Hujjat 26.05.2000 00 sanasi holatiga
Amaldagi versiyaga o‘tish

Oʻzbekiston Respublikasi Vazirlar Mahkamasining

OʻZBEKISTON RESPUBLIKASIDA GOLFNI RIVOJLANTIRISH VA OMMALASHTIRISH CHORA-TADBIRLARI TOʻGʻRISIDA

Oʻzbekistonda aholi dam olishini uyushtirish va salomatligini mustahkamlashning yangi shakli sifatida golfni rivojlantirish va ommalashtirish, respublika milliy jamoasini tayyorlash hamda xalqaro maydonda sport aloqalarini kengaytirish maqsadida Vazirlar Mahkamasi qaror qiladi:

1. Vazirlar Mahkamasining “Dam olish va sportni rivojlantirish xalqaro korporatsiyasi” Oʻzbekiston-Amerika qoʻshma korxonasini tashkil etish toʻgʻrisida” 1996-yil 19-sentabrdagi 324-son qarori asosida Toshkent shahridagi Rohat koʻli hududida, xalqaro darajada musobaqalar oʻtkazish imkonini beradigan, xalqaro andozadagi Toshkent golf klubi qurilishi tugallanganligi va foydalanishga topshirilganligi maʼlumot uchun qabul qilinsin.

2. Oʻzbekiston Respublikasi Davlat jismoniy tarbiya va sport qoʻmitasi, Toshkent shahar hokimligi, Oʻzbekiston milliy olimpiya qoʻmitasi, “Oʻzbekiston havo yoʻllari” milliy aviakompaniyasi, Oʻzbekiston yoshlarining “Kamolot” jamgʻarmasi, “Oʻzbekturizm” milliy kompaniyasi, Tashqi iqtisodiy faoliyat milliy banki, “Asaka” banki, “Oʻzsanoatqurilishbank”, “Oʻzuyjoyjamgʻarmabank” hamda “Dam olish va sportni rivojlantirish xalqaro korporatsiyasi” Oʻzbekiston-Amerika qoʻshma korxonasining Oʻzbekiston golf uyushmasini tashkil etish toʻgʻrisidagi taklifi qabul qilinsin.

Belgilab qoʻyilsinki, golf uyushmasi oʻzini oʻzi boshqaradigan, oʻzini oʻzi mablagʻ bilan taʼminlanadigan, yuridik shaxs huquqiga ega boʻlgan, oʻz faoliyatini mustaqil ravishda amalga oshiradigan, barcha yuridik va jismoniy shaxslar uchun ochiq boʻlgan, Hukumatiga qarashli boʻlmagan jamoat tashkiloti hisoblanadi.

3. Oʻzbekiston golf uyushmasini tashkil etish boʻyicha tashkiliy qoʻmita tarkibi ilovaga * muvofiq tasdiqlansin.

* Ilova berilmaydi.

Tashkiliy qoʻmita belgilangan tartibda bir oy muddatda Oʻzbekiston golf uyushmasi taʼsis konferensiyasi oʻtkazilishini uning rahbar organlari shakllantirilishini va ustavi tasdiqlanishini taʼminlasin.

4. Maʼlumot uchun qabul qilinsinki, quyidagilar Oʻzbekiston golf uyushmasining asosiy vazifalari hisoblanadi:

aholi keng qatlamlarini sportning ushbu turi bilan shugʻullanishga jalb etish;

tashkil etiladigan golf klublarida golf bilan shugʻullanish uchun moddiy-texnik bazani mustahkamlashga keng doirada koʻmaklashish;

Oʻzbekistonda golfni rivojlantirishni muvofiqlashtirib borish va xalqaro maydonda Oʻzbekiston nomidan vakillik qilish;

Oʻzbekiston golf uyushmasining Osiyo va Jahon golf uyushmalari tomonidan tan olinishini taʼminlash uchun tadbirlar kompleksini amalga oshirish;

golfni rivojlantirish uchun mablagʻlarni jalb etish va taqsimlash, golf klublariga ularni asbob-anjomlar, jihozlar bilan taʼminlashda koʻmaklashish hamda ulardan samarali foydalanilishini nazorat qilib borish.

5. Belgilansinki, Uyushma va uning tarkibiy boʻlinmalari faoliyatini mablagʻ bilan taʼminlash aʼzolik va homiylik badallari, oʻtkaziladigan tadbirlardan tushgan daromadlar, shuningdek, amaldagi qonunchilikka zid boʻlmagan boshqa daromadlar hisobiga amalga oshiriladi.

6. Quyidagilar:

Oʻzbekiston golf uyushmasi va uning tarkibiga qiruvchi golf klublari Mahalliy soliqlarning barcha turlarini toʻlashdan besh yil muddatga ozod qilinsin, ushbu mablagʻlar golfni rivojlantirishga yoʻnaltirilsin;

“Dam olish va sportni rivojlantirish xalqaro korporatsiyasi” Oʻzbekiston-Amerika qoʻshma korxonasi oʻz ehtiyojlari uchun olib kelinadigan asbob-uskunalar va materiallar boʻyicha qoʻshilgan qiymati soligʻi toʻlashdan (2000-yil 1-yanvardan boshlab) 3 yil muddatga istisno tariqasida ozod qilinsin,

7. Belgilab qoʻyilsinki, Golf uyushmasining muassislari, shuningdek homiylari hisoblanadigan tashkilotlar va korxonalar jami daromadidan soliq solinadigan daromadlar (foyda)ni aniqlashda ularning Golf uyushmasini rivojlantirishga va golf boʻyicha musobaqalar oʻtkazishga yoʻnaltiriladigan mablagʻlari chegirib tashlanadi.

Keyingi tahrirga qarang.

8. Oʻzbekiston Respublikasi Ichki ishlar vazirligi Oʻzbekiston golf uyushmasi buyurtmanomalariga binoan, grinlarga karayu boʻyicha xorijiy mutaxassislarga, golf instruktorlariga va maydonlarga qarash uchun ixtisoslashtirilgan texnikani ishlatish va taʼminlash boʻyicha mexaniklarga, ularni davlat boji toʻlashdan ozod qilgan holda, vizalar berishni va ularning muddatini uzaytirishni, ularni yashash joylari boʻyicha vaqtinchalik roʻyxatdan oʻtkazishni va roʻyxatdan oʻtganlik muddatini uzaytirishni taʼminlasin.

Keyingi tahrirga qarang.

9. Oʻzbekiston golf uyushmasi masalalari boʻyicha ishlash uchun keluvchi grinlarga qarash boʻyicha xorijiy mutaxassislarga golf instruktorlariga va maydonlarga qarash uchun ixtisoslashtirilgan texnikani ishlatish va taʼmirlash boʻyicha mexaniklarga respublika hududida yashash va transportning barcha turlarida yurish uchun Oʻzbekiston Respublikasi fuqarolariga nazarda tutilgan tariflar boʻyicha haq toʻlash huquqi berilsin.

10. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

2000-yil 26-may,