Budjet intizomiga rioya qilinishi, budjet mablagʻlarining belgilangan maqsadda sarflanishi ustidan qattiq nazoratni taʼminlashga doir ishlarni samarali tashkil etish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi Raisi, viloyatlar, shaharlar va tumanlar hokimlari, moliya organlari va budjet muassasalari rahbarlarining eʼtibori budjet intizomiga qatʼiy va izchil amal qilinishini taʼminlash zarurligiga qaratilsin hamda ular budjet mablagʻlarining noqonuniy va boshqa maqsadlarga sarflanganligi uchun, amaldagi qonunchilikka muvofiq, shaxsan javobgar ekanliklari toʻgʻrisida ogohlantirilsin.

2. Oʻzbekiston Respublikasi Moliya vazirligi Nazorat-taftish bosh boshqarmasining budjet intizomini mustahkamlashdagi rolini kuchaytirish maqsadga muvofiq deb hisoblansin. Budjet jarayonining barcha bosqichlarida budjet intizomiga rioya qilinishi ustidan doimiy nazoratni amalga oshirish, shu jumladan, quyidagilar uning asosiy vazifasi etib belgilansin:

moliya organlari, budjet muassasalari va tijorat banklarining birinchi navbatdagi sarf-xarajatlar navbatiga, mablagʻ bilan taʼminlash hamda budjet muassasalari xodimlariga ish haqi, ijtimoiy nafaqalar, stipendiyalarni toʻlash muddatlariga va toʻliqligiga rioya qilish, shuningdek, budjet muassasalariga koʻrsatib oʻtilgan maqsadlar uchun naqd pul berish boʻyicha faoliyati ustidan nazorat va monitoringni amalga oshirish;

davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob Jamgʻarmasi mablagʻlaridan belgilangan maqsadda foydalanilishini, toʻlovlarning oʻz vaqtida oʻtishini, hisob-kitoblarning toʻliq va oʻz vaqtida amalga oshirilishini nazorat qilish;

shtat-smeta intizomiga va budjet mablagʻlarini xoʻjalik ehtiyojlariga sarflash limitlariga rioya qilinishi ustidan nazoratni amalga oshirish;

hokimiyat va boshqaruv organlari rahbarlari va mansabdor shaxslarning budjet jarayoniga asossiz aralashishlari hollarining oldini olish;

investitsiya dasturlarini amalga oshirishga ajratiladigan davlat valyuta mablagʻlari va markazlashtirilgan mablagʻlardan toʻgʻri va belgilangan maqsadda foydalanilishini nazorat qilish.

Bundan tashqari, Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi mablagʻlaridan maqsadli foydalanilishi yuzasidan nazoratni kuchaytirish maqsadida quyidagilar Oʻzbekiston Respublikasi Moliya vazirligining Nazorat-taftish bosh boshqarmasining qoʻshimcha vazifalari etib belgilansin:

yangidan tayinlangan pensiyalar va nafaqalarning, shuningdek qonun hujjatlarida nazarda tutilgan imtiyozlarni qoʻllashning, shu jumladan fuqarolarning pensiya yigʻmajildlaridagi boshlangʻich hujjatlarning toʻliqligi va ishonchliligini tekshirish yoʻli bilan toʻgʻriligini yalpi tekshirish;

mulkchilik shakllaridan qatʼi nazar, korxonalar, tashkilotlar, muassasalar tomonidan ishlayotgan pensionerlarga pensiyalar va nafaqalarning hisoblab yozilishi va toʻlanishi toʻgʻriligini rejali tekshirish oʻtkazish;

fuqarolarga, shu jumladan bank va pochta muassasalari tomonidan pensiyalar va nafaqalarning oʻz vaqtida va toʻliq toʻlanishi, qonun buzilishlari aniqlangan taqdirda qonun hujjatlarida nazarda tutilgan choralar koʻrilishi yuzasidan tizimli monitoring olib borish;

zarurat boʻlganda, mustaqil ekspertlarni jalb etgan holda, tibbiy-mehnat ekspert komissiyalari tomonidan berilgan tekshirish dalolatnomalarini va xulosalarni takroriy ekspertizadan oʻtkazish.

4. Belgilab qoʻyilsinki:

Nazorat-taftish bosh boshqarmasining viloyatlar va tumanlardagi tarkibiy boʻlinmalari rahbarlari budjet intizomi buzilishi hollari ular xodimlarining ishtirokisiz aniqlangan taqdirda amaldagi qonunchilikka muvofiq qattiq javobgarlikka tortiladilar;

Nazorat-taftish bosh boshqarmasi apparati xodimlari bundan buyon huquqni muhofaza qilish organlarining alohida muhim ishlar boʻyicha jinoiy ishlar qoʻzgʻash toʻgʻrisidagi qarorlari boʻyicha taftishlar va tekshirishlarga respublika huquqni muhofaza qilish organlari rahbarlarining soʻrovnomalari asosida faqat Oʻzbekiston Respublikasi Moliya vazirligining roziligi bilan jalb etiladilar.

5. Oʻzbekiston Respublikasi Vazirlar Mahkamasining “Oʻzbekiston Respublikasi Moliya vazirligining Nazorat-taftish bosh boshqarmasi toʻgʻrisidagi Nizomni tasdiqlash haqida” 1992-yil 28-dekabrdagi 594-son qarori oʻz kuchini yoʻqotgan deb hisoblansin.

6. Oʻzbekiston Respublikasi Adliya vazirligi Moliya vazirligi, boshqa manfaatdor vazirliklar va idoralar bilan birgalikda bir oy muddatda amaldagi qonunchilikka budjet intizomini buzganlik uchun mansabdor shaxslarning jinoiy va maʼmuriy javobgarlik choralarini, shuningdek, Oʻzbekiston Respublikasi Moliya vazirligining Nazorat-taftish bosh boshqarmasiga budjet intizomini buzganlik uchun rahbarlar va mansabdor shaxslarga nisbatan jarimalar solish huquqi berilishini nazarda tutuvchi oʻzgartirish va qoʻshimchalar kiritish toʻgʻrisida takliflar taqdim etsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.