Oʻzbekiston Respublikasi Prezidentining “Temir yoʻl transportini monopoliyadan chiqarish va aksiyalashtirish chora-tadbirlari toʻgʻrisida” 2001-yil 2-martdagi PF-2815-son Farmonini bajarish yuzasidan va “Oʻzbekiston temir yoʻllari” davlat-aksiyadorlik kompaniyasining boshqaruv tizimini takomillashtirish, temir yoʻl transporti korxonalari va tashkilotlarini xususiylashtirish jarayonlarini chuqurlashtirish, tarmoq korxonalarini rivojlantirish, texnika bilan qayta jihozlash va zamonaviylashtirish uchun investitsiyalar, shu jumladan xorijiy investitsiyalarni jalb etish maqsadida Vazirlar Mahkamasi qaror qiladi:

1. “Oʻzbekiston temir yoʻllari” davlat-aksiyadorlik kompaniyasining tuzilmasi va uning ijro etuvchi apparati tuzilmasi 1 va 1a-ilovalarga* muvofiq maʼqullansin.

“Oʻzbekiston temir yoʻllari” davlat-aksiyadorlik kompaniyasi ijro etuvchi apparati shtatdagi xodimlarining cheklangan soni 164 nafardan iborat etib (xizmat koʻrsatuvchi xodimlardan tashqari) tasdiqlansin.

“Oʻzbekiston temir yoʻllari” davlat-aksiyadorlik kompaniyasi boshqaruvi raisiga zarurat boʻlganda kompaniya ijro etuvchi apparati tuzilmasiga xodimlarning shtatda belgilangan soni doirasida oʻzgartirishlar kiritishga ruxsat berilsin.

2. “Oʻzbekiston temir yoʻllari” davlat-aksiyadorlik kompaniyasi 2001-yil 1-sentabrgacha “Oʻzbekiston temir yoʻllari” davlat-aksiyadorlik kompaniyasining yuk va yoʻlovchilar tashish boʻyicha hududiy direksiyalari hamda Orolboʻyi boʻlimini belgilangan tartibda tugatish va ularning negizida 1-ilovada nazarda tutilgan funksional tarkibiy boʻlinmalar va korxonalar tashkil etishga doir kompleks chora-tadbirlarni amalga oshirsin.

3. Temir yoʻl transporti korxonalari va tashkilotlarini monopoliyadan va davlat tasarrufidan chiqarish hamda aksiyalashtirish masalalari boʻyicha maxsus komissiya (Sultonov), Oʻzbekiston Respublikasi Davlat mulki qoʻmitasi:

asosiy fondlarning 2001-yil 1-yanvardagi holatiga koʻra qayta baholanishini hisobga olgan holda 2-ilovaga muvofiq korxonalar, tashkilotlar va tarkibiy boʻlinmalarning mol-mulki qiymati hisobiga 2001-yil 1-iyungacha “Oʻzbekiston temir yoʻllari” davlat-aksiyadorlik kompaniyasining ustav fondini shakllantirsinlar. Kompaniyaning aksiyalari emissiyasi prospekti belgilangan tartibda roʻyxatdan oʻtkazilishi taʼminlansin;

“Oʻzbekiston temir yoʻllari” davlat-aksiyadorlik kompaniyasi bilan birgalikda 3-ilovaga* muvofiq korxonalar va tashkilotlarni bosqichma-bosqich ochiq aksiyadorlik jamiyatlariga aylantirish chora-tadbirlarini amalga oshirsinlar;

4-ilovaga* muvofiq xoʻjalik jamiyatlarining ustav fondlaridagi davlatga tegishli ulushlarni toʻliq sotsinlar, shu jumladan xususiy mulk sifatida sotsinlar;

5-ilovaga* muvofiq xalq isteʼmol tovarlari ishlab chiqaruvchi korxonalar va tashkilotlar hamda ijtimoiy infratuzilma obyektlari 2001-2002-yillarda yuz foiz xususiylashtirilishini, shu jumladan xususiy mulk sifatida sotilishini taʼminlasinlar;

“YOL-ELEKTR-MEXANIK USTAXONALARI”, “TOSHTEMIRYOLLOYHA”, “Eyvalekmaxsustemirbeton”, “Jumurtau karyeri” va “Granit” aksiyadorlik jamiyatlari aksiyalarining davlat paketlarini “Oʻzbekiston temir yoʻllari” davlat-aksiyadorlik kompaniyasiga ishonchli boshqaruvga bersinlar.

4. Belgilansinki:

“Oʻzbekiston temir yoʻllari” davlat-aksiyadorlik kompaniyasini ochiq aksiyadorlik jamiyatiga aylantirish jarayonida chiqarilgan aksiyalar davlat mulki hisoblanadi va sotilmaydi yoki boshqacha tarzda oʻzgaga berilmaydi, garovga qoʻyilishi mumkin emas, shuningdek ikkilamchi qimmatli qogʻozlar chiqarishni taʼminlashga xizmat qilishi mumkin emas;

mazkur qarorga muvofiq tashkil etiladigan Yagona dispetcherlik markazi, “Oʻzbekiston temir yoʻllari” davlat-aksiyadorlik kompaniyasining yoʻllardan foydalanish va ularni saqlash, energiya bilan taʼminlash, signalizatsiya va aloqa tizimlari, tashish hujjatlarini qayta ishlash, lokomotiv xoʻjaligi, halokat-tiklash ishlari boʻyicha funksional tarkibiy boʻlinmalari xususiylashtirilmaydi;

yuk va yoʻlovchilar tashuvchi, shuningdek yuk joʻnatuvchilar va yoʻlovchilarga transport-ekspeditorlik va servis xizmatlari koʻrsatuvchi korxonalar, vokzallarga xizmat koʻrsatuvchi servis kompaniyalari, umumiy ovqatlanish, turizm, chiptalarni uyga yetkazib berish xizmatlari koʻrsatuvchi va boshqa xizmatlar boʻyicha kompaniyalar turli tashkiliy-huquqiy shakllarda tashkil etilishi mumkin va ular raqobat asosida faoliyat koʻrsatadilar;

“Oʻztemiryoʻlyoʻlovchi”, “Yoʻlreftrans” “Oʻztemiryoʻlkonteyner”ning daromadlariga “Oʻzbekiston temir yoʻllari” davlat-aksiyadorlik kompaniyasida markazlashtirilgan tartibda daromad (foyda) soligʻi va qoʻshilgan qiymat soligʻi solinadi. Koʻrsatib oʻtilgan norma, shuningdek ishlab chiqarish korxonalari uchun belgilangan toʻlov stavkalari qoʻllanilgan holda, Respublika yoʻl jamgʻarmasiga va budjetdan tashqari Pensiya jamgʻarmasiga toʻlovlarni hisoblab chiqish va toʻlash tartibiga ham joriy etiladi.

5. Oʻzbekiston Respublikasi Davlat mulki qoʻmitasi “Oʻzbekiston temir yoʻllari” davlat-aksiyadorlik kompaniyasi obyektlarini xususiylashtirishdan olingan mablagʻlarni (qonun hujjatlariga muvofiq korxonalar ixtiyorida qoldiriladigan mablagʻlardan tashqari) temir yoʻl transporti korxonalarini texnika bilan qayta jihozlash dasturini amalga oshirishda maqsadli foydalanish uchun qaytarmaslik asosida istisno tariqasida “Oʻzbekiston temir yoʻllari” davlat-aksiyadorlik kompaniyasiga yoʻnaltirsin.

6. Belgilab qoʻyilsinki:

6-ilovaga muvofiq tarkibda 11 kishidan iborat boʻlgan Kompaniya kengashi “Oʻzbekiston temir yoʻllari” davlat-aksiyadorlik kompaniyasining yuqori boshqaruv organi hisoblanadi. Vazirlar Mahkamasi Rayosati bir hafta muddatda Kompaniya kengashining shaxsiy tarkibiga doir takliflarni Vazirlar Mahkamasiga kiritsin;

“Oʻzbekiston temir yoʻllari” davlat-aksiyadorlik kompaniyasi boshqaruvi rais va uning 5 nafar oʻrinbosaridan, shu jumladan 1 nafar bosh menejer-bosh muhandisdan va raisning 1 nafar birinchi oʻrinbosaridan iborat boʻladi. Rais va uning oʻrinbosarlari Vazirlar Mahkamasi tomonidan tasdiqlanadi.

7. “Oʻzbekiston temir yoʻllari” davlat-aksiyadorlik kompaniyasi Oʻzbekiston Respublikasi Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2002-yil 1-yanvargacha belgilangan tartibda:

uy-joy fondi va kommunal sohaning muhandislik kommunikatsiyalari ular joylashgan joyda qabul qilib olish-topshirish dalolatnomalari asosida hududiy kommunal foydalanish birlashmalari balanslariga;

7-ilovaga* muvofiq obyektlar viloyatlar va shaharlar hokimliklari, vazirliklar va idoralar ixtiyoriga berilishini taʼminlasin.

8. Vazirlar Mahkamasining 1994-yil 14-noyabrdagi 551-son qarorining 3-bandi, 4-bandining birinchi va ikkinchi xatboshi oʻz kuchini yoʻqotgan deb hisoblansin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T.Sultonov zimmasiga yuklansin.

1. Yoʻl xoʻjaligi boshqarmasi

2. Signalizatsiya va aloqa markazi

3. Elektr taʼminoti markazi

4. Lokomotivlardan foydalanish boshqarmasi

5. Vagon deposi

6. Yagona dispetcherlik markazi

7. Halokat-tiklash boshqarmasi

8. “Temiryoʻlyonilgʻitaʼmin” boshqarmasi

9. Harbiylashtirilgan qoʻriqlash boshqarmasi

10. “Oʻztemiryoʻlhisob-kitob”

11. “Oʻztemiryoʻlyuktrans” yuk tashish boshqarmasi

12. “Oʻztemiryoʻlmashtaʼmir” korxonasi

13. “Oʻztemiryoʻlyoʻlovchi” korxonasi

14. Toshkent yoʻlovchi tashish vagonlarini taʼmirlash zavodi

15. Statistika, informatika va hisoblash texnikalari markazi

16. “Oʻzbektemiryoʻlekspeditsiya” korxonasi

17. “Yoʻlreftrans” (refrijerator vagon deposi)

18. “Oʻztemiryoʻlkonteyner” korxonasi

19. Kapital qurilish direksiyasi

20. Kompaniya binolari va inshootlariga xizmat koʻrsatish direksiyasi

21. “Transtreyl” qoʻshma korxonasi*

22. “Lokkolorsintez” qoʻshma korxonasi*

23. “Interneyshnl” AJ qoʻshma korxonasi *

24. “Oʻzbekiston temir yoʻllari” davlat-aksiyadorlik kompaniyasi balansidagi mulk qiymati **

Oʻzbekiston Respublikasi Vazirlar Mahkamasi vakili

Davlat mulki qoʻmitasi vakili

Moliya vazirligi vakili

Adliya vazirligi vakili

Oʻzbekiston Respublikasi hukumatining vakolatli vakillari:

“Oʻzbekneftgaz” milliy xolding kompaniyasidan

“Oʻzqurilishmateriallari” aksiyadorlik kompaniyasidan

“Oʻzmetkombinat” birlashmasidan

“Oʻzdavpaxtasanoatsotish” davlat-aksiyadorlik uyushmasidan

“Oʻzdonmahsulot” davlat korporatsiyasidan

“Oʻzkimyosanoat” uyushmasidan

“Oʻzdavtemiryoʻlnazorat” inspeksiyasidan