Mikrokreditlashning yangi usullarini joriy etish yoʻli bilan aholining tadbirkorlik faoliyatida yanada faol qatnashishi uchun qoʻshimcha shart-sharoitlar yaratish, shuningdek aholining ijtimoiy nochor tabaqalarini qoʻllab-quvvatlash va xususiy tadbirkorlikni rivojlantirish uchun donor tashkilotlarning mablagʻlarini keng jalb etish maqsadida Vazirlar Mahkamasi qaror qiladi:

1. Kichik va xususiy tadbirkorlikni rivojlantirishni ragʻbatlantirish boʻyicha respublika muvofiqlashtiruvchi Kengashining ilovaga* muvofiq xalqaro moliya tashkilotlari, xorijiy hukumatga qarashli va hukumatga qarashli boʻlmagan notijorat tashkilotlar (donor tashkilotlar)ning begʻaraz mablagʻlarini (grantlarini) jalb etish yoʻli bilan mikrokreditlash tizimini rivojlantirish toʻgʻrisidagi taklifi maʼqullansin.

2. Oʻzbekiston Respublikasi Mehnat va aholini ijtimoiy muhofaza qilish vazirligi xususiy tadbirkorlikni mikrokreditlash dasturlarini rivojlantirishning, shuningdek donor tashkilotlar ishtirokidagi loyihalarning muvofiqlashtiruvchisi etib belgilansin, unga mikrokreditlash loyihalari boʻyicha axborotlarni har chorakda umumlashtirish va tahlil etish funksiyalari yuklansin.

3. Belgilab qoʻyilsinki:

mikrokreditlar har bir qarz oluvchiga ekvivalenti 3 ming AQSh dollaridan ortiq boʻlmagan naqd mablagʻ bilan milliy valyutada muddatlilik, haq toʻlash va qaytarish shartlarida beriladi;

Oʻzbekiston Respublikasi rezidentlari — yuridik va jismoniy shaxslar mikrokreditlash boʻyicha qarz oluvchilar hisoblanadi;

donor tashkilotlar, shuningdek Oʻzbekiston Respublikasi rezidentlari va norezidentlari boʻlgan notijorat tashkilotlar mablagʻ bilan taʼminlovchi tashkilotlar hisoblanadi;

notijorat tashkilotlarning oʻz mablagʻlari, donor tashkilotlar tomonidan notijorat tashkilotlarga mikrokreditlash uchun beriladigan grantlar, shuningdek notijorat tashkilotlarning mikrokreditlash bilan bogʻliq faoliyatdan olinadigan daromadlari mikrokreditlash mablagʻlari manbalari hisoblanadi;

qarz oluvchilarni tanlash, mikrokreditlash loyihalari doirasida ularga mablagʻlar berish va mablagʻlarni qaytarish tartibi mablagʻ bilan taʼminlovchi tashkilotlar tomonidan belgilanadi;

donor tashkilotlarning mikrokreditlash manbai sifatida foydalaniladigan erkin almashtiriladigan valyutadagi grant mablagʻlari tegishli vakolatli bankning korrespondentlik hisob raqamiga oʻtkaziladi va banklararo valyuta savdolarida belgilangan tartibda sotilishi kerak;

mikrokreditlash uchun milliy valyutadagi naqd mablagʻ banklar tomonidan notijorat tashkilotlarning hisob raqamlaridagi mavjud mablagʻlar doirasida beriladi.

4. Notijorat tashkilotlarning mazkur qarorga muvofiq mikrokreditlashdan olingan daromadlari 2006-yil 1-yanvargacha daromad (foyda) soligʻi toʻlashdan ozod qilinsin, boʻshayotgan mablagʻlardan operatsiya xarajatlarini qoplash, oʻz moddiy-texnika bazasini rivojlantirish, shuningdek mikrokreditlashni kengaytirish uchun maqsadli foydalanilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.