“Navoiy KMK” davlat korxonasining kadrlar salohiyatini yanada mustahkamlash, yuqori malakali mutaxassislarining kasbiy va moddiy manfaatdorligini oshirish, shuningdek ularning ijtimoiy muhofazasini kuchaytirish maqsadida Vazirlar Mahkamasi qaror qiladi:

1. “Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamgʻarmasi” davlat muassasasi xodimlarining ish haqiga quyidagi miqdorlarda tuman (hududiy) koeffitsiyentlari belgilansin:

1,60 — Navoiy viloyatining Zarafshon, Uchquduq shaharlarida, Tomdi, Uchquduq, Konimex, Nurota tumanlarida, Buxoro viloyatining Gʻijduvon, Peshku va Shofirkon tumanlarida, Xorazm viloyatining Tuproqqalʼa tumanida joylashgan boʻlinmalar xodimlari uchun;

1,30 — Samarqand viloyatining Nurobod shahrida, Qoʻshrabod, Nurobod, Paxtachi, Urgut tumanlarida, Jizzax viloyatining Gʻallaorol, Zomin va Forish tumanlarida, Navoiy viloyatining Navbahor, Qiziltepa va Xatirchi tumanlarida joylashgan boʻlinmalar xodimlari uchun;

1,20 — Navoiy viloyatining Navoiy shahrida va Karmana tumanida, Qashqadaryo viloyatining Shahrisabz shahrida, Kitob, Muborak va Koson tumanlarida, Toshkent viloyatining Angren va Olmaliq shaharlarida, Piskent va Ohangaron tumanlarida hamda Namangan viloyatining Pop tumanida joylashgan boʻlinmalar xodimlari uchun;

1,15 — Qoraqalpogʻiston Respublikasi Taxiatosh tumanida joylashgan boʻlinmalar xodimlari uchun.

2. Belgilab qoʻyilsinki:

“Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamgʻarmasi” davlat muassasasi xodimlarining ish haqiga tuman (hududiy) koeffitsiyentlarini hisoblashning cheklangan summasi Oʻzbekiston Respublikasi hududida belgilangan mehnatga haq toʻlashning eng kam miqdorining 2,11 baravarini tashkil etadi;

Vazirlar Mahkamasining “Mehnat bozorida mehnat munosabatlarini tartibga solishga doir qoʻshimcha chora-tadbirlar toʻgʻrisida” 2019-yil 6-sentabrdagi 743-son qarori 1-ilovasiga muvofiq tasdiqlangan Tabiiy-iqlim va maishiy sharoitlari ogʻir va noqulay boʻlgan joylarda ishlovchi xodimlar mehnatiga haq toʻlashga tuman koeffitsiyentlarini, shuningdek, ularga har yili beriladigan qoʻshimcha taʼtilning eng kam muddatini belgilash va qoʻllash tartibi toʻgʻrisidagi nizom “Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamgʻarmasi” davlat muassasasining xodimlariga nisbatan qoʻllanmaydi.

3. Xodimlarning ish haqiga koeffitsiyentlar belgilash bilan bogʻliq xarajatlar “Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamgʻarmasi” davlat muassasasi mablagʻlari hisobiga amalga oshirilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.