Oʻzbekiston Respublikasi Prezidentining “Kommunal xizmatni boshqarish tizimini yanada isloh qilish toʻgʻrisida” 2000-yil 19-dekabrdagi PF-2791-son Farmoniga hamda Oʻzbekiston Respublikasi Vazirlar Mahkamasining “Kommunal xizmat koʻrsatish tizimi faoliyatini tashkil etishni takomillashtirish toʻgʻrisida” 2000-yil 21-dekabrdagi 493-son qaroriga muvofiq Vazirlar Mahkamasi qaror qiladi:

1. Quyidagilar:

“Oʻzkommunxizmat” agentligi toʻgʻrisidagi Nizom 1-ilovaga muvofiq;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining hududiy kommunal-foydalanish birlashmasi toʻgʻrisidagi Namunaviy nizom 2-ilovaga muvofiq tasdiqlansin.

2. Belgilab qoʻyilsinki, “Oʻzkommunxizmat” agentligi oʻz vakolati doirasida Oʻzbekiston Respublikasi Kommunal xizmat koʻrsatish vazirligining huquqiy vorisi hisoblanadi.

3. Vazirlar Mahkamasining 3-ilovaga muvofiq qarorlariga oʻzgartirish va qoʻshimchalar kiritilsin.

4. Oʻzbekiston Respublikasi Vazirlar Mahkamasining 4-ilovaga muvofiq qarorlari oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasining Bosh vaziri Kotibiyatiga yuklansin.

1. Keyingi oʻrinlarda Agentlik deb yuritiladigan “Oʻzkommunxizmat” agentligi oʻz faoliyatida Oʻzbekiston Respublikasi Vazirlar Mahkamasiga boʻysunadi.

2. Agentlik oʻz faoliyatida Oʻzbekiston Respublikasining Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda mazkur Nizomga amal qiladi.

3. Agentlik kommunal xizmat koʻrsatishni isloh qilish, bozor iqtisodiyoti sharoitlarida kommunal xizmat koʻrsatishni samarali boshqarish boʻyicha tajriba oʻrganish va ayirboshlash masalalari yuzasidan xalqaro tashkilotlarda Oʻzbekiston Respublikasining manfaatlarini ifodalashga vakil qilingan organ hisoblanadi.

4. Agentlik yuridik shaxs hisoblanadi, Oʻzbekiston Respublikasining Davlat gerbi tasviri tushirilgan, oʻz nomi davlat tilida yozilgan muhrga va bank hisob raqamlariga egadir.

5. Quyidagilar agentlikning asosiy vazifalari hisoblanadi:

tabiiy va suyultirilgan gaz bilan uzluksiz taʼminlash, mintaqalararo suv quvurlarining barqaror va ishonchli ishlashini taʼminlash;

mintaqalararo suv quvurlarini, kommunal gaz sotish tarmoqlarini rivojlantirish va ulardan foydalanish sohasida yagona texnika siyosatini shakllantirish va oʻtkazish, ular qurilishi boʻyicha buyurtmachi funksiyasini bajarish;

kommunal xizmat koʻrsatish tizimini isloh qilish ishlarini muvofiqlashtirish, kommunal xizmat koʻrsatish sohasida normativ-huquqiy hujjatlarni, texnik-iqtisodiy shartlarni belgilangan tartibda ishlab chiqish va tasdiqlash;

davlat boshqaruvi mahalliy organlari, xoʻjalik yurituvchi subyektlar va fuqarolar tomonidan kommunal xizmat koʻrsatish sohasidagi amaldagi qonun hujjatlariga, belgilangan texnik shartlar va talablarga rioya qilinishini nazorat qilish;

maishiy chiqitlarni toʻplash, foydali suratda ishlatish va qayta ishlash masalalari boʻyicha yagona siyosatni shakllantirish va uning holatini oʻrganish;

tarmoqqa xorijiy investitsiyalar va texnologiyalarni jalb etish, shu jumladan qoʻshma korxonalar tashkil etish hisobiga jalb etish.

6. Agentlik oʻziga yuklangan vazifalarga muvofiq quyidagi funksiyalarni bajaradi:

kompleks texnik-iqtisodiy tahlil asosida kommunal gaz sotish xoʻjaligidagi ishlarning ahvolini va mintaqaviy suv quvurlari ishini tahlil qiladi, ularni rivojlantirish tendensiyalarini oʻrganadi va qonuniyatlarini umumlashtiradi, ushbu sohada yagona texnika siyosatini shakllantiradi va amalga oshiradi;

Moliya vazirligi bilan birgalikda aholini tabiiy va suyultirilgan gaz bilan taʼminlashga doir tarif siyosatini shakllantirishda qatnashadi;

normativ-huquqiy hujjatlar loyihalarini belgilangan tartibda ishlab chiqadi va tasdiqlash uchun Oʻzbekiston Respublikasi Hukumatiga kiritadi, uy-joy-kommunal munosabatlar boʻyicha kompleks davlat dasturlari, qonunlar va boshqa normativ-huquqiy hujjatlar loyihalarini ishlab chiqishda qatnashadi;

mablagʻ bilan taʼminlash manbalaridan qatʼi nazar belgilangan tartibda olib keluvchi va posyolkalararo gaz tarmoqlari qurilishi, shuningdek Hukumatning topshirigʻi boʻyicha kommunal maqsaddagi boshqa obyektlar qurilishi boʻyicha buyurtmachi funksiyasini bajaradi;

kommunal maqsadlardagi ilgʻor texnologiyalar, asbob-uskunalar, priborlar, mashina va mexanizmlar joriy etilishi yuzasidan takliflar tayyorlaydi, ularni ishlab chiqish va jihozlash ishlarini tashkil etadi, Oʻzbekiston Respublikasi kommunal xoʻjaligi ehtiyojlari uchun yangi mashinalar, asbob-uskunalar va priborlar yaratish boʻyicha buyurtmachi boʻladi;

bevosita Agentlik boshqaruviga kiruvchi kommunal xizmat koʻrsatish korxonalari va tashkilotlarini xususiylashtirish masalalari yuzasidan takliflar tayyorlaydi va ularni hal etishda qatnashadi, kommunal xizmatlar koʻrsatish, injiniring, konsalting, auditorlik sohasida va uy-joy-kommunal tarmoqning boshqa tashkilotlarida raqobat muhiti yaratilishiga koʻmaklashadi;

kommunal xoʻjalik hamda mashinalar, priborlar, asbob-uskunalar ishlab chiqarish masalalari boʻyicha xorijiy mamlakatlar va xalqaro tashkilotlar bilan ilmiy - texnik va iqtisodiy hamkorlik qiladi, xorijiy firmalar hamda boshqa korxonalar va tashkilotlar bilan toʻgʻridan toʻgʻri aloqalar oʻrnatilishida mahalliy korxonalar va tashkilotlarga koʻmaklashadi;

tarmoqqa xorijiy investitsiyalar va texnologiyalarni jalb qilish, shu jumladan qoʻshma korxonalar tashkil etish, Hukumat kafolati ostidagi kreditlar hisobiga xorijiy investitsiyalar va texnologiyalarni jalb qilish ishini taʼminlaydi va muvofiqlashtiradi;

mintaqalararo suv quvurlarini, gaz sotish tashkilotlarini va shartnoma asosida boshqa korxonalar va tashkilotlarni eng muhim moddiy-texnika resurslari bilan taʼminlaydi;

Makroiqtisodiyot va statistika vazirligi hamda “Oʻzbekneftgaz” milliy xolding kompaniyasi bilan birgalikda tasdiqlangan normativlar boʻyicha turli isteʼmolchilar (aholi)ning tabiiy va suyultirilgan gazni isteʼmol qilish balansini tuzishda qatnashadi;

“Boshkommungaz” korxonasi boʻlinmalari tomonidan kommunal gaz sotish tarmogʻi boʻyicha moliyaviy resurslar markazlashtirilishi va taqsimlanishini, shuningdek soliqlar va boshqa toʻlovlar boʻyicha budjet bilan hisob-kitoblar markazlashtirilgan tartibda amalga oshirilishini muvofiqlashtiradi va ular ustidan nazorat qiladi;

ushbu sektor korxonalari faoliyatini muntazam ravishda monitoring qilish, rivojlanish tendensiyalarini va ilgʻor tajribani oʻrganish yoʻli bilan maishiy chiqitlarni toʻplash, ularni foydali suratda ishlatish va qayta ishlash masalalari boʻyicha yagona texnika siyosatini amalga oshiradi, uning joriy etilishiga koʻmaklashadi;

oʻz vakolatlari doirasida kommunal xizmat koʻrsatish korxonalari uchun mutaxassislar, shu jumladan shartnoma asosida oʻqitilishi, tayyorlanishi va qayta tayyorlanishini hamda kadrlar malakasini oshirishni tashkil etadi;

texnika siyosatini oʻtkazadi, mehnatni muhofaza qilish boʻyicha normativ-huquqiy hujjatlarni ishlab chiqadi hamda Agentlik tarkibiga kiruvchi boʻlinmalarda mehnatni muhofaza qilish xizmatlariga metodik rahbarlik qiladi, oʻlimga olib kelgan guruhli baxtsiz hodisalarni tekshirishda qatnashadi, mehnatni muhofaza qilish sohasida ilgʻor tajribani oʻrganadi va umumlashtiradi.

Oʻzbekiston Respublikasi Hukumatining topshirigʻiga koʻra:

gaz taʼminoti, suv taʼminoti, kanalizatsiya, issiqlik taʼminoti, sanitariya bilan bogʻliq tozalash, irrigatsiya va hududlar, aholi punktlari drenaji tizimining konsepsiyasini, istiqbolli dasturlarini va rivojlantirish sxemalarini ishlab chiqadi, ular amalga oshirilishini monitoring qiladi;

manfaatdor respublika boshqaruv organlari va joylardagi hokimiyat organlari bilan oʻzaro hamkorlikda uy-joy-kommunal xizmatlarning tarif siyosatini, isteʼmol normalarini ishlab chiqish va takomillashtirish yuzasidan metodolik ish olib boradi;

mintaqalararo suv quvurlari obyektlari va kommunal gaz sotish tarmogʻi boʻyicha ilmiy-tadqiqot va loyiha-qidiruv ishlarini amalga oshirish strategiyasini shakllantiradi va ularning bajarilishini taʼminlaydi;

Oʻzbekiston Respublikasi qonun hujjatlariga muvofiq Agentlikka yuklangan boshqa funksiyalarni bajaradi.

7. Agentlik quyidagi huquqlarga egadir:

oʻz vakolatlari doirasida barcha vazirliklar, idoralar, xoʻjalik birlashmalari, korxonalar, muassasalar, tashkilotlar, shuningdek yuridik va jismoniy shaxslar, shu jumladan Oʻzbekiston Respublikasi hududidagi xorijiy yuridik va jismoniy shaxslar, ularning idoraviy boʻysunishi va mulkchilik shakllaridan qatʼi nazar, bajarishi majburiy boʻlgan kommunal xizmat sohasidagi normativ-huquqiy hujjatlarni belgilangan tartibda ishlab chiqish va tasdiqlash;

zarur hollarda respublika vazirliklari va idoralari bilan birgalikda belgilangan tartibda qarorlar qabul qilish va kommunal xizmat koʻrsatish masalalari boʻyicha qoʻshma normativ-huquqiy hujjatlar chiqarish;

kommunal sohasidagi eng muhim muammolarni ishlab chiqish va koʻrib chiqish boʻyicha idoralararo komissiyalar va kengashlar tashkil etish. Materiallarni ishlab chiqishga ilmiy-tadqiqot, texnologiya, loyiha-konstruktorlik tashkilotlarini, oliy oʻquv yurtlari va boshqa muassasalarning xodimlarini, shuningdek alohida olimlar va mutaxassislarni belgilangan tartibda jalb etish;

statistika organlaridan, “Oʻzgeodezkadastr” bosh boshqarmasidan oʻz faoliyati uchun zarur boʻlgan statistika axborotini va boshqa axborotlarni belgilangan tartibda olish;

korxonalar, tashkilotlarning hamda Agentlik tarkibiga kiruvchi boshqa tuzilmalarning statistika, buxgalteriya hisobotlari va boshqa hisobotlarini olish va koʻrib chiqish;

Agentlik huzurida belgilangan tartibda xoʻjalik hisobidagi korxonalar hamda amaldagi qonun hujjatlariga zid boʻlmagan boshqa tuzilmalar tashkil etish;

amaldagi tartibga muvofiq davlat boshqaruvi mahalliy organlari, xoʻjalik yurituvchi subyektlar va fuqarolar tomonidan kommunal xizmat koʻrsatish sohasidagi amaldagi qonun hujjatlariga, belgilangan texnik shartlar va talablarga rioya qilinishi ustidan nazorat qilish.

8. Agentlik oʻziga yuklangan vazifalar va qabul qilingan qarorlar bajarilishi uchun Oʻzbekiston Respublikasi qonun hujjatlariga muvofiq oʻz vakolatlari doirasida javob beradi.

9. Agentlikka Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan bosh direktor boshchilik qiladi.

10. Agentlik bosh direktorining Oʻzbekiston Respublikasi Vazirlar Mahkamasi tomonidan tayinlanadigan birinchi oʻrinbosari boʻladi. “Boshkommungaz” korxonasining bosh direktori va Mintaqalararo suv quvurlaridan foydalanish va ularni rivojlantirish bosh direksiyasi direktori maqomiga koʻra “Oʻzkommunxizmat” agentligi bosh direktorining oʻrinbosarlari hisoblanadi.

Oʻrinbosarlar oʻrtasida vazifalarni taqsimlash Agentlik bosh direktori tomonidan amalga oshiriladi.

11. Bosh direktor Agentlik zimmasiga yuklangan vazifalar va majburiyatlar bajarilishi uchun shaxsan javob beradi, Agentlik faoliyati ayrim yoʻnalishlariga rahbarlik qilish uchun oʻrinbosarlar, tarkibiy boʻlinmalar rahbarlarining javobgarligi darajasini belgilaydi.

12. Agentlik bosh direktori:

Agentlik ishini tashkil etadi;

oʻz vakolatlari doirasida Oʻzbekiston Respublikasi qonun hujjatlariga muvofiq Agentlik xodimlari, shuningdek Agentlik tarkibiga kiruvchi korxonalar va tashkilotlar tomonidan bajarilishi majburiy boʻlgan buyruqlar chiqaradi va koʻrsatmalar beradi;

davlat hokimiyati organlarida, shuningdek xalqaro tashkilotlarda Agentlik manfaatlarini ifodalaydi.

Agentlik tizimidagi alohida oʻrnak koʻrsatgan xodimlarni Oʻzbekiston Respublikasi qonun hujjatlarida belgilangan tartibda Oʻzbekiston Respublikasi davlat mukofotlari bilan taqdirlashga taqdim etadi;

tarmoq xodimlarini koʻkrak nishonlari, Faxriy yorliqlar bilan mukofotlaydi va ragʻbatlantirishning boshqa turlarini qoʻllaydi;

Agentlik boʻysunishida boʻlgan davlat korxonalari, muassasalar va tashkilotlarning ustavlarini (nizomlarini) belgilangan tartibda tasdiqlaydi;

Agentlik boshqaruvi apparatiga sarflanadigan sarf-xarajatlar smetasini, uning xodimlari shtat jadvalini hamda boshqaruv apparati tarkibiy boʻlinmalari toʻgʻrisidagi nizomlarni belgilangan tartibda tasdiqlaydi, mehnatga haq toʻlash miqdorini va ragʻbatlantirish tizimini belgilaydi;

tasdiqlangan nomenklaturaga muvofiq Agentlik boshqaruv apparati xodimlarini, Agentlik tarkibiga kiruvchi davlat korxonalari va tashkilotlari rahbarlarini lavozimga tayinlaydi va lavozimdan ozod qiladi;

Agentlik xodimlarini xizmat safarlariga, shu jumladan Oʻzbekiston Respublikasi tashqarisiga xizmat safarlariga yuboradi;

oʻz vakolatlari doirasida Agentlik xodimlarining ijtimoiy himoya qilinishini taʼminlash masalalarini hal etadi.

13. Agentlikda tarkibiga bosh direktor (hayʼat raisi) va bosh direktor oʻrinbosarlari, shuningdek Agentlik va uning tarkibiy boʻlinmalarining boshqa rahbar xodimlari kirgan besh kishidan iborat hayʼat tashkil etiladi.

Agentlik hayʼatining shaxsiy tarkibi Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat va uning ish tartibi toʻgʻrisidagi nizom Agentlik bosh direktori tomonidan tasdiqlanadi.

14. Agentlik hayʼati oʻz majlislarida aholini tabiiy va suyultirilgan gaz bilan uzluksiz taʼminlash, mintaqalararo suv quvurlarining barqaror va ishonchli ishlashi, mintaqalararo suv quvurlari, kommunal gaz sotish tarmogʻidan foydalanish va ularni rivojlantirish sohasida yagona texnik siyosatni shakllantirish va amalga oshirish, kommunal xizmat koʻrsatishni isloh qilish ishlarini muvofiqlashtirishning asosiy masalalarini, davlat boshqaruvi mahalliy organlari, xoʻjalik yurituvchi subyektlar va fuqarolar tomonidan kommunal xizmat koʻrsatish sohasidagi amaldagi qonun hujjatlariga, belgilangan texnik shartlar va talablarga rioya qilinishini tekshirish natijalarini koʻrib chiqadi.

Hayʼat qarorlari, qoidaga koʻra, Agentlik bosh direktorining buyruqlari bilan hayotga joriy etiladi. Bosh direktor (rais) va hayʼat oʻrtasida kelishmovchiliklar paydo boʻlgan taqdirda rais paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga axborot bergan holda oʻz qarorini amalga oshiradi, hayʼat aʼzolari oʻz navbatida oʻz fikrlarini Oʻzbekiston Respublikasi Vazirlar Mahkamasiga maʼlum qilishlari mumkin.

15. Agentlik huzurida kommunal xizmat koʻrsatish va tarmoqning ilmiy-texnik taraqqiyoti muammolarini koʻrib chiqish va maqbul hal etish yoʻllarini izlash uchun ilmiy-texnik kengash tashkil etiladi. Kengashning shaxsiy tarkibi va u toʻgʻrisidagi Nizom Agentlik bosh direktori tomonidan tasdiqlanadi, ilmiy-texnik kengashda ishlash uchun vazirliklar, idoralar xoʻjalik birlashmalari va boshqa tashkilotlarning mutaxassislari (kelishuv boʻyicha) jalb etilishi mumkin.

16. Agentlik markaziy apparatining tuzilmasi va xodimlari soni Oʻzbekiston Respublikasi Vazirlar Mahkamasi tomonidan tasdiqlanadi. Agentlik bosh direktori markaziy apparatning tasdiqlangan tuzilmasiga xodimlarning belgilangan soni doirasida oʻzgartirishlar kiritishga, xodimlarning umumiy sonidan tashqari xizmat koʻrsatuvchi va axborot xizmatlari tashkil etishga haqlidir.

17. Agentlik qonun hujjatlarida belgilangan tartibda qayta tashkil etiladi va tugatiladi.

1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining hududiy kommunal-foydalanish birlashmasi (matnning keyingi oʻrinlarida “birlashma” deb ataladi) Oʻzbekiston Respublikasi Vazirlar Mahkamasining 2000-yil 21-dekabrdagi 493-son qaroriga muvofiq faoliyat koʻrsatadi.

2. Birlashma hokimlik tomonidan shaharlar va tumanlarning kommunal-foydalanish boshqarmalari, issiqlik, suv taʼminoti, kanalizatsiya hududiy korxonalari va tashkilotlari hamda kommunal maqsadlardagi boshqa xizmatlar faoliyatini muvofiqlashtirishga, aholiga uy-joy-kommunal xizmatlarning butun kompleksini koʻrsatishga, ularni ichimlik suv, markaziy isitish, kanalizatsiya bilan taʼminlashga vakil qilingan organ hisoblanadi.

3. Birlashma oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining, hokimlikning qarorlari va farmoyishlariga, shuningdek ushbu Nizomga amal qiladi.

4. Birlashma yuridik shaxs hisoblanadi, Oʻzbekiston Respublikasi Davlat gerbi tasviri tushirilgan, oʻz nomi davlat tilida yozilgan muhrga va banklarda hisob raqamlariga ega boʻladi.

5. Quyidagilar birlashmaning asosiy vazifalari hisoblanadi:

aholiga uy-joy-kommunal xizmatlar butun kompleksini koʻrsatish, ularni ichimlik suv, markaziy isitish, kanalizatsiya bilan taʼminlash;

uy-joy-kommunal xoʻjaligi obyektlarini mavsumiy foydalanishga tayyorlash ishlarini amalga oshirish;

koʻp kvartirali uylarni toʻliq taʼmirlash ishlarini belgilangan tartibda tashkil etish;

uy-joy egalari shirkatlarini hamda Yagona buyurtmachi xizmatlarini, uy-joy fondiga xizmat koʻrsatish va kommunal xizmatlar koʻrsatish boʻyicha muqobil pudrat tashkilotlarini shakllantirish uchun zarur tashkiliy-iqtisodiy sharoitlar yaratish;

mahalliy budjet va oʻz mablagʻlari hisobiga kommunal obyektlar qurish boʻyicha buyurtmachi funksiyalarini amalga oshirish;

shaharlar va aholi punktlarini obodonlashtirish va sanitariya jihatidan tozalash ishlarini tashkil etish;

shaharlar va tumanlar kommunal-foydalanish boshqarmalari faoliyatini muvofiqlashtirish.

6. Birlashma oʻziga yuklangan vazifalarga muvofiq quyidagi funksiyalarni bajaradi:

viloyat hududida uy-joy fondidan foydalanish va ularning saqlanishini taʼminlash, kommunal xizmat koʻrsatishni rivojlantirish sohasida texnika siyosatini shakllantirish va oʻtkazish;

kommunal xoʻjaligini rivojlantirish konsepsiyalari, istiqbol dasturlari va sxemalarini, tarmoqda ilmiy-texnika siyosatini ishlab chiqish va amalga oshirishda qatnashish, kommunal obyektlar va uy-joy fondini loyihalash, qurish va ulardan foydalanish masalalarida ilgʻor tajribani oʻrganish va yoyish;

kompleks texnik-iqtisodiy tahlil asosida tasarrufidagi korxonalar va tashkilotlarning ishlab chiqarish-texnika va moliya-iqtisodiy faoliyatini tashkil etish;

hududlarga xizmat koʻrsatish korxonalarini iqtisodiy rivojlantirish prognozlari va kompleks dasturlari loyihalarini ishlab chiqish;

kommunal xizmat koʻrsatish korxonalarini kuz-qish davrida ishlashga tayyorlash tadbirlarini ishlab chiqish va amalga oshirish, koʻp kvartirali uy-joylarni toʻliq taʼmirlash ishlarini belgilangan tartibda tashkil etish;

mahalliy budjet, oʻz mablagʻlari, bank kreditlari va boshqa manbalar hisobiga kommunal maqsadlardagi obyektlarni loyihalash va qurish boʻyicha aniq roʻyxatlarni tayyorlash va tasdiqlash, buyurtmachi funksiyalarini va ularning qurilishi ustidan nazoratni amalga oshirish;

uy-joy egalariga, shaharlar va tumanlar hokimliklariga uy-joy egalari shirkatlari hamda Yagona buyurtmachi xizmatlari, uy-joy fondiga xizmat koʻrsatish va kommunal xizmatlar koʻrsatish boʻyicha muqobil pudrat tashkilotlari tashkil etishda va ularning faoliyat koʻrsatishida koʻmaklashish va amaliy yordam koʻrsatish, ularni shartnoma asosida zarur normativ-huquqiy hujjatlar va tavsiyanomalar bilan taʼminlash;

shaharlar va tumanlar kommunal-foydalanish boshqarmalarining, issiqlik, suv taʼminoti va kanalizatsiya korxonalarining atrof muhitni va mehnatni muhofaza qilish bilan bogʻliq chora-tadbirlarni amalga oshirish, sifatli kommunal xizmatlar koʻrsatish boʻyicha faoliyatini muvofiqlashtirish, maishiy chiqindilarni toʻplash, foydalaniladigan qilish va qayta ishlash, shaharlar va aholi punktlarining sanitariya holatini yaxshilash boʻyicha yangi usullar va texnologiyalarni joriy etish ishlarini amalga oshirish;

viloyat hududida kommunal xizmat koʻrsatishning texnik darajasini oshirish uchun xorijiy investitsiyalarni jalb etish maqsadida, hokimlik bilan kelishilgan holda tashqi iqtisodiy aloqalarni oʻrnatish va rivojlantirish, xorijiy firmalar, qoʻshma korxonalar va respublika tashkilotlari bilan hamkorlikning yangi shakllarini joriy qilish;

kommunal korxonalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining birgalikdagi sayʼ-harakatlarini talab qiluvchi moddiy-texnika taʼminoti masalalarini hal etishda qatnashish;

uy-joy egalari kengashlari jamoat tuzilmalari va fuqarolarning oʻzini oʻzi boshqarish organlari bilan aholining yashash sharoitlarini, kommunal xizmat koʻrsatishni yaxshilash hamda kommunal va foydalanish xizmatlari uchun toʻlovlarni toʻliq yigʻish borasida oʻzaro hamkorlik qilish;

birlashma tarkibiga kiruvchi korxonalar va tashkilotlarga bozor munosabatlariga oʻtishda, ularni aksiyadorlik va boshqa tashkiliy-huquqiy shakllarga aylantirishda koʻmaklashish;

fuqarolar murojaatlarining oʻz vaqtida koʻrib chiqilishini taʼminlash, uy-joy-kommunal xizmat koʻrsatish korxonalari faoliyatidagi kamchiliklarni bartaraf etish chora-tadbirlarini koʻrish;

hokimlik topshirigʻiga koʻra:

tasarrufidagi hududda aholini toza ichimlik suv va gaz bilan taʼminlash uchun suv quvurlari va gaz tarmoqlarini rivojlantirish boʻyicha maqsadli davlat dasturlarini amalga oshirish;

tasarrufidagi hududda kommunal xizmatlarga tariflarni shakllantirish boʻyicha takliflar tayyorlash;

suv, gaz, issiqlik va boshqa energiya manbalari sarfini yakka tartibda hisobga olish va tartibga solish priborlarini joriy etish ishlarini amalga oshirish;

tasarrufidagi hududda texnik xatlovdan oʻtkazish byurosi faoliyatini tashkil etishga koʻmaklashish;

Oʻzbekiston Respublikasi qonun hujjatlariga muvofiq birlashmaga yuklangan boshqa vakolatlarni amalga oshiradi.

7. Birlashma quyidagi huquqlarga ega:

statistika organlari va hokimlikdan oʻz faoliyati uchun zarur boʻlgan statistik va boshqa maʼlumotlarni belgilangan tartibda olish;

birlashma tarkibiga kiruvchi korxonalar, tashkilotlar va boshqa tuzilmalardan statistika, buxgalteriya hisobotlarini va boshqa hisobotlarni olish va koʻrib chiqish;

oʻz vakolati doirasida mutaxassislarni oʻqitish, tayyorlash va qayta tayyorlashni hamda kadrlar malakasini oshirishni tashkil etish;

hokimlik bilan kelishilgan holda, belgilangan tartibda xoʻjalik hisobidagi korxonalar va amaldagi qonun hujjatlariga zid boʻlmagan boshqa tuzilmalar tashkil etish;

mintaqada uy-joy-kommunal xizmat koʻrsatishni boshqarish tuzilmasini takomillashtirish boʻyicha takliflar kiritish.

8. Birlashma oʻziga yuklangan vazifalarning va uning vakolatlari doirasida qabul qilingan qarorlarning bajarilishi uchun Oʻzbekiston Respublikasi qonun hujjatlariga muvofiq javob beradi.

9. Birlashma tarkibiga shaharlar, tumanlar, shaharlardagi tumanlar kommunal-foydalanish boshqarmalari, uy-joy-kommunal xizmat koʻrsatish boʻyicha Yagona buyurtmachi xizmatlari, viloyat suv quvurlari kanalizatsiya, issiqlik energiyasi xoʻjaliklari, mintaqa hududida joylashgan, yuqorida koʻrsatib oʻtilgan boshqarmalar tarkibiga kirmaydigan aholiga kommunal-foydalanish xizmati koʻrsatuvchi korxonalar va tashkilotlar kiradi, “Oʻzkommunxizmat” agentligi tarkibiga kiruvchi korxonalar va tashkilotlardan tashqari.

Birlashma tarkibiga kiruvchi korxonalar va tashkilotlar oʻz xoʻjalik mustaqilligini hamda yuridik shaxs huquqini saqlab qoladi.

10. Birlashma Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga boʻysunadi.

Hududiy kommunal-foydalanish birlashmasini Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari tomonidan lavozimga tayinlanadigan va birlashmaga yakka boshchilik asosida rahbarlik qiladigan boshliq boshqaradi.

11.Boshliq birlashmaning butun faoliyatiga rahbarlik qiladi va birlashma ishlarini tashkil etadi, birlashma ishlari natijalari uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari oldida javob beradi.

12. Boshliq ishonchnomasiz birlashma nomidan ish koʻradi, davlat hokimiyati va boshqaruvi barcha organlarida, korxonalarda, tashkilotlarda uning nomidan vakillik qiladi, birlashma mol-mulkini belgilangan tartibda tasarruf etadi, shartnomalar tuzadi, ishonchnomalar beradi, banklarda hisob raqamlari ochadi, moliya, hisobot hujjatlarini va boshqa hujjatlarni imzolaydi; hokimlik bilan kelishilgan holda tuzilmani va shtatlar jadvalini tasdiqlaydi; birlashma apparati taʼminoti xarajatlari smetasini, uning tarkibiy boʻlinmalari toʻgʻrisidagi nizomlarni va lavozim yoʻriqnomalarini tasdiqlaydi.

13. Boshliq oʻz vakolati doirasida birlashma barcha xodimlarining, shuningdek tarkibiy boʻlinmalarining bajarishi majburiy boʻlgan buyruqlar chiqaradi va koʻrsatmalar beradi.

14. Birlashma boshligʻi birlashma xodimlarini belgilangan tartibda lavozimga tayinlaydi va lavozimdan ozod qiladi, tasarrufidagi korxonalar rahbarlarini, tegishli hokimliklarning taqdimnomasiga koʻra esa shaharlar (shaharlardagi tumanlar) va tumanlar kommunal-foydalanish boshqarmalari rahbarlarini lavozimga tasdiqlaydi.

15. Kommunal xizmat koʻrsatishni rivojlantirish va yaxshilash masalalarini koʻrib chiqish, tarmoq korxonalarining muvofiqlashtirilgan holda ishlashini taʼminlash uchun birlashma huzurida birlashma tarkibiga kiruvchi korxonalar va tashkilotlar rahbarlari kengashi tuziladi. Kengashga mintaqada kommunal xizmatlar koʻrsatuvchi boshqa korxonalar va tashkilotlar rahbarlari ham kirishlari mumkin. Birlashma rahbari ayni bir vaqtda rahbarlar kengashining raisi hisoblanadi.

Rahbarlar kengashi faoliyatini tartibga soluvchi nizomni kengash raisi tasdiqlaydi.

16. Birlashmani qayta tashkil etish va tugatish qonun hujjatlarida belgilangan tartibda amalga oshiriladi.

1. Oʻzbekiston Respublikasi Vazirlar Mahkamasining “Respublika xalq xoʻjaligini va aholini gaz bilan taʼminlashni tashkil etishni yaxshilash chora-tadbirlari toʻgʻrisida” 1993-yil 2-dekabrdagi 587-son qarorining 5, 9, 11-bandlaridagi “Oʻzbekiston Respublikasi Kommunal xizmat koʻrsatish vazirligi”, “Kommunal xizmat koʻrsatish vazirligi”, “Oʻzbekiston Respublikasi Kommunal xizmat koʻrsatish vazirligi” soʻzlari Oʻzbekiston “Oʻzkommunxizmat” agentligi, Oʻzbekiston “Oʻzkommunxizmat” agentligi”, Oʻzbekiston “Oʻzkommunxizmat” agentligi” soʻzlari bilan almashtirilsin.

2. Oʻzbekiston Respublikasi Vazirlar Mahkamasining “Sanoat terakchiligini rivojlantirish va boshqa tez oʻsuvchi yogʻochbop daraxtzorlarni barpo etishga oid chora-tadbirlar toʻgʻrisida” 1994-yil 8-fevraldagi 62-son qarorida:

1-banddagi “va Oʻzbekiston Respublikasi Kommunal xizmat koʻrsatish vazirligi” soʻzlari “Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari” soʻzlari bilan almashtirilsin;

1-ilovadagi Oʻzbekiston Respublikasi “Kommunal xizmat koʻrsatish vazirligiga”, “Kommunal xizmat koʻrsatish vazirligi” soʻzlari tegishli ravishda “Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga”, “Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari” soʻzlari bilan almashtirilsin;

1-ilova quyidagi mazmundagi izoh bilan toʻldirilsin:

“Izoh: 2001—2003-yillarda terak koʻchatlari oʻstirish boʻyicha topshiriq quyidagi miqdorda taqsimlansin (mln ta):

Qoraqalpogʻiston Respublikasi Vazirlar Kengashi – 2,4;

Andijon viloyati hokimligi – 2,4;

Buxoro viloyati hokimligi – 2,4;

Jizzax viloyati hokimligi – 1,5;

Qashqadaryo viloyati hokimligi – 3,0;

Navoiy viloyati hokimligi – 0,6;

Namangan viloyati hokimligi – 3,0;

Samarqand viloyati hokimligi – 2,4;

Sirdaryo viloyati hokimligi – 1,5;

Surxondaryo viloyati hokimligi – 0,9;

Toshkent viloyati hokimligi – 2,4;

Fargʻona viloyati hokimligi – 3,0;

Xorazm viloyati hokimligi – 2,1;

Toshkent shahar hokimligi – 2,4.”

3. Oʻzbekiston Respublikasi Vazirlar Mahkamasining “Uy-joy fondida va ijtimoiy-madaniy maqsadlardagi obyektlarda suv va gazni hisobga olish asboblarini oʻrnatish va ulardan foydalanish haqidagi Nizomni tasdiqlash toʻgʻrisida” 1995-yil 26-maydagi 185-son qarori bilan tasdiqlangan Uy-joy fondida va ijtimoiy-madaniy maqsadlardagi obyektlarda suv va gazni hisobga olish asboblarini oʻrnatish va ulardan foydalanish haqidagi Nizomning II qismi toʻrtinchi xatboshidagi “Oʻzbekiston Respublikasi Kommunal xizmat koʻrsatish vazirligi” soʻzlari “Oʻzkommunxizmat” agentligi, hududiy kommunal-foydalanish birlashmalari tarkibiga kiruvchi” soʻzlari bilan almashtirilsin.

4. Oʻzbekiston Respublikasi Vazirlar Mahkamasining “Kommunal xizmat koʻrsatish va yoʻlovchilar tashish transporti korxonalari maʼmuriy-boshqaruv xodimlari mehnatiga haq toʻlashni takomillashtirish toʻgʻrisida” 1995-yil 15-iyundagi 222-son qarorining (Oʻzbekiston Respublikasi QT, 1995-yil, 6-son, 22-modda) nomi, muqaddimasi, 1-bandining ikkinchi xatboshi, 3—5-bandlaridagi “kommunal xizmat koʻrsatish va”, “Oʻzbekiston Respublikasi Kommunal xizmat koʻrsatish vazirligi” soʻzlari chiqarib tashlansin.

5. Oʻzbekiston Respublikasi Vazirlar Mahkamasining “Uy-joy-kommunal xizmatlarning oʻz xarajatlarini oʻzi qoplashiga bosqichma-bosqich oʻtish munosabati bilan normativ hujjatlarni tasdiqlash toʻgʻrisida” 1996-yil 30-iyuldagi 271-son qarori bilan tasdiqlangan Aholiga sotiladigan kommunal xizmatlar tariflaridagi farqlarni budjetdan qoplash tartibining 14-bandidagi “Qoraqalpogʻiston Respublikasi Kommunal xizmat-koʻrsatish vazirligi, viloyatlar va Toshkent shahar hududiy kommunal-foydalanish birlashmalari” soʻzlari “Oʻzbekiston Respublikasi Moliya vazirligi va uning hududiy boʻlinmalari” soʻzlari bilan almashtirilsin.

6. Oʻzbekiston Respublikasi Vazirlar Mahkamasining “Keng koʻlamli “Toza suv, sanitariya va aholi salomatligi” loyihasini amalga oshirish chora-tadbirlari toʻgʻrisida” 1998-yil 15-oktabrdagi 444-son qarorining 5-bandidagi “Kommunal xizmat koʻrsatish vazirligi” soʻzlari “Oʻzbekiston “Oʻzkommunxizmat” agentligi” soʻzlari bilan almashtirilsin.

7. Oʻzbekiston Respublikasi Vazirlar Mahkamasining “Aholiga kommunal xizmat koʻrsatish tizimida iqtisodiy islohotlarni chuqurlashtirish Konsepsiyasini tasdiqlash toʻgʻrisida” 1998-yil 3-noyabrdagi 461-son qarorida:

Oʻzbekiston Respublikasi aholiga kommunal xizmat koʻrsatish tizimida iqtisodiy islohotlarni chuqurlashtirish Konsepsiyasining (1-ilova) IV boʻlimi oʻn ikkinchi xatboshidagi, VII boʻlimi sakkizinchi xatboshidagi “Oʻzbekiston Respublikasi Kommunal xizmat koʻrsatish vazirligi huzurida” soʻzlari “Oʻzbekiston “Oʻzkommunxizmat” agentligi huzurida” soʻzlari bilan almashtirilsin;

“Oʻzbekiston Respublikasi aholiga kommunal xizmat koʻrsatish tizimida iqtisodiy islohotlarni chuqurlashtirish Konsepsiyasini amalga oshirish chora-tadbirlari” nomli 2-ilovaning “Masʼul ijro etuvchilar” boʻlimidagi “Kommunal xizmat koʻrsatish vazirligi” soʻzlari “Oʻzbekiston “Oʻzkommunxizmat” agentligi” soʻzlari bilan almashtirilsin.

8. Oʻzbekiston Respublikasi Vazirlar Mahkamasining “Xorijiy fuqarolar va fuqaroligi boʻlmagan shaxslar tomonidan Oʻzbekiston Respublikasida uy-joy sotib olish hamda doimiy yashash uchun Toshkent shahriga kelishni tartibga solish toʻgʻrisida” 1999-yil 27-fevraldagi 92-son qarori 1-bandining uchinchi xatboshidagi “Kommunal xizmat koʻrsatish vazirligining” soʻzlari “Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining” soʻzlari bilan almashtirilsin.

9. Oʻzbekiston Respublikasi Vazirlar Mahkamasining “Qishloq aholi yashash joylarini ichimlik suv va tabiiy gaz bilan taʼminlashni yanada yaxshilash chora-tadbirlari toʻgʻrisida” 1999-yil 1-iyundagi 278-son qarorining 2-bandidagi “Kommunal xizmat koʻrsatish vazirligi” soʻzlari “Oʻzbekiston “Oʻzkommunxizmat” agentligi” soʻzlari bilan almashtirilsin.

10. Oʻzbekiston Respublikasi Vazirlar Mahkamasining “Uy-joy fondini suv va gazni hisobga olish priborlari bilan jihozlash, ularni Oʻzbekiston Respublikasida ishlab chiqarishni tashkil etish chora-tadbirlari toʻgʻrisida” 1999-yil 1-iyundagi 280-son qarorida (Oʻzbekiston Respublikasi QT, 1999-yil, 6-son, 30-modda):

3-bandning toʻrtinchi xatboshidagi “Kommunal xizmat koʻrsatish vazirligi” soʻzlari “Oʻzbekiston “Oʻzkommunxizmat” agentligi” soʻzlari bilan almashtirilsin;

7-banddagi “Kommunal xizmat koʻrsatish vazirligi” soʻzlari “Oʻzbekiston “Oʻzkommunxizmat” agentligi” soʻzlari bilan almashtirilsin.

11. Oʻzbekiston Respublikasi Vazirlar Mahkamasining “Tabiiy gaz yetkazib berish va uning uchun hisob-kitob qilish tizimini takomillashtirish toʻgʻrisida” 1999-yil 21-sentabrdagi 439-son qarorida (Oʻzbekiston Respublikasi QT, 1999-yil, 9-son, 57-modda):

a) 1-bandda:

birinchi xatboshidagi “Oʻzbekiston Respublikasi Kommunal xizmat koʻrsatish vazirligining” soʻzlari “Oʻzbekiston “Oʻzkommunxizmat” agentligining” soʻzlari bilan almashtirilsin;

toʻrtinchi xatboshidagi “Oʻzbekiston Respublikasi Kommunal xizmat koʻrsatish vazirligining tabiiy gaz uzatuvchi xoʻjalik hisobidagi “Boshkommungaz” bosh boshqarmasining” va “xoʻjalik hisobidagi “Boshkommungaz” bosh boshqarmasining” soʻzlari tegishli ravishda “Oʻzbekiston “Oʻzkommunxizmat” agentligi “Boshkommungaz” korxonasining” va “Boshkommungaz” korxonasi” soʻzlari bilan almashtirilsin;

beshinchi xatboshidagi “xoʻjalik hisobidagi “Boshkommungaz” bosh boshqarmasining gaz sotuvchi tashkilotlariga” soʻzlari “Boshkommungaz” korxonasining shuʼba korxonalariga” soʻzlari bilan almashtirilsin;

b) 2-bandning uchinchi, toʻrtinchi va beshinchi xatboshidagi “xoʻjalik hisobidagi “Boshkommungaz” bosh boshqarmasining gaz sotuvchi tashkilotlari” soʻzlari “Boshkommungaz” korxonasining shuʼba korxonalari” soʻzlari bilan almashtirilsin;

v) uchinchi banddagi “Oʻzbekiston Respublikasi Kommunal xizmat koʻrsatish vazirligi” soʻzlari “Oʻzbekiston “Oʻzkommunxizmat” agentligi” soʻzlari bilan almashtirilsin.

12. Oʻzbekiston Respublikasi Vazirlar Mahkamasining “Uy-joy mulkdorlari shirkatining Namunaviy ustavini va uy-joylarni uy-joy mulkdorlari shirkati boshqaruviga berish va uy-joy fondini saqlash va tuzatish masalalarida davlat hokimiyati organlari bilan oʻzaro hamkorlik qilish tartibi toʻgʻrisidagi Namunaviy nizomni tasdiqlash toʻgʻrisida” 1999-yil 4-oktabrdagi 454-son qarorining 2-bandidagi “Kommunal xizmat koʻrsatish vazirligi” soʻzlari “Oʻzbekiston “Oʻzkommunxizmat” agentligi” soʻzlari bilan almashtirilsin.

13. Oʻzbekiston Respublikasi Vazirlar Mahkamasining “Oʻzbekiston Respublikasining uy-joy fondini davlat yoʻli bilan hisobga olish toʻgʻrisida” 2000-yil 20-yanvardagi 18-son qarorida (Oʻzbekiston Respublikasi QT, 2000-yil, 1-son, 5-modda):

2-band quyidagi tahrirda bayon qilinsin:

“Oʻzgeodezkadastr” bosh boshqarmasi texnik inventarizatsiya kadastrlar hududiy byurolari faoliyatiga uslubiy rahbarlikni, shuningdek uy-joy fondi yigʻma kadastrining yuritilishini taʼminlaydi”.

Oʻzbekiston Respublikasida uy-joy fondini davlat yoʻli bilan hisobga olishning yagona tizimi toʻgʻrisida Nizomning (1-ilova) 6-bandi 2-xatboshidagi “Oʻzbekiston Respublikasi Kommunal xizmat koʻrsatish vazirligi bilan” soʻzlari “Oʻzgeodezkadastr” bosh boshqarmasi bilan” soʻzlari bilan almashtirilsin.

14. Oʻzbekiston Respublikasi Vazirlar Mahkamasining 2000-yil 24-yanvardagi 22-son qarori (Oʻzbekiston Respublikasi QT, 2000-yil, 1-son, 6-modda) bilan tasdiqlangan Uy-joy-kommunal xizmat koʻrsatish boʻyicha Yagona buyurtmachi xizmati toʻgʻrisida Vaqtinchalik Nizomning 3-bandi ikkinchi xatboshidagi “Kommunal xizmat koʻrsatish vazirligi” soʻzlari “Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining hududiy kommunal-foydalanish birlashmasi” soʻzlari bilan almashtirilsin.

15. Oʻzbekiston Respublikasi Vazirlar Mahkamasining “Chimyon-Chorvoq zonasi tabiiy boyliklarini saqlash hamda hududini oʻzlashtirishga kompleks va izchillik bilan yondoshishni taʼminlash chora-tadbirlari toʻgʻrisida” 2000-yil 10-martdagi 83-son qarorida:

3-bandning toʻrtinchi xatboshidagi “Oʻzbekiston Respublikasi Kommunal xizmat koʻrsatish vazirligi” soʻzlari “Toshkent viloyati hokimligi” soʻzlari bilan almashtirilsin;

5-bandning ikkinchi xatboshidagi “Kommunal xizmat koʻrsatish vazirligi hamda” soʻzlari chiqarib tashlansin;

ushbu qarorga 1-ilova 3—5-bandlarining “Masʼul ijro etuvchilar” ustunidagi “Kommunal xizmat koʻrsatish vazirligi” soʻzlari “Toshkent viloyati hokimligi” soʻzlari bilan almashtirilsin;

ushbu qarorga 6-ilovadagi “Mixaylov V.K. Kommunal xizmat koʻrsatish vazirining birinchi oʻrinbosari” soʻzlari “lavozimi boʻyicha “Oʻzkommunxizmat” agentligi bosh direktorining birinchi oʻrinbosari” soʻzlari bilan almashtirilsin.

1. “KPSS Markaziy Komiteti va SSSR Ministrlar Sovetining “Mamlakatda turar-joy-kommunal xoʻjaligi ishlarini yanada takomillashtirish tadbirlari toʻgʻrisida” 1987-yil 8-apreldagi 427-son qarori yuzasidan Oʻzbekiston SSR Ministrlar Sovetining 1987-yil 19-avgustdagi 339-son qarori (OʻzSSR QT, 1987-y., 8-son, 49-modda).

2. Oʻzbekiston Respublikasi Vazirlar Mahkamasining “Oʻzbekiston SSJ Uy-joy kommunal xoʻjaligi sistemasidagi korxonalar (birlashmalar) va tashkilotlarni toʻla xoʻjalik hisobi va oʻzini oʻzi mablagʻ bilan taʼminlashga oʻtkazish toʻgʻrisida” 1990-yil 9-avgustdagi 283-son qarori.

3. Oʻzbekiston Respublikasi Vazirlar Mahkamasining “Uy-joy fondiga xizmat koʻrsatish va uni saqlash uchun hisob-kitoblarning kontrakt (shartnoma) tizimiga oʻtish toʻgʻrisida” 1993-yil 17-iyuldagi 363-son qarorining 1-4, 7-10-bandlari va qarorga ilova.

4. Oʻzbekiston Respublikasi Vazirlar Mahkamasining “Oʻzbekiston Respublikasi Kommunal xizmat koʻrsatish vazirligini tashkil etish va uning faoliyati masalalari toʻgʻrisida” 1993-yil 22-iyuldagi 371-son qarori.

5. Oʻzbekiston Respublikasi Vazirlar Mahkamasining “Oʻzbekiston Respublikasi Kommunal xizmat koʻrsatish vazirligi toʻgʻrisidagi Nizomni tasdiqlash haqida” 1993-yil 12-oktabrdagi 490-son qarori (Oʻzbekiston Respublikasi QT, 1993-y., 10-son, 36-modda).

6. Oʻzbekiston Respublikasi Vazirlar Mahkamasining “Oʻzbekiston Respublikasi Kommunal xizmat koʻrsatish vazirligi faoliyatining ayrim masalalari toʻgʻrisida” 1996-yil 2-apreldagi 130-son qarori.

7. Vazirlar Mahkamasining “Uy-joy kommunal xizmatlarning oʻz xarajatlarini oʻzi qoplashiga bosqichma-bosqich oʻtish munosabati bilan normativ hujjatlarni tasdiqlash toʻgʻrisida” 1996-yil 30-iyuldagi 271-son qarori bilan tasdiqlangan Kommunal xizmatlar uchun iqtisodiy asoslangan stavkalar va tariflarni hisoblash metodikasi.

8. Oʻzbekiston Respublikasi Vazirlar Mahkamasining “Jismoniy shaxslarga mulk huquqida tegishli boʻlgan binolar va inshootlar boʻyicha roʻyxatga olish-baholash ishlarini amalga oshirish toʻgʻrisida” 1998-yil 21-yanvardagi 35-son qarori, 1-banddan tashqari.

9. Oʻzbekiston Respublikasi Vazirlar Mahkamasining “Xoʻjalik hisobidagi texnik roʻyxatga olish respublika kadastr byurosi toʻgʻrisidagi Nizomni tasdiqlash haqida” 1998-yil 3-oktabrdagi 423-son qarori (Oʻzbekiston Respublikasi QT, 1998y., 10-son, 36-modda).

10. Oʻzbekiston Respublikasi Vazirlar Mahkamasining “Oʻzbekiston Respublikasining Uy-joy kodeksini amalga oshirish chora-tadbirlari toʻgʻrisida” 1999-yil 16-iyuldagi 345-son qarori (Oʻzbekiston Respublikasi QT, 1999-y., 7-son, 38-modda) bilan tasdiqlangan Hukumatning ayrim qarorlariga kiritilayotgan oʻzgartirish va qoʻshimchalarning 1-bandi.