Hujjat 18.05.2015 00 sanasi holatiga
Amaldagi versiyaga o‘tish

Oʻzbekiston Respublikasi Vazirlar Mahkamasining

qarori

Davlat xizmatlari koʻrsatish hamda davlat organlari va boshqa tashkilotlarning idoralararo axborot hamkorligi tartibini yanada takomillashtirish chora-tadbirlari toʻgʻrisida

Oʻzbekiston Respublikasi Prezidentining “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining faoliyatini tashkil etish toʻgʻrisida” 2015-yil 4-fevraldagi PQ-2293-son qaroriga muvofiq, “Elektron hukumat” tizimi doirasida idoralararo axborot hamkorligini takomillashtirish, aholiga va tadbirkorlik subyektlariga davlat xizmatlari koʻrsatish, davlat organlari faoliyati samaradorligini oshirish maqsadida Vazirlar Mahkamasi qaror qiladi:

1. Quyidagilar:

Davlat xizmatlari, shakllari va blankalari yagona reyestrini shakllantirish va yuritish tartibi toʻgʻrisidagi nizom 1-ilovaga muvofiq;

Davlat xizmatlari koʻrsatishda davlat organlari va boshqa tashkilotlarning idoralararo axborot hamkorligi tartibi toʻgʻrisidagi nizom 2-ilovaga muvofiq tasdiqlansin.

2. Axborot texnologiyalari va kommunikatsiyalarini rivojlantirish vazirligi Davlat xizmatlari, shakllari va blankalari yagona reyestrini shakllantirish va yuritish yuzasidan masʼul idora etib belgilansin va unga quyidagilar yuklansin:

Davlat xizmatlari, shakllari va blankalari yagona reyestri shakllantirilishini, shuningdek davlat xizmatlari koʻrsatishda davlat organlari va boshqa tashkilotlarning idoralararo axborot hamkorligini taʼminlash boʻyicha davlat organlari va boshqa tashkilotlar faoliyatini idoralararo muvofiqlashtirishni amalga oshirish;

aholiga va tadbirkorlik subyektlariga davlat xizmatlari koʻrsatish tartibini yanada takomillashtirish, davlat organlarining maʼmuriy tartibotlarini axborotlashtirish boʻyicha doimiy monitoring oʻtkazish va takliflar kiritish;

davlat xizmatlari koʻrsatishda oʻz vaqtida va kelishilgan idoralararo elektron hamkorlikni tashkil etish hisobiga davlat organlari va boshqa tashkilotlar faoliyati samaradorligini oshirishga doir takliflar ishlab chiqish.

3. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi:

Oʻzbekiston Respublikasi Iqtisodiyot vazirligi, Moliya vazirligi hamda boshqa manfaatdor vazirliklar va idoralar bilan birgalikda davlat xizmatlari koʻrsatuvchi davlat organlari va boshqa tashkilotlar roʻyxati bir oy muddatda xatlovdan oʻtkazilishini va 2013 — 2020-yillarda Oʻzbekiston Respublikasi Milliy axborot-kommunikatsiya tizimini rivojlantirish kompleks dasturi amalga oshirilishini muvofiqlashtirish respublika komissiyasiga kiritilishini;

ikki oy muddatda Davlat xizmatlari, shakllari va blankalari yagona reyestri, shuningdek davlat xizmatlari koʻrsatuvchi davlat organlari va boshqa tashkilotlarning idoralararo elektron hamkorlik tizimi yaratilishini;

davlat xizmatlari koʻrsatishda davlat organlari va boshqa tashkilotlar oʻrtasida idoralararo elektron hamkorlik amalga oshirilishi yuzasidan har chorakda monitoring oʻtkazilishini, aniqlangan kamchiliklarni bartaraf etish boʻyicha aniq takliflar ishlab chiqilishini taʼminlasin.

4. Davlat xizmatlari koʻrsatuvchi davlat organlari va boshqa tashkilotlar Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda 2015-yil 1-sentabrgacha boʻlgan muddatda:

koʻrsatiladigan barcha davlat xizmatlari, shuningdek foydalaniladigan shakllar va blankalarni, keyinchalik Davlat xizmatlari, shakllari va blankalari yagona reyestriga kiritgan holda, xatlovdan oʻtkazsinlar va reglamentlasinlar;

xatlov natijalariga koʻra davlat xizmatlari koʻrsatish uchun talab qilinadigan idoraviy maʼlumotlar bazalarini yaratish va shakllantirish chora-tadbirlari rejalarini hamda tarmoq jadvallarini ishlab chiqsinlar va tasdiqlasinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2015-yil 13-may,

120-son

Vazirlar Mahkamasining 2015-yil 13-maydagi 120-son qaroriga
1-ILOVA

Davlat xizmatlari, shakllari va blankalari yagona reyestrini shakllantirish va yuritish tartibi toʻgʻrisida

NIZOM

I.Umumiy qoidalar

1. Ushbu Nizom Davlat xizmatlari, shakllari va blankalari yagona reyestrini shakllantirish va yuritish tartibini belgilaydi.

2. Ushbu Nizomda quyidagi tushunchalar qoʻllanadi:

davlat xizmati — davlat boshqaruvi, mahalliy davlat hokimiyati organlari va boshqa davlat tashkilotlari (keyingi oʻrinlarda davlat organi deb ataladi) tomonidan ariza beruvchilarning soʻrovlari boʻyicha, shu jumladan bildirish tartibida, ushbu organlar va tashkilotlarning belgilangan vakolatlari doirasida xizmatlar koʻrsatish boʻyicha amalga oshiriladigan, ariza beruvchilarning Oʻzbekiston Respublikasi qonun hujjatlarida nazarda tutilgan huquqlari va qonuniy manfaatlari amalga oshirilishini taʼminlashga doir faoliyat;

Keyingi tahrirga qarang.

ariza beruvchi — davlat xizmati koʻrsatish toʻgʻrisidagi soʻrov bilan davlat organiga murojaat qilgan jismoniy yoki yuridik shaxs;

Keyingi tahrirga qarang.

Davlat xizmatlari, shakllari va blankalari yagona reyestri (keyingi oʻrinlarda Yagona reyestr deb ataladi) — davlat xizmatlari, shakllari va blankalarining toʻliq roʻyxatini, shuningdek ushbu Nizomga muvofiq boshqa axborotni oʻz ichiga oladigan, Internet tarmogʻidagi ochiq va hamma erkin foydalanishi mumkin boʻlgan axborot resursi;

davlat xizmati koʻrsatish natijasi — davlat xizmati koʻrsatish reglamentiga muvofiq davlat organlari tomonidan tegishli harakatlarni amalga oshirishda ifodalangan, ariza beruvchilarning huquqlari, erkinliklari va qonuniy manfaatlarining amalga oshirilishi, shu jumladan ariza beruvchilarga tegishli axborot va hujjatlarning taqdim etilishi;

davlat xizmati koʻrsatish reglamenti — davlat organlari va (yoki) ularning tasarrufidagi tashkilotlar tomonidan davlat xizmati koʻrsatish tartibini belgilovchi normativ-huquqiy hujjat.

Keyingi tahrirga qarang.

3. Yagona reyestr quyidagi maqsadda shakllantiriladi va yuritiladi:

jismoniy va yuridik shaxslarga davlat xizmatlari, shakllari va blankalari toʻgʻrisida batafsil axborotni taqdim etish;

davlat organlari faoliyatining ochiqligi, oshkoraligi va samaradorligini oshirish;

davlat xizmatlari toʻgʻrisidagi axborotni yigʻish, umumlashtirish va tahlil qilish, shuningdek ularni maqbullashtirish va amalga oshirish tartibini takomillashtirishga doir takliflar ishlab chiqish.

4. Yagona reyestr davlat xizmatlarining quyidagi turlarini oʻz ichiga oladi:

ariza beruvchilarning huquqlarini belgilash (bitimlarni, mol-mulkka boʻlgan huquqlarni roʻyxatga olish va shu kabilar);

yozma va boshqa shaklda rasmiylashtiriladigan yuridik faktlarni aniqlash (maʼlumotnomalar, guvohnomalar, litsenziyalar, ruxsat berish tusidagi hujjatlarni berish, shtamplar qoʻyish va shu kabilar);

axborot berish (koʻchirmalar berish, axborotni eʼlon qilish va shu kabilar).

Yagona reyestr qonun hujjatlariga muvofiq davlat xizmatlarining boshqa turlarini ham oʻz ichiga oladi.

5. Yagona reyestr davlat tilida shakllantiriladi va yuritiladi hamda rus va ingliz, shuningdek boshqa tillardagi teng qiymatli yoki qisqartirilgan versiyalariga ega boʻlishi mumkin.

6. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Yagona reyestr operatori hisoblanadi.

7. Yagona reyestrni shakllantirish va yuritish ushbu Nizomning 1-ilovasidagi sxemaga muvofiq davlat organlari bilan birgalikda Yagona reyestr operatori tomonidan amalga oshiriladi.

Yagona reyestr ushbu Nizomning 2-ilovasidagi shaklga muvofiq yuritiladi.

II. Yagona reyestrni shakllantirish tartibi

8. Davlat organlari koʻrsatiladigan davlat xizmatlari, ularning ixtiyorida boʻlgan shakllar va blankalarning xatlovini oʻtkazish asosida davlat xizmatlari toʻgʻrisidagi maʼlumotlarni, ularning reglamentlarini, shuningdek shakllar va blankalar, hujjatlar va boshqa axborot namunalarini tayyorlaydilar va elektron koʻrinishda Yagona reyestrga kiritadilar.

Davlat xizmatining reglamentini ishlab chiqishda davlat organi tegishli idoralararo soʻrov yuborilgan paytdan boshlab bir ish kunidan ortiq boʻlmagan muddatda hujjatlar va axborot (arxiv hujjatlari asosida taqdim etiladigan arxiv maʼlumotnomalari va axborotidan tashqari) mavjud boʻlgan manfaatdor davlat organlaridan olish muddatini nazarda tutishi shart.

9. Davlat organiga beriladigan hujjatlar va axborotning shakllari va blankalarining namunalari Yagona reyestrga elektron koʻrinishda kiritiladi.

10. Davlat xizmati koʻrsatishda boshqa davlat organlari ishtirok etgan taqdirda ushbu davlat xizmati toʻgʻrisidagi maʼlumotlarni shakllantirish, hujjatlashtirish va Yagona reyestrga kiritish davlat xizmati koʻrsatilishining yakuniy natijasini taqdim etayotgan organ tomonidan amalga oshiriladi.

Agar davlat xizmati koʻrsatilishining yakuniy natijasi Oʻzbekiston Respublikasi Vazirlar Mahkamasi tomonidan taqdim etilsa, ushbu davlat xizmati toʻgʻrisidagi maʼlumotlarni shakllantirish, hujjatlashtirish va Yagona reyestrga kiritish mazkur davlat xizmati boʻyicha hujjatlar va axborot koʻrib chiqilishini tashkil qilish uchun masʼul boʻlgan davlat organi (Oʻzbekiston Respublikasi Vazirlar Mahkamasining ishchi organi) tomonidan amalga oshiriladi.

11. Yagona reyestrga kiritiladigan davlat xizmatlari toʻgʻrisidagi maʼlumotlar toʻliq va ishonchli boʻlishi kerak. Ushbu maʼlumotlarda noaniqliklar, qisqartmalar va xatolar boʻlmasligi lozim.

Davlat xizmatlari toʻgʻrisidagi maʼlumotlarni oʻz ichiga olgan hujjatlarning taqdim etiladigan elektron nusxalari va ularning matni yaxshi farqlanadigan, nusxalar sifati esa hujjatning oʻqilishini qiyinlashtirmasligi kerak.

Agar davlat xizmati olish boshqa organlar tomonidan beriladigan tegishli hujjatlar va maʼlumotnomalarni yigʻishni nazarda tutsa, davlat xizmatlari toʻgʻrisidagi maʼlumotlarda ushbu hujjatlarning berilishi uchun masʼul boʻlgan organlar koʻrsatilgan holda, mazkur hujjatlarning batafsil roʻyxati berilishi kerak.

12. Davlat organi tomonidan Yagona reyestrga maʼlumotlar kiritilgandan keyin Yagona reyestr operatori ushbu maʼlumotlarni bir hafta muddatda koʻrib chiqadi va davlat xizmatini roʻyxatga oladi.

Noyob reyestr raqamini koʻrsatgan holda davlat xizmatining Yagona reyestrda roʻyxatga olinganligi toʻgʻrisidagi bildirishnoma elektron koʻrinishda davlat xizmati Yagona reyestrda roʻyxatga olingan kundan keyin bir ish kuni mobaynida davlat organiga yuboriladi.

13. Davlat organi tomonidan ushbu Nizom talablari buzilgan holda, notoʻgʻri rasmiylashtirilgan yoki boshqa kamchiliklar mavjud boʻlgan maʼlumotlar va hujjatlar Yagona reyestrga kiritilgan taqdirda, operator besh ish kuni mobaynida, rad etishning asoslangan sabablarini koʻrsatib, davlat xizmatini Yagona reyestrda roʻyxatga olishni rad etadi.

Davlat organi ish jarayonida aniqlangan kamchiliklarni uch ish kuni mobaynida bartaraf etadi va davlat xizmati toʻgʻrisidagi tegishli maʼlumotlarni Yagona reyestrga takroran kiritadi.

Kamchiliklari aniqlangan, Yagona reyestrga kiritilishi kerak boʻlgan maʼlumotlar va hujjatlarni oʻzgartirish yoki toʻldirish ularni boshqa davlat organlari bilan kelishish, belgilangan tartibda tasdiqlashga sabab boʻlsa yoki aniqlangan kamchiliklarni ish jarayonida uch kun mobaynida aniqlashga toʻsqinlik qiladigan, qonun hujjatlarida nazarda tutilgan boshqa holatlarda, davlat organi aniqlangan kamchiliklarni bartaraf etish muddatlarini koʻrsatib, bu haqdagi tegishli axborotni Yagona reyestr operatoriga kiritadi.

Ilgari aniqlangan va tuzatilmagan kamchiliklar mavjud boʻlgan davlat xizmati toʻgʻrisidagi tegishli maʼlumotlar takroran kiritilgan taqdirda paydo boʻladigan barcha masalalar davlat organi va Yagona reyestr operatori oʻrtasida ish jarayonida darhol hal etiladi.

III. Yagona reyestrga oʻzgartirishlar va qoʻshimchalar kiritish tartibi

14. Yagona reyestrda roʻyxatga olingan davlat xizmati koʻrsatish reglamentiga oʻzgartirishlar va qoʻshimchalar kiritilgan taqdirda davlat organi bir kun muddatda, asoslarni koʻrsatib, elektron koʻrinishda tegishli oʻzgartirishlar va qoʻshimchalarni kiritadi.

15. Yagona reyestr operatori tomonidan Yagona reyestrda roʻyxatga olingan davlat xizmatlari toʻgʻrisidagi maʼlumotlardagi oʻzgartirishlar va qoʻshimchalarni koʻrib chiqish ushbu Nizomning 12-13-bandlarida belgilangan tartibda amalga oshiriladi.

Bunda oʻzgartirishlar va qoʻshimchalar kiritilgan taqdirda Yagona reyestrda kiritilgan oʻzgartirishlar va qoʻshimchalarning sanasi va mohiyati toʻgʻrisida tegishli belgi qoʻyiladi.

16. Davlat xizmati bekor qilingan taqdirda davlat organi bir hafta muddatda, chiqarish uchun asoslarni koʻrsatib, davlat xizmatini Yagona reyestrdan chiqarish zarurligi toʻgʻrisida elektron koʻrinishda Yagona reyestr operatorini xabardor qiladi.

Davlat xizmati Yagona reyestrdan chiqarilganda davlat xizmati toʻgʻrisidagi maʼlumotlar toʻliq chiqarib tashlanmaydi, balki ushbu davlat xizmati bekor qilinganligi, shuningdek mazkur xizmat bekor qilingan sana va buning asosi toʻgʻrisida tegishli belgi kiritiladi.

17. Bekor qilingan davlat xizmatining noyob reyestrli raqami reyestrdan chiqarilmaydi va Yagona reyestrda yangidan roʻyxatga olingan boshqa davlat xizmatlariga berilmaydi.

IV. Yagona reyestr operatori va davlat organlarining huquqlari va majburiyatlari

18. Yagona reyestr operatori quyidagi huquqlarga ega:

davlat xizmatlari toʻgʻrisida notoʻgʻri rasmiylashtirilgan, shuningdek hujjatlari, shakllari, blankalarida kamchiliklar mavjud maʼlumotlarni Yagona reyestrda roʻyxatga olmaslik;

davlat xizmatlarini Yagona reyestrga kiritish yoki unga oʻzgartirishlar va qoʻshimchalar kiritishga doir takliflarni Oʻzbekiston Respublikasi Vazirlar Mahkamasiga taqdim etish;

davlat xizmatlarining sifatli reglamentlanishini taʼminlashga doir takliflarni Oʻzbekiston Respublikasi Vazirlar Mahkamasiga kiritish.

19. Yagona reyestr operatori quyidagilarga majbur:

davlat xizmatlarining Yagona reyestrda roʻyxatga olinishini, shuningdek ushbu Nizomga muvofiq davlat xizmatlari toʻgʻrisidagi maʼlumotlarga tegishli oʻzgartirishlar va qoʻshimchalar kiritish;

Yagona reyestrdagi maʼlumotlarni Oʻzbekiston Respublikasi Interaktiv davlat xizmatlarining yagona portalida eʼlon qilish hamda jismoniy va yuridik shaxslarning davlat xizmatlari toʻgʻrisidagi maʼlumotlardan kecha- kunduz foydalana olishlarini taʼminlash;

Yagona reyestrning uzluksiz ishlashini, shuningdek undagi maʼlumotlarning saqlanishini va foydalana olish mumkinligini taʼminlash;

davlat xizmatlari toʻgʻrisidagi tegishli maʼlumotlarni shakllantirish va yuritish uchun davlat organlarining Yagona reyestrdan foydalana olishlarini taʼminlash;

davlat xizmatlari toʻgʻrisidagi maʼlumotlarni Yagona reyestrda roʻyxatga olishdan oldin ularning toʻliqligi va ishonchliligini tekshirish;

koʻrsatiladigan davlat xizmatlarini tahlil qilish va davlat organlari tomonidan amalga oshiriladigan tartibotlarning takrorlanishini istisno etish, shuningdek muddatlarni va ariza beruvchilardan talab qilinadigan hujjatlar va axborotni qisqartirish yuzasidan Oʻzbekiston Respublikasi Vazirlar Mahkamasiga takliflar kiritish.

20. Davlat organlari quyidagi huquqlarga ega:

belgilangan tartibda davlat xizmati koʻrsatish reglamentiga oʻzgartirishlar va qoʻshimchalar kiritish;

Yagona reyestrni shakllantirish va yuritish boʻyicha uslubiy tavsiyalarni ishlab chiqishda ishtirok etish.

21. Davlat organlari quyidagilarga majbur:

oʻzlari tomonidan koʻrsatiladigan davlat xizmatlarining reglamentlanishini va Yagona reyestrda hujjatlashtirish uchun ular toʻgʻrisida maʼlumotlar taqdim etilishini taʼminlash;

har yili 1-oktabrgacha boʻlgan muddatda davlat xizmatlarini xatlovdan oʻtkazish va ular toʻgʻrisidagi Yagona reyestrdagi maʼlumotlarni aktuallashtirish;

davlat xizmatlari koʻrsatish reglamentlariga oʻzgartirishlar va qoʻshimchalar kiritilgan yoki ushbu davlat xizmatlari bekor qilingan taqdirda davlat xizmatlari toʻgʻrisidagi maʼlumotlarni oʻzgartirish va toʻldirish boʻyicha takliflar kiritish;

ushbu Nizomga muvofiq davlat xizmatlarini Yagona reyestrda roʻyxatga olish uchun mazkur xizmatlar toʻgʻrisida toʻliq va ishonchli maʼlumotlarni taqdim etish.

Davlat organlari qonun hujjatlariga muvofiq boshqa majburiyatlarga ham ega boʻlishi mumkin.

V. Yakunlovchi qoidalar

22. Davlat sirlarining yoki qonun bilan qoʻriqlanadigan boshqa sirning oshkor boʻlishiga olib kelishi mumkin boʻlgan maʼlumotlarni Yagona reyestrga kiritish taqiqlanadi.

23. Axborot texnologiyalari va kommunikatsiyalarini rivojlantirish vazirligi huzuridagi Aloqa, axborot texnologiyalari va kommunikatsiyalari sohasidagi nazorat boʻyicha davlat inspeksiyasi Oʻzbekiston Respublikasi Vazirlar Mahkamasining “Davlat va xoʻjalik boshqaruvi, mahalliy davlat hokimiyati organlari faoliyatida axborot-kommunikatsiya texnologiyalarini joriy etish va rivojlantirishning holatini oʻrganishni amalga oshirish tartibi toʻgʻrisidagi nizomni tasdiqlash haqida” 2014-yil 23-apreldagi 102-son qaroriga muvofiq axborot-kommunikatsiya texnologiyalarini davlat organlarida joriy qilish va rivojlantirish holatini oʻrganish asosida Yagona reyestrga kiritilgan maʼlumotlarning toʻliqligi va ishonchliligi yuzasidan nazoratni amalga oshiradi.

Keyingi tahrirga qarang.

24. Ushbu Nizom talablarini bajarishda davlat organlari va Yagona reyestr operatori oʻrtasida paydo boʻladigan bahslar Oʻzbekiston Respublikasi Vazirlar Mahkamasi tomonidan koʻrib chiqiladi va hal etiladi.

25. Yagona reyestrda roʻyxatga olish uchun taqdim etiladigan davlat xizmatlari toʻgʻrisidagi maʼlumotlarning toʻliqligi va ishonchliligi yuzasidan masʼuliyat davlat organlarining tegishli rahbarlari zimmasida boʻladi.

26. Ushbu Nizom talablari buzilishida aybdor boʻlgan shaxslar qonun hujjatlariga muvofiq javobgar boʻladilar.

Davlat xizmatlari, shakllari va blankalari yagona reyestrini shakllantirish va yuritish tartibi toʻgʻrisidagi nizomga
1-ILOVA

Davlat xizmatlari, shakllari va blankalari yagona reyestrini shakllantirish va yuritish

SXEMASI

Bosqichlar	Xatti-harakatlar	Subyektlar	Muddatlar
1-bosqich	Davlat xizmatlari, shakllari va blankalari yagona reyestri axborot tizimini yaratish va ishga tushirish.	Yagona reyestr operatori	2015-yil 1-iyulgacha
2-bosqich	Aholiga va tadbirkorlik subyektlariga koʻrsatiladigan davlat xizmatlarini xatlovdan oʻtkazish va reglamentlash.	Davlat xizmatlari koʻrsatuvchi davlat organlari	2015-yil 1-sentabrgacha
3-bosqich	Yagona reyestrga davlat xizmatlari toʻgʻrisidagi maʼlumotlarni, ularni koʻrsatish reglamentlarini, shakllar va blankalar namunalarini, shuningdek davlat xizmatlari koʻrsatuvchi organlarga beriladigan qoʻshimcha maʼlumotlar va axborotni elektron koʻrinishda kiritish.	Davlat xizmatlari koʻrsatuvchi davlat organlari	2015-yil 1-oktabrgacha
4-bosqich	Davlat xizmatining uni koʻrsatish reglamentiga muvofiqligi yuzasidan davlat xizmati koʻrsatish toʻgʻrisida kiritilgan maʼlumotlarni koʻrib chiqish, Yagona reyestrda roʻyxatga olish (oʻzgartirishlar kiritish).	Yagona reyestr operatori	bir hafta muddatda
5-bosqich	Davlat xizmatining Yagona reyestrda roʻyxatga olinganligi toʻgʻrisidagi bildirishnomani yuborish.	Yagona reyestr operatori	roʻyxatga olingan kundan keyin 1 ish kuni mobaynida
5-bosqich	Talablar buzilgan taqdirda davlat xizmatining Yagona reyestrda roʻyxatga olinishini rad etish va bartaraf etish uchun aniqlangan kamchiliklar toʻgʻrisidagi bildirishnomani yuborish.	Yagona reyestr operatori	5 ish kuni mobaynida
6-bosqich	Aniqlangan kamchiliklarni bartaraf etish va davlat xizmati toʻgʻrisidagi tegishli maʼlumotlarni Yagona reyestrga takroran kiritish.	Davlat xizmatlari koʻrsatuvchi davlat organlari	3 ish kuni mobaynida
7-bosqich	Yagona reyestrda roʻyxatga olingan davlat xizmati koʻrsatish toʻgʻrisidagi reglamentga kiritilgan oʻzgartirishlar va qoʻshimchalar toʻgʻrisidagi maʼlumotlarni elektron koʻrinishda Yagona reyestrga kiritish.	Davlat xizmatlari koʻrsatuvchi davlat organlari	oʻzgartirish kiritilgan paytdan boshlab 1 ish kuni mobaynida
7-bosqich	Yagona reyestrda roʻyxatga olingan davlat xizmatlari toʻgʻrisidagi maʼlumotlarga kiritilgan oʻzgartirishlar va qoʻshimchalarni ushbu sxemaning 4 va 5-bosqichlarida belgilangan tartibda koʻrib chiqish.	Yagona reyestr operatori	belgilangan muddatlarda

Davlat xizmatlari, shakllari va blankalari yagona reyestrini shakllantirish va yuritish tartibi toʻgʻrisidagi nizomga
2-ILOVA

Davlat xizmatlari, shakllari va blankalari yagona

reyestri

Davlat xizmatining noyob reyestr raqami‎	Davlat xizmatining nomi‎	Davlat xizmatini koʻrsatish natijasini beruvchi vakolatli organning nomi‎	Davlat xizmati koʻrsatilayotgan ariza beruvchilar toifalari‎	Davlat xizmati koʻrsatish tartibi (koʻrsatish bosqichlari va tartibotlari)‎	Davlat xizmati koʻrsatish narxi‎	Davlat xizmati koʻrsatish muddatlari‎	Davlat xizmati koʻrsatish reglamenti‎	Davlat xizmati koʻrsatish uchun talab qilinadigan hujjatlar‎	Axborot hamkorligi orqali olinadigan hujjatlar va axborot hamda ularni beradigan davlat organlari‎	Davlat xizmati koʻrsatish natijasi‎	Davlat xizmati koʻrsatish natijasida beriladigan yoki davlat xizmati olish uchun foydalaniladigan shakllar va blankalar ‎
1‎	2‎	3‎	4‎	5‎	6‎	7‎	8‎	9‎	10‎	11‎	12‎
.‎	‎	‎	‎	‎	‎	‎	‎	‎	‎	‎	‎
.‎	‎	‎	‎	‎	‎	‎	‎	‎	‎	‎	‎
.‎	‎	‎	‎	‎	‎	‎	‎	‎	‎	‎	‎

Izoh. Davlat xizmatlari, shakllari va blankalari yagona reyestri davlat xizmatlari toʻgʻrisidagi boshqa maʼlumotlarni ham oʻz ichiga olishi mumkin.

Keyingi tahrirga qarang.

Vazirlar Mahkamasining 2015-yil 13-maydagi 120-son qaroriga
2-ILOVA

Davlat xizmatlari koʻrsatishda davlat organlari va boshqa tashkilotlarning idoralararo axborot hamkorligi tartibi toʻgʻrisida

NIZOM

I. Umumiy qoidalar

1. Ushbu Nizom “Elektron hujjat aylanishi toʻgʻrisida” va “Elektron raqamli imzo toʻgʻrisida”gi Oʻzbekiston Respublikasi qonunlariga hamda Vazirlar Mahkamasining “Tadbirkorlik subyektlariga davlat xizmatlari koʻrsatish tartibini yanada takomillashtirish chora-tadbirlari toʻgʻrisida” 2014-yil 31-dekabrdagi 377-son qaroriga muvofiq idoralararo elektron hamkorlik tizimini qoʻllagan holda davlat xizmatlari koʻrsatishda davlat organlari va boshqa tashkilotlarning idoralararo axborot hamkorligi tartibini belgilaydi.

2. Ushbu Nizomda quyidagi tushunchalar qoʻllanadi:

soʻrov — davlat organiga yozma yoki elektron shaklda taqdim etiladigan davlat xizmati koʻrsatish toʻgʻrisidagi talab;

elektron hujjat — elektron shaklda qayd etilgan, elektron raqamli imzo bilan tasdiqlangan hamda elektron hujjatning uni identifikatsiya qilish imkonini beradigan boshqa rekvizitlariga ega boʻlgan axborot;

idoralararo elektron hamkorlik — ariza beruvchilarga davlat xizmatlari koʻrsatishda zarur boʻlgan, davlat organlari ixtiyoridagi hujjatlar va axborotni almashish maqsadida amalga oshiriladigan ushbu davlat organlari oʻrtasida elektron shakldagi oʻzaro hamkorlik;

idoralararo elektron hamkorlik tizimi — ariza beruvchilarga davlat xizmatlari koʻrsatishda idoralararo elektron hamkorlik qilishni, davlat organlariga zarur boʻlgan elektron hujjatlarni almashishni taʼminlovchi apparat-dasturiy vositalar majmui;

idoralararo elektron soʻrov — davlat organining ariza beruvchi soʻrovi asosida soʻralayotgan hujjatlar va axborot bor boʻlgan tashkilotlarga elektron hujjat shaklida yuborilgan, davlat xizmati koʻrsatish uchun zarur boʻlgan hujjatlar va axborotni taqdim etish toʻgʻrisidagi talabi;

davlat xizmati koʻrsatish reglamenti — davlat organlari va (yoki) ularga idoraviy mansub tashkilotlar tomonidan davlat xizmati koʻrsatish tartibini belgilovchi normativ-huquqiy hujjat;

davlat xizmati koʻrsatish natijasi — davlat xizmati koʻrsatish reglamentiga muvofiq davlat organlari tomonidan tegishli harakatlarni amalga oshirishda ifodalangan, ariza beruvchilarning huquqlari, erkinliklari va qonuniy manfaatlari amalga oshirilishi, shu jumladan ariza beruvchilarga tegishli axborot va hujjatlar taqdim etilishi;

Davlat xizmatlari, shakllari va blankalari yagona reyestri — davlat organlari tomonidan koʻrsatiladigan davlat xizmatlarining toʻliq roʻyxati, shu jumladan elektron shakldagi roʻyxati, shakllar va blankalar hamda boshqa axborot bor boʻlgan ochiq va hamma erkin foydalanishi mumkin boʻlgan axborot resursi.

3. Quyidagilar davlat xizmatlari koʻrsatishda idoralararo elektron hamkorlik qilish vazifalari hisoblanadi:

davlat organlari tomonidan oʻz funksiyalarining axborot tizimlari va maʼlumotlar bazalaridan foydalangan holda samarali bajarilishini taʼminlash;

ariza beruvchilarning soʻrovlarini samarali koʻrib chiqish uchun oʻz vaqtida va kelishilgan idoralararo elektron hamkorlik qilishni taʼminlash;

axborot-kommunikatsiya texnologiyalaridan keng foydalanish va joriy etish hisobiga davlat organlari faoliyati samaradorligini oshirish.

4. Idoralararo elektron soʻrovlarni yuboruvchi va berilgan soʻrovlar asosida tegishli hujjatlar va axborotni taqdim etuvchi davlat organlarining masʼul mansabdor shaxslari idoralararo elektron hamkorlik tizimidan foydalanuvchilar hisoblanadi.

5. Davlat xizmatlari koʻrsatishda davlat organlarining idoralararo axborot hamkorligi:

ushbu Nizomga muvofiq idoralararo elektron hamkorlik tizimidan foydalanib;

qonun hujjatlari bilan taqiqlanmagan axborot hamkorligining boshqa usullari yordamida amalga oshirilishi mumkin.

Idoralararo elektron hamkorlik tizimini qoʻllagan holda axborot hamkorligini texnologik taʼminlashga yagona texnologik yechimlar va standartlar, yagona klassifikatorlar va maʼlumotlar tuzilishining tavsiflaridan foydalanish yoʻli bilan, shuningdek elektron hujjatlardan foydalanishda litsenziya cheklovlaridan holi boʻlgan ularning yagona ochiq formati asosida erishiladi.

6. Ushbu Nizomga ilova qilinayotgan sxemaga muvofiq davlat xizmatlari koʻrsatuvchi davlat organlari va boshqa tashkilotlar oʻrtasidagi idoralararo elektron soʻrovlar va ularga javoblarni uzatish, ularning ishlashini taʼminlash idoralararo elektron hamkorlik tizimining asosiy funksiyasi hisoblanadi.

7. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi idoralararo elektron hamkorlik tizimining operatori hisoblanadi.

8. Idoralararo elektron soʻrovni yoʻllash va davlat xizmatlari koʻrsatish uchun zarur hujjatlar va axborotni taqdim etish idoralararo elektron hamkorlik qilish tizimi orqali bepul amalga oshiriladi.

II. Idoralararo elektron hamkorlik qilish tartibi

9. Idoralararo elektron hamkorlik qilish quyidagicha amalga oshiriladi:

idoralararo elektron soʻrovni ushbu Nizomda belgilangan tartibda davlat xizmatlari koʻrsatish uchun zarur boʻlgan soʻraladigan hujjatlar va axborot bor boʻlgan davlat organlariga yuborish;

“Elektron hukumat” tizimi axborot tizimlari va markazlashtirilgan maʼlumotlar bazalari, davlat xizmatlari koʻrsatish uchun zarur boʻlgan soʻraladigan hujjatlar va axborot bor boʻlgan davlat organlarining axborot tizimlari va maʼlumotlar bazalari komplekslarining idoralararo elektron soʻrovlarni uzatish, ularni ishlash va olish jarayonini avtomatlashtirish uchun idoralararo elektron hamkorlik tizimi bilan integratsiyalashuvini taʼminlash.

10. Idoralararo elektron hamkorlik tizimidan foydalanuvchilar boshqa davlat organlaridan ular ixtiyorida boʻlgan hujjatlar va axborotni ushbu Nizomga muvofiq ariza beruvchining soʻrovi asosida soʻrash huquqiga ega.

11. Davlat organlari tomonidan soʻraladigan hujjatlar va axborot roʻyxati davlat xizmatlari koʻrsatish reglamentlari bilan belgilanadi.

12. Idoralararo elektron hamkorlik tizimidan foydalanuvchilar davlat xizmati koʻrsatish uchun ariza beruvchining soʻrovi olingandan keyin ariza beruvchining soʻrovi olingan kundan keyingi bir ish kuni mobaynida idoralararo elektron soʻrovni oʻz ixtiyorida davlat xizmati koʻrsatish uchun zarur boʻlgan hujjatlar va axborot bor boʻlgan davlat organlariga yuboradilar.

13. Idoralararo elektron soʻrov yuborilgan idoralararo elektron hamkorlik qilish tizimidan foydalanuvchilar idoralararo elektron soʻrov yuborilgan kundan keyingi bir ish kuni davomida oʻz ixtiyoridagi hujjatlar va axborotni elektron hujjat shaklida tayyorlaydilar va idoralararo elektron hamkorlik tizimi orqali yuboradilar.

Elektron hujjatning haqiqiyligini tekshirish tartib-qoidasi qonun hujjatlarida belgilangan talablarga muvofiq amalga oshiriladi.

14. Idoralararo elektron soʻrovda quyidagilar koʻrsatilishi kerak:

idoralararo elektron soʻrovni yuboradigan davlat organining nomi;

idoralararo elektron soʻrov yuboriladigan davlat organining nomi;

davlat xizmatining noyob reyestr raqamini koʻrsatgan holda, taqdim etish uchun tegishli hujjatlar va axborot zarur boʻlgan davlat xizmatining nomi;

ariza beruvchi toʻgʻrisidagi maʼlumotlar, shu jumladan uning soʻrovini ilova qilgan holda hujjatlar va axborotni taqdim etish uchun uning identifikatsiyalovchi maʼlumotlari;

idoralararo elektron soʻrov yuboriladigan davlat organi ixtiyorida boʻlgan soʻraladigan hujjatlar va axborot roʻyxati;

idoralararo elektron soʻrov yuborilgan sana;

idoralararo elektron soʻrovni tayyorlagan va yuborgan shaxsning familiyasi, ismi, otasining ismi va lavozimi, elektron raqamli imzo rekvizitlari.

Idoralararo elektron soʻrov davlat xizmatlari koʻrsatish uchun zarur boʻlgan boshqa maʼlumotlarni ham oʻz ichiga olishi mumkin.

15. Idoralararo elektron soʻrovni oladigan idoralararo elektron hamkorlik tizimidan foydalanuvchi:

idoralararo elektron soʻrovni yuborishning huquqiy asoslarini aniqlaydi;

maʼlumotlar tarkibini, shu jumladan hujjatlar va axborotni tayyorlash va yuborish uchun zarur boʻlgan, idoralararo elektron soʻrovda bayon qilingan soʻraladigan hujjatlar va axborot roʻyxatini aniqlaydi;

idoralararo elektron soʻrovni olgan tashkilotda shunday hujjatlar va axborotning mavjudligi faktini aniqlaydi;

soʻraladigan hujjatlar va axborotni idoralararo elektron soʻrov bilan murojaat qilgan davlat organiga oʻz vaqtida yuborish maqsadida ularni olish uchun zarur choralarni koʻradi;

soʻraladigan hujjatlar va axborotni ilova qilgan holda idoralararo elektron soʻrovga javobni shakllantiradi hamda uni tegishli hujjatlar va axborotni soʻragan davlat organiga yuboradi.

16. Idoralararo elektron soʻrov idoralararo elektron hamkorlik tizimiga yuborilgan sana ushbu soʻrov davlat organidan olingan sana hisoblanadi.

17. Idoralararo elektron soʻrovni olgan davlat organlari tomonidan ushbu organlarda mavjud boʻlgan soʻraladigan hujjatlar va axborotning asosli rad javobi boʻlmaganda taqdim etilmasligi yoki oʻz vaqtida taqdim etilmasligi ariza beruvchiga davlat xizmati koʻrsatilishini rad etish uchun asos hisoblanmaydi.

18. Idoralararo elektron hamkorlik tizimidan foydalanuvchining davlat organiga soʻraladigan hujjatlar va axborotni taqdim etishdagi asosli rad javobi asoslangan boʻlishi va idoralararo elektron soʻrov yuborilgan kundan keyingi bir ish kunidan kechiktirilmay yuborilishi kerak.

19. Idoralararo elektron hamkorlik tizimi orqali davlat siri yoki qonun bilan qoʻriqlanadigan boshqa sirni oʻz ichiga olgan idoralararo elektron soʻrovlarni yuborishga hamda tegishli hujjatlar va axborotni taqdim etishga yoʻl qoʻyilmaydi.

III. Idoralararo elektron hamkorlik qilishda davlat xizmatlari koʻrsatuvchi davlat organlarining huquqlari va majburiyatlari

20. Idoralararo elektron hamkorlik qilishda davlat organlari:

tegishli davlat organlaridan davlat xizmatlari koʻrsatish uchun zarur boʻlgan hujjatlar va axborotni soʻrash va olish;

tegishli huquqiy asoslar boʻlmaganda hujjatlar va axborotni taqdim etishni rad etish huquqiga ega.

Davlat organlari qonun hujjatlariga muvofiq boshqa huquqlarga ham ega boʻlishi mumkin.

21. Davlat organlari tegishli munosabatlarni tartibga solish vakolatiga kirmaydigan tashkilotlarga idoralararo elektron soʻrovlarni yuborish huquqiga ega emas.

22. Idoralararo elektron hamkorlik qiluvchi davlat organlari tegishli idoralararo elektron soʻrov olingan kundan keyingi bir ish kuni mobaynida soʻraladigan hujjatlar va axborotni (arxiv hujjatlari asosida taqdim etiladigan arxiv maʼlumotnomalari va axborotdan tashqari) toʻliq hajmda taqdim etishga, shuningdek uzatiladigan hujjatlar va axborotning ishonchliligini taʼminlashga majbur.

Davlat organlari qonun hujjatlariga muvofiq boshqa majburiyatlarga ham ega boʻlishi mumkin.

23. Idoralararo elektron hamkorlik tizimidan foydalanuvchilar identifikatsion va autentifikatsion maʼlumotlarning, shuningdek idoralararo elektron hamkorlik qilish doirasida olinadigan va joʻnatiladigan hujjatlar va axborotning muhofaza qilinishi va zarur tarzda saqlanishini taʼminlashga majbur.

Keyingi tahrirga qarang.

24. Davlat organlari xodimlari tomonidan oʻzlariga idoralararo elektron hamkorlik qilishda maʼlum boʻlgan jismoniy shaxslarning shaxsiy hayoti, yuridik shaxslarning faoliyati toʻgʻrisidagi maʼlumotlar ularning yozma roziligisiz, shuningdek, agar bu ariza beruvchilarning huquqlari, erkinliklari va qonuniy manfaatlarini kamsitadigan boʻlsa, qonun bilan qoʻriqlanadigan boshqa sir va boshqa axborotning oshkor etilishiga yoʻl qoʻyilmaydi.

IV. Yakunlovchi qoidalar

25. Idoralararo elektron hamkorlik tizimidan foydalanuvchilar davlat organlarining idoralararo elektron soʻrovlari boʻyicha soʻraladigan hujjatlar va axborotning oʻz vaqtida taqdim etilishi uchun javob beradilar.

26. Idoralararo elektron hamkorlik qiluvchi davlat organlari idoralararo elektron hamkorlik tizimi orqali yuboriladigan hujjatlar va axborotning ishonchliligi uchun javob beradilar.

27. Idoralararo elektron hamkorlik tizimi operatori uning uzluksiz ishlashi va axborot xavfsizligi uchun javob beradi.

28. Ushbu Nizom talablari buzilishida aybdor boʻlgan shaxslar qonun hujjatlariga muvofiq javobgar boʻladilar.

Davlat xizmatlari koʻrsatishda davlat organlari va boshqa tashkilotlarning idoralararo axborot hamkorligi tartibi toʻgʻrisidagi nizomga
ILOVA

Davlat xizmatlari koʻrsatishda davlat organlari va boshqa tashkilotlarning idoralararo elektron hamkorligini amalga oshirish

SXEMASI

Bosqichlar	Xatti-harakatlar	Subyektlar	Muddatlar
1-bosqich	Davlat xizmati olish uchun davlat organiga soʻrov yuborish.	Jismoniy yoki yuridik shaxs	Ariza beruvchining xohishiga koʻra
2-bosqich	Davlat xizmati olish uchun soʻrovni qabul qilish, roʻyxatdan oʻtkazish va bajarish uchun qabul qilish.	Davlat xizmatlari koʻrsatuvchi davlat organi	Bir ish kuni mobaynida
3-bosqich	Idoralararo elektron soʻrovni shakllantirish va davlat xizmati koʻrsatish uchun zarur hujjatlar va axborot bor boʻlgan davlat organiga yoki boshqa tashkilotga yuborish.	Davlat xizmatlari koʻrsatuvchi davlat organi	Bir ish kuni mobaynida
4-bosqich	Idoralararo elektron soʻrovni yuborishning huquqiy asosini aniqlash. Soʻralayotgan hujjatlar va axborotning mavjudligi faktini aniqlash. Soʻralayotgan hujjatlar va axborotni ilova qilgan holda idoralararo elektron soʻrovga javobni shakllantirish va yuborish.	Oʻz ixtiyorida zarur hujjatlar va axborotga ega boʻlgan davlat organi yoki boshqa tashkilot	Idoralararo elektron soʻrov yuborilgan kundan keyingi bir ish kuni mobaynida

(Oʻzbekiston Respublikasi qonun hujjatlari toʻplami, 2015-y., 19-son, 235-modda; 2016-y., 23-son, 269-modda; Qonun hujjatlari maʼlumotlari milliy bazasi, 23.04.2018-y., 09/18/297/1096-son, 21.11.2018-y., 09/18/934/2197-son)