladi. Umumiy majlis qarori Shirkat aʼzolari umumiy majlisida qatnashayotganlar ovozlarining umumiy soniga ega boʻlgan oddiy koʻpchilik ovoz bilan qabul qilinadi, mazkur ustavning 4.5, 5.5, 6.13-bandlarida nazarda tutilgan hollar bundan mustasno.
Kvorum boʻlmagan hollarda Boshqaruv oʻtkaziladigan umumiy majlisning yangi sanasi va vaqtini belgilaydi.
9.5. Umumiy majlisni Boshqaruv raisi yoki uning oʻrinbosari olib boradi.
Ular boʻlmagan hollarda majlisni Boshqaruv aʼzolaridan biri olib boradi.
Koʻrsatib oʻtilgan shaxslar boʻlmagan hollarda raislik qiluvchi majlisda qatnashayotgan Shirkat aʼzolarining safidan saylanadi.
9.6. Ustavga muvofiq olingan ovoz berish natijalari barcha hollarda kvartiralarning barcha mulkdorlari uchun, shu jumladan, ovoz berishda qatnashmagan (sababidan qatʼi nazar)lar uchun ham majburiy hisoblanadi.
Kvartira mulkdori hisoblanadigan yuridik shaxsning ovozi aniq shaxsni tayinlash toʻgʻrisida xabarnoma boʻlmaganda vakil qilingan shaxs tomonidan berilishi mumkin. Majlis raisi yuridik shaxs nomidan ovoz beruvchi shaxsning bunga haqi borligini isbotlovchi dalil talab qilishi mumkin.
Kvartiralar mulkdorlarining biron bir guruh (toifa)lari manfaatlariga daxl qiluvchi masalalar ushbu guruh (toifa)larni ifodalovchi kvartiralar mulkdorlarining ovoz berish obyekti boʻlishi kerak va ushbu guruh (toifa)ga kirmaydigan kvartiralar mulkdorlarining roziligini olmasliklari kerak.
9.7. Umumiy majlisning mutlaq vakolatiga quyidagi masalalarni hal etish kiradi:
9.7.1. Shirkat ustaviga oʻzgartirishlar va qoʻshimchalar kiritish yoki shirkat ustavini yangi tahrirda tasdiqlash.
9.7.2. Boshqaruv va taftish komissiyasi (taftishchi)ni saylash hamda ularning vakolatlarini muddatidan oldin toʻxtatish.
9.7.3. Yillik daromadlar va xarajatlar smetasini hamda uning ijrosi toʻgʻrisidagi hisobotni tasdiqlash.
9.7.4. Shirkatning maxsus fondlarini tuzish.
9.7.5. Shirkat aʼzolarining Shirkat raisi, boshqaruvi va taftish komissiyasi (taftishchisi) faoliyatiga taalluqli ariza va shikoyatlarini koʻrib chiqish.
9.7.6. Shirkat shtatidagi xodimlarning ichki mehnat tartibi qoidalarini, ular mehnatiga haq toʻlash va mukofotlash toʻgʻrisidagi nizomni qabul qilish va oʻzgartirish.
9.7.7. Asbob-uskunalar, anjomlar va boshqa moddiy boyliklarni qonun hujjatlarida belgilangan tartibda sotib olish, sotish, topshirish, ayirboshlash, ijaraga berish, shuningdek, ularni balansdan chegirib tashlash toʻgʻrisida qarorlar qabul qilish.
9.7.8. Ustavda belgilangan vazifalarni bajarish uchun xoʻjalik binolari va boshqa imoratlarni qurish, koʻchmas mulk sotib olish toʻgʻrisida qarorlar qabul qilish.
9.7.9. Qarzga mablagʻ olish, shu jumladan, bank kreditlari olish toʻgʻrisida qaror qabul qilish.
9.7.10. Shirkatning xoʻjalik faoliyatidan olingan daromaddan foydalanish yoʻnalishlarini belgilash.
9.7.11. Shirkatni qayta tashkil etish va tugatish.
9.7.12. Xoʻjalik faoliyatini yuritish uchun Boshqaruv tomonidan ishga yollanadigan ijrochi direktor nomzodini tasdiqlash.
9.7.13. Qonun hujjatlarida va Shirkat ustavida nazarda tutilgan boshqa masalalarni hal etish.
9.8. Umumiy majlis Shirkat faoliyatining barcha masalalari boʻyicha qarorlar qabul qilishga haqlidir.
10. ShIRKAT BOShQARUVI
10.1. Shirkatning joriy faoliyatiga rahbarlikni Boshqaruv amalga oshiradi.
10.2. Shirkat Boshqaruvi Shirkat aʼzolari orasidan saylanadi. Agar yuridik shaxs turar joyning mulkdori hisoblansa, unda har qanday uning vakolatli vakili Boshqaruv aʼzoligiga saylanishi mumkin.
10.3. Boshqaruv aʼzolari belgilangan tartibda Boshqaruv aʼzolarini saylash maqsadida chaqiriladigan umumiy majlisda turar joy mulkdorlari tomonidan saylanadilar.
Boshqaruv aʼzolari Shirkat ustavida belgilangan muddatga umumiy majlis tomonidan saylanadilar.
Boshqaruvga saylash uchun nomzodlar Boshqaruv aʼzolarini saylash maqsadida chaqirilgan majlisda istalgan turar joy mulkdori tomonidan ham yozma, ham ogʻzaki shaklda taklif etilishlari mumkin. Boshqaruvga barcha nomzodlarning roʻyxati Shirkat aʼzolariga — mulkdorlarga Boshqaruv aʼzolari saylanadigan majlisgacha kamida 15 kun oldin taqdim etiladi.
Boshqaruv aʼzolari saylanishi kerak boʻlgan umumiy majlisda mulkdorlar bunday saylovlarni olib borishning maxsus tartibotlarini, agar ular Ustavga zid boʻlmasa, tasdiqlab olishlari mumkin.
Boshqaruv oʻz tarkibidan rais va uning oʻrinbosarini saylaydi.
Boshqaruv Shirkatning ijrochi organi hisoblanadi, Shirkat aʼzolarining umumiy majlisiga hisob beradi.
10.4. Moliya-xoʻjalik faoliyatini, buxgalterlik hisobi va hisobotini yuritish uchun Shirkat boshqaruvi tomonidan ijrochi direktor va buxgalter, keyinchalik ularni umumiy majlis tomonidan tasdiqlanishi sharti bilan, ishga yollanadi.
Shirkatning toʻlov va boshqa moliya hujjatlari buxgalter, shuningdek, ijrochi direktor va boshqaruv raisi tomonidan tasdiqlanadi.
10.5. Boshqaruv vakolatiga quyidagi masalalarni hal etish kiradi:
10.5.1. Umumiy majlis chaqirish va uning oʻtkazilishini tashkil etish.
10.5.2. Yillik daromadlar va xarajatlar smetasi loyihasini va uning ijrosi toʻgʻrisidagi hisobotni tuzish.
10.5.3. Uyga xizmat koʻrsatish va uni taʼmirlash, shuningdek, umumiy foydalanishdagi boshqa obyektlarni saqlash uchun shartnomalar tuzish.
10.5.4. Uyni asrash, saqlash, taʼmirlash hamda unga xizmat koʻrsatish boʻyicha tuzilgan shartnoma majburiyatlariga rioya etilishini nazorat qilish.
10.5.5. Shirkat mablagʻlarini umumiy majlis tasdiqlagan daromadlar va xarajatlar smetasiga muvofiq tasarruf etish.
10.5.6. Shirkat aʼzolarining belgilangan majburiy toʻlovlarni oʻz vaqtida toʻlashlarini nazorat qilish.
10.5.7. Ish yuritish, buxgalteriya hisobi va hisobotini olib borish.
10.5.8. Xoʻjalik faoliyatini yuritish uchun ijrochi direktorni, uning nomzodini keyinchalik umumiy majlisda tasdiqlash uchun kiritish sharti bilan, ishga yollash.
10.5.9. Shirkat mol-mulkiga xizmat koʻrsatish va xoʻjalik faoliyatini yuritish uchun, shu jumladan, ish yuritish, buxgalteriya hisobi va hisobotini olib borish uchun xodimlarni ishga yollash.
10.5.10. Qonun hujjatlariga muvofiq boshqa vakolatlar.
10.6. Har qanday boshqa sabablarga koʻra Boshqaruvda paydo boʻladigan boʻsh oʻrinlar, bunday boʻsh oʻrinlar paydo boʻlgandan soʻng ularni toʻldirish uchun istalgan vaqtda chaqirilgan umumiy majlis qaroriga koʻra, toʻldirilishi mumkin. Shu tariqa saylangan yoki tayinlangan Boshqaruv aʼzosi oʻzi oʻrniga kelgan Boshqaruv aʼzosining vakolatlari muddati tugagunga qadar lavozimda qoladi.
10.7. Boshqaruv yigʻilishi uning raisi tomonidan chaqiriladi.
10.8. Yil yakuni boʻyicha umumiy majlis oʻtkazilgandan soʻng 10 kundan kechiktirmay Boshqaruv yigʻilishi oʻtkaziladi.
10.9. Boshqaruvning muntazam yigʻilishlari jadval boʻyicha oʻtkazib boriladi yoki Boshqaruvning koʻpchilik aʼzosi tomonidan davriy ravishda belgilab boriladigan oʻsha vaqtda va oʻsha joyda Boshqaruv raisi tomonidan chaqiriladi, bunda yigʻilishlar oyda kamida 1-marta chaqiriladi. Agar yigʻilishlar jadval boʻyicha oʻtkazilmasa, ularni oʻtkazish haqidagi xabarnoma Boshqaruvning har bir aʼzosiga majlis oʻtkazish sanasigacha kechi bilan uch ish kunidan oldin pochta orqali yuborilishi yoki shaxsan topshirilishi kerak. Boshqaruvning barcha yigʻilishlari mulkdorlarning kirishi uchun ochiqdir.
10.10. Boshqaruv yigʻilishi mazkur Ustavda belgilangan muddatlarda chaqiriladi. Agar Boshqaruv yigʻilishida qatnashayotganlar soni kvorumni tashkil etmasa, u holda qatnashayotganlarning koʻpchilik ovozi bilan mazkur yigʻilish boshqa kunga koʻchirilishi mumkin.
Qayta majlisda kvorum boʻlsa, oldingi chaqirilgan yigʻilishda hal etilishi lozim boʻlgan masala qoʻshimcha xabarnomasiz koʻrib chiqilishi mumkin.
10.11. Boshqaruv aʼzolarining kamida 2/3 qismi qatnashganda Boshqaruv qarorlari vakolatli boʻladi.
11. BOShQARUV RAISI
11.1. Boshqaruv raisi Shirkat aʼzolari orasidan ustavda belgilangan muddatga saylanadi. Rais Shirkat manfaatlarini ifodalaydi, Boshqaruv qarorlarining bajarilishini taʼminlaydi, oʻz vakolati doirasida Shirkatning barcha mansabdor shaxslariga ularning bajarishlari majburiy boʻlgan koʻrsatmalar va farmoyishlar berish huquqiga ega boʻladi.
11.2. Rais Shirkat shtatidagi xodimlarning ichki mehnat tartibi qoidalarini, ular mehnatiga haq toʻlash va mukofotlash toʻgʻrisidagi nizomni, ijrochi direktorlikka nomzodni umumiy majlis tasdigʻiga kiritadi.
12. TAFTISh KOMISSIYASI (TAFTIShChI)
12.1. Shirkatning moliya-xoʻjalik faoliyatini nazorat qilish uchun uning aʼzolarining umumiy majlisi Shirkat aʼzolari tarkibidan tarkibi kamida 3 kishidan iborat boʻlgan taftish komissiyasini saylaydi yoki taftishchini tayinlaydi.
12.2. Taftish komissiyasi (taftishchi) umumiy majlis tomonidan koʻpi bilan ikki yilga saylanadi. Taftish komissiyasi tarkibiga Shirkat Boshqaruvi aʼzolari kiritilishi mumkin emas.
12.3. Shirkat va uning boshqaruvi moliya-xoʻjalik faoliyatini tekshirish uchun umumiy majlis belgilangan tartibda auditorni yoki auditorlik tashkilotini jalb etishga haqlidir.
12.4. Taftish komissiyasi oʻz tarkibidan rais saylaydi.
12.5. Taftish komissiyasi (taftishchi):
12.5.1. Yilda kamida bir marta Shirkatning moliya-xoʻjalik faoliyatini rejali taftish qiladi.
12.5.2. Umumiy majlisga yillik hisobot va majburiy toʻlovlar hamda badallar miqdorlari boʻyicha xulosa taqdim etadi.
12.5.3. Oʻz faoliyati toʻgʻrisida umumiy majlisga hisob beradi.
12.5.4. Qonun hujjatlari, Shirkat Ustavining Boshqaruv (rais)ning moliya-xoʻjalik faoliyati qismiga doir talablariga rioya etilishini nazorat qiladi.
13. ShIRKATNI QAYTA TAShKIL ETISh VA TUGATISh
13.1. Shirkatni qayta tashkil etish va tugatish umumiy majlis qaroriga yoxud sud qaroriga koʻra qonun hujjatlarida nazarda tutilgan asosda va tartibda amalga oshiriladi.
13.2. Shirkat tugatilgan taqdirda, kreditorlarning talablari qondirilgandan keyin qolgan mol-mulk Shirkat aʼzolari oʻrtasida ularning umumiy mol-mulkdagi ulushlariga mutanosib tarzda taqsimlanadi.
Keyingi tahrirga qarang.
Vazirlar Mahkamasining 1999-yil
4-oktabrdagi 454-son qaroriga
2-ILOVA
Uy-joylarni uy-joy mulkdorlari shirkati boshqaruviga berish va uy-joy fondini saqlash va tuzatish masalalarida davlat hokimiyati organlari bilan oʻzaro hamkorlik qilish tartibi toʻgʻrisida
Keyingi tahrirga qarang.
NAMUNAVIY NIZOM
Mazkur Nizom uy-joylarni uy-joy mulkdorlari shirkati boshqaruviga berish va uy-joy fondini saqlash va tuzatish masalalarida davlat hokimiyati organlari bilan oʻzaro hamkorlik qilishning namunaviy tartibini belgilaydi. Joylardagi davlat hokimiyati organlari amaldagi qonun hujjatlari normalariga va mazkur Nizomga muvofiq uy-joylarni uy-joy mulkdorlari shirkati boshqaruviga berish va uy-joy fondini saqlash va tuzatish masalalarida davlat hokimiyati organlari bilan oʻzaro hamkorlik qilishni tartibga soluvchi tegishli normativ hujjatlarni qabul qiladilar.
Keyingi tahrirga qarang.
1.1. Uy-joy mulkdorlarini birlashtiruvchi hamda ularning manfaatlarini ifodalash huquqini olgan shirkatlar tashkil etilganda shirkat uy-joy mulkdorlarining roziligi va ularning topshirigʻiga koʻra bino (binolar)ni boshqarishni oʻz zimmasiga oladi.
Keyingi tahrirga qarang.
1.2. Uy (uylar)ni shirkat boshqaruviga berish shirkat boshqaruvi rahbariyatining arizasi olingandan keyin:
— shirkatning yuridik shaxs sifatida roʻyxatdan oʻtkazilganligi toʻgʻrisidagi guvohnomaning notarial tartibda tasdiqlangan nusxasi;
Keyingi tahrirga qarang.
— shirkat ustavining nusxasi;
— bino (binolar)ni boshqarish huquqini shirkatga berish toʻgʻrisidagi qaror bilan birgalikda uy-joy mulkdorlari umumiy yigʻilishi bayonnomasi taqdim etilgach bir oy muddatda shahar (tuman) hokimining qarori asosida amalga oshiriladi.
Keyingi tahrirga qarang.
1.3. Shirkat boshqaruviga berilayotgan uy-joy binosida davlat uy-joyi boʻlgan taqdirda davlat uy-joyining mulkdori shahar (tuman) hokimining qarori olingandan keyin bir oy mobaynida shirkat aʼzoligiga kirishi, uy-joylarni shirkat boshqaruviga topshirish-qabul qilib olish boʻyicha komissiya tuzishi kerak.
Keyingi tahrirga qarang.
1.4. Shirkat balans saqlovchi funksiyasini bajargan holda uyning texnika hujjatlarini yuritadi, uni balansda hisobga oladi. Bunda xususiy va davlat mulki boʻlgan binolarning balans qiymati hisobi alohida yuritiladi. Turar joy va turar joyga moʻljallanmagan binolar maydonini hisobga olish ham shu taxlitda yuritiladi.
1.5. Uy (uylar) shirkat boshqaruviga berilishi bilan bir vaqtda shahar (tuman) hokimining tegishli qarori bilan uy (uylar) va uy atrofidagi hududlar egallab turgan yer uchastkasidan foydalanish huquqi rasmiylashtiriladi.
Keyingi tahrirga qarang.
2. UY-JOY MULKDORLARI ShIRKATINING UY-JOY FONDINI SAQLASh VA TUZATISh MASALALARIDA DAVLAT HOKIMIYATI ORGANLARI BILAN OʻZARO HAMKORLIGI
Keyingi tahrirga qarang.
2.1. Ham jismoniy, ham yuridik shaxslar, shuningdek davlat hokimiyati organlari uy-joy mulkdorlari boʻlgan uylarda davlat hokimiyati organlari shirkatga binodagi turar joylarga davlat mulkining tegishli miqdoriga teng qatnashish ulushi, umumiy xarajatlarga tegishli ulush qoʻshgan holda va qatnashish ulushiga muvofiq ovozlar soni bilan kiradi.
Keyingi tahrirga qarang.
2.2. Birgalikdagi mulk boʻlgan binodagi turar joylar mulkdorlarining munosabatlari bitim asosida quriladi.
Davlat uy-joy fondi boʻyicha shirkatdagi davlat uy-joy mulkdorining vakili tayinlanadi.
Keyingi tahrirga qarang.
2.3. Davlat mulki boʻlmagan uylar boʻyicha xususiylashtirish natijasida xususiy mulkka oʻtgan turar joylarni saqlash va tuzatishga kompensatsiya davlat hokimiyati organlari tomonidan uy-joy mulkdorlari shirkatiga oʻtkaziladi, biroq bu tegishli davrda xuddi shunday uylar boʻyicha uy-joy fondidan foydalanish va uni tuzatishga dotatsiyadan koʻp boʻlmasligi kerak.
Keyingi tahrirga qarang.
2.4. Uy-joy mulkdorlaridan biri davlat hokimiyati organlari hisoblangan shirkatlarda dotatsiya ular tomonidan davlat mulki boʻlgan uy-joylar boʻyicha ham, xususiylashtirish tartibida xususiy mulkka oʻtgan uy-joylar boʻyicha ham ajratiladi.
2.5. Mazkur nizomning 2.3 va 2.4-bandlariga muvofiq mablagʻlarni oʻtkazish mablagʻ bilan taʼminlashni amalga oshiruvchi davlat hokimiyati organi bilan shirkat oʻrtasida tuziladigan shartnoma asosida amalga oshiriladi*.
* Uy-joy mulkdorlari shirkatlarini mablagʻ bilan taʼminlash toʻgʻrisidagi shartnoma uy-joy fondini saqlash va tuzatish boʻyicha xarajatlarning bir qismini davlat kompensatsiya qilgan taqdirda tuziladi.
Ushbu shartnomada quyidagilar nazarda tutilishi kerak:
— shirkat tomonidan daromadlar toʻgʻrisidagi, mablagʻlardan foydalanish va mulkchilik turlari boʻyicha mablagʻ bilan taʼminlanayotgan uy-joy fondi hajmi toʻgʻrisidagi buxgalteriya va statistika hisoboti taqdim etilishi;
— ikkilamchi bitishuv (hadya etish, meros qilib qoldirish, oldi-sotdi va hokazolar) sodir etilishi natijasida xususiy mulkka oʻtgan uy-joylarning hajmlari toʻgʻrisidagi maʼlumotlar taqdim etilishi;
— tasdiqlovchi hujjatlarning nusxalari bilan birgalikda imtiyozga ega boʻlganlar roʻyxati;
— taqdim etiladigan axborot va hisobotning ishonchliligi va oʻz vaqtida taqdim etilishi uchun shirkatning javobgarligi, shartnoma shartlari buzilganligi uchun jarimalar.
Shartnomaning namunaviy shakli ilova* qilinadi.
* Ilova berilmaydi.
Keyingi tahrirga qarang.
2.6. Xususiylashtirilgan koʻp kvartirali uylarda uy-joy mulkdorlari bilan shartnoma-kontraktlar boʻyicha uy-joylarga xizmat koʻrsatuvchi uy-joylardan foydalanish tashkilotlari ularni shirkatga texnik jihatdan soz holda topshirishi shart.
2.7. Shirkat aʼzolari boʻlmagan uy-joy mulkdorlari umumiy mulk boʻlgan mol-mulkni saqlash boʻyicha majburiyatlardan ozod etilmaydilar va uy boshqaruvchisi bilan tuzilgan bitim boʻyicha oʻz mulkida boʻlgan uy-joylarning umumiy maydoniga teng xarajatlar ulushini shirkatning yoki boshqa tashkilotning hisob-kitob hisobvaragʻiga toʻlaydilar.
Keyingi tahrirga qarang.
2.8. Lift xoʻjaligidan foydalanish va uni tuzatish boʻyicha xizmatlar koʻrsatuvchi korxonalar shirkatlarning uylarini tegishli davrda amal qiluvchi narxlar va tariflar boʻyicha texnik xizmat koʻrsatishga qabul qilishni rad etishga haqli emaslar.
2.9. Resurslarni tejovchi tashkilotlar issiqlik, elektr energiyasi, suv, gazni aholi uchun belgilangan tariflar boʻyicha berishga majburdir.
2.10. Uy-joy mulkdorlari mazkur uy-joylardan uning vazifasiga muvofiq foydalanishlari shart.
2.11. Shirkat ustavida nazarda tutilgan barcha tugatish tadbirlari oʻtkazilgandan keyin va tugatishdan oldingi davr uchun uyni va uy atrofidagi hududni saqlash boʻyicha moliyaviy majburiyatlar qoplangandan soʻng shirkat tugatilgan taqdirda uy-joy mulkdorlari uy-joyni saqlash va tuzatish masalasi boʻyicha imorat joylashgan joydagi mulkchilikning istalgan shaklidagi tuzatish, foydalanish tashkiloti bilan bitim tuzish huquqiga ega boʻladilar.
Keyingi tahrirga qarang.

(Oʻzbekiston Respublikasi Hukumatining qarorlari toʻplami, 1999-y., 10-son, 60-modda; Oʻzbekiston Respublikasi qonun hujjatlari toʻplami, 2001-y., 3-4-son, 13-modda)