Hujjat kuchini yo‘qotgan " " 09.07.2018
Hujjat 31.10.2002 00 sanasi holatiga
Amaldagi versiyaga o‘tish
Oʻzbekiston Respublikasi Vazirlar Mahkamasining
qarori
OʻZBEKISTON BOLALAR SPORTINI RIVOJLANTIRISh JAMGʻARMASI FAOLIYATINI TAShKIL ETISh TOʻGʻRISIDA
 LexUZ sharhi
Mazkur qaror Oʻzbekiston Respublikasi Vazirlar Mahkamasining 2018-yil 5-iyuldagi 508-sonli “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Jismoniy tarbiya va sport sohasida davlat boshqaruvi tizimini tubdan takomillashtirish chora-tadbirlari toʻgʻrisida” 2018-yil 5-martdagi PF-5368-son Farmoni va Oʻzbekiston Respublikasi Prezidentining “Oʻzbekiston Respublikasi Jismoniy tarbiya va sport vazirligini tashkil etish toʻgʻrisida” 2018-yil 5-martdagi PQ-3583-son qarori)” qaroriga asosan oʻz kuchini yoʻqotgan.
Oʻzbekiston Respublikasi Prezidentining “Oʻzbekiston Bolalar sportini rivojlantirish jamgʻarmasini tuzish toʻgʻrisida” 2002-yil 24-oktabrdagi PF-3154-son Farmonini bajarish yuzasidan hamda Jamgʻarmaga yuklangan asosiy vazifalarni amalga oshirish uchun zarur shart-sharoitlar yaratish maqsadida Vazirlar Mahkamasi qaror qiladi:
1.1-ilovaga muvofiq vazirliklar, idoralar, korporatsiyalar, kompaniyalar, uyushmalar, boshqa xoʻjalik birlashmalari, banklar, xalqaro, jamoat va nohukumat tashkilotlari, xorijiy kompaniyalarning Bolalar sportini rivojlantirish jamgʻarmasi muassislari sifatida qatnashish toʻgʻrisidagi taklifiga rozilik berilsin.
Yoshlarning “Kamolot” ijtimoiy harakati, Oʻzbekiston Respublikasi Milliy olimpiya qoʻmitasi, Davlat jismoniy tarbiya va sport qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi, Sogʻliqni saqlash vazirligi, Oʻzbekiston Kasaba uyushmalari Federatsiyasi Kengashi bilan birgalikda Jamgʻarma va uning joylardagi tarkibiy boʻlinmalari faoliyatini tashkil etishda faol qatnashsinlar.
2. Bolalar sportini rivojlantirish jamgʻarmasining 2-ilovaga* muvofiq tarkibda Homiylik kengashi tuzilsin.
*2-ilova berilmaydi.
Oʻzbekiston Respublikasi Prezidenti respublika darajasida Jamgʻarma Homiylik kengashining raisi ekanligi maʼlumot uchun qabul qilinsin.
Qoraqalpogʻiston Respublikasi, viloyatlar va Toshkent shahrida Jamgʻarma mintaqaviy filiallarining homiylik kengashlari tuzilsin.
Belgilab qoʻyilsinki, Qoraqalpogʻiston Respublikasi, viloyatlar va Toshkent shahrida Joʻqorgʻi Kenges Raisi, viloyatlar va Toshkent shahar hokimlari tegishli ravishda mintaqaviy filiallar homiylik kengashlarining raislari hisoblanadilar.
Bolalar sport inshootlarining moddiy bazasini qurish boʻyicha qabul qilingan qarorlarning amalga oshirilishi yuzasidan masʼuliyat shahar va tumanlar hokimlarining tegishli oʻrinbosarlari zimmasiga yuklansin.
Shaharlar va tumanlar hokimliklari shtatlariga bolalar sportining sport bazasi shakllantirilishi va rivojlantirilishi uchun javob beradigan bittadan yetakchi mutaxassislar shtati kiritilsin.
Keyingi tahrirga qarang.
3. Quyidagilar:
Oʻzbekiston Bolalar sportini rivojlantirish jamgʻarmasi tuzilmasi, uning cheklangan xodimlari soni 18 kishidan iborat boʻlgan markaziy apparati tuzilmasi va mintaqaviy filiallarning namunaviy tuzilmasi 3, 4, 5 va 5a-ilovalarga muvofiq;
Oʻzbekiston Bolalar sportini rivojlantirish jamgʻarmasi toʻgʻrisidagi Nizom 6-ilovaga muvofiq maʼqullansin.
Belgilansinki, Jamgʻarma apparati va uning mintaqaviy filiallari taʼminoti Jamgʻarmaning oʻz mablagʻlari hisobiga amalga oshiriladi.
4. Jamgʻarmaning Homiylik kengashiga:
Jamgʻarma oldiga qoʻyilgan vazifalarni hal etishga manfaatdor davlat, nodavlat va jamoat tuzilmalarini, shuningdek xorijiy sheriklar mablagʻlarini jalb etishni taʼminlash;
bolalar jismoniy tarbiyasi va sportini rivojlantirishga izchil yondashuvlarni, shuningdek bolalar sport inshootlari loyihalarining namunaviy, ilmiy asoslangan negizda ishlab chiqilishini va joriy etilishini taʼminlovchi aniq chora-tadbirlarni amalga oshirish;
Jamgʻarmaga uning zimmasiga yuklangan vazifalarni bajarishda, uning moddiy-texnika va moliyaviy bazasini mustahkamlashda har tomonlama koʻmaklashish;
Jamgʻarma tomonidan toʻplangan mablagʻlardan maqsadli (yoʻnalishlar boʻyicha) va qonuniy ravishda foydalanilishi ustidan qatʼiy nazoratni taʼminlash, Jamgʻarma ijro etuvchi direktorining va uning tuzilmalarining Jamgʻarma mablagʻlaridan foydalanilishi toʻgʻrisidagi hisobotini muntazam ravishda eshitish;
Jamgʻarmaning taʼsis konferensiyasini oʻtkazishda, uni nohukumat xalqaro tashkilot sifatida belgilangan tartibda roʻyxatdan oʻtkazishda va uning tuzilmalari rahbarlarini tasdiqlashda koʻmaklashish tavsiya qilinsin.
5. Oʻzbekiston Respublikasi Moliya vazirligi manfaatdor vazirliklar, idoralar va jamoat tashkilotlari bilan birgalikda Jamgʻarma direksiyasi bilan birgalikda Jamgʻarma mablagʻlarini shakllantirish va ulardan maqsadli foydalanish tartibini bir oy muddatda ishlab chiqsin va tasdiqlasin.
6. Oʻzbekiston Respublikasi Davlat jismoniy tarbiya va sport qoʻmitasi Jamgʻarma, Xalq taʼlimi vazirligi, Oliy va oʻrta maxsus taʼlim vazirligi, Sogʻliqni saqlash vazirligi, “Davarxitektqurilish” qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2005-yilgacha mamlakat aholi punktlarida bolalar sport komplekslarini joylashtirish va rivojlantirish sxemasini 2003-yil 1-yanvargacha ishlab chiqsin hamda tasdiqlash uchun taqdim etsin, bunda ularning hududlar boʻyicha oqilona joylashtirilishini, shuningdek zamonaviy talablarga muvofiq texnika bilan jihozlanishini nazarda tutsin.
7. Oʻzbekiston Respublikasi “Davarxitektqurilish” qoʻmitasi koʻrsatib oʻtilgan talablarga muvofiq bolalarning ijtimoiy va yoshi xususiyatlarini hamda bolalar va yoshlarning jismoniy tarbiya-sport tayyorgarligiga ehtiyojini, shuningdek bolalar sport komplekslarining sanitariya-gigiyena va maishiy sharoitlariga qoʻyiladigan yuksak talablarni hisobga oluvchi bolalar sport komplekslarining bazaviy namunaviy loyihalari tender asosida ishlab chiqilishini tashkil etsin.
Jamgʻarma bolalar sport komplekslari bazaviy namunaviy loyihalarining buyurtmachisi etib belgilansin, bosh loyihalashtirish tashkiloti funksiyalari “Davarxitektqurilish” qoʻmitasining “OʻzLITTI” aksiyadorlik jamiyatiga yuklansin.
Keyingi tahrirga qarang.
Belgilansinki, ekspertizadan oʻtmagan va “Davarxitektqurilish” qoʻmitasi bilan kelishilmagan bolalar sport komplekslarini qurish qatʼiy taqiqlanadi.
8. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda Jamgʻarmaning mintaqaviy filiallarini joylashtirish, ularni oʻz funksiyalarini bajarishlari uchun mebel va zarur texnika, aloqa vositalari bilan taʼminlash chora-tadbirlarini koʻrsinlar.
Toshkent shahar hokimligi Oʻzbekiston bolalar sportini rivojlantirish jamgʻarmasi ijro etuvchi direksiyasini joylashtirish uchun bir oy muddatda bino ajratsin.
9. “Toshshaharyoʻlovchitrans” uyushmasi shartnoma asosida Jamgʻarma direksiyasini xizmat avtotransporti bilan taʼminlasin, Oʻzbekiston aloqa va axborotlashtirish agentligi esa Jamgʻarma buyurtmanomasiga koʻra Jamgʻarma markaziy apparatini va uning mintaqaviy filiallarini zarur aloqa, shu jumladan Hukumat aloqasi vositalari bilan jihozlasin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2002-yil 31-oktabr,
374-son
Vazirlar Mahkamasining
2002-yil 31-oktabrdagi 374-son qaroriga
1-ILOVA
Bolalar sportini rivojlantirish jamgʻarmasi muassislarining
ROʻYXATI
1. Oʻzbekiston Respublikasi Davlat jismoniy tarbiya va sport qoʻmitasi
Keyingi tahrirga qarang.
2. Oʻzbekiston Respublikasi Milliy olimpiya qoʻmitasi
3. Oʻzbekiston Respublikasi Sogʻliqni saqlash vazirligi
4. Oʻzbekiston Respublikasi Xalq taʼlimi vazirligi
5. Oʻzbekiston Respublikasi Oliy va oʻrta maxsus taʼlim vazirligi
6. Oʻzbekiston Respublikasi Moliya vazirligi
7. Oʻzbekiston Respublikasi Davlat mulki qoʻmitasi
Keyingi tahrirga qarang.
8. Davlat soliq qoʻmitasi
9. Matbuot va axborot agentligi
10. Oʻzbekiston Teleradiokompaniyasi
11. Oʻzbekiston Respublikasi Markaziy banki
12. Oʻzbekiston Respublikasi Tashqi iqtisodiy faoliyat milliy banki
13. “Asaka” banki
14. “Oʻzsanoatqurilishbank”
15. “Oʻzuyjoyjamgʻarmabank”
Keyingi tahrirga qarang.
16. “Paxta-bank”
Keyingi tahrirga qarang.
17. “Oʻzbekinvest” kompaniyasi
18. “Oʻzbekturizm” milliy kompaniyasi
19. “Oʻzbekiston havo yoʻllari” milliy aviakompaniyasi
20. “Oʻzbekiston temir yoʻllari” davlat-aksiyadorlik kompaniyasi
21. “Oʻzdonmahsulot” davlat-aksiyadorlik korporatsiyasi
22. “Oʻzpaxtasanoat” uyushmasi
Keyingi tahrirga qarang.
23. “Oʻzbekneftgaz” milliy xolding kompaniyasi
24. “Oʻzbekenergo” davlat-aksiyadorlik kompaniyasi
25. “Qizilqumnodirmetalloltin” davlat konserni
Keyingi tahrirga qarang.
26. Olmaliq kon-metallurgiya kombinati
27. “Oʻzbekyengilsanoat” kompaniyasi
28. “Oʻzkimyosanoat” davlat-aksiyadorlik kompaniyasi
29. “Oʻzfarmsanoat” davlat konserni
30. “Oʻzavtosanoat” uyushmasi
31. “Yogʻmoytamakisanoat” uyushmasi
Keyingi tahrirga qarang.
32. “Oziqovqatsanoat” uyushmasi
Keyingi tahrirga qarang.
33. “Oʻzeltexsanoat” uyushmasi
34. “Oʻzavtoyoʻl” davlat konserni
35. “Oʻzbeksavdo” kompaniyasi
Keyingi tahrirga qarang.
36. Oʻzbekbirlashuv kompaniyasi
Keyingi tahrirga qarang.
37. “Oʻzulgurjisavdo” aksiyadorlik kompaniyasi
38. Yoshlarning “Kamolot” ijtimoiy harakati
Keyingi tahrirga qarang.
39. “Sogʻlom avlod uchun” jamgʻarmasi
40. Oʻzbekiston bolalar jamgʻarmasi
41. “Vatanparvar” tashkiloti
42. Oʻzbekiston Kasaba uyushmalari Federatsiyasi Kengashi
43. “Mahalla” jamgʻarmasi
44. “Kurash” xalqaro uyushmasi
45. “Tasviriy oyina” ijodiy uyushmasi
46. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari
Xorijiy firmalar, banklar va kompaniyalarning vakillari
Vazirlar Mahkamasining
2002-yil 31-oktabrdagi 374-son qaroriga
3-ILOVA
Oʻzbekiston Bolalar sportini rivojlantirish jamgʻarmasi
tuzilmasi
Keyingi tahrirga qarang.
Vazirlar Mahkamasining
2002-yil 31-oktabrdagi 374-son qaroriga
4-ILOVA
Bolalar sportini rivojlantirish jamgʻarmasi markaziy apparatining
TUZILMASI
Keyingi tahrirga qarang.
Vazirlar Mahkamasining
2002-yil 31-oktabrdagi 374-son qaroriga
5-ILOVA
Bolalar sportini rivojlantirish jamgʻarmasining mintaqaviy
TUZILMASI
Keyingi tahrirga qarang.
Keyingi tahrirga qarang.
Vazirlar Mahkamasining
2002-yil 31-oktabrdagi 374-son qaroriga
5a-ILOVA
Bolalar sportini rivojlantirish jamgʻarmasi mintaqaviy filialining
NAMUNAVIY TUZILMASI
Keyingi tahrirga qarang.
Keyingi tahrirga qarang.
Vazirlar Mahkamasining
2002-yil 31-oktabrdagi 374-son qaroriga
6-ILOVA
Oʻzbekiston Bolalar sportini rivojlantirish jamgʻarmasi toʻgʻrisida
NIZOM
I. Umumiy qoidalar
1. Oʻzbekiston Bolalar sportini rivojlantirish jamgʻarmasi (keyingi oʻrinlarda Jamgʻarma deb ataladi) Oʻzbekiston Respublikasi Prezidentining “Oʻzbekiston Bolalar sportini rivojlantirish jamgʻarmasini tuzish toʻgʻrisida” 2002-yil 24-oktabrdagi PF-3154-son Farmoni bilan tashkil etilgan.
2. Jamgʻarma oʻz faoliyatini Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmonlari va farmoyishlariga, Vazirlar Mahkamasining qarorlari va farmoyishlariga, ushbu Nizomga va Ustavga muvofiq amalga oshiradi.
3. Jamgʻarma u xalqaro nohukumat jamoat tashkiloti sifatida davlat roʻyxatidan oʻtkazilgan vaqtdan boshlab yuridik shaxs huquqini oladi. Jamgʻarma xoʻjalik mustaqilligi asosida faoliyat koʻrsatadi, oʻz mol-mulkiga, mustaqil balansga, banklarda hisob raqamlariga, shu jumladan xorijiy valyutadagi hisob raqamlariga ega boʻladi. Oʻz nomidan mulkiy va nomulkiy huquqlarga ega boʻladi, tegishli majburiyatlar oladi.
4. Jamgʻarma faoliyatida jamoat tashkilotlari hamda mulkchilik shakllaridan qatʼi nazar korxonalar va xoʻjaliklarning mehnat jamoalari, muassasalar va ijodiy uyushmalar, vazirliklar, idoralar, uyushmalar, kompaniyalar va boshqa xoʻjalik birlashmalari, tijorat tuzilmalari, xorijiy va boshqa tashkilotlar, sogʻlom avlodni shakllantirishga oʻz hissasini qoʻshishni xohlovchi yuridik va jismoniy shaxslar ixtiyoriy asosda qatnashishlari mumkin.
5. Jamgʻarma faoliyati xayriya tusiga egadir. Uning mablagʻlari, ularning tushish manbalaridan qatʼi nazar, Jamgʻarmaning maqsadi va unga yuklangan vazifalarga erishish uchun sarflanadi.
Jamgʻarmaning tijorat va savdo-vositachilik faoliyati bilan shugʻullanishi taqiqlanadi.
6. Jamgʻarmaning yuridik manzili: Oʻzbekiston Respublikasi, Toshkent shahri.
II. Jamgʻarmaning maqsadi, asosiy vazifalari va faoliyati yoʻnalishlari
7. Oʻsib kelayotgan yosh avlodning jismoniy va maʼnaviy salomatligini shakllantirishning, ularga sogʻlom turmush tarziga intilish va sportga mehr-muhabbatni singdirishning gʻoyat muhim sharti sifatida bolalar ommaviy sportini rivojlantirishni taʼminlash Jamgʻarma faoliyatining maqsadi hisoblanadi.
8. Quyidagilar Jamgʻarmaning asosiy vazifalari hisoblanadi:
bolalar jismoniy tarbiya va sportini rivojlantirish borasida davlat siyosatini ishlab chiqish va amalga oshirishga, bolalar sportini aniq maqsad yoʻlida va barqaror avj oldirishga koʻmaklashish;
bolalarda sportga mehr uygʻotish, oʻsib kelayotgan yosh avlod ongida sport bilan shugʻullanish, sogʻlom turmush tarziga amal qilish, maʼnaviy va jismoniy kamolga intilish, ularni salbiy taʼsirdan himoya qilish hamda zararli odatlardan xalos etish, bolalarni barqaror feʼl-atvorli, Vatanga mehr-muhabbat va oʻz mamlakati uchun gʻurur-iftixor ruhida tarbiyalash borasidagi chora-tadbirlar kompleksini amalga oshirish;
birinchi navbatda qishloq joylarda bolalar jismoniy tarbiya va sportining moddiy bazasini shakllantirish, aholi manzilgohlarida zamonaviy bolalar sport komplekslari tarmogʻini barpo etish, ularni zamonaviy sport uskunalari hamda anjomlari bilan jihozlash, ulardan samarali foydalanishni taʼminlashga koʻmaklashish boʻyicha zarur moliyaviy va moddiy mablagʻlarni jamlash;
bolalarni jismoniy va maʼnaviy tarbiyalashning zamonaviy shakl va uslublarini, jinsi va yoshiga qarab bolalarga sport koʻnikmalarini singdirishning, sport sohasida iqtidorli bolalarni ixtisoslashtirilgan sport maktablari va markazlaridagi mashgʻulotlarga tanlab olishning ilmiy asoslangan tizimlarini ishlab chiqishni tashkil etish hamda ularni tadbiq qilishga koʻmaklashish;
shaharlarda va qishloq joylarda sport inshootlarini yanada rivojlantirish ularni mamlakatning aholi punktlarida oqilona joylashtirish hamda zamonaviy talablarga muvofiq texnika bilan jihozlash;
bolalarning jismoniy va ruhiy jihatdan uygʻun kamol topishini taʼminlashni nazarda tutgan holda tibbiyot muassasalari va tashkilotlari bilan oʻzaro yaqin hamkorlikni taʼminlash;
bolalar va yoshlarning ijtimoiy va yoshi xususiyatlarini hamda ularning jismoniy-sport tayyorgarligi turlariga ehtiyojlarini hisobga olish, joylarda Jamgʻarmaning sport fidoyilari ishlarini tashkil etish boʻyicha oʻquv-amaliy dasturlarini yaratish;
hudud aholisining zichligini, sport mashgʻulotiga jalb etiladigan bolalar soni, jinsi va yoshini eʼtiborga oladigan bolalar sport maydonchalari va komplekslarining ilmiy asoslangan namunaviy loyihalarini ishlab chiqishga koʻmaklashish;
bolalarni jismoniy tarbiyalashning ilmiy asoslangan zamonaviy tizimlari, shakl va uslublarini joriy etish, bolalar sporti boʻyicha ustozlar va pedagog kadrlarni mamlakatning yetakchi ilmiy hamda taʼlim markazlarida va chet ellarda tayyorlash, qayta tayyorlash hamda ularning malakasini oshirish borasida respublika Milliy olimpiya qoʻmitasi, sport federatsiyalari, klub va tashkilotlari bilan oʻzaro faol hamkorlik qilish;
bolalar ommaviy sportini rivojlantirish, istiqomat joylarida texnikaviy jihozlangan, zamonaviy bolalar sport komplekslarini barpo etish ahamiyatini keng targʻib qilishni tashkil etish va amalga oshirish, ushbu vazifalarni roʻyobga chiqarishga jamoatchilikni, fuqarolarning oʻzini oʻzi boshqarish organlarini, kichik va oʻrta biznes, xususiy tadbirkorlik vakillarini, korxona va tashkilotlarni, shu jumladan xalqaro tashkilotlarni faol jalb etish;
Keyingi tahrirga qarang.
mamlakatimiz hamda chet el investitsiyalarini, homiylik mablagʻlari va grantlarini bolalar-oʻsmirlar jismoniy tarbiya va sporti sohasiga keng koʻlamda jalb etish borasidagi ishlarni tashkil qilish;
iqtidorli yosh sportchilarni moddiy jihatdan qoʻllab-quvvatlashni amalga oshirish;
davlatlararo, xalqaro, shuningdek mintaqaviy tuzilmalar va tashkilotlar bilan xalqaro sport hamkorligida, jismoniy tarbiya-sogʻlomlashtirish, sport-ommaviy ishlar va xayriya faoliyati boʻyicha tajriba almashishda qatnashish;
Vatanimiz jismoniy tarbiya va sportini axborotlar bilan taʼminlash tizimini shakllantirish va rivojlantirish, ularni jahon axborot tarmogʻiga kiritish;
mintaqaviy jamgʻarmalarni tashkil etish va ularni zarur oʻquv-metodik hamda koʻrgazmali-rasmli materiallar bilan taʼminlash, ushbu ishga olimlarni, yuqori malakali mutaxassislarni jalb etish, noshirlik bazasini va ilmiy sohani rivojlantirish, davlat tilida lugʻatlar va maʼlumotnoma adabiyotlarni chop etish;
xoʻjalik faoliyatini tashkil etish, ustav vazifalarini bajarishga yordam beruvchi sugʻurta, tijorat, shuningdek kommunal-maishiy xizmatlar koʻrsatish.
III. Jamgʻarmaning huquqlari va majburiyatlari
9. Jamgʻarma yuklangan vazifalar va faoliyat yoʻnalishlarini taʼminlash uchun Oʻzbekiston Respublikasi qonun hujjatlariga muvofiq quyidagi huquqlarga ega:
ustavdagi maqsad va vazifalarni bajarishni taʼminlash uchun oʻz vakolatlari doirasida yuridik va jismoniy shaxslar bilan huquqiy hujjatlarni mustaqil ravishda tuzish;
bolalar sportini rivojlantirishning turli masalalari boʻyicha belgilangan tartibda tashabbus bilan chiqish, davlat hokimiyati va boshqaruvi organlariga takliflar kiritish;
ommaviy jismoniy tarbiya-sogʻlomlashtirish va sport tadbirlarini oʻtkazish, turli xil sport musobaqalarida, notijorat maqsadlaridagi tendyerlar va tanlovlarda qatnashish;
davlat, nodavlat va jamoat tashkilotlari, korxonalar, muassasalar hamda firmalar bilan birgalikda bolalar sportini va uning moddiy bazasini rivojlantirish boʻyicha oʻz loyihalari va dasturlarini amalga oshirish;
respublikaning va xorijiy mamlakatlarning korxonalari, tashkilotlari, hududiy organlari, shuningdek xalqaro tashkilotlar bilan oʻzaro foydali hamkorlikni rivojlantirish;
kontrakt asosida sport-pedagog kadrlarni, shu jumladan xorijiy mutaxassislarni, olimlarni jalb etgan holda, oʻqitish;
Jamgʻarmaning ustavdagi faoliyati sohasiga taalluqli masalalar boʻyicha seminarlar va konferensiyalar oʻtkazish;
Oʻzbekiston Respublikasi hududida qonun hujjatlariga muvofiq shoʻba korxonalar, qoʻshma korxonalar, ishlab chiqarish muassasalari va boshqa tashkilotlarni taʼsis etish;
mintaqalararo hamkorlikka koʻmaklashish;
zarur hollarda, ustavdagi vazifalarni hal etish uchun muassislarning va boshqa tashkilotlarning yordamidan: mol-mulkidan, boshqa mulkchilik obyektlaridan, shu jumladan intellektual mulkidan shartnomaviy asosda foydalanish;
koʻchar va koʻchmas mol-mulkni mulk qilib sotib olish;
qonun hujjatlarida nazarda tutilgan tartibda davlat hokimiyati va boshqaruvi organlari qarorlarini ishlab chiqishda qatnashish;
oʻz atributlarini (firma belgilarini) yaratish;
belgilangan tartibda banklarda hisob-kitob raqamlarini, shu jumladan valyuta hisob-kitob raqamlarini ochish, milliy va erkin almashtiriladigan valyutada bank kreditlari va ssudalar olish, oʻz nomidan shartnomalar va kontraktlar tuzish, mulkiy huquqlarga ega boʻlish, sudda daʼvogar va javobgar boʻlish;
faoliyatga mahalliy va xorijiy mutaxassislarni jalb etish;
sportga oid materiallarni nashr etish va tarqatish;
Jamgʻarmaning moddiy va moliyaviy mablagʻlaridan foydalanish ustidan nazoratni amalga oshirish;
yuridik va jismoniy shaxslarga tegishli konsultatsiya, axborot xizmatlari va boshqa xil xizmatlar koʻrsatish;
ommaviy axborot vositalarida oʻz faoliyati toʻgʻrisida xabarlar berish;
davlat, jamoat va xalqaro tashkilotlar bilan amaliy aloqalar bogʻlash.
10. Jamgʻarma quyidagilarga majbur:
oʻsib kelayotgan avlod oʻrtasida jismoniy tarbiya va sportni rivojlantirish davlat siyosati va dasturlarini amalga oshirishda faol qatnashish;
vakolatxonalarga, filiallarga hamda Jamgʻarma tomonidan tashkil etilgan boshqa tashkilotlarga oʻz faoliyati dasturlarini ishlab chiqishda har tomonlama koʻmaklashish va ularning ishlarini oʻz vaqtida nazorat qilish va muvofiqlashtirish;
Jamgʻarma tomonidan yoʻnaltiriladigan moliyaviy va moddiy mablagʻlardan ustavdagi vazifalarga muvofiq qatʼiy maqsadli foydalanilishini taʼminlash.
11. Jamgʻarma va uning Qoraqalpogʻiston Respublikasi, viloyatlar va Toshkent shahridagi mintaqaviy filiallari oʻz faoliyatida, eng avvalo, bolalar sport inshootlari qurilishi masalalarida shaharlar va tumanlar hokimlarining tegishli oʻrinbosarlari, shuningdek shaharlar va tumanlar hokimliklari shtatlariga yangidan kiritilgan, bolalar sporti sport bazalarining shakllantirilishi va rivojlantirilishi uchun javob beradigan yetakchi mutaxassislar bilan oʻzaro hamkorlik qiladi va ularga tayanadi.
Keyingi tahrirga qarang.
IV. Jamgʻarma qatnashchilari
12. Davlat, jamoat va nohukumat tashkilotlari, fuqarolarning oʻzini oʻzi boshqarish organlari, korporatsiyalar, kompaniyalar, uyushmalar va boshqa xoʻjalik birlashmalari, korxonalar, banklar, boshqa jamgʻarmalar, shu jumladan xorijiy jamgʻarmalar, shuningdek Jamgʻarmaning asosiy vazifalarini amalga oshirishda ixtiyoriy asosda qatnashuvchi yuridik va jismoniy shaxslar (rezidentlar va norezidentlar) Jamgʻarmaning qatnashchilari hisoblanadilar.
V. Boshqaruv organlari tuzilmasi
13. Jamgʻarma qatnashchilarining Konferensiyasi Jamgʻarmani boshqarishning yuqori organi hisoblanadi, Konferensiya Jamgʻarmaning ustavdagi faoliyati asosiy yoʻnalishlarini belgilaydi.
Konferensiyada Jamgʻarma boshqaruvi, boshqaruv raisi, taftish komissiyasi saylanadi, Jamgʻarma ijro etuvchi direktori tasdiqlanadi.
14. Jamgʻarma oldiga qoʻyilgan vazifalarni hal etishga manfaatdor davlat, nodavlat va jamoat tuzilmalarini va xorijiy sheriklarni jalb etishni taʼminlash, bolalar jismoniy tarbiyasi va sportini rivojlantirishga izchil yondashuvlarni taʼminlovchi aniq chora-tadbirlarni amalga oshirish, Jamgʻarma tomonidan ustavdagi faoliyati amalga oshirilishiga har tomonlama koʻmaklashish, uning moddiy-texnika va moliyaviy bazasini mustahkamlash, shuningdek Jamgʻarma tomonidan jalb qilinayotgan mablagʻlardan qatʼiy maqsadli foydalanilishini taʼminlash uchun Homiylik kengashi tuziladi.
Homiylik kengashi Jamgʻarmaning ustavdagi vazifalariga muvofiq Jamgʻarma boshqaruvi raisining hisobotini muntazam ravishda eshitib borishga va tasdiqlashga majbur.
15. Nazorat-taftish komissiyasi Jamgʻarma mablagʻlaridan maqsadli (yoʻnalishlar boʻyicha) va qonuniy foydalanilishini, Jamgʻarmaning, unga qarashli mintaqaviy filiallar va tarkibiy boʻlinmalarning moliya-xoʻjalik faoliyatini nazorat qiladi.
16. Boshqaruv raisi va aʼzolari Jamgʻarma qatnashchilari orasidan Konferensiya tomonidan saylanadi.
Jamgʻarma boshqaruvi raisi maqomi va moddiy-maishiy sharoitlariga koʻra vazir oʻrinbosariga tenglashtiriladi.
17. Jamgʻarma boshqaruvi raisi Jamgʻarma va uning mintaqaviy filiallari faoliyatiga rahbarlik qiladi va uning uchun javob beradi, Jamgʻarma nomidan ishonchnomasiz ish koʻradi, boshqa yuridik, shu jumladan xorijiy yuridik shaxslar bilan munosabatlarda uning nomidan vakillik qiladi, boshqaruv qarorlarini imzolaydi.
rais rahbarligida Boshqaruv:
Jamgʻarma faoliyatini uning faoliyati asosiy yoʻnalishlari boʻyicha muvofiqlashtiradi;
Jamgʻarma markaziy apparati, uning mintaqaviy filiallari va vakolatxonalari faoliyatiga umumiy rahbarlikni amalga oshiradi;
maqsadli dasturlar ishlab chiqilishi va amalga oshirilishini tashkil etadi;
turli tashkilotlarda, shu jumladan xorijiy tashkilotlarda Jamgʻarma manfaatlarini ifodalaydi.
18. Jamgʻarma markaziy apparati joriy faoliyatiga rahbarlikni ijro etuvchi direktor amalga oshiradi, u Jamgʻarma nomidan ishonchnomasiz ish koʻradi, oʻz vakolatlari doirasida buyruqlar chiqaradi, mehnat toʻgʻrisidagi qonun hujjatlariga muvofiq xodimlarni ishga qabul qiladi va ishdan boʻshatadi (Jamgʻarma boshqaruvi bilan kelishgan holda) shtatlar roʻyxatini, markaziy apparat va mintaqaviy filiallarning joriy taʼminotiga xarajatlar smetasini tasdiqlaydi, Jamgʻarma mablagʻlarini belgilangan tartibda tasarruf etadi, yuridik va jismoniy shaxslar bilan shartnomalar tuzadi.
19. Jamgʻarma mintaqaviy filiallari rahbarlari Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlarining tavsiyanomasiga koʻra, Homiylik kengashi bilan kelishgan holda, Jamgʻarma boshqaruvi tomonidan tayinlanadilar.
20. Jamgʻarma markaziy apparati shtatdagi xodimlari soni 18 kishidan (xizmat koʻrsatuvchi xodimlardan tashqari), mintaqaviy filiallarda esa — 3 kishidan iborat etib belgilanadi.
Keyingi tahrirga qarang.
21.Jamgʻarma apparati va uning mintaqaviy filiallari taʼminoti Jamgʻarmaning oʻz mablagʻlari hisobiga amalga oshiriladi.
VI. Jamgʻarmaning mol-mulki va moliyaviy mablagʻlari
22. Jamgʻarmaning mol-mulki asosiy vositalar va Jamgʻarma tomonidan Jamgʻarma qatnashchilari ulushlari hisobiga olingan boshqa aktivlardan tashkil topishi mumkin.
23. Jamgʻarmaning pul mablagʻlari:
davlat budjeti (respublika budjeti va mahalliy budjetlar) mablagʻlari;
Jamgʻarma muassislarining pul badallari;
Milliy olimpiya qoʻmitasi, sport federatsiyalari, tashkilotlari va klublarining pul mablagʻlari;
xorijiy mamlakatlar, xalqaro tashkilotlar va moliyaviy institutlarning grantlari va begʻaraz yordami;
budjetdan tashqari jamgʻarmalarning ajratmalari, xoʻjalik yurituvchi subyektlar, kichik va oʻrta biznes, xususiy tadbirkorlar, Oʻzbekiston Respublikasining ham rezidentlari va ham norezidentlari boʻlgan yuridik va jismoniy shaxslarning homiylik mablagʻlari;
Keyingi tahrirga qarang.
Jamgʻarma faoliyatidan, shuningdek Jamgʻarma oldiga qoʻyilgan vazifalarni hal etish maqsadida Jamgʻarma tomonidan taʼsis etilgan korxonalar va tashkilotlar daromadlari;
qonun hujjatlarida taqiqlanmagan boshqa tushumlar hisobiga shakllantiriladi.
24. Jamgʻarmaning har yilgi daromadlar va xarajatlar smetasi Jamgʻarma boshqaruvi taqdimnomasiga koʻra Homiylik kengashi tomonidan tasdiqlanadi.
Jamgʻarmaning pul mablagʻlari ustavdagi vazifalarni bajarishga, bolalar sportini rivojlantirishga doir tegishli davlat dasturlarida nazarda tutilgan tadbirlarga, shuningdek Jamgʻarma tomonidan amalga oshirilayotgan bolalarni sogʻlomlashtirish dasturlarini roʻyobga chiqarishda faol qatnashayotgan shaxslarni ragʻbatlantirishga sarflanadi.
25. Soliqlar, yigʻimlar va toʻlovlar Jamgʻarma tomonidan amaldagi qonun hujjatlariga muvofiq toʻlanadi.
26. Jamgʻarma va uning mintaqaviy filiallari oʻz majburiyatlari boʻyicha oʻzlariga tegishli barcha mol-mulk bilan javob beradilar.
Davlat Jamgʻarma majburiyatlari boʻyicha, Jamgʻarma esa davlat majburiyatlari boʻyicha javob bermaydi.
27. Jamgʻarmaning mulkiy huquqlari Oʻzbekiston Respublikasining jamoat nohukumat tashkilotlar uchun belgilangan qonun hujjatlariga muvofiq muhofaza qilinadi.
VII. Jamgʻarma faoliyatini toʻxtatish tartibi
28. Jamgʻarmaning faoliyati Jamgʻarma konferensiyasi qaroriga koʻra yoki Oʻzbekiston Respublikasining amaldagi qonun hujjatlarida nazarda tutilgan hollarda toʻxtatiladi.
29. Jamgʻarma ixtiyoriga berilgan binolar, asbob-uskunalar va boshqa mol-mulk ularning egalariga qaytariladi.
30. Jamgʻarmani tugatish yakunlangan, Jamgʻarma esa faoliyatini toʻxtatgan deb, bu toʻgʻrida davlat roʻyxatidan oʻtkazish reyestriga yozib qoʻyilgan paytdan boshlab, hisoblanadi.
Keyingi tahrirga qarang.

(Oʻzbekiston Respublikasi qonun hujjatlari toʻplami, 2002-y., 20-son, 160-modda; 2003-y., 15-16-son, 123-modda; 2004-y., 3-son, 31-modda, 20-son, 236-modda, 34-35-son, 394-modda; 2005-y., 22-son, 159-modda, 27-son, 191-modda; 2006-y., 22-son, 195-modda; 2009-y., 21-son, 252-modda; 2010-y., 18-19-son, 141-modda; 2013-y., 37-son, 485-modda; 2015-y., 52-son, 647-modda; 2016-y., 14-son, 132-modda; 2017-y., 37-son, 996-modda; Qonun hujjatlari maʼlumotlari milliy bazasi, 16.02.2018-y., 09/18/121/0711-son)