Hujjat kuchini yo‘qotgan " " 27.02.2021

Hujjat 10.07.2017 00 sanasi holatiga
Amaldagi versiyaga o‘tish

Oʻzbekiston Respublikasi Prezidentining

Qarori

Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasi faoliyatini tashkil etish toʻgʻrisida

Keyingi tahrirga qarang.

Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi huzuridagi Davlat xaridi uchun qishloq xoʻjaligi mahsulotlarini yetishtirish va qishloq xoʻjaligini texnika bilan jihozlashni maqsadli moliyalashtirish jamgʻarmasini tashkil etish toʻgʻrisida” 2017-yil 27-iyundagi PF-5095-sonli Farmonini ijro etish hamda qishloq xoʻjaligi mahsulotlarining davlat xaridi va zamonaviy, yuqori ishlab chiqarish quvvatiga ega qishloq xoʻjaligi texnikasini yetkazib berishni maqsadli moliyalashtirishning prinsipial yangi mexanizmini joriy etish maqsadida:

Keyingi tahrirga qarang.

1. Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasini boshqarish departamenti (keyingi oʻrinlarda — Departament) tashkil etilsin.

Keyingi tahrirga qarang.

2. Quyidagilar:

Keyingi tahrirga qarang.

3. Departament Oʻzbekiston Respublikasi Vazirlar Mahkamasining Qishloq va suv xoʻjaligi, qishloq xoʻjaligi mahsulotlarini qayta ishlash va isteʼmol tovarlari kompleksi tarkibiga kirishi belgilab qoʻyilsin.

Keyingi tahrirga qarang.

4. Belgilab qoʻyilsinki:

Departament davlat xaridi uchun yetishtiriladigan paxta va gʻalla hosili hisob-kitobini moliyalashtirishga ajratilgan Jamgʻarmaning mablagʻlaridan foydalanishda, shuningdek zamonaviy, yuqori ishlab chiqarish quvvatiga ega qishloq xoʻjaligi texnikasini imtiyozli lizing shartlarida yetkazib berishni ragʻbatlantirish uchun qaytarib berish asosida ajratilgan qarz mablagʻlaridan foydalanilishida vakolati boʻlmagan mansabdor shaxslarning barcha aralashuvlari boʻyicha qonun hujjatlariga muvofiq Jamgʻarma kengashiga tegishli axborot kiritadi;

Jamgʻarma kengashi Departament tomonidan kiritilgan axborotni belgilangan tartibda koʻrib chiqadi, Oʻzbekiston Respublikasi Moliya vazirligining Nazorat-taftish Bosh boshqarmasiga aniqlangan holatlar boʻyicha tekshirish va taftishlar oʻtkazish toʻgʻrisida koʻrsatma beradi.

Keyingi tahrirga qarang.

5. Oʻzbekiston Respublikasi Markaziy bankiga Jamgʻarmaga moliyaviy operatsiyalar oʻtkazish uchun bir hafta muddatda milliy va chet el valyutasida tegishli maxsus hisobvaraqlari ochish tavsiya etilsin.

6. Belgilab qoʻyilsinki, Jamgʻarma mablagʻlaridan quyidagi maqsadlarda foydalaniladi:

davlat xaridi uchun yetishtiriladigan paxta va gʻalla hosilini moliyalashtirish;

davlat xaridi uchun qishloq xoʻjaligi mahsulotlarini yetishtirishda ishtirok etadigan fermer xoʻjaliklari va boshqa qishloq xoʻjaligi tashkilotlariga zamonaviy, yuqori ishlab chiqarish quvvatiga ega qishloq xoʻjaligi texnikasini imtiyozli lizing shartlarida yetkazib berishni moliyalashtirish;

paxta tolasi, don va don mahsulotlarining tasdiqlangan preyskurantdagi ulgurji narxlardan past boʻlgan jahon narxlari amalda boʻlgan davrdagi salbiy tafovutni zarurat boʻlganda qoplash;

urugʻlik paxta yetishtiruvchi xoʻjaliklar, nav originatorlari boʻlgan ilmiy muassasalarga, shuningdek urugʻlik chigitni tayyorlashda ishtirok etgan boshqa subyektlarga toʻlanadigan ustama mablagʻlari xarajatlarini qoplash;

paxta xomashyosi yetishtirishda fermer xoʻjaliklari uchun zarur boʻlgan moddiy-texnika resurslari xaridi uchun tayyorlov korxonalarining xarajatlarini qoplash;

jalb qilingan kredit va unga hisoblangan foizlarni qaytarish;

rivojlanayotgan va rivojlangan davlatlarning agrar sohasini moliyalashtirish boʻyicha tajribasini keyinchalik uning ijobiy natijalarini respublikada joriy qilish maqsadida oʻrganish;

Departament faoliyatini taʼminlash xarajatlarini moliyalashtirish.

Keyingi tahrirga qarang.

7. Quyidagilar Jamgʻarmaning agentlari etib belgilansin:

paxta va gʻalla yetishtirish, xarid qilish, shuningdek, zamonaviy, yuqori ishlab chiqarish quvvatiga ega qishloq xoʻjaligi texnikasini imtiyozli lizing shartlarida yetkazib berishni moliyalashtirish boʻyicha moliya agenti — “Agrobank” aksiyadorlik tijorat banki;

paxtani xarid qilish, saqlash, qayta ishlash va sotish boʻyicha tijorat agenti — “Oʻzpaxtasanoat” aksiyadorlik jamiyati va uning hududiy filiallari;

Keyingi tahrirga qarang.

gʻallani xarid qilish, saqlash, qayta ishlash va sotish boʻyicha tijorat agenti — “Oʻzdonmahsulot” aksiyadorlik kompaniyasi;

zamonaviy, yuqori ishlab chiqarish quvvatiga ega qishloq xoʻjaligi texnikasini imtiyozli lizing shartlarida yetkazib berish boʻyicha tijorat agenti — “Oʻzagrolizing” aksiyadorlik jamiyati.

Keyingi tahrirga qarang.

8. Quyidagilar:

moliya agenti “Agrobank” ATBga — maxsus ochiladigan maqsadli hisobvaraqlar orqali davlat xaridi uchun yetkazib beriladigan mahsulotlarga, shu jumladan zamonaviy, yuqori ishlab chiqarish quvvatiga ega qishloq xoʻjaligi texnikasini lizing shartlarida yetkazib berishga ajratiladigan mablagʻlardan maqsadli foydalanilishi va hisob-kitoblarning oʻz vaqtida amalga oshirilishi, shuningdek, Jamgʻarmaning maqsadli mablagʻlarini va tegishli komissiya toʻlovlarini belgilangan muddatlarda qaytarilishi yuzasidan nazorat oʻrnatish;

Jamgʻarmaga — davlat xaridi uchun paxta va gʻallaning umumiy hajmi boʻyicha, shuningdek, zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berish boʻyicha tijorat agentlari bilan Bosh bitim tuzish;

tijorat agentlariga — Jamgʻarma nomidan hamda u bilan kelishilgan holda, mahsulot xarid qilishda, kontraktatsiya shartnomalarini oʻz vaqtida tuzish, xarid qilinadigan qishloq xoʻjaligi mahsulotlari hisob-kitobini qilish, ularni xarid qilish, saqlash va qayta ishlashda belgilangan standartlarga rioya etilishi, shuningdek, zamonaviy, yuqori ishlab chiqarish quvvatiga ega qishloq xoʻjaligi texnikasining imtiyozli lizing shartlarida yetkazib berilishi doirasida nazoratni taʼminlash yuklansin.

9. Departament Toshkent shahri, Mustaqillik maydoni 5, Hukumat uyi binosiga joylashtirilsin.

Keyingi tahrirga qarang.

10. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Departamentni Hukumat aloqa va shahar aloqasi vositalari bilan, shuningdek Internet jahon axborot tarmogʻiga ulanishini belgilangan tartibda taʼminlasin.

11. Oʻzbekiston Respublikasi Moliya vazirligi Oʻzbekiston Respublikasi Adliya vazirligi hamda manfaatdor vazirliklar va idoralar bilan birgalikda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida bir oy muddatda Oʻzbekiston Respublikasi Vazirlar Mahkamasiga takliflar kiritsin.

12. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 27-iyun,

PQ-3096-son

Oʻzbekiston Respublikasi Prezidentining 2017-yil 27-iyundagi PQ-3096-sonli qaroriga
1-ILOVA

TARKIBI

Mirzayev Z.T.	—	Oʻzbekiston Respublikasi Bosh vazirining oʻrinbosari — Qishloq va suv xoʻjaligi vaziri, Jamgʻarma kengashi raisi
Xoʻjayev B.A.	—	Oʻzbekiston Respublikasi Moliya vaziri, Jamgʻarma kengashi raisining oʻrinbosari
Saidova G.K.	—	Oʻzbekiston Respublikasi Iqtisodiyot vaziri
Abdurazakov Sh.Sh.	—	Oʻzbekiston Respublikasi Vazirlar Mahkamasining Qishloq va suv xoʻjaligi, qishloq xoʻjaligi mahsulotlarini qayta ishlash va isteʼmol tovarlari masalalari axborot-tahlil departamenti mudiri
Ishmetov T.�.	—	Oʻzbekiston Respublikasi Markaziy banki raisining birinchi oʻrinbosari
Turdiyev S.	—	Oʻzbekiston fermyerlari Kengashi raisi
Kamalov A.A.	—	“Oʻzpaxtasanoateksport” xolding kompaniyasi boshqaruvi raisi
Xaydarov S.O.	—	“Oʻzdonmahsulot” aksiyadorlik kompaniyasi raisi
Otajonov N.S.	—	“Oʻzagrotexsanoatxolding” aksiyadorlik jamiyati boshqaruvi raisi
Tamikayev A.U.	—	“Agrobank” aksiyadorlik tijorat banki boshqaruvi raisi
Lavozimi boʻyicha	—	Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarini davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasini boshqarish departamenti direktori. Jamgʻarma kengashi kotibi.

Izoh: Jamgʻarma kengashi aʼzolari boshqa ishga oʻtgan taqdirda Kengash tarkibiga ushbu lavozimlarga yangidan tayinlangan shaxslar yoxud zimmasiga tegishli funksiyalarni bajarish yuklangan shaxslar kiritiladi.

Keyingi tahrirga qarang.

Oʻzbekiston Respublikasi Prezidentining 2017-yil 27-iyundagi PQ–3096-sonli qaroriga
2-ILOVA

TUZILMASI

Keyingi tahrirga qarang.

Oʻzbekiston Respublikasi Prezidentining 2017-yil 27-iyundagi PQ–3096-sonli qaroriga
3-ILOVA

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasining (keyingi oʻrinlarda — Jamgʻarma) maqomi, asosiy vazifalari, funksiyalari, huquqlari va javobgarligini, shuningdek faoliyatini tashkil etish tartibini belgilaydi.

2. Jamgʻarma oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalari qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga, shuningdek boshqa qonun hujjatlariga amal qiladi.

3. Jamgʻarma oʻz faoliyatini davlat boshqaruvi boshqa organlari, mahalliy davlat hokimiyati organlari va boshqa tashkilotlar bilan hamkorlikda amalga oshiradi.

4. Jamgʻarma rivojlanayotgan va rivojlangan davlatlarning agrar sohasini moliyalashtirish boʻyicha tajribasini oʻrganish va keyinchalik uning ijobiy tomonini respublikada tatbiq etishda tegishli xalqaro tashkilotlar va moliyaviy institutlar bilan hamkorlik qiladi.

5. Quyidagilar Jamgʻarmani shakllantirishning asosiy manbalari hisoblanadi:

paxta tolasini eksport va ichki isteʼmolchilarga sotishdan tushadigan boʻnak, shuningdek ular yuzasidan yakuniy hisob-kitob qilishdan tushadigan mablagʻlar;

tasdiqlangan preyskurantdagi ulgurji narxlardan yuqori boʻlgan mablagʻlar, tegishli yil hosili paxta tolasini sotish yakunlari boʻyicha — ijobiy tafovutning toʻliq miqdordagi yakuniy summasi;

don, un va un mahsulotlarini sotish va qayta baholashdan, shuningdek mahsulotlar eksportidan tushgan valyuta mablagʻlarini erkin birja savdolari orqali sotishdan tushadigan mablagʻlar;

maqsadli ajratilgan mablagʻlarni qaytarishdan tushadigan tushumlar va ularga hisoblangan foizlar;

budjet tizimining budjetlari mablagʻlari;

Oʻzbekiston Respublikasi Markaziy bankining imtiyozli kreditlari;

Keyingi tahrirga qarang.

jalb etiladigan kreditlar;

xalqaro moliya institutlari grantlari va donor tashkilotlar mablagʻlari;

Jamgʻarmaning boʻsh qoldiq mablagʻlarini joylashtirishdan tushadigan daromadlar;

qonun hujjatlarida taqiqlanmagan boshqa manbalar.

6. Jamgʻarma mablagʻlaridan quyidagi maqsadlarda foydalaniladi:

davlat xaridi uchun yetishtiriladigan paxta va gʻalla hosilini oʻz vaqtida moliyalashtirish;

davlat xaridi uchun qishloq xoʻjaligi mahsulotlarini yetishtirishda ishtirok etadigan fermer xoʻjaliklari va boshqa qishloq xoʻjaligi tashkilotlariga zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berishni moliyalashtirish;

paxta tolasi, don va don mahsulotlarining tasdiqlangan preyskurantdagi ulgurji narxlardan past boʻlgan jahon narxlari amalda boʻlgan davrlardagi salbiy tafovutni qoplash;

paxta xomashyosini yetishtirishda fermer xoʻjaliklari foydalanishi zarur boʻlgan moddiy-texnika resurslari xaridi uchun tayyorlov tashkilotlarining xarajatlarini qoplash;

jalb etilgan kredit va unga hisoblangan foizlarni qaytarish;

rivojlanayotgan va rivojlangan davlatlarning agrar sohasini moliyalashtirish boʻyicha tajribasini keyinchalik uning ijobiy natijalarini respublikada joriy etish maqsadida oʻrganish;

Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarini davlat xaridi va qishloq xoʻjaligini texnika bilan jihozlashni maqsadli moliyalashtirish Jamgʻarmasini boshqarish departamenti (keyingi oʻrinlarda — Departament) faoliyatini taʼminlash xarajatlarini moliyalashtirish.

2-bob. Jamgʻarmaning asosiy vazifalari va funksiyalari

7. Quyidagilar Jamgʻarmaning asosiy vazifalari hisoblanadi:

davlat xaridi uchun yetishtiriladigan paxta va gʻalla hosili hisob-kitobini oʻz vaqtida moliyalashtirish;

davlat xaridi uchun qishloq hoʻjaligi mahsulotlarini yetishtirishda ishtirok etadigan fermer xoʻjaliklari va boshqa qishloq xoʻjaligi tashkilotlariga zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berishni ragʻbatlantirish uchun qaytarib berish asosida qarz mablagʻlari ajratish;

maqsadli ajratiladigan mablagʻlardan aniq va samarali foydalanilishini tizimli nazorat qilishni taʼminlash;

xarid qilinadigan mahsulot uchun hisob-kitoblarni taʼminlaydigan barcha boʻgʻinlar — Oʻzbekiston Respublikasi Moliya vazirligi, banklar, tayyorlov, taʼminotchi, xizmat koʻrsatuvchi, yetkazib beruvchi va lizing tashkilotlari, taʼminotchilar, shuningdek qishloq xoʻjaligi mahsuloti ishlab chiqaruvchilari faoliyatini muvofiqlashtirish;

zamonaviy axborot va kompyuter texnologiyalaridan foydalanish asosida hisob-kitob tizimini yanada takomillashtirish va joriy etishni moliyalashtirish;

rivojlanayotgan va rivojlangan davlatlarning agrar sohani moliyalashtirish boʻyicha tajribasini keyinchalik uning ijobiy natijalarini respublikada joriy etish maqsadida oʻrganish;

8. Jamgʻarma oʻziga yuklangan vazifalarni bajarish uchun quyidagi funksiyalarni amalga oshiradi:

Jamgʻarmaning daromadlari va xarajatlarining har yilgi balanslari loyihalarini ishlab chiqadi, belgilangan tartibda va muddatlarda Oʻzbekiston Respublikasi Vazirlar Mahkamasiga taqdim etadi;

Jamgʻarma mablagʻlari tushishini tahlil qiladi va oʻz vaqtida tushishini taʼminlaydi;

Departamentni saqlash xarajatlari smetasini ishlab chiqadi va tasdiqlash uchun Jamgʻarma kengashiga kiritadi;

Jamgʻarma daromadlari va xarajatlari hisobini yuritadi va uning ijrosi yuzasidan har oyda Vazirlar Mahkamasiga axborot taqdim etadi;

davlat ehtiyoji uchun xarid qilinadigan paxtaning umumiy hajmi boʻyicha — “Oʻzpaxtasanoat” aksiyadorlik jamiyati va uning hududiy filiallari bilan, gʻalla xarid qilish umumiy hajmi boʻyicha — “Oʻzdonmahsulot” aksiyadorlik kompaniyasi bilan, zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berish boʻyicha — “Oʻzagrolizing” aksiyadorlik jamiyati bilan bosh bitim tuzadi;

Keyingi tahrirga qarang.

Oʻzbekiston Respublikasi Qishloq va suv xoʻjaligi vazirligi bilan birgalikda har yilgi hosil uchun agrotexnologik xaritalardan kelib chiqqan holda paxta xomashyosi va gʻalla hosilini yetishtirish xarajatlarining har bir turini moliyalashtirish uchun ajratiladigan kreditlarning eng koʻn miqdori yuzasidan tavsiyalarni ishlab chiqadi va tasdiqlaydi;

davlat xaridi uchun yetishtiriladigan paxta xomashyosi va gʻalla hosili uchun yakuniy hisob-kitoblarni oʻz vaqtida, shuningdek Jamgʻarma mablagʻlaridan maqsadli va samarali foydalanilishi yuzasidan belgilangan tartibda nazoratni amalga oshiradi;

Jamgʻarma kengashiga jamgʻarma mablagʻlaridan maqsadli foydalanishni tekshirishlar jarayonida aniqlangan qonun buzilishlar va kamchiliklar toʻgʻrisidagi axborotni, shuningdek ularni bartaraf etish, Jamgʻarma agentlariga bosh kelishuv va qonun hujjatlarida nazarda tutilgan moliyaviy sanksiyalarni (jarimalar va penyalar) qoʻllash boʻyicha belgilangan tartibda takliflar kiritadi;

Jamgʻarma daromadlari va xarajatlari toʻgʻrisida Hukumat qarori loyihasini ishlab chiqadi va belgilangan tartibda Oʻzbekiston Respublikasi Vazirlar Mahkamasiga kiritadi.

3-bob. Jamgʻarmaning huquq va majburiyatlari

9. Jamgʻarma oʻziga yuklangan vazifa va funksiyalarni bajarish doirasida quyidagi huquqlarga ega:

davlat xaridi uchun yetishtiriladigan paxta va gʻalla hosili va zamonaviy yuqori unumli qishloq xoʻjaligi texnikasini imtiyozli lizing shartlarida yetkazib berishni moliyalashtirishga ajratilgan mablagʻlardan maqsadli foydalanish boʻyicha taftish va tekshirishlarni oʻtkazish uchun Oʻzbekiston Respublikasi Moliya vazirligining Nazorat-taftish Bosh boshqarmasi va uning hududiy boshqarmalarini jalb etish;

xizmat koʻrsatuvchi tijorat banklaridan Jamgʻarma mablagʻlarining harakati toʻgʻrisidagi maʼlumotlarni olish;

jamgʻarmaning moliya (“Agrobank” aksiyadorlik tijorat banki) va tijorat (“Oʻzpaxtasanoat” aksiyadorlik jamiyati, “Oʻzdonmahsulot” aksiyadorlik kompaniyasi) agentlaridan — Jamgʻarma mablagʻlaridan foydalanish boʻyicha yillik buxgalteriya va statistika hisobotlarini olish;

“Oʻzagrolizing” aksiyadorlik jamiyatidan har yilgi buxgalteriya va statistika hisobotlarini, davlat xaridi uchun qishloq xoʻjalik mahsulotlarini yetishtirishda ishtirok etadigan fermer xoʻjaliklari va boshqa qishloq xoʻjaligi tashkilotlariga zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berish uchun qaytarish asosida ajratilgan qarz mablagʻlaridan maqsadli foydalanilishi toʻgʻrisidagi maʼlumotlarni olish;

Jamgʻarma mablagʻlaridan maqsadsiz foydalanilganligi aniqlanganda va ilgari ajratilgan mablagʻlar va ularga hisoblangan foizlar oʻz vaqtida qaytarilmaganda moliyalashtirishni toʻxtatish;

moliya va tijorat agentlari maqsadli mablagʻlarni qaytarish boʻyicha oʻz majburiyatlarini bajarmaganda, Jamgʻarmaga qarzdorlarning barcha hisobvaraqlaridagi mablagʻ qoldiqlarini koʻchirib olish hisobiga oʻz talablarini toʻla qondiradi.

Jamgʻarma qonun hujjatlariga muvofiq boshqa huquqlarga ham ega boʻlishi mumkin.

10. Jamgʻarma quyidagilarga majbur:

Davlat xaridi uchun yetishtiriladigan paxta va gʻalla hosili xarajatlari va yakuniy hisob-kitoblarni oʻz vaqtida moliyalashtirishni taʼminlash;

Jamgʻarma mablagʻlaridan maqsadli va samarali foydalanilishini doimiy nazorat qilish;

Jamgʻarma daromadlarining istiqboldagi koʻrsatkichlari bajarilishini tahlil qilish va mablagʻlarning kelib tushishiga salbiy taʼsir qilgan aniqlangan omillar asosida ularni bartaraf etish boʻyicha tegishli choralar koʻrish.

4-bob. Jamgʻarma kengashi

11. Jamgʻarma kengashi Jamgʻarmaning yuqori organi hisoblanadi. Jamgʻarma kengashining shaxsiy tarkibi Oʻzbekiston Respublikasi Prezidentining qarori bilan tasdiqlanadi.

12. Jamgʻarma Kengashi:

Jamgʻarma faoliyatining asosiy yoʻnalishlarini belgilaydi;

Departament tomonidan taqdim etilgan Jamgʻarma balansini koʻrib chiqadi, qaror qabul qiladi va ularni tasdiqlash uchun belgilangan tartibda Oʻzbekiston Respublikasi Vazirlar Mahkamasiga kiritadi;

Departamentning, Oʻzbekiston Respublikasi Moliya vazirligi, Qishloq va suv xoʻjaligi vazirligi, “Oʻzpaxtasanoat” aksiyadorlik jamiyati, “Oʻzdonmahsulot” aksiyadorlik kompaniyasi va “Oʻzagrolizing” aksiyadorlik jamiyatining davlat xaridi uchun paxta va gʻalla hosili yetishtirish, zamonaviy, yuqori unumli qishloq xoʻjaligi texnikalarini imtiyozli lizing shartlarida yetkazib berish boʻyicha amalga oshirilayotgan ishlari, ajratilgan mablagʻlardan maqsadli foydalanilishi toʻgʻrisidagi hisobotlarini eshitadi;

Oʻzbekiston Respublikasi Vazirlar Mahkamasiga Jamgʻarmaning daromadlari va xarajatlarini shakllantirish tartibini takomillashtirishga doir takliflar kiritadi;

mehnatga haq toʻlash fondini shakllantirish, xodimlarni taqdirlash va moddiy ragʻbatlantirish, moddiy-texnika bazasini mustahkamlash va Departamentning koʻzda tutilmagan boshqa xarajatlarini moliyalashtirish tartibini tasdiqlaydi;

Oʻzbekiston Respublikasi Moliya vazirligining Nazorat-taftish Bosh boshqarmasiga aniqlangan holatlar boʻyicha tekshirish va taftishlar oʻtkazish boʻyicha koʻrsatma beradi, ularning natijasini koʻrib chiqadi, koʻrib chiqish yakuni boʻyicha tegishli qaror qabul qiladi va Departamentga bajarish uchun yuboradi.

5-bob. Departament

13. Departament Jamgʻarmaning ijro etuvchi organi, Jamgʻarmani boshqarish boʻyicha funksiyasini bajaruvchi hisoblanadi.

14. Departamentning tuzilmasi va shtatdagi xodimlari soni Oʻzbekiston Respublikasi Prezidentining qarori bilan tasdiqlanadi.

15. Departamentni saqlash xarajatlari Jamgʻarma mablagʻlari va qonun hujjatlarida taqiqlanmagan boshqa manbalar hisobidan amalga oshiriladi.

Departament davlat muassasasi shaklidagi yuridik shaxs hisoblanadi, mustaqil balansga, Oʻzbekiston Respublikasi Markaziy banki Toshkent shahar Bosh boshqarmasi Hisob-kitob kassa markazida milliy va chet el valyutasida tegishli maxsus hisobvaraqlarga, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhr va blankalarga ega boʻladi.

16. Departament Jamgʻarmaning daromadlari va xarajatlari ijrosi toʻgʻrisidagi buxgalteriya hisobotini tuzadi va uni belgilangan tartibda Jamgʻarma kengashiga taqdim etadi.

17. Departamentga Jamgʻarma kengashi tomonidan saylanadigan, Oʻzbekiston Respublikasi Vazirlar Mahkamasi tomonidan lavozimga tasdiqlanadigan va lavozimdan ozod etiladigan direktor boshchilik qiladi. Departament direktori maqomiga, moddiy taʼminot, ijtimoiy va transport xizmati koʻrsatish boʻyicha shart-sharoitlariga koʻra vazir oʻrinbosariga tenglashtiriladi.

18. Departament direktori:

Departament faoliyatiga umumiy rahbarlik qiladi va Jamgʻarmaga yuklangan vazifa va funksiyalarning bajarilishi uchun shaxsan javob beradi.

Davlat xaridi uchun yetishtiriladigan paxta va gʻalla hosili hisob-kitobini moliyalashtirishga ajratilgan, Jamgʻarmaning mablagʻlaridan foydalanishda, shuningdek, zamonaviy, yuqori ishlab chiqarish quvvatiga ega qishloq xoʻjaligi texnikasini imtiyozli lizing shartlarida yetkazib berishni ragʻbatlantirish uchun qaytarib berish asosida ajratilgan qarz mablagʻlaridan foydalanilishda vakolatlari boʻlmagan mansabdor shaxslarning aralashuvi yoʻlidagi urinishlari toʻgʻrisida tegishli axborotni qonun hujjatlariga muvofiq Jamgʻarma kengashiga kiritadi;

oʻtkazilgan tekshirish va taftishda aniqlangan holatlar boʻyicha Jamgʻarma kengashi qarorini ijrosini taʼminlaydi;

Departament tuzilmasiga xodimlarning cheklangan soni doirasida oʻzgartirishlar kiritadi;

Departamentning xarajatlar smetasi va shtatlar jadvalini tasdiqlaydi;

Departament xodimlarini belgilangan tartibda lavozimga tayinlaydi va lavozimdan ozod qiladi, shuningdek Departament xodimlarini ragʻbatlantirish boʻyicha qarorlar qabul qiladi;

Jamgʻarma mablagʻlarini shakllantirish va sarflash masalalariga oid tushuntirishlar beradi;

Ushbu Nizomga va boshqa qonun hujjatlariga muvofiq boshqa vakolatlarni amalga oshiradi.

19. Departament xodimlarining ish haqi qonun hujjatlarida belgilangan lavozim maoshi, mukofot, qushimcha va ustamalardan iborat.

Departament xodimlariga har yili bir marotaba ragʻbatlantirish yoʻli bilan koʻp yillik xizmat uchun ustamalar toʻlanadi. Koʻp yillik xizmat uchun ustamalar lavozim maoshiga koeffitsiyentlarda, ragʻbatlantirish koeffitsiyentini hisobga olgan holda hisoblanadi.

Ish staji Jamgʻarma kengashi tomonidan tasdiqlanadigan tartibga muvofiq ragʻbatlantiriladigan koʻp yillik xizmat uchun ustamalar belgilash huquqini beradi.

6-bob. Mintaqaviy inspektorlar

20. Jamgʻarmaning mintaqaviy inspektorlari “Oʻzpaxtasanoat” aksiyadorlik jamiyati hududiy filiallarining paxta xomashyosi va paxta mahsulotlari kontraktatsiyasi va hisob-kitobi markazlariga biriktirib qoʻyiladi va bevosita Departament shtatlarida turadi.

Keyingi tahrirga qarang.

21. “Oʻzpaxtasanoat” aksiyadorlik jamiyatining hududiy filiallari mintaqaviy inspektorlarni alohida xona, ofis jihozlari, “Agromarkaz” monitoring axborot bazasiga ulangan kompyuter va axborot-kommunikatsiya texnikalari bilan taʼminlaydi.

Keyingi tahrirga qarang.

22. Mintaqaviy inspektorlarga Jamgʻarma mablagʻlaridan belgilangan maqsadda foydalanilishi, toʻlovlarning oʻz vaqtida oʻtishi, hisob-kitoblarning toʻliq amalga oshirilishi yuzasidan davlat moliyaviy nazoratini taʼminlash vazifasi yuklanadi.

23. Mintaqaviy inspektorlar quyidagi huquqlarga ega:

moliya va tijorat agentlaridan tegishli maʼlumot va axborotlarni olish;

moliya va tijorat agentlarining mansabdor va masʼul shaxslaridan nazorat davomida paydo boʻladigan masalalar boʻyicha tushuntirishlar berishni, shuningdek nazorat natijalari boʻyicha rasmiylashtiriladigan hujjatlarni imzolashni talab qilish;

moliya va tijorat agentlari mansabdor va masʼul shaxslarining tushuntirishlar berish va nazorat natijalari boʻyicha rasmiylashtiriladigan hujjatlarni imzolashdan bosh tortganliklari toʻgʻrisida dalolatnoma tuzish va tegishli axborotni Departamentga taqdim etish.

7-bob. Jamgʻarmaning moliya va tijorat agentlari

24. “Agrobank” aksiyadorlik tijorat banki paxta va gʻalla yetishtirish, xarid qilish, shuningdek zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berishni moliyalashtirish boʻyicha Jamgʻarmaning moliya agenti hisoblanadi.

Jamgʻarmaning moliya agentiga maxsus ochiladigan maqsadli hisobvaraqlar orqali davlat xaridi uchun yetkazib beriladigan mahsulotlarga, shu jumladan zamonaviy, yuqori ishlab chiqarish quvvatiga ega qishloq xoʻjaligi texnikasini lizing shartlarida yetkazib berishga ajratiladigan mablagʻlardan maqsadli foydalanilishi va hisob-kitoblarning oʻz vaqtida amalga oshirilishi, shuningdek Jamgʻarmaning tegishli mablagʻlarini va tegishli komissiya toʻlovlarining belgilangan muddatlarda qaytarilishi yuzasidan nazorat oʻrnatish vazifasi yuklanadi.

25. “Agrobank” aksiyadorlik tijorat banki va uning filiallarida davlat xaridi uchun yetishtiriladigan paxta va gʻalla hosiliga, zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berishga Jamgʻarmadan ajratilgan mablagʻlardan maqsadli, samarali foydalanishini, toʻlovlarning oʻz vaqtida oʻtishini taʼminlaydigan va doimiy nazoratini olib boradigan boʻlimlar tashkil etiladi.

Ushbu boʻlimlarga Oʻzbekiston Respublikasi Markaziy bankning viloyat boshqarmalari boʻlim boshligʻi oʻrinbosarlari, “Agrobank” aksiyadorlik tijorat banki viloyat boshqarmalari boshliq oʻrinbosarlari, filiallarda boshqaruvchi oʻrinbosarlari bevosita rahbarlik qiladi, ular toʻlovlarning oʻz vaqtida oʻtishi, mablagʻlarning aniq maqsadli sarflanishi uchun shaxsan javob beradi.

Keyingi tahrirga qarang.

26. Quyidagilar Jamgʻarmaning tijorat agentlari hisoblanadi:

“Oʻzpaxtasanoat” aksiyadorlik jamiyati va uning hududiy filiallari — paxtani xarid qilish, saqlash, qayta ishlash va sotish boʻyicha;

Keyingi tahrirga qarang.

“Oʻzdonmahsulot” aksiyadorlik kompaniyasi — gʻallani xarid qilish, saqlash, qayta ishlash va sotish boʻyicha;

“Oʻzagrolizing” aksiyadorlik jamiyati — zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berish boʻyicha.

Jamgʻarma davlat xaridi uchun paxtaning umumiy hajmi boʻyicha — “Oʻzpaxtasanoat” aksiyadorlik jamiyati bilan, gʻallaning umumiy hajmi boʻyicha esa — “Oʻzdonmahsulot” aksiyadorlik kompaniyasi bilan, zamonaviy yuqori unumli qishloq xoʻjalik texnikasini imtiyozli lizing shartlarida yetkazib berish boʻyicha — “Oʻzagrolizing” aksiyadorlik jamiyati bilan Bosh bitim tuzadi.

Tijorat agentlari Jamgʻarma nomidan hamda u bilan kelishilgan holda mahsulot xarid qilish, kontraktatsiya shartnomalarining oʻz vaqtida tuzilishi, xarid qilinadigan qishloq xoʻjaligi mahsulotlari hisob-kitobini qilish, ularni xarid qilish, saqlash va qayta ishlashning belgilangan standartlariga rioya etilishi, shuningdek zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berish yuzasidan nazoratni taʼminlaydilar.

Tijorat agentlari tuzilgan Bosh bitimga asosan Jamgʻarma nomidan “Agrobank” aksiyadorlik tijorat banki ishtirokida oʻzining tayyorlov tashkilotlari orqali qishloq xoʻjaligi tashkilotlari bilan mahsulotni sotib olish yuzasidan oʻz vaqtida va asoslangan konfaktatsiya shartnomalari tuzilishini, maqsadli mablagʻlar va ularga hisoblangan foizlarni oʻz vaqtida qaytarilishini taʼminlaydilar, sotib olinayotgan mahsulot uchun toʻliq hisob-kitob qiladilar, mahsulotni sotib olishda, saqlash va qayta ishlashda belgilangan standartlarga rioya etilishi yuzasidan nazoratni, shuningdek Jamgʻarma bilan kelishilgan holda “Oʻzpaxtaeksport” aksiyadorlik jamiyati bilan paxta tolasini eksportga va ichki isteʼmolchilarga sotish boʻyicha shartnomalar tuzilishini taʼminlaydilar.

Keyingi tahrirga qarang.

Davlat xaridi uchun qishloq xoʻjaligi mahsulotlarini yetishtirishda ishtirok etadigan fermer xoʻjaliklari va boshqa qishloq xoʻjaligi tashkilotlariga zamonaviy, yuqori ishlab chiqarish quvvatiga ega qishloq xoʻjaligi texnikasini imtiyozli lizing shartlarida yetkazib berish uchun Jamgʻarmaning qaytarib berish asosida ajratilgan qarz mablagʻlari va ularga hisoblangan foizlarni oʻz vaqtida qaytarilishini taʼminlaydi.

8-bob. Jamgʻarma mablagʻlarini ajratish va ulardan foydalanish tartibi

27. Jamgʻarma mablagʻlari Jamgʻarma moliya agentiga Jamgʻarma bilan moliya va tijorat agentlari oʻrtasida tuzilgan Bosh bitimga asosan maxsus ochilgan maqsadli hisobvaraqlar orqali ajratiladi.

28. Tuzilgan Bosh bitimga muvofiq va maxsus ochiladigan maqsadli hisobvaraqlarni koʻllash orqali qilingan hisob-kitoblarga asosan:

tijorat agentlari moliya agenti orqali olingan Jamgʻarmaning maqsadli mablagʻlarini xizmat koʻrsatuvchi banklar orqali tayyorlov tashkilotlariga yuboradilar;

tayyorlov tashkilotlari tushgan mablagʻlarni qishloq xoʻjaligi tashkilotlaridan davlat ehtiyojlari uchun xarid qilinayotgan mahsulotlar uchun hisob-kitob qilishga ishlatadilar.

“Oʻzagrolizing” aksiyadorlik jamiyati tushgan mablagʻlarni zamonaviy, yuqori unumli qishloq xoʻjaligi texnikasi ishlab chiqarishni ragʻbatlantirishga ishlatadi.

29. Tayyorlov tashkilotlari qishloq xoʻjaligi tashkilotlari bilan tuzilgan kontraktatsiya shartnomalariga muvofiq, sugʻurta tashkilotlari bilan sugʻurtalash shartnomalarini tuzgan holda mablagʻlarni quyidagi maqsadlarga sarflanishini taʼminlaydilar:

amalda yetkazib berilgan gʻalla qiymatining 100 foizi miqdorida hisob-kitob qilish;

Oʻzbekiston Respublikasi Prezidenti va Hukumati qarorlarida belgilangan miqdorlarda paxta xomashyosi uchun hisob-kitob qilish;

davlat xaridi uchun yetishtiriladigan mahsulotlarning qoʻshimcha hajmi uchun hisob-kitob qilish.

9-bob. Bank hisobvaraqlari, Jamgʻarma hisobvaraqlariga mablagʻlarni kiritish va hisobini yuritish

30. Etkazib beriladigan mahsulot va qishloq xoʻjaligi texnikasi hisob- kitobi uchun Jamgʻarma mablagʻlarini hisobga kiritish va hisobi Oʻzbekiston Respublikasi Markaziy banki Toshkent shahar Bosh boshqarmasida ochiladigan maxsus hisobvaraqlarda quyidagilarni moliyalashtirish uchun yuritiladi:

shartnomalarda koʻrsatilgan hajmda paxta xomashyosi va gʻalla yetishtirish;

zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berish.

31. Kreditlarni qaytarish uchun Jamgʻarma mablagʻlarini jamlash va ularning hisobi mahsulotlar va qishloq xoʻjaligi texnikalarining turlari boʻyicha Oʻzbekiston Respublikasi Markaziy banki Toshkent shahar Bosh boshqarmasida ochiladigan maxsus hisobvaraqlarda yuritiladi.

32. Xalqaro moliyaviy institutlar grantlari va donor tashkilotlar mablagʻlari Oʻzbekiston Respublikasi Markaziy banki Toshkent shahar Bosh boshqarmasida ochiladigan maxsus valyuta hisobvaraqlarida yuritiladi.

33. Qishloq xoʻjaligi mahsulotlarini sotib olish boʻyicha tuzilgan kontraktatsiya shartnomalaridagi hajmlarni xarid qilishni moliyalashtirish uchun Jamgʻarmaning maxsus hisobvaraqlariga quyidagi mablagʻlar kirim qilinadi:

a) paxta tolasi boʻyicha:

paxta tolasini eksport va ichki isteʼmolchilarga sotishdan tushadigan boʻnak va yakuniy hisob-kitob mablagʻlari “Oʻzpaxtasanoat” aksiyadorlik jamiyatining hududiy filiallari maxsus hisobvaraqlariga;

Keyingi tahrirga qarang.

tasdiqlangan preyskurantdagi ulgurji narxlardan yuqori boʻlgan mablagʻlar, tegishli yil hosili paxta tolasini sotish yakunlari boʻyicha — ijobiy tafovutning toʻliq miqdordagi yakuniy summasi;

Keyingi tahrirga qarang.

maqsadli mablagʻlarni qaytarish uchun maxsus hisobvaraqda jamlangan vaqtincha boʻsh mablagʻlar;

qonun hujjatlarida taqiqlanmagan boshqa mablagʻlar;

b) gʻalla boʻyicha:

don, un va un mahsulotlarini sotish va qayta baholashdan, shuningdek ushbu mahsulotlar eksportidan tushgan valyuta mablagʻlarini erkin birja savdolari orqali sotishdan tushadigan mablagʻlar;

maqsadli mablagʻlarni qaytarish uchun maxsus hisobvaraqda jamlangan vaqtincha boʻsh mablagʻlar;

qonun hujjatlarida taqiqlanmagan boshqa mablagʻlar kirim qilinadi.

34. “Oʻzagrolizing” aksiyadorlik jamiyati tomonidan davlat xaridi uchun yetishtiriladigan qishloq xoʻjaligi mahsulotlarini yetishtirishda ishtirok etadigan fermer xoʻjaliklari va boshqa qishloq xoʻjaligi tashkilotlariga zamonaviy, yuqori unumli qishloq xoʻjalik texnikasini imtiyozli lizing shartlarida yetkazib berishni moliyalashtirishga ajratilgan qarz mablagʻlari va unga hisoblangan foizlarni jamlash Jamgʻarmaning maxsus hisobvaraqlarida yuritiladi.

10-bob. Maqsadli mablagʻlarni qaytarish

35. Jamgʻarmaning maqsadli mablagʻlarini qaytarish Jamgʻarmaning maqsadli mablagʻlarni qaytarish hisobvaraqlariga moliya agentidan davlat xaridi uchun tijorat agentlari tomonidan xarid qilinadigan qishloq xoʻjaligi mahsulotlarini hisob-kitob qilishdan va yetkazib berilgan zamonaviy, yuqori ishlab chiqarish quvvatiga ega qishloq xoʻjaligi texnikasi uchun tushadigan mablagʻlar hisobidan Jamgʻarmaning maxsus hisobiga tushiriladi.

36. Moliya agenti va uning filiallari tomonidan Jamgʻarmaning maqsadli mablagʻlarini qaytarish, “Oʻzpaxtasanoat” aksiyadorlik jamiyati va uning hududiy filiallarining paxta tolasini, “Oʻzdonmahsulot” aksiyadorlik kompaniyasining don, un va un mahsulotlarni sotishdan tushgan mablagʻlari, shuningdek “Oʻzagrolizing” aksiyadorlik jamiyati zamonaviy, yuqori unumli qishloq xoʻjaligi texnikalarini imtiyozli lizing shartlarida yetkazib berishdan olgan daromadlari (asosiy qarz va foizlari bilan) hisobiga amalga oshiriladi.

“Oʻzpaxtasanoat” aksiyadorlik jamiyatining hududiy filiallarida va “Oʻzdonmahsulot” aksiyadorlik kompaniyasining tashkilotlarida, paxta tolasi, don, un va un mahsulotlarini sotishdan, “Oʻzagrolizing” aksiyadorlik jamiyatining esa lizing xizmatidan tushgan mablagʻlarni jamlash maqsadida “Jamgʻarma bilan maqsadli hisob-kitob qilish uchun maxsus hisobvaraqlar” hisobvaraqlari ochiladi.

Paxta tolasi, don, un va un mahsulotlari sotishdan, shuningdek zamonaviy, yuqori unumli qishloq xoʻjaligi texnikasini imtiyozli lizing shartlarida yetkazib berishdan va unga hisoblangan foizlardan tushgan barcha pul tushumlari ushbu hisobvaraqlarga kirim qilinadi va Jamgʻarma mablagʻlaridan avval ajratilgan maqsadli mablagʻlarni moliya agentiga qaytarish uchun ishlatiladi.

Keyingi tahrirga qarang.

37. Moliya va tijorat agentlari belgilangan jadvallarga muvofiq Jamgʻarmaning maqsadli mablagʻlarini qaytarish boʻyicha oʻz majburiyatlarini bajarmasa yoki toʻla bajarmasa, Jamgʻarmaga qarzdorlarning barcha hisobvaraqlaridagi mablagʻ qoldiqlarini koʻchirib olish hisobiga oʻz talablarini toʻla qondirish huquqi beriladi.

11-bob. Jamgʻarma mablagʻlaridan foydalanishini va sotib olinayotgan mahsulot sifatini nazorat qilish

38. Jamgʻarmadan ajratiladigan mablagʻlarni maqsadga muvofiq ishlatish, qishloq xoʻjaligi tashkilotlari tomonidan yetkazib berilgan mahsulotlarga, yetkazib berilgan moddiy-texnika resurslari va koʻrsatilgan xizmatlar, bajarilgan ishlar uchun toʻliq hisob-kitob qilishni oʻz vaqtida amalga oshirish javobgarligi kontraktatsiya shartnomalarini bajarishda ishtirok etayotgan tijorat banklari va qishloq xoʻjaligi tashkilotlari rahbarlariga yuklanadi.

39. Tijorat banklari, “Oʻzpaxtasanoat” aksiyadorlik jamiyati, “Oʻzdonmahsulot” aksiyadorlik kompaniyasi, “Oʻzagrolizing” aksiyadorlik jamiyati va ularning hududiy filiallari va tashkilotlari rahbarlari, shuningdek, qishloq xoʻjalik tashkilotlarining rahbarlari va bosh buxgaltyerlari Jamgʻarma mablagʻlarini maqsadga muvofiq ishlatmaganligi, hisob-kitob qilish tartibini buzganligi uchun qonun hujjatlarida belgilangan tartibda javobgarlikka tortiladilar.

40. Jamgʻarma mablagʻlarining maqsadli sarflanishi, toʻlovlar va hisoblarni toʻliq hamda oʻz vaqtida amalga oshirish ustidan nazorat qilish Oʻzbekiston Respublikasi Moliya vazirligining Nazorat-taftish bosh boshqarmasi va uning hududiy boʻlinmalari tomonidan amalga oshiriladi.

41. Davlat xaridi uchun yetishtiriladigan mahsulotlarni sotib olish, saqlash va qayta ishlash, shuningdek qishloq xoʻjaligi texnikalarini yetkazib berish sifatini nazorat qilish:

paxta xomashyosi va paxta tolasi boʻyicha — Oʻzbekiston Respublikasi Vazirlar Mahkamasi huzuridagi “Sifat” Oʻzbekiston paxta tolasini sertifikatlash markazi tomonidan;

Keyingi tahrirga qarang.

gʻalla boʻyicha — Oʻzbekiston Respublikasi Vazirlar Mahkamasi huzuridagi Davlat don inspeksiyasi tomonidan;

qishloq xoʻjaligi texnikasi boʻyicha — Oʻzbekiston Respublikasi Vazirlar Mahkamasi huzuridagi Oʻzbekiston qishloq xoʻjaligi texnikasi va texnologiyalarini sertifikatlash va sinash davlat markazi tomonidan amalga oshiriladi.

12-bob. Yakunlovchi qoida

42. Jamgʻarmani qayta tashkil etish va tugatish qonun hujjatlarida belgilangan tartibda amalga oshiriladi.

Keyingi tahrirga qarang.