Oʻzbekiston Respublikasi Uy-joy kodeksining 15, 17, 18, va 20-moddalariga muvofiq Vazirlar Mahkamasi qaror qiladi:

1. Quyidagilar:

Oʻzbekiston Respublikasida Uy-joy fondini davlat yoʻli bilan hisobga olishning yagona tizimi toʻgʻrisidagi nizom 1-ilovaga muvofiq;

Uylar va turar joylarni uy-joy fondiga kiritish tartibi toʻgʻrisidagi nizom 2-ilovaga muvofiq;

Uylar va turar joylarni uy-joy fondidan chiqarish tartibi toʻgʻrisidagi nizom 3-ilovaga muvofiq;

Turar joylarni yashash uchun moʻljallanmagan joylarga oʻtkazish tartibi toʻgʻrisidagi nizom 4-ilovaga muvofiq tasdiqlansin.

2. Oʻzbekiston Respublikasi Kommunal xizmat koʻrsatish vazirligi:

Oʻzbekiston Respublikasi Makroiqtisodiyot va statistika vazirligi bilan kelishgan holda ikki oy muddatda uy-joy fondini davlat yoʻli bilan hisobga olish boʻyicha yoʻriqnoma ishlab chiqsin va tasdiqlasin hamda uning bajarilishi ustidan nazoratni taʼminlasin;

texnik roʻyxatga olish kadastr byurolariga uslubiy rahbarlikni va ularning uy-joy fondini texnik hisobga olishga doir faoliyatini muvofiqlashtirishni taʼminlasin.

3. Belgilab qoʻyilsinki, Oʻzbekiston Respublikasida uy-joy fondini davlat yoʻli bilan hisobga olishning yagona tizimi toʻgʻrisidagi nizom amalga kiritilgunga qadar tuzilgan inventar hujjatlar yigʻma jildi, roʻyxatdan oʻtkazish daftarlari va boshqa hujjatlar haqiqiy hisoblanadi.

4. Oʻzbekiston SSR Ministrlar Sovetining “Uylar va xonalarning texnik va sanitar ahvolini tekshirish hamda ularning yashash uchun yaroqsizligini tan olish toʻgʻrisida, shuningdek, ularni boshqa maqsadlarda foydalanish uchun qayta sozlashni yoki buzishni amalga oshirish toʻgʻrisida” 1985-yil 6-dekabrdagi 605-son qarori (OʻzSSR QT, 1985-y., 12-son, 58-modda) oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.

1. Mazkur Nizom Oʻzbekiston Respublikasida uy-joy fondini, mulkchilik shakllaridan qatʼi nazar, davlat yoʻli bilan hisobga olishning yagona tizimini belgilaydi va koʻchmas mulk davlat kadastrining tarkibiy elementi hisoblanadi.

2. Uy-joy fondi obyektlarining joylashgan oʻrni, son va sifat tarkibi, texnik holati, obodonlashtirish darajasi va ularning qiymati toʻgʻrisida maʼlumot olish hamda ushbu koʻrsatkichlarni oʻzgartirish Oʻzbekiston Respublikasida uy-joy fondini davlat yoʻli bilan hisobga olishning asosiy vazifasi hisoblanadi.

3. Insonning yashashi uchun yaroqli boʻlgan turar joylar, shu jumladan, uylar, kvartiralar, xizmat turar joylari, maxsus uylar (yotoqxonalar, vaqtinchalik uy-joy fondi uylari, nogironlar, faxriylar, yolgʻiz keksalar internat-uylari, shuningdek, bolalar uylari va boshqa maxsus maqsadlar uchun moʻljallangan uylar) davlat yoʻli bilan hisobga olinadi.

Uylar va turar joylarni uy-joy fondiga kiritish, ularni uy-joy fondidan chiqarish, Uylar va turar joylarni uy-joy fondiga kiritish tartibi toʻgʻrisidagi nizomga, Uylar va turar joylarni uy-joy fondidan chiqarish tartibi toʻgʻrisidagi nizomga hamda Oʻzbekiston Respublikasining uy-joy toʻgʻrisidagi boshqa qonun hujjatlariga muvofiq amalga oshiriladi.

4. Oʻzbekiston Respublikasida uy-joy fondini davlat yoʻli bilan hisobga olishning yagona tizimi texnik (tezkor) va rasmiy statistika hisobini oʻz ichiga oladi.

Texnik inventarizatsiya oʻtkazish va uylar hamda turar joylarga egalik huquqini va boshqa mulkiy huquqlarni roʻyxatdan oʻtkazish yoʻli bilan Oʻzbekiston Respublikasi uchun hisobga olishning yagona tizimi boʻyicha uy-joy fondini, uning qaysi idoraga qarashliligi va mulkchilik shakllaridan qatʼi nazar, texnik hisobga olish davlat yoʻli bilan hisobga olishning asosini tashkil etadi.

Uylar va turar joylarni texnik hisobga olish hamda davlat roʻyxatidan oʻtkazish Oʻzbekiston Respublikasi Vazirlar Mahkamasining “Oʻzbekiston Respublikasida koʻchmas mulk davlat kadastrini yuritish toʻgʻrisida” 1997-yil 2-iyundagi 278-son qaroriga muvofiq amalga oshiriladi.

Uy-joy fondini texnik hisobga olishni yuritish va davlat roʻyxatidan oʻtkazish tumanlar va shaharlar texnik inventarizatsiya kadastr byurolariga yuklanadi.

5. Tumanlar, shaharlar texnik inventarizatsiya kadastr byurolari uy-joy fondini, uning qaysi idoraga qarashliligi va mulkchilik shakllaridan qatʼi nazar, texnik hisobga olishni amalga oshiradilar.

6. Uy-joy fondini rasmiy statistik hisobga olish texnik inventarizatsiya kadastr byurolari tomonidan taqdim etilgan uy-joy fondini davlat statistika kuzatuvi shakllarini umumlashtirish asosida, statistika ishlarining har yilgi dasturlarida belgilanadigan davrlar boʻyicha va muddatlarda Makroiqtisodiyot va statistika vazirligi va uning hududiy organlari tomonidan amalga oshiriladi.

Uy-joy fondini davlat statistika kuzatuvi shakllari, ularni toʻldirish va taqdim etish metodologiyasi, tartibi hamda muddati Oʻzbekiston Respublikasi Kommunal xizmat koʻrsatish vazirligi bilan kelishgan holda Oʻzbekiston Respublikasi Makroiqtisodiyot va statistika vazirligi tomonidan ishlab chiqiladi va tasdiqlanadi.

Uy-joy fondini texnik hisobga olish koʻrsatkichlari rasmiy statistik hisobga olish koʻrsatkichlariga mos boʻlishi kerak.

7. Texnik inventarizatsiya kadastr byurolari:

uy-joy fondini texnik inventarizatsiyalashga;

uylar va turar joylarning texnik holatini nazorat qilishga;

uylar va turar joylarni baholashga va qayta baholashga, shu jumladan, soliq olish maqsadida baholashga va qayta baholashga;

axborot va konsultativ xizmat koʻrsatish va uy-joy fondini davlat yoʻli bilan hisobga olish bilan bogʻliq boshqa faoliyatni amalga oshirishga majburdirlar.

8. Uy va turar joyning inventar yigʻma jildi uy yoki turar joy foydalanish uchun qabul qilib olinayotganda yoxud turar joy uy-joy fondiga kiritilayotganda tuziladi.

Keyingi texnik hisobga olish uylar va turar joylarni vaqti-vaqti bilan rejali xatlashlar oʻtkazish yoʻli bilan besh yilda kamida bir marta, shuningdek rejadan tashqari tekshirishlar jarayonida hisobga olish koʻrsatkichlari oʻzgarishlari aniqlanishiga qarab amalga oshiriladi.

9. Inventarizatsiya maʼlumotlari va uy-joy fondini texnik hisobga olishning boshqa maʼlumotlari, agar Oʻzbekiston Respublikasi qonun hujjatlarida boshqacha tartib nazarda tutilmagan boʻlsa, quyidagi hollarda qoʻllanish uchun majburiydir:

uy-joy fondi boʻyicha davlat statistika hisobotini tuzishda;

koʻchmas mulkka boʻlgan huquqlarni hamda koʻchmas mulkka oid bitishuvlarni davlat roʻyxatidan oʻtkazishda;

turar joy sohasida koʻchmas mulkka solinadigan soliqni hisoblash va uning bazasini nazorat qilishda;

uylar va turar joylarni foydalanishga topshirishda;

uylar va turar joylarning texnik holatini hamda fizik eskirganligini aniqlashda;

uy-joy mulkdorlari shirkatlarini roʻyxatdan oʻtkazishda;

uy-joy fondi obyektlariga kadastr tartib raqamlari berishda.

10. Uylar va turar joylarni rejali texnik inventarizatsiyalash texnik inventarizatsiya kadastrlari byurosi tomonidan ular mulkdorlarining mablagʻlari hisobiga, joylardagi davlat hokimiyati organlari tomonidan tasdiqlanadigan stavkalar boʻyicha amalga oshiriladi.

Rejadan tashqari tekshirishlar uylar va turar joylar mulkdorlarining buyurtmanomalariga koʻra, shartnoma narxlari boʻyicha texnik inventarizatsiya kadastrlar byurosi tomonidan amalga oshirilishi mumkin.

11. Qurilishi tugallangan uy va turar joyga ijroni hisobga olish texnik hujjati texnik inventarizatsiya kadastr byurosi tomonidan tuziladi, qabul komissiyasi buyurtmachisi (imorat soluvchi) tomonidan koʻrsatilgan hujjatlar tarkibiga kiritiladi.

Uylarni foydalanishga qabul qilish dalolatnomalarisiz ularning inventar hujjatlar yigʻma jildini berishga yoʻl qoʻyilmaydi.

12. Uy va turar joyning inventar yigʻma jildidan olingan maʼlumotlar ayrim turlaridan koʻchirmalar va nusxalar mustaqil hujjatlarni tashkil etadi, ularni berish tartibi joylardagi davlat hokimiyati organlari tomonidan belgilanadi.

13. Uylar, turar joylarni hisobga olish davlat kadastri yagona tizimining boshqa kadastrlar bilan texnologik aloqalarini taʼminlovchi avtomatik boshqarish tizimi vositalarini qoʻllagan holda uy-joy fondi reyestrini yuritish yoʻli bilan texnik inventarizatsiya kadastr byurosi tomonidan amalga oshiriladi.

14. Uy-joy fondining hisobga olish — texnik, hujjatlar yigʻma jildi, roʻyxatdan oʻtkazish daftarlari, inventar hujjatlar yigʻma jildida shakllangan roʻyxatdan oʻtkazilgan hujjatlarning nusxalari, boshqa inventarizatsiya hujjatlari texnik inventarizatsiya kadastr byurosi arxivida, shuningdek, Oʻzbekiston Respublikasi davlat arxivlarida saqlanadi.

Texnik inventarizatsiya kadastr byurosi arxivlari Oʻzbekiston Respublikasi davlat arxiv fondiga kiradi va joylardagi davlat hokimiyati organlari foydalanishida boʻlgan respublika mulki hisoblanadi.

Texnik inventarizatsiya kadastr byurosi arxivlarining begonalashtirilishiga yoʻl qoʻyilmaydi.

15. Texnik inventarizatsiya kadastr byurosi va boshqa organlar mansabdor shaxslarining mazkur Nizom talablarining zarur darajada bajarilishi uchun javobgarligi Oʻzbekiston Respublikasi qonun hujjatlariga muvofiq belgilanadi.

1. Mazkur Nizom uylar va turar joylarni uy-joy fondiga kiritish asoslari va shartlarini tartibga soladi.

2. Uy-joy fondi — inson yashashi uchun yaroqli boʻlgan turar joydan, shu jumladan, uylar, kvartiralar, xizmat turar joylari, maxsus uylar (yotoqxonalar, vaqtinchalik uy-joy fondi uylari, nogironlar, faxriylar, yolgʻiz qariyalar, internat-uylar, shuningdek, bolalar uylari va boshqa maxsus maqsadli uylar)dan iborat boʻlgan fond.

3. Uylar va turar joylar uy-joy fondiga belgilangan tartibda kiritilishi kerak.

4. Qurilish tugallangandan keyin uylar va turar joylarni, mulkchilik shakllari va idoraviy boʻysunishlaridan qatʼi nazar, foydalanishga qabul qilib olish tuman, shahar hokimi tomonidan tayinlanadigan qabul qilish komissiyalari tomonidan amalga oshiriladi.

5. Uy yoki turar joyni quruvchi (mulkdor, ashyoviy huquq egasi) mulkka egalik qilish huquqini roʻyxatdan oʻtkazish va uy yoki turar joyni keyinchalik uy-joy fondiga kiritish uchun tuman, shahar texnik inventarizatsiya kadastr byurosiga:

a) joylardagi davlat hokimiyati organining uy qurish uchun yer uchastkasi ajratish toʻgʻrisidagi qarorini yoki ushbu organlarning turar joy qurishga ruxsatnomasini, shuningdek, qabul qilish komissiyasining uyni yoki turar joyni foydalanishga qabul qilish toʻgʻrisidagi tuman, shahar hokimi tomonidan tasdiqlangan dalolatnomasini;

b) oʻzboshimchalik bilan tiklangan imorat majburiy tartibda davlat mulkiga olib qoʻyilgan hollarda uni olib qoʻyish toʻgʻrisida sudning qarorini;

v) qonunda nazarda tutilgan hollarda egasiz imoratni davlat mulkiga olib qoʻyish toʻgʻrisida sudning qarorini;

g) uy yoki turar joyning qavatma-qavat rejasini;

d) joylardagi davlat hokimiyati organlarining uyga yoki turar joyga egalik qilish huquqini eʼtirof etish toʻgʻrisidagi qarorini;

e) uyga yoki turar joyga egalik qilish huquqini eʼtirof etish toʻgʻrisida sudning qonuniy kuchga kirgan qarorini taqdim etadi.

6. Ayrim hollarda tuman, shahar texnik inventarizatsiya kadastr byurosiga qurish uchun yer uchastkasi ajratish toʻgʻrisidagi qaror oʻrniga yer uchastkasiga meros qilib qoldiriladigan umrbod egalik qilish huquqini tasdiqlovchi davlat dalolatnomasi taqdim etilishi mumkin.

7. Bogʻdorchilik va boshqa yer uchastkalarida joylashgan hamda Oʻzbekiston Respublikasi Uy-joy kodeksining 9-moddasida nazarda tutilgan talablarga javob beradigan imoratlarga ega boʻlgan shaxslar shu imoratlarni uylar sifatida rasmiylashtirishni va ularni uy-joy fondiga kiritishni talab qilishga haqlidirlar. Ushbu talablar ular tomonidan tuman, shahar texnik inventarizatsiya kadastr byurosiga joylardagi davlat hokimiyati organlarining bogʻdorchilik shirkatlari va boshqa shirkatlar (kooperativlar) uchun yer uchastkasi ajratish toʻgʻrisidagi qarori hamda tuman, shahar hokimining koʻrsatib oʻtilgan imoratlarni uylar sifatida rasmiylashtirish toʻgʻrisidagi qarori taqdim etilgan taqdirda qondirilishi mumkin.

8. Uy-joy fondiga:

uy-joylardagi savdo, maishiy va nosanoat tusidagi boshqa ehtiyojlar uchun moʻljallangan, yashash uchun moʻljallanmagan joylar;

uy-joy qurish uchun ajratilgan yer uchastkalarida tiklangan, ularda fuqarolarning qancha vaqt yashashidan qatʼi nazar, mavsumiy va vaqtincha yashash uchun moʻljallangan imoratlar va joylar;

oʻzboshimchalik bilan qurilgan uylar va turar joylar;

turar joylarga qoʻyiladigan talablarga javob bermaydigan imoratlar va joylar kiritilmaydi.

9. Mulkdor tomonidan taqdim etilgan mazkur Nizomning 5-bandida koʻrsatilgan hujjatlar asosida tuman, shahar texnik inventarizatsiya kadastr byurosi uyga yoki turar joyga egalik qilish huquqini davlat roʻyxatidan oʻtkazadi hamda roʻyxatdan oʻtkazilgan mulkka egalik qilish huquqi toʻgʻrisida hujjat beradi, bu uy yoki turar joy uy-joy fondiga kiritilganligi toʻgʻrisida guvohnoma boʻlib hisoblanadi.

10. Uylar va turar joylarni davlat tomonidan roʻyxatdan oʻtkazish Oʻzbekiston Respublikasi Vazirlar Mahkamasining “Oʻzbekiston Respublikasida koʻchmas mulk davlat kadastrini yuritish toʻgʻrisida” 1997-yil 2-iyundagi 278-son qaroriga muvofiq amalga oshiriladi.

11. Uy-joy mulkdorlari boʻlgan yuridik shaxslar, uy-joyga xizmat koʻrsatish va ularni tuzatish boʻyicha boshqaruvchi tashkilotlar uy-joy fondining boshlangʻich hisobini yuritadilar, ularning mulkida (balansida) boʻlgan yoki ular xizmat koʻrsatadigan uy-joy fondi, konstruktiv qarorlar tarkibi, qiymati hamda obodonlashtirish turlari mavjudligi va boshqalar toʻgʻrisidagi buxgalteriya va statistika hisobotini tuzadilar hamda yuqori turuvchi tashkilotlarga va davlat statistikasi mahalliy organlariga taqdim etadilar.

12. Texnik inventarizatsiya kadastr byurosi ham Makroiqtisodiyot va statistika vazirligi tomonidan belgilanadigan muddatlarda, mulkchilik shakllari va qaysi idoraga qarashliliklaridan qatʼi nazar, uy-joy fondi toʻgʻrisida tegishli statistika hisobotini tuzadi hamda ularni yuqori turuvchi tashkilotlarga va davlat statistikasi mahalliy organlariga taqdim etadi.

1. Mazkur Nizom uylarni va turar joylarni uy-joy fondidan chiqarish asoslarini va shartlarini tartibga soladi.

2. Uylar va turar joylar mulkdorlari, uy-joylarga xizmat koʻrsatish va ularni taʼmirlash boʻyicha boshqaruvchi tashkilotlar muntazam ravishda rejali — ogohlantiruvchi va rejadan tashqari koʻriklar oʻtkazish yoʻli bilan uylar va turar joylarning texnik holati ustidan nazoratni amalga oshiradilar.

3. Rejadan tashqari koʻriklar zilzilalar, sel toshqinlari, jalalar, dovulli shamollar, kuchli qor yogʻishlari, suv toshqinlari va stixiyali tusdagi boshqa hodisalar, uylar joylashgan hududdagi uylarning alohida elementlarini va ularni butunlay shikastlashi mumkin boʻlgan harbiy harakatlardan keyin, issiqlik, suv, elektr taʼminoti tizimlaridagi avariyalardan keyin va poydevorlar va elementlarning deformatsiyalanishi aniqlanganda majburiy tartibda oʻtkazilishi kerak.

4. Barcha texnik koʻriklar natijalari dalolatnomalar bilan rasmiylashtiriladi va uylar yoki turar joylar mulkdori (uy-joylarga xizmat koʻrsatish va ularni taʼmirlash boʻyicha boshqaruvchi tashkilot)da turishi kerak boʻlgan uy yoki turar joyning texnik holatini hisobga olish hujjatlarida yoki inventar hujjatlar yigʻma jildida aks ettiriladi.

5. Uy yoki turar joy mulkdori arizasiga koʻra yoki uy-joylarga xizmat koʻrsatish boʻyicha boshqaruvchi tashkilotning yozma xabariga koʻra, shuningdek, mazkur Nizomning 3-bandida koʻrsatilgan hollarda, uyning yoki turar joyning, kimga qarashliligidan qatʼi nazar, texnik holatini aniqlash uchun tuman, shahar hokimi tomonidan komissiya tuziladi.

6. Uy yoki turar joyning texnik holatini aniqlash komissiyasi tarkibiga quyidagilar kiradi:

tuman, shahar hokimi oʻrinbosari — komissiya raisi;

komissiya aʼzolari;

uy yoki turar joy mulkdori;

uy-joylarga xizmat koʻrsatish va ularni taʼmirlash boʻyicha boshqaruvchi tashkilot vakili;

Davlat sanitariya nazorati vakili;

Davlat yongʻin nazorati vakili;

yer inspeksiyasi vakili;

Davlat arxitektura va qurilish qoʻmitasining joylardagi organlari vakili;

“Oʻzsanoatkontexnazorat” davlat qoʻmitasi (texnologiya asbob-uskunalari mavjud obyektlardagi uylar va turar joylar boʻyicha) vakili;

Oʻzbekiston Respublikasi Mudofaa vazirligi vakili — harbiy shaharchalardagi uylar va turar joylar boʻyicha;

texnik inventarizatsiya kadastr byurosi vakili;

issiqlik, suv, gaz va elektr bilan taʼminlovchi tashkilotlar vakillari.

7. Komissiya uyni yoki turar joyni koʻzdan kechirgandan va asboblar bilan tekshirgandan keyin:

fizik eskirishi (uy yoki turar joyning koʻrik oʻtkazilgan paytdagi texnik va u bilan bogʻliq boʻlgan boshqa foydalanish koʻrsatkichlarining yomonlashganlik darajasini mufassal koʻrsatgan holda);

mazkur Nizomning 3-bandida koʻrsatib oʻtilgan sabablar tufayli avariya holatiga tushishi oqibatida yashash uchun yaroqsiz holga kelgan uyni yoki turar joyni uy-joy fondidan chiqarish toʻgʻrisida yozma xulosa beradi.

8. Komissiya xulosasiga muvofiq tuman, shahar hokimi yashash uchun yaroqsiz boʻlgan uylar yoki turar joylarni boshqa maqsadlarda foydalanish uchun qayta jihozlash yoxud ushbu uylar yoki turar joylarni buzish toʻgʻrisidagi tavsiyanoma bilan tegishli ravishda Qoraqalpogʻiston Respublikasi Vazirlar Kengashiga, viloyat, Toshkent shahar hokimiga murojaat qiladi.

9. Tuman, shahar hokimi tavsiyanomasi asosida Qoraqalpogʻiston Respublikasi Vazirlar Kengashi, viloyat, Toshkent shahar hokimi tomonidan yashash uchun yaroqsiz boʻlgan uylar yoki turar joylarni boshqa maqsadlarda foydalanish uchun qayta jihozlash yoxud buzish toʻgʻrisida qaror chiqariladi. Bunda turar joylari avariya holatida yoki tabiiy ofatlardan jabrlangan deb eʼtirof etilgan fuqarolarga davlat tomonidan tekin uy-joy berish masalasi albatta hal qilingan boʻlishi kerak.

10. Qoraqalpogʻiston Respublikasi Vazirlar Kengashi, viloyat, Toshkent shahar hokimining uylar va uy-joylarni boshqa maqsadlarda foydalanish uchun qayta jihozlanishi yoki buzilishi sababli uy-joy fondidan chiqarish toʻgʻrisidagi qarori tuman, shahar texnik inventarizatsiya kadastr byurosida roʻyxatdan oʻtkaziladi va reyestr daftariga tegishli yozuvlar kiritish uchun asos boʻlib xizmat qiladi.

11. Uylar va turar joylar:

a) joylardagi davlat hokimiyati organining tegishli qarori asosida davlat va jamoat ehtiyojlari uchun yer uchastkalarining olib qoʻyilishi munosabati bilan fuqarolar yoki yuridik shaxslar mulki boʻlgan uylar (kvartiralar) buzilganda;

b) turar joy Qoraqalpogʻiston Respublikasi Vazirlar Kengashi, viloyatlar, Toshkent shahar hokimlari qaroriga koʻra yashash uchun moʻljallanmagan joylarga oʻtkazilgan hollarda ham uy-joy fondidan chiqariladi.

12. Yuridik shaxslar — uy-joy mulkdorlari, uy-joylarga xizmat koʻrsatish va ularni taʼmirlash boʻyicha boshqaruvchi tashkilotlar, texnik inventarizatsiya kadastr byurosi uy-joy fondining kamayganligi haqida tegishli statistik hisobot tuzadilar hamda ularni Makroiqtisodiyot va statistika vazirligi tomonidan belgilangan muddatlarda yuqori tashkilotlarga va mahalliy statistika organlariga taqdim etadilar.

13. Uylar yoki turar joylarga boʻlgan mulkchilik shakllarining oʻzgarishi uyni, turar joyni uy-joy fondidan chiqarish uchun asos hisoblanmaydi.

1. Ushbu Nizom Oʻzbekiston Respublikasining Uy-joy kodeksiga muvofiq ishlab chiqilgan hamda uylarni va turar joylarni, uy-joy fondining foydalanish turidan qatʼi nazar, yashash uchun moʻljallanmagan joylarga oʻtkazish tartibi va shartlarini belgilaydi.

2. Yashash uchun yaroqli turar joyni yashash uchun moʻljallanmagan joylarga oʻtkazishga istisno hollarda Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari (bundan keyin joylardagi davlat hokimiyati organlari deb ataladi) qaroriga koʻra yoʻl qoʻyiladi.

3. Turar joylarni yashash uchun moʻljallanmagan joylarga oʻtkazish, uyning idoraviy mansubligidan qatʼi nazar, joylardagi davlat hokimiyati organlari huzuridagi idoralararo komissiya tomonidan koʻrib chiqiladi.

4. Jismoniy va yuridik shaxslarning xususiy mulki boʻlgan xususiy turar joylarni yoki ularning bir qismini yashash uchun moʻljallanmagan joylarga aylantirish mulkdorning arizasiga koʻra amalga oshiriladi, ushbu Nizom talablariga muvofiq tartibda va shartlarda hal etiladi.

5. Yashash uchun moʻljallanmagan joyga oʻtkazilgan uylarda faoliyatning belgilangan tartibda ruxsat etilgan turlarini amalga oshirishga yoʻl qoʻyiladi.

6. Turar joy uy-joy binosining pastki qavatida joylashgan taqdirda yashash uchun moʻljallanmagan joyga oʻtkazilishi mumkin.

7. Turar joylarni yashash uchun moʻljallanmagan joyga oʻtkazishga:

a) turar joy belgilangan maqsadda foydalaniladigan kommunal uy-joy fondida boʻlsa;

b) bunday oʻtkazish boshqa shaxslarning huquqlarini va qonun bilan muhofaza qilinadigan manfaatlarini buzsa (buzilishiga olib kelsa);

v) uyga alohida kirish joyi yoʻq boʻlsa yoki alohida kirish joyi barpo qilish imkoniyati boʻlmasa;

g) turar joy avariya holatida boʻlsa yoki yashash uchun moʻljallanmagan joyga oʻtkazishga yaroqsiz boʻlsa;

d) turar joy sudda koʻrib chiqish mavzusi boʻlsa — nizo sud tartibida hal etilgunigacha yoʻl qoʻyilmaydi.

8. Arxitektura, tarix va madaniyat yodgorliklari hisoblanadigan uylardagi turar joyni yashash uchun moʻljallanmagan joyga oʻtkazish arxitektura, tarix va madaniyat yodgorliklarini muhofaza qilish organlarining roziligi bilan amalga oshiriladi.

9. Turar joyni yashash uchun moʻljallanmagan joyga oʻtkazish toʻgʻrisidagi masalani hal etish uchun mulkdor (ariza beruvchi), oʻtkazish maqsadini, shuningdek, kelgusida uydan foydalanishning moʻljallanayotgan shakl va usullarini koʻrsatgan holda, joylardagi davlat hokimiyati organlariga ariza beradi.

10. Turar joy mulkdori yoki notarius tasdiqlagan ishonchnoma asosida mulkdorning roziligi bilan faoliyat koʻrsatuvchi, toʻliq xoʻjalik yuritish huquqiga ega boʻlgan shaxs ariza beruvchi boʻlishi mumkin.

11. Arizaga quyidagi hujjatlar ilova qilinadi:

hammulkdorlarning va balogʻat yoshiga yetgan oila aʼzolarining notarius tasdiqlagan rozilik hujjati;

turar joyga mulk egasi huquqini tasdiqlovchi hujjatlar;

tegishli arxitektura organlarining texnik xulosasi;

uyning texnik inventarizatsiya kadastr byurosi tayyorlagan rejasi;

shahar (tuman)ning sanitariya-epidemiologiya xizmati, arxitektura xizmatlari va yongʻin nazorati organlari bilan kelishganlik toʻgʻrisidagi hujjat;

fuqarolarning oʻzini oʻzi boshqarish organlarining rozilik hujjati.

12. Ariza beruvchi taqdim etgan hujjatlarni koʻrib chiqish va joylardagi davlat hokimiyati organi qarori loyihasini tayyorlash quyidagi tarkibda tuziladigan idoralararo komissiya tomonidan amalga oshiriladi:

hokim oʻrinbosari — komissiya raisi;

shahar (tuman) kommunal-foydalanish tashkiloti vakili;

qurilish va arxitektura organlari vakili;

yongʻin nazorati organlari vakili;

davlat sanitariya nazorati vakili;

mahalliy oʻzini oʻzi boshqarish organlari vakili;

texnik inventarizatsiya kadastr byurosi yoki koʻchmas mulk kadastri xizmati vakili.

Koʻp kvartirali uydagi turar joyni yashash uchun moʻljallanmagan joyga oʻtkazish toʻgʻrisidagi masalani koʻrib chiqishda komissiya tarkibiga uyga xizmat koʻrsatuvchi boshqaruvchi tashkilot vakillarini kiritish majburiydir.

Zarurat boʻlganda komissiya tarkibiga boshqa vakillar (fuqarolarning oʻzini oʻzi boshqarish organlari, uy-joy egalari kengashi, uy-joy mulkdorlarining shirkati vakillari) kiritilishi mumkin.

13. Idoralararo komissiya oʻz ishini kuyidagi tartibda amalga oshiradi:

ariza beruvchilar taqdim etgan hujjatlar koʻrib chiqiladi va zarur hollarda qoʻshimcha maʼlumotlar soʻraladi;

ariza beruvchilar yoki ularning vakillari komissiya majlisiga chaqiriladi;

joy yashash uchun moʻljallanmagan joyga oʻtkazilishi va mazkur uydan yashash uchun moʻljallanmagan joy sifatida foydalanilishi munosabati bilan huquqi va qonuniy manfaatlariga daxl qilinishi mumkin boʻlgan shaxslar komissiya majlisiga chaqiriladi;

zarur hollarda komissiya (yoki uning ayrim aʼzolari) uyni koʻrish va turar joyni yashash uchun moʻljallanmagan joyga oʻtkazish toʻgʻrisidagi masalani hal etishda muhim boʻlgan haqiqiy ahvol bilan tanishish uchun joylarga borishadi.

14. Komissiyaning ish natijalari bayonnoma bilan rasmiylashtiriladi, u komissiyaning barcha aʼzolari tomonidan imzolanishi kerak.

Bayonnomada quyidagilar koʻrsatiladi:

bayonnoma tuzilgan vaqt va joy;

komissiya tarkibi;

yashash uchun moʻljallanmagan joyga oʻtkazilayotgan turar joyning tavsifi;

sabablar va xulosalar koʻrsatilgan holda ishning komissiya tomonidan aniqlangan ahvoli;

komissiya xulosasi.

Bayonnomaga ariza beruvchi taqdim etgan barcha hujjatlar, qaror qabul qilish uchun ahamiyatli boʻlgan boshqa materiallar ilova qilinadi.

Komissiya koʻrsatib oʻtilgan hujjatlar va qilingan ishlar asosida uyni yashash uchun moʻljallanmagan joyga oʻtkazish imkoniyati toʻgʻrisidagi xulosani va hokimning qarori loyihasini tayyorlaydi.

Turar joyni yashash uchun moʻljallanmagan joyga oʻtkazish chogʻida koʻp kvartirali uydagi xonadan foydalanish maqsadi amaldagi Uy-joy fondidan foydalanishning texnik qoidalari va normalari hamda “Uy-joy binolari” 02.08.01—94 raqamli qurilish meʼyorlari va qoidalari talablarini hisobga olgan holda belgilanishi kerak.

15. Komissiya xulosasi oddiy koʻpchilik ovoz bilan qabul qilinadi. Komissiyaning bir yoki bir nechta aʼzosi qabul qilingan qarorga rozi boʻlmagan taqdirda, bu bayonnomada koʻrsatiladi.

16. Komissiya:

turar joyni yashash uchun moʻljallanmagan joyga oʻtkazish toʻgʻrisida;

turar joyni yashash uchun moʻljallanmagan joyga oʻtkazishni rad etish toʻgʻrisida qaror qabul qilishi mumkin.

Qaror ariza beruvchi tomonidan barcha zarur hujjatlar taqdim etilgan kundan boshlab 30 kundan kechikmay qabul qilinadi.

Komissiya xulosasi asosida hokim turar joyni yashash uchun moʻljallanmagan joyga oʻtkazish yoki uni rad etish toʻgʻrisida qaror chiqaradi.

17. Turar joyni yashash uchun moʻljallanmagan joyga oʻtkazishni rad etish ushbu Nizomning 7-bandida sanab oʻtilgan sabablar koʻrsatilgan holda asoslangan boʻlishi kerak.

Komissiyaning asosli rad etishida koʻrsatilgan sabablar bartaraf qilingan taqdirda ariza beruvchi takroriy arizaning navbatdan tashqari koʻrib chiqilishiga haqlidir.

18. Mazkur qaror chiqqunga qadar yashash uchun moʻljallanmagan joylar maqomiga oʻtkazilgan turar joylarni qayta roʻyxatdan oʻtkazish ushbu Nizomning barcha talablariga rioya qilingan holda amalga oshiriladi. Qayta rasmiylashtirish tartibotidan oʻtgan yashash uchun moʻljallanmagan joylar mulkdorlariga komissiyaning turar joyni yashash uchun moʻljallanmagan joyga oʻtkazish toʻgʻrisidagi qarori asosida belgilangan namunadagi dalolatnoma beriladi.

19. Dalolatnoma hokimning qaroriga binoan beriladi.

20. Turar joylarni yoki ularning bir qismini yashash uchun moʻljallanmagan joyga oʻtkazish toʻgʻrisidagi hujjatlarni rasmiylashtirish Qoraqalpogʻiston Respublikasi Vazirlar Kengashining, viloyatlar va Toshkent shahar hokimliklarining ayni bir vaqtda idoralararo komissiyalar kotiblari hisoblanadigan vakolatli xodimlari tomonidan amalga oshiriladi.

21. Tegishli hujjatlar rasmiylashtirilganligi va turar joy yoki uning bir qismi yashash uchun moʻljallanmagan joyga oʻtkazilganligi toʻgʻrisidagi dalolatnoma berilganligi uchun vakolatli organ ariza beruvchidan Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari qarori bilan tasdiqlanadigan xarajatlar kalkulyatsiyasiga binoan tegishli toʻlov undiradi.

22. Ariza beruvchi turar joydan yashash uchun moʻljallanmagan joy sifatida foydalanish huquqini olganlik uchun mahalliy budjetga yigʻim toʻlaydi. Yigʻimning cheklangan miqdori yuridik shaxslardan eng kam oylik ish haqining 25 foizi, jismoniy shaxslardan esa 5 foizi miqdorida belgilanadi.

23. Uyni yashash uchun moʻljallanmagan joydan turar joyga qaytadan oʻtkazish mulkdorning arizasi boʻyicha, tegishli davlat xizmatlari bilan uzil-kesil hisob-kitob qilingach, idoralararo komissiyaning qarori bilan amalga oshiriladi.