Mamlakatimizda yuqori texnologiyali yangi ishlab chiqarish quvvatlarini tashkil etish, hududlarni raqobatdosh va eksportga yoʻnaltirilgan zamonaviy sanoat mahsulotlari ishlab chiqarishni oʻzlashtirishga yanada faol jalb qilish, ishlab chiqarish, muhandislik-kommunikatsiya, yoʻl-transport, ijtimoiy infratuzilma va logistika xizmatlarini jadal rivojlantirishni taʼminlash uchun toʻgʻridan-toʻgʻri xorijiy investitsiyalarni jalb etishni kengaytirishning eng muhim omili sifatida erkin iqtisodiy zonalarni izchil rivojlantirish borasida yanada qulay shart-sharoitlar yaratish maqsadida:

1. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligining “Navoiy” erkin industrial-iqtisodiy zonasi, “Angren” va “Jizzax” maxsus industrial zonalari nomini birxillashtirish maqsadida ularni “Navoiy”, “Angren” va “Jizzax” erkin iqtisodiy zonalar deb atash toʻgʻrisidagi taklifi qabul qilinsin.

2. Quyidagilar “Navoiy”, “Angren” va “Jizzax” erkin iqtisodiy zonalari (keyingi oʻrinda — erkin iqtisodiy zonalar) faoliyatini yanada rivojlantirishning asosiy yoʻnalishlari etib belgilansin:

xorijiy investorlarga mamlakatimiz iqtisodiyotining real sektorlariga investitsiya kiritishi uchun yanada qulay sharoitlar yaratish maqsadida erkin iqtisodiy zonalar uchun yagona huquqiy rejimni belgilash, soliq va bojxona imtiyozlari, preferensiyalarni birxillashtirish;

mahalliy mineral-xom ashyo resurslarini chuqur qayta ishlaydigan va yuqori qoʻshimcha qiymatga ega raqobatdosh mahsulotlar ishlab chiqaradigan yuqori texnologiyali va mahalliylashtiriladigan zamonaviy korxonalarni tashkil qilish uchun toʻgʻridan-toʻgʻri investitsiyalarni, avvalambor, xorijiy investitsiyalarni faol jalb etish, erkin iqtisodiy zonalarning muayyan sohaga ixtisoslashuvini qoʻllab-quvvatlash va ularda sanoat kooperatsiyasini rivojlantirish;

erkin iqtisodiy zonalarda “yagona darcha” tamoyili asosida barcha turdagi davlat xizmatlarini koʻrsatishga, jumladan, ruxsat berish tartib-taomillariga bosqichma-bosqich oʻtish;

ishlab chiqarish, muhandislik-kommunikatsiya, yoʻl-transport va ijtimoiy infratuzilmani jadal rivojlantirish, shuningdek, sifatli logistika xizmatlari koʻrsatish boʻyicha zamonaviy infratuzilmani shakllantirish;

oliy, oʻrta maxsus kasb-hunar taʼlimi muassasalarida erkin iqtisodiy zonalarning soha kadrlariga boʻlgan hozirgi va istiqboldagi ehtiyojlaridan kelib chiqib, ularning erkin iqtisodiy zonalarda joylashgan korxonalarda ishlab chiqarish amaliyotini oʻtashini nazarda tutgan holda, yuqori malakali mutaxassislarni tayyorlashni tashkil etish.

3. Oʻzbekiston Respublikasi Prezidentining 2014-yil 19-sentabrdagi R-4351-sonli farmoyishiga muvofiq tashkil etilgan Erkin iqtisodiy zonalar faoliyatini faollashtirishga qaratilgan chora-tadbirlarni tahlil qilish va ishlab chiqish komissiyasining erkin iqtisodiy zonalar hududida amalda qoʻllanilayotgan soliq va bojxona rejimlarini birxillashtirish hamda ushbu zonalar ishtirokchilarining quyidagilardan:

yer soligʻi, daromad soligʻi, yuridik shaxslar mulk soligʻi, obodonlashtirish va ijtimoiy infratuzilmani rivojlantirish soligʻi, mikrofirmalar va kichik korxonalar uchun yagona soliq toʻlovi, shuningdek, Respublika yoʻl jamgʻarmasi va Oʻzbekiston Respublikasi Moliya vazirligi huzuridagi budjetdan tashqari Umumtaʼlim maktablari, kasb-hunar kollejlari, akademik litseylar va tibbiyot muassasalarini rekonstruksiya qilish, kapital taʼmirlash va jihozlash jamgʻarmasiga majburiy ajratmalaridan;

oʻzining ishlab chiqarish ehtiyojlari uchun olib kelinadigan uskunalar, xom ashyo, material va butlovchi buyumlar, shuningdek, mamlakatimizda ishlab chiqarilmaydigan va loyihalarni amalga oshirish doirasida Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar boʻyicha olib kelinadigan qurilish materiallari uchun bojxona toʻlovlaridan ozod etish (bojxona rasmiylashtiruvi yigʻimlaridan tashqari) toʻgʻrisidagi taklifi qabul qilinsin:

Belgilansinki, mazkur bandda qayd etilgan bojxona imtiyozlari qoʻllangan holda olib kelingan uskunalar, xom ashyo, material va butlovchi buyumlar sotilgan yoki begʻaraz berilgan hollarda, ular olib kelingan paytdan boshlab uch yil davomida bojxona toʻlovlari qonunchilikda belgilangan tartibda toʻliq hajmda undiriladi.

4. Belgilab qoʻyilsinki, Farmonning 3-bandida koʻzda tutilgan imtiyozlar kiritilgan investitsiyalar hajmiga qarab 3 yildan 10 yil muddatgacha, jumladan:

300 ming AQSH dollaridan 3 million AQSH dollarigacha hajmdagi investitsiyalar — 3 yil muddatga;

3 million AQSH dollaridan 5 million AQSH dollarigacha hajmdagi investitsiyalar — 5 yil muddatga;

5 million AQSH dollaridan 10 million AQSH dollarigacha hajmdagi investitsiyalar — 7 yil muddatga;

10 million va undan koʻp AQSH dollari hajmidagi investitsiyalar soʻnggi 5 yilda amaldagi stavkalardan 50 foiz kam hajmdagi daromad soligʻi va yagona soliq toʻlovi stavkalari qoʻllangan holda — 10 yil muddatga beriladi.

5. “Angren” va “Jizzax” erkin iqtisodiy zonalari ishtirokchilari uchun shunday tartib joriy etilsinki, unga muvofiq erkin iqtisodiy zonalar ishtirokchilari:

erkin iqtisodiy zonalar faoliyati davomida eksportga yoʻnaltirilgan mahsulotlar ishlab chiqarish uchun olib kelinadigan xom ashyo, material va butlovchi buyumlar uchun bojxona toʻlovlari toʻlashdan (bojxona rasmiylashtiruvi yigʻimlaridan tashqari) ozod etiladi;

erkin iqtisodiy zonalar doirasida ishtirokchilar oʻrtasida tuzilgan shartnomalarga muvofiq xorijiy valyutada hisob-kitob qilish va toʻlash;

Oʻzbekiston Respublikasining boshqa xoʻjalik yurituvchi subyektlari — rezidentlari tomonidan yetkazib berilgan tovarlar, ishlar (xizmatlar) uchun xorijiy valyutada toʻlash, shuningdek, eksport va import qilinadigan tovarlar uchun oʻzlariga qulay boʻlgan toʻlash hamda hisob-kitob qilish shart va shakllaridan foydalanish huquqiga ega boʻladi.

6. “Navoiy” erkin industrial-iqtisodiy zonasi, “Angren” va “Jizzax” maxsus industrial zonalarining Maʼmuriy kengashlari tugatilib, ularning oʻrniga erkin iqtisodiy zonalar Maʼmuriy kengashi ilovaga* muvofiq tashkil etilsin.

6. Quyidagilar erkin iqtisodiy zonalar Maʼmuriy kengashining asosiy vazifalari etib belgilansin:

erkin iqtisodiy zonalar faoliyatini muvofiqlashtirish va davlat tomonidan tartibga solish;

korxona va tashkilotlarga — erkin iqtisodiy zonalar ishtirokchilari maqomini berish toʻgʻrisida qarorlar qabul qilish;

erkin iqtisodiy zonalar ishtirokchilari boʻlgan xoʻjalik subyektlariga erkin iqtisodiy zonalar hududida amalga oshirish uchun istiqbolli investitsiya loyihalarini ishlab chiqish boʻyicha kompleks xizmatlar koʻrsatish, xorijiy investitsiyalarni jalb qilish, moliyalashtirish manbalarini belgilash, mustahkam kooperatsiya aloqalarini yoʻlga qoʻyish va ishlab chiqarilgan mahsulotlarni eksportga yoʻnaltirishga koʻmaklashish;

erkin iqtisodiy zonalarda loyihalarni amalga oshirishga masʼul vazirlik va idoralar, xoʻjalik birlashmalarining loyiha, tender hamda shartnoma hujjatlarini oʻz vaqtida tayyorlash va ularni ekspertizadan oʻtkazish, shuningdek, joylardagi davlat hokimiyati organlarining erkin iqtisodiy zonalar faoliyati bilan bogʻliq masalalarga oid ishlarini muvofiqlashtirish;

erkin iqtisodiy zonalarda obyektlar qurish va ularni oʻz vaqtida foydalanishga topshirishga doir tasdiqlangan investitsiya loyihalari hayotga tatbiq etilishini tizimli asosda nazorat qilish;

erkin iqtisodiy zonalarda transport, muhandislik-kommunikatsiya va ijtimoiy infratuzilmani jadal rivojlantirish dastur va loyihalarini ishlab chiqishni tashkil etish;

erkin iqtisodiy zonalarning samarali faoliyat koʻrsatishini tashkil etish, erkin iqtisodiy zonalar direksiyalarini shakllantirish va ular faoliyati ustidan nazorat qilish boʻyicha kompleks chora-tadbirlarni amalga oshirish.

7. Erkin iqtisodiy zonalar Maʼmuriy kengashiga:

erkin iqtisodiy zonalar ishtirokchilariga faoliyat koʻrsatmayotgan korxonalar va davlat tasarrufida boʻlgan mulklarni investitsiya majburiyatlarini qabul qilish sharti bilan “nol” qiymatda sotish toʻgʻrisida qarorlar qabul qilish;

erkin iqtisodiy zonalarning xizmatlar koʻrsatish va qonunchilikda taqiqlanmagan boshqa tushumlar, shuningdek, Oʻzbekiston Respublikasi Moliya vazirligi bilan kelishgan holda, ular foydalanayotgan va boshqaruvidagi yerlar, bino va inshootlarni ijaraga berishdan tushadigan tushumlar hisobidan shakllantiriladigan oʻz budjetlarini tashkil qilish;

ushbu budjetlar doirasida erkin iqtisodiy zonalar infratuzilmasini rivojlantirish va faoliyati samaradorligini oshirishga xizmat qiladigan Erkin iqtisodiy zonalar jamgʻarmalarini tashkil etish huquqlari berilsin.

8. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi boshqa manfaatdor vazirlik va idoralar, aksiyadorlik kompaniyalari va uyushmalar bilan birgalikda bir oy muddatda Oʻzbekiston Respublikasi Vazirlar Mahkamasiga:

erkin iqtisodiy zonalar Maʼmuriy kengashi toʻgʻrisidagi nizomni;

“Navoiy”, “Angren” va “Jizzax” erkin iqtisodiy zonalari faoliyatini yanada takomillashtirish va kengaytirish boʻyicha qonunchilikni takomillashtirish, ishlab chiqarish, muhandislik-kommunikatsiya va transport infratuzilmasini va ushbu zonalarni rivojlantirishning boshqa masalalariga taalluqli aniq tadbirlar koʻzda tutilgan chora-tadbirlar dasturini tasdiqlash uchun taqdim etsin.

9. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Adliya vazirligi hamda boshqa manfaatdor vazirlik va idoralar bilan birgalikda qonun hujjatlariga ushbu Farmondan kelib chiquvchi oʻzgartish va qoʻshimchalar toʻgʻrisida ikki oy muddatda Oʻzbekiston Respublikasi Vazirlar Mahkamasiga takliflar kiritsin.

10. Mazkur Farmonning ijrosini nazorat qilish Oʻzbekiston Respublikasi Bosh vazirining birinchi oʻrinbosari R. Azimov zimmasiga yuklansin.