3. “Davarxitektqurilish” qoʻmitasi oʻz faoliyatida Oʻzbekiston Respublikasi Konstitutsiyasiga va Oʻzbekiston Respublikasi qonunlariga, Oliy Majlis qarorlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga hamda mazkur Nizomga amal qiladi.

4. “Davarxitektqurilish” qoʻmitasining oʻz vakolatlari doirasida qabul qilgan qarorlari vazirliklar, idoralar, mahalliy hokimiyat va boshqaruv organlari, muassasalar va tashkilotlar, mulkchilik shakllaridan qatʼi nazar, xoʻjalik yurituvchi subyektlar va ularning birlashmalari, mansabdor shaxslar va fuqarolar tomonidan bajarilishi majburiy hisoblanadi.

5. “Davarxitektqurilish” qoʻmitasi yuridik shaxs hisoblanadi, Oʻzbekiston Respublikasining Davlat gerbi tasviri tushirilgan va oʻz nomi yozilgan muhrga, mustaqil balansga, bankda hisob raqamlariga ega boʻladi.

II. “Davarxitektqurilish” qoʻmitasining asosiy vazifalari

6. Quyidagilar “Davarxitektqurilish” qoʻmitasining asosiy vazifalari hisoblanadi:

shaharsozlik va shaharsozlik faoliyati sohasida davlat siyosatini amalga oshirish, zamonaviy arxitektura va shaharsozlik talablari texnologiyalarini hisobga olgan holda hududlarni joylashtirish, rejalashtirish va qurishning ilmiy asoslangan sxemalarini taʼminlash;

loyihalashtirish va qurilish-montaj ishlari sifati, shahar va qishloq aholi yashash punktlarini rejalashtirish va qurishda shaharsozlikka oid qonun hujjatlari, shaharsozlik normalari, qoidalari va standartlariga rioya etilishi ustidan nazoratni amalga oshirish;

shaharsozlik faoliyati sohasida yagona ilmiy va texnika siyosatini amalga oshirish, tegishli axborot bazasini yaratish;

kapital qurilishda islohotlarning borishini muvofiqlashtirish va uning monitoringini olib borish, kapital qurilishda iqtisodiy islohotlarning borishini aks ettiruvchi koʻrsatkichlar tizimini ishlab chiqish va joriy etish, kapital qurilishda islohotlarni chuqurlashtirish boʻyicha takliflar tayyorlash va Vazirlar Mahkamasiga kiritish;

kapital qurilishni yanada isloh qilish masalalarini tartibga soluvchi normativ-huquqiy hujjatlarni ishlab chiqish va ularning monitoringini olib borish, tanlov savdolarini tashkil etish va oʻtkazishning belgilangan tartibiga rioya etilishini nazorat qilish, shartnoma munosabatlarining rolini oshirish, qurilishda narxlarni shakllantirish tizimini takomillashtirish yuzasidan takliflar ishlab chiqish;

loyihalashtirish va pudrat ishlari, qurilish materiallari bozorlarida raqobat muhitini yanada shakllantirishga koʻmaklashish;

xususiylashtirish jarayonlarini chuqurlashtirishda, xususiy va qoʻshma korxonalar, injiniring, konsalting, sugʻurta tashkilotlari va bozor infratuzilmasining boshqa tashkilotlarini tashkil etishda, shaharsozlik faoliyati sohasida kichik va oʻrta biznesni rivojlantirishda koʻmaklashish;

tanlov savdolari natijalari boʻyicha tuzilgan shartnomalar majburiyatlari bajarilishi monitoringini olib borish, obyektlar qurilishi sifati va muddatlari ustidan nazorat qilish, markazlashtirilgan manbalar hisobiga moliyalashtirilayotgan obyektlarni qurish sifati va muddatlarini nazorat qilish;

qurilish va qurilish materiallari, buyumlar va konstruksiyalar ishlab chiqarish sohasida standartlashtirish tartibini belgilash va u boʻyicha ishlarni tashkil etish, loyihalashtirish va konstruksiyalash ham shu jumlaga kiradi;

shaharlar, qishloq aholi yashash punktlari va qishloqlar orasidagi hududlarni rejalashtirish va qurishda shaharsozlik normalari, qoidalari va standartlariga rioya qilinishi, madaniy meros obyektlari saqlab qolinishini hisobga olgan holda ularning arxitektura-rejalashtirilishi va arxitektura-badiiy sifatlarini yaxshilash, arxitektura va shaharsozlikda milliy va madaniy anʼanalarni rivojlantirish ustidan nazorat qilish.

III. “Davarxitektqurilish” qoʻmitasining asosiy funksiyalari

7. “Davarxitektqurilish” qoʻmitasi oʻziga yuklangan vazifalarga muvofiq quyidagi funksiyalarni amalga oshiradi:

shaharsozlik va shaharsozlik faoliyati sohasida davlat shaharsozlik normalari va qoidalari, boshqa qonun hujjatlari ishlab chiqilishi va tasdiqlanishini taʼminlaydi, ularga rioya etilishi va ularning qoʻllanishi ustidan monitoringni amalga oshiradi;

oʻz vakolatiga kiruvchi masalalar boʻyicha respublika maqsadli dasturlari, ijtimoiy-iqtisodiy rivojlantirish prognozlarining shaharsozlik boʻlimlarini ishlab chiqish va amalga oshirishda qatnashadi;

Oʻzbekiston Respublikasi hududida aholi joylashishining Bosh sxemasi ishlab chiqilishini, Qoraqalpogʻiston Respublikasi, viloyatlar (viloyatlar guruhlari) hududlarini rejalashtirish sxemalari va umumdavlat ahamiyatiga ega boʻlgan alohida tartibga solinadigan shaharsozlik obyektlarining shaharsozlik hujjatlari, shuningdek shaharsozlik faoliyati sohasida ilmiy-tadqiqot ishlari ishlab chiqilishi tashkil etilishini taʼminlaydi;

shaharlar, shahar posyolkalarining bosh rejalarini tasdiqlaydi, tasdiqlanishi Oʻzbekiston Respublikasi Vazirlar Mahkamasining vakolatiga tegishli boʻlgan shaharlarning bosh rejalari bundan mustasno, va Toshkent shahrining, viloyat markazlarini va madaniy meros obyekti ahamiyatiga ega boʻlgan shaharlarning markaziy qismlarini batafsil rejalashtirish loyihalarini tasdiqlaydi;

Oʻzbekiston Respublikasi Vazirlar Mahkamasiga umumdavlat ahamiyatiga ega boʻlgan alohida tartibga solinadigan shaharsozlik faoliyati obyektlari uchun chegaralarni belgilash toʻgʻrisida takliflar kiritadi;

davlat shaharsozlik kadastri, shaharsozlik faoliyati obyektlari monitoringi yuritilishini amalga oshiradi, shaharsozlik va tanlov hujjatlarini ekspertizadan oʻtkazadi;

kapital qurilishda iqtisodiy islohotlarning borishi va uning ahvolini, loyihalashtirish va qurilish tashkilotlarini, qurilish industriyasi korxonalarini reyting baholarini aks ettiruvchi koʻrsatkichlar tizimini joriy etadi;

loyihalash va pudrat tashkilotlari, qurilish industriyasi korxonalari va investitsiya faoliyatining boshqa qatnashchilari toʻgʻrisidagi maʼlumotlar bankini, shuningdek qurilish materiallari, konstruksiyalari va buyumlari narxlari, qurilish mashinalari va mexanizmlari qiymati, transport xarajatlari, hududlar, tarmoq vazirliklari va idoralari boʻyicha quruvchi ishchilar ish haqi toʻgʻrisidagi maʼlumotlarning axborot bankini shakllantiradi;

Keyingi tahrirga qarang.

shaharsozlik va shaharsozlik faoliyati sohasida davlat normalari va qoidalari ishlab chiqilishi, roʻyxatdan oʻtkazilishi, tasdiqlanishi, amalga joriy etilishi va qayta koʻrib chiqilishi tartibini belgilaydi;

muhandislik izlanishlari sohasida yagona texnika siyosatini amalga oshiradi, kapital qurilish uchun kompleks muhandislik izlanishlarining davlat fondini yaratadi;

turar joy, jamoat binolari va boshqa binolarning koʻp martalab qoʻllaniladigan yakka tartibdagi, namunaviy va tajriba loyihalarini ishlab chiqadi va tasdiqlaydi;

loyihalashtirish va qurilish-montaj ishlari sifatiga, shaharsozlik va shaharsozlik faoliyatida shaharsozlik normalari, qoidalari va standartlariga rioya etilishi ustidan davlat arxitektura-qurilish nazoratini amalga oshiradi, qurilish obyektlari roʻyxatdan oʻtkazadi va qurilish-montaj ishlarini boshlashga ruxsatnomalar beradi;

Oldingi tahrirga qarang.

yetakchi loyiha-qidiruv tashkilotlarining loyiha faoliyatini muvofiqlashtiradi;

shaharsozlik sohasida ilmiy-tadqiqot ishlarining buyurtmachisi vazifasini bajaradi, ularning natijalarini qurilish normalari, qoidalari va standartlariga kiritadi, loyihalashtirish va qurilish sohasida yangi konsepsiyalarni yaratadi;

(7-band Oʻzbekiston Respublikasi Vazirlar Mahkamasining 2008-yil 10-iyundagi 120-sonli qarori asosida oʻn beshinchi va oʻn oltinchi xatboshlar bilan toʻldirilgan — OʻR QHT, 2008-y., 24-25-son, 223-modda)

shaharsozlik va shaharsozlik faoliyati sohasida qoida buzilishlari uchun qonun hujjatlarida nazarda tutilgan moliyaviy va boshqa jazolarni belgilangan tartibda qoʻllaydi, qonun hujjatlarida nazarda tutilgan hollarda materiallarni yoʻl qoʻyilgan qoida buzishlarda aybdor boʻlgan yuridik va mansabdor shaxslarni javobgarlikka tortish uchun huquqni muhofaza qilish organlariga beradi;

Keyingi tahrirga qarang.

kapital qurilishda davlat xaridlari tizimini takomillashtirish ishlarini va tanlov savdolari monitoringini, shartnoma munosabatlarini mustahkamlash, shartnoma majburiyatlari bajarilishi taʼminlanishi uchun javobgarlikning turli shakllarini joriy etish boʻyicha ishlarni tashkil etadi;

qurilish qiymatini aniqlash metodlarini ishlab chiqadi, moddiy-texnika resurslari sarfining smeta-normativ bazasini va normativ koʻrsatkichlarini ishlab chiqish va takomillashtirishni tashkil etadi;

kapital qurilishda shartnomaviy joriy narxlar va tariflarni shakllantirish boʻyicha metodologik koʻrsatmalar va tavsiyalarni ishlab chiqadi;

manfaatdor vazirliklar, idoralar, mahalliy davlat hokimiyati va boshqaruvi organlari bilan birgalikda shaharsozlik va shaharsozlik faoliyatida tarkibiy, ilmiy-texnik va iqtisodiy siyosatining asosiy yoʻnalishlarini belgilaydi;

tarmoqni rivojlantirishning yagona ilmiy-texnik konsepsiyasi oʻtkazilishini taʼminlaydi va maqsadli ilmiy-texnik dasturlarni amalga oshiradi;

qurilishning texnik darajasi va industriyalashtirilishini oshirish, kompleks mexanizatsiyalash va avtomatlashtirish, resurslarni tejash, materiallar va mehnat sarfini kamaytirish, qurilish materiallarini loyihalashtirish va ishlab chiqarish, kapital qurilishda ishlarning sifatini yaxshilash ishlarini tashkil etishda qatnashadi;

shaharsozlik faoliyati, investitsiya jarayonini boshqarish, shaharsozlik hujjatlarini ishlab chiqish, pudrat ishlari va qurilish materiallari bozorini takomillashtirish, yangi texnikani va qurilish-montaj ishlari texnologiyalarini qoʻllash masalalari boʻyicha xorijiy mamlakatlar va tashkilotlar bilan xalqaro ilmiy-texnik va iqtisodiy hamkorlikni amalga oshiradi va ularda qatnashadi, mamlakatimiz korxonalari va tashkilotlariga xorijiy sheriklar bilan toʻgʻridan toʻgʻri aloqalar oʻrnatishda koʻmaklashadi;

oʻz vakolatlari doirasida shaharsozlik va shaharsozlik faoliyati sohasida mutaxassislar tayyorlash va ularni qayta tayyorlashni tashkil etadi;

Oldingi tahrirga qarang.

qurilish sohasida faoliyatning ayrim turlarini litsenziyalaydi, shuningdek Vazirlar Mahkamasining qurilish sohasida litsenziyalash komissiyasining ishchi organi funksiyasini bajaradi, uning qarorlariga koʻra litsenziyalarni rasmiylashtiradi, litsenziya bitimlari tuzadi, litsenziyalar reyestrini yuritadi, litsenziatlar tomonidan litsenziya talablari va shartlariga rioya etilishi ustidan nazoratni amalga oshiradi, litsenziyalarning amal qilishini oʻn ish kunidan ortiq boʻlmagan muddatga toʻxtatib turadi hamda litsenziyalarning amal qilishini tiklaydi.

(7-bandning yigirma uchinchi xatboshisi Oʻzbekiston Respublikasi Vazirlar Mahkamasining 2006-yil 22-maydagi 92-son qarori tahririda — Oʻzbekiston Respublikasi Qonun hujjatlari toʻplami, 2006-y., 20-21-son, 181-modda)

qurilish materiallari, buyumlar va konstruksiyalarni standartlashtirish va sertifikatlashni amalga oshiradi;

har yili 1-fevralgacha Vazirlar Mahkamasiga kapital qurilishda iqtisodiy islohotlarning borishi hamda qurilish mahsulotlari qiymatiga taʼsir qiluvchi narx shakllantiruvchi omillarning holati toʻgʻrisidagi tahliliy maʼlumotnomalarni taqdim etadi, unda markazlashtirilgan manbalar hisobiga moliyalashtirilayotgan obyektlar qurilishiga xarajatlar moddalar boʻyicha koʻrsatiladi;

aholini shaharsozlik faoliyati toʻgʻrisida muntazam ravishda xabardor qilib boradi;

qonun hujjatlariga muvofiq boshqa vakolatlarni amalga oshiradi.

IV. “Davarxitektqurilish” qoʻmitasining huquqlari va javobgarligi

8. “Davarxitektqurilish” qoʻmitasiga oʻziga yuklangan funksiyalarni amalga oshirishi uchun quyidagi huquqlar beriladi:

oʻz vakolatlari doirasida shaharsozlik va shaharsozlik faoliyati sohasida kapital qurilishdagi iqtisodiy islohotlarni yanada chuqurlashtirish masalalari ishlab chiqilishini muvofiqlashtirish;

oʻz vakolatiga kiruvchi masalalarni hal etish uchun zarur boʻlgan materiallarni vazirliklar, idoralar, xoʻjalik birlashmalari, mahalliy hokimiyat va boshqaruv organlari, korxonalar va tashkilotlardan soʻrash va belgilangan tartibda olish;

oʻz vakolatiga kiruvchi masalalar boʻyicha normativ-huquqiy va metodologik hujjatlarni ishlab chiqish va belgilangan tartibda tasdiqlash;

oʻz vakolatiga kiruvchi masalalar yuzasidan Vazirlar Mahkamasining topshirigʻiga koʻra xalqaro darajada Oʻzbekiston Respublikasi manfaatlarini ifodalash, oʻz vakolatiga kiruvchi masalalar boʻyicha xorijiy davlatlar bilan bitimlar tayyorlash va tuzishda, xalqaro va hukumatlararo tashkilotlar (komissiyalar) ishida qatnashish;

shaharsozlik va shaharsozlik faoliyati sohasida eng muhim muammolarni ishlab chiqish va koʻrib chiqish boʻyicha idoralararo komissiyalar va kengashlar tashkil etish;

ilmiy-tadqiqot, texnologiya, loyiha-konstruktorlik tashkilotlarini, oliy oʻquv yurtlari va boshqa muassasalar mutaxassislarini, shuningdek alohida olimlarni materiallarni ishlab chiqishga jalb etish;

shaharsozlik faoliyati sohasidagi eng yaxshi ilmiy-texnik ishlanmalarni hamda hududlarni rejalashtirish va qurish loyihalarini tanlash uchun tanlovlar eʼlon qilish va tanlov komissiyalari tashkil etish;

loyihalashtirish va qurishning sifati hamda texnik darajasini, ishlab chiqarilayotgan qurilish materiallari, buyumlar va konstruksiyalarni standartlashtirish va sertifikatlash ishlari tashkil etilishini belgilangan tartibda nazorat qilish; nazorat natijalari boʻyicha tegishli qarorlar qabul qilish;

tanlov hujjatlarining sifati va tarkibini, markazlashtirilgan manbalar hisobiga moliyalashtiriladigan kapital qurilishda tovarlar (ishlar, xizmatlar)ni xarid qilish boʻyicha tanlov savdolarini tashkil etish va oʻtkazishning belgilangan tartib-qoidalariga rioya etilishini tekshirish;

moliyalashtirishning markazlashtirilgan manbalari hisobiga amalga oshirilayotgan qurilishda tanlov savdolari natijalari toʻgʻrisida buyurtmachilarning hisobotlarini kelishish;

moliyalashtirishning markazlashtirilgan manbalari hisobiga amalga oshirilayotgan qurilish obyektlari boʻyicha tanlov savdolari va tuzilgan shartnomalar shartlarining buyurtmachilar va pudratchilar tomonidan bajarilishi monitoringini oʻtkazish;

tasdiqlangan loyiha hamda qurilish normalari va qoidalari buzilgan holda amalga oshirilayotgan obyektlar qurilishini toʻxtatib qoʻyish;

qonun hujjatlarida belgilangan tartibda jarima solish va boshqa jazolar berish;

Keyingi tahrirga qarang.

materiallarni obyektlarni foydalanishga qabul qilib olish qoidalarini buzish hollari boʻyicha — huquqni muhofaza qilish organlariga hamda obyektlarni (yakka tartibdagi uy-joy qurilishidan tashqari) qurilish normalari va qoidalari buzilgan holda foydalanishga topshirish hollari boʻyicha statistika organlariga statistika hisobotidan chiqarish uchun — berish;

vazirliklar, idoralar hamda davlat va xoʻjalik boshqaruvi boshqa organlarining, shuningdek ular tasarrufidagi tashkilotlarning shaharsozlik va shaharsozlik faoliyati masalalari boʻyicha qonun hujjatlariga zid boʻlgan normativ-huquqiy hujjatlarining amal qilishini toʻxtatib turish yoki bekor qilish toʻgʻrisida takliflar kiritish;

shaharsozlik va shaharsozlik faoliyati masalalari boʻyicha normativ-huquqiy hujjatlarni mustaqil ravishda yoki boshqa vazirliklar va idoralar bilan birgalikda ishlab chiqish hamda belgilangan tartibda tasdiqlash.

9. “Davarxitektqurilish” qoʻmitasi quyidagilar uchun javob beradi:

shaharlar, qishloq aholi yashash punktlari va qishloqlar orasidagi hududlarni rejalashtirish va qurishda loyihalashtirish, qurilish-montaj ishlari sifatiga, shaharsozlik normalari, qoidalari va standartlariga rioya qilinishini hisobga olgan holda ularning arxitektura-rejalashtirilishi va arxitektura-badiiy sifatlarini yaxshilash, arxitektura shaharsozlikda milliy anʼanalarni rivojlantirish ustidan nazorat qilish;

loyihalashtirish ishlarini takomillashtirish, loyihalashtirish va qurilish ishlari sifatini oshirish, qurilishda normativ bazani yangilash;

kapital qurilishni yanada iqtisodiy isloh qilish masalalarini tartibga soluvchi normativ-huquqiy hujjatlarni ishlab chiqish va ularning monitoringini olib borish, narxlarni shakllantirish, pudrat ishlari va qurilish materiallari bozorini rivojlantirish metodlarini takomillashtirish;

moddiy-texnika resurslarini sarflashning smeta-normativ bazasini va normativ koʻrsatkichlarini ishlab chiqish va takomillashtirish;

tanlov savdolarini tashkil etish va oʻtkazish tartibiga rioya qilish, tanlov savdolari natijalari boʻyicha tuzilgan shartnoma majburiyatlarining buyurtmachilar va pudratchilar tomonidan bajarilishi monitoringini olib borish, obyektlarni qurish sifati va muddatlarini nazorat qilish.

V. “Davarxitektqurilish” qoʻmitasi faoliyatini tashkil etish

Keyingi tahrirga qarang.

10. “Davarxitektqurilish” qoʻmitasiga belgilangan tartibda lavozimga tayinlanadigan va lavozimdan ozod etiladigan rais boshchilik qiladi.

“Davarxitektqurilish” qoʻmitasi raisining Oʻzbekiston Respublikasi Vazirlar Mahkamasi tomonidan tayinlanadigan uch nafar oʻrinbosari, shu jumladan bir nafar birinchi oʻrinbosari boʻladi.

11. “Davarxitektqurilish” qoʻmitasi raisi:

“Davarxitektqurilish” qoʻmitasi faoliyatiga rahbarlik qiladi va “Davarxitektqurilish” qoʻmitasiga yuklangan vazifalar va funksiyalarning bajarilishi uchun shaxsan javob beradi;

“Davarxitektqurilish” qoʻmitasining markaziy apparati shtat jadvalini tasdiqlaydi;

tegishli organlarda, shuningdek xalqaro tashkilotlarda “Davarxitektqurilish” qoʻmitasi nomidan vakillik qiladi;

Qoʻmitaga qarashli tashkilotlarning ustavlari (nizomlari)ni belgilangan tartibda tasdiqlaydi, ularning rahbarlarini lavozimga tayinlaydi va lavozimdan ozod qiladi, Qoʻmitaga qarashli tashkilotlar rahbarlari bilan qonun hujjatlariga muvofiq shartnomalar tuzadi, ularni oʻzgartiradi va bekor qiladi;

qonun hujjatlariga muvofiq boshqa vakolatlarni amalga oshiradi.

Keyingi tahrirga qarang.

12. “Davarxitektqurilish” qoʻmitasida tarkibiga rais (hayʼat raisi) va rais oʻrinbosarlari, shuningdek “Davarxitektqurilish” qoʻmitasi va uning tarkibiy boʻlinmalarining boshqa xodimlari kiruvchi 9 kishidan iborat hayʼat tuziladi.

“Davarxitektqurilish” qoʻmitasi hayʼati aʼzolari Oʻzbekiston Respublikasi Vazirlar Mahkamasi tomonidan tasdiqlanadi.

13. “Davarxitektqurilish” qoʻmitasi hayʼati oʻz majlislarida shaharsozlik va shaharsozlik faoliyati sohasida yagona siyosatni oʻtkazish, shaharsozlik darajasini oshirish, qurilishda ilmiy-texnika taraqqiyotini jadallashtirish va iqtisodiy islohotlarni chuqurlashtirish masalalarini hamda “Davarxitektqurilish” qoʻmitasi faoliyatiga taalluqli boshqa masalalarni koʻrib chiqadi, “Davarxitektqurilish” qoʻmitasi tashkilotlariga amaliy rahbarlik qilish masalalarini, shuningdek qarorlar, buyruqlar, qoidalar, yoʻriqnomalar va boshqa normativ hujjatlar loyihalarini muhokama qiladi.

Keyingi tahrirga qarang.

14. “Davarxitektqurilish” qoʻmitasi huzurida shaharsozlik va kapital qurilishda ilmiy-texnika taraqqiyoti muammolarini maqbul tarzda hal etish yoʻllarini koʻrib chiqish va izlash uchun ilmiy-texnika kengashi tuziladi. Ilmiy-texnika kengashiga Qoʻmita raisi boshchilik qiladi. Kengashning shaxsiy tarkibi va uning toʻgʻrisidagi Nizom Qoʻmita raisi tomonidan tasdiqlanadi. Vazirliklar, idoralar, xoʻjalik birlashmalari va boshqa tashkilotlar mutaxassislari Ilmiy-texnika kengashida ishlashga jamoatchilik asosida jalb qilinishi mumkin.

15. Boshqarmalar va boʻlimlar “Davarxitektqurilish” qoʻmitasi markaziy apparatining asosiy tarkibiy boʻlinmalari hisoblanadi.

“Davarxitektqurilish” qoʻmitasi boshqarmalari va boʻlimlari boshliqlari “Davarxitektqurilish” qoʻmitasi raisining buyrugʻi bilan lavozimga tayinlanadi va lavozimdan ozod etiladi.

16. “Davarxitektqurilish” qoʻmitasi tarkibiga quyidagilar kiradi:

Qoraqalpogʻiston Respublikasi arxitektura va qurilish qoʻmitasi;

viloyatlar va Toshkent shahar arxitektura va qurilish bosh boshqarmalari;

shaharlar va tumanlar arxitektura va qurilish boshqarmalari (boʻlimlari);

Davlat ekspertizasi hududiy boshqarmalari;

Davlat arxitektura-qurilish nazorati hududiy inspeksiyalari;

Qurilishda tanlov savdolari va narxlarni shakllantirish hududiy konsalting markazlari;

Qurilishda standartlashtirish va sertifikatlash respublika markazi;

Kapital qurilishda iqtisodiy islohotlar va narxlarni shakllantirish markazi;

“AQATM” axborot-joriy etish markazi.

Keyingi tahrirga qarang.

17. Qoraqalpogʻiston Respublikasi arxitektura va qurilish davlat qoʻmitasi, viloyatlar va Toshkent shahar arxitektura va qurilish bosh boshqarmalari rahbarlarini lavozimga tayinlash va lavozimdan ozod etish toʻgʻrisidagi qaror tegishli ravishda Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlarining taqdimnomasi boʻyicha Oʻzbekiston Respublikasi Davlat arxitektura va qurilish qoʻmitasi raisi tomonidan qabul qilinadi.

Boshqa tarkibiy boʻlinmalar rahbarlarini lavozimga tayinlash va lavozimdan ozod etish toʻgʻrisidagi qarorni Oʻzbekiston Respublikasi Davlat arxitektura va qurilish qoʻmitasi raisi qabul qiladi.

Keyingi tahrirga qarang.

18. “Davarxitektqurilish” qoʻmitasi markaziy apparati tuzilmasi va xodimlari soni, Qoraqalpogʻiston Respublikasi arxitektura va qurilish qoʻmitasi hamda viloyatlar va Toshkent shahar arxitektura va qurilish bosh boshqarmalari tuzilmasi va xodimlari soni Oʻzbekiston Respublikasi Vazirlar Mahkamasi tomonidan tasdiqlanadi.

19. “Davarxitektqurilish” qoʻmitasi markaziy apparati, Qoraqalpogʻiston Respublikasi arxitektura va qurilish qoʻmitasi hamda viloyatlar va Toshkent shahar arxitektura va qurilish bosh boshqarmalari taʼminoti xarajatlarini mablagʻ bilan taʼminlash davlat budjeti mablagʻlari hamda budjetdan tashqari mablagʻlar hisobiga amalga oshiriladi.

20. “Davarxitektqurilish” qoʻmitasi markaziy apparatining shtat jadvali, shuningdek uning tarkibiy boʻlinmalari toʻgʻrisidagi nizomlar hamda ularning shtat jadvali moliya organlarida roʻyxatdan oʻtkazilgandan keyin, “Davarxitektqurilish” qoʻmitasi raisi tomonidan tasdiqlanadi.

21. “Davarxitektqurilish” qoʻmitasi xodimlarini moddiy ragʻbatlantirish qonun hujjatlariga muvofiq amalga oshiriladi.

“Davarxitektqurilish” qoʻmitasida Rivojlantirish va moddiy ragʻbatlantirish jamgʻarmasi tashkil etiladi. Jamgʻarma mablagʻlari kapital qurilishda qonunbuzishlar uchun jazo jarimalari qoʻllashdan Oʻzbekiston Respublikasi Davlat arxitektura va qurilish qoʻmitasi tasarrufiga tushgan mablagʻlarning bir qismini ajratish hisobiga va qonun hujjatlarida taqiqlanmagan boshqa manbalar hisobiga belgilangan tartibda shakllantiriladi.

Rivojlantirish va moddiy ragʻbatlantirish jamgʻarmasi toʻgʻrisidagi nizom Moliya vazirligi bilan kelishgan holda “Davarxitektqurilish” qoʻmitasi hayʼatining qarori bilan tasdiqlanadi.

22. “Davarxitektqurilish” qoʻmitasi qonun hujjatlariga muvofiq jurnallar, gazetalar taʼsis etadi va nashr qiladi hamda radio va televideniyeda mavzuli dasturlar shakllantirilishini taʼminlaydi.

23. “Davarxitektqurilish” qoʻmitasini qayta tashkil etish va tugatish qonun hujjatlarida belgilangan tartibda amalga oshiriladi.

Keyingi tahrirga qarang.

Vazirlar Mahkamasining
2003-yil 2-dekabrdagi
538-son qaroriga
5-ILOVA

Davlat ekspertizasi hududiy boshqarmasining namunaviy

tuzilmasi

Keyingi tahrirga qarang.

Vazirlar Mahkamasining
2003-yil 2-dekabrdagi
538-son qaroriga
5a-ILOVA

Davlat arxitektura-qurilish nazorati hududiy inspeksiyasining

namunaviy tuzilmasi

Keyingi tahrirga qarang.

Vazirlar Mahkamasining
2003-yil 2-dekabrdagi
538-son qaroriga
5b-ILOVA

Qurilishda tanlov savdolari va narxlarni shakllantirish hududiy konsalting markazining

namunaviy tuzilmasi

Keyingi tahrirga qarang.

Vazirlar Mahkamasining
2003-yil 2-dekabrdagi
538-son qaroriga
6-ILOVA

Oʻzbekiston Respublikasi Davlat arxitektura va qurilish qoʻmitasining Davlat ekspertizasi hududiy boshqarmasi toʻgʻrisida

Namunaviy nizom

I. Umumiy qoidalar

1. Ushbu Nizom Oʻzbekiston Respublikasi Shaharsozlik kodeksining 24-moddasiga muvofiq ishlab chiqilgan hamda Qoraqalpogʻiston Respublikasi, viloyatlar va Toshkent shahridagi Davlat ekspertizasi hududiy boshqarmasining (keyingi oʻrinlarda Boshqarma deb ataladi) vazifalari, funksiyalari, huquqlari va javobgarligini belgilaydi.

2. Boshqarma Oʻzbekiston Respublikasi Davlat arxitektura va qurilish qoʻmitasining (keyingi oʻrinlarda “Davarxitektqurilish” qoʻmitasi deb ataladi) tarkibiy boʻlinmasi hisoblanadi.

3. Boshqarma oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oliy Majlis qarorlariga va boshqa qarorlariga, Oʻzbekiston Respublikasi Prezidentining farmonlari va farmoyishlariga, Vazirlar Mahkamasining qarorlari va farmoyishlariga, boshqa normativ-huquqiy hujjatlarga, Oʻzbekiston Respublikasi “Davarxitektqurilish” qoʻmitasining buyruqlari, farmoyishlari va topshiriqlariga hamda mazkur Nizomga amal qiladi.

4. Boshqarma davlat mulki shaklidagi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga ega boʻladi.

II. Boshqarmaning asosiy vazifalari

5. Quyidagilar Boshqarmaning asosiy vazifalari hisoblanadi:

markazlashtirilgan manbalar hisobiga amalga oshiriladigan shaharsozlik hujjatlarining, shuningdek yuridik va jismoniy shaxslarning oʻz mablagʻlari va jalb etilgan mablagʻlari hisobiga obyektlar qurilishi texnik-iqtisodiy asoslarini va texnik-iqtisodiy hisoblarining mustahkamlikka, yongʻin va portlash xavfsizligi hamda shaharsozlik, ijtimoiy, sanitariya-gigiyena talablariga rioya etilishi, yoqilgʻi-energetika, xomashyo va tabiiy resurslardan oqilona foydalanilishi, loyiha yechimlarining amaldagi normativlar va standartlarga muvofiqligi yuzasidan belgilangan tartibda davlat ekspertizasi tashkil etilishi va oʻtkazilishini taʼminlash;

arxitektura-rejalashtirish va shaharsozlik yechimlari darajasini oshirish;

loyihalashtirish ishlarini, qurilish ishlab chiqarishini takomillashtirish, loyihalashtirish va qurilish sohasidagi ilgʻor tajribani oʻrganish va ommalashtirish;

buyurtmachilar, shaharsozlik hujjatlarini ishlab chiquvchilar va boshqa tashkilotlar oʻrtasidagi shaharsozlik hujjatlariga oid kelishmovchiliklarni koʻrib chiqish.

III. Boshqarmaning funksiyalari

6. Boshqarma quyidagi funksiyalarni bajaradi:

mulkchilik shakllaridan va moliyalashtirish manbalaridan qatʼi nazar, texnik-iqtisodiy asoslarni va texnik-iqtisodiy hisoblarni, korxonalar, binolar, inshootlar, muhandislik tarmoqlari va yoʻl qurilishi obyektlarini qurish, kengaytirish va rekonstruksiya qilishga doir loyihalashtirish hujjatlarini, qishloq aholi yashash joylari va shahar tipidagi aholi yashash joylarining loyihalashtirish-rejalashtirish hujjatlarini belgilangan tartibda davlat ekspertizasidan oʻtkazadi;

keyinchalik loyihalashtirish va qurishda ekspert boʻlinmasining takliflari amalga oshirilishini tanlab nazorat qiladi;

ekspertiza va tanlab nazorat qilish natijalarini umumlashtiradi, ular toʻgʻrisida “Davarxitektqurilish” qoʻmitasining Shaharsozlik hujjatlarini ekspertizadan oʻtkazish boshqarmasini, buyurtmachi va loyihalashtirish tashkilotlarining barcha manfaatdor xizmatlarini xabardor qiladi, shaharsozlik hujjatlarini va ekspertizani takomillashtirish toʻgʻrisida belgilangan tartibda takliflar kiritadi;

faoliyati litsenziyalanadigan tashkilotlar, boshqa yuridik shaxslar tomonidan ishlab chiqilgan shaharsozlik hujjatlarining sifati toʻgʻrisida xulosalar beradi;

zarur hollarda Oʻzbekiston Respublikasi “Davarxitektqurilish” qoʻmitasining Shaharsozlik hujjatlarini ekspertizadan oʻtkazish boshqarmasiga ishlab chiqilgan shaharsozlik hujjatlarining sifati pastligida aybdor boʻlgan yuridik va jismoniy shaxslarga nisbatan sanksiyalar qoʻllash toʻgʻrisida, shu jumladan ularni shaharsozlik hujjatlarini ishlab chiqish huquqini beruvchi litsenziyadan mahrum qilish toʻgʻrisida ham takliflar kiritadi;

buyurtmachilarga (investorlarga) shaharsozlik hujjatlarini ishlab chiqishda (qayta ishlab chiqishda), ularni ekspertizadan oʻtkazishda hamda investitsiya faoliyatining texnik va iqtisodiy masalalari boʻyicha maslahatlar berishda shartnoma asosida xizmatlar koʻrsatadi.

IV. Boshqarmaning huquqlari

7. Boshqarma quyidagi huquqlarga ega:

ekspertiza va maslahatlar oʻtkazish uchun manfaatdor tashkilotlarni, davlat muassasalari va korxonalarini, oliy oʻquv yurtlarini, shuningdek ayrim olimlar va mutaxassislarni jalb etish;

zarur hollarda oqilona loyiha yechimlarini tanlab olish uchun murakkab texnologiya jarayonlariga yoki qurilish konstruksiyalariga ega boʻlgan korxonalar, binolar va inshootlar qurilishi loyihalarining (yoki ularning bir qismining) qoʻshimcha variantlarini ishlab chiqish toʻgʻrisida takliflar kiritish;

loyihalashtirish tashkilotlarida va boshqa tashkilotlarda shaharsozlik hujjatlarini ishlab chiqish boʻyicha qurilish normalari va qoidalariga, yoʻriqnomalarga va koʻrsatmalarga rioya qilinishi monitoringini olib borish;

zarur hollarda, ishlab chiqilgan shaharsozlik hujjatlarining sifati pastligida aybdor boʻlgan yuridik va jismoniy shaxslarga nisbatan sanksiyalar qoʻllash toʻgʻrisida, shu jumladan ularni shaharsozlik hujjatlarini ishlab chiqish huquqini beruvchi litsenziyadan mahrum qilish toʻgʻrisida ham takliflar kiritish.

V. Boshqarma xodimlarining javobgarligi

8. Boshqarma xodimlari Oʻzbekiston Respublikasi qonun hujjatlarida belgilangan tartibda javob beradilar.

Boshqarma xodimlari:

oʻz funksiyalari bajarilmaganligi yoki zarur darajada bajarilmaganligi;

Oʻzbekiston Respublikasining normativ-huquqiy hujjatlari hamda mazkur Nizom qoidalari va talablariga rioya etilmaganligi;

shaharsozlik hujjatlarining ekspertizadan sifatsiz oʻtkazilganligi sababli yetkazilgan zarar uchun davlat va buyurtmachi oldida;

noqonuniy xatti-harakatlar (harakatsizlik) oqibatida korxonalar, muassasalar, tashkilotlar va fuqarolarga moddiy va maʼnaviy zarar yetkazilganligi;

Oʻzbekiston Respublikasining qonun hujjatlari va normalariga muvofiq boʻlmagan qarorlar qabul qilinganligi;

boshqa huquqbuzarliklar uchun javob beradilar.

VI. Boshqarma faoliyatini tashkil etish

9. Boshqarmaga Oʻzbekiston Respublikasi Davlat arxitektura va qurilish qoʻmitasi toʻgʻrisidagi nizomga muvofiq “Davarxitektqurilish” qoʻmitasi raisining buyrugʻi bilan lavozimga tayinlanadigan va lavozimdan ozod qilinadigan boshliq rahbarlik qiladi.

Boshqarma boshligʻi davlat bosh eksperti hisoblanadi.

10. Boshqarma boshligʻi:

Boshqarma faoliyatiga rahbarlik qiladi, shtatlarni tasdiqlaydi;

oʻz vakolatlari doirasida buyruqlar, farmoyishlar chiqaradi;

Boshqarma xodimlarini amaldagi qonun hujjatlariga muvofiq ishga qabul qiladi va ishdan boʻshatadi;

Boshqarma nomidan ishonchnomasiz ish koʻradi, tashkilotlar, muassasalar va korxonalarda uning manfaatlarini ifodalaydi, belgilangan tartibda Boshqarma mablagʻlari va mol-mulkini tasarruf etadi, shartnomalar, shu jumladan mehnat shartnomalari tuzadi, banklarda hisob raqamlari va boshqa hisob raqamlari ochadi, oʻziga yuklangan vazifalar va funksiyalarning bajarilishi uchun shaxsan javob beradi;

qonun hujjatlariga muvofiq boshqa vakolatlarni amalga oshiradi.

11. Boshqarma toʻliq xoʻjalik hisobida va oʻzini-oʻzi mablagʻ bilan taʼminlash asosida faoliyat koʻrsatadi.

12. Boshqarma har oyda Oʻzbekiston Respublikasi “Davarxitektqurilish” qoʻmitasi hisob raqamiga oʻz daromadlarining 10 foizi miqdorida mablagʻ oʻtkazadi.

13. Boshqarmani qayta tashkil etish va tugatish qonun hujjatlarida belgilangan tartibda amalga oshiriladi.

Keyingi tahrirga qarang.

Vazirlar Mahkamasining
2003-yil 2-dekabrdagi
538-son qaroriga
6a-ILOVA

Oʻzbekiston Respublikasi Davlat arxitektura va qurilish qoʻmitasining Davlat arxitektura-qurilish nazorati hududiy inspeksiyasi toʻgʻrisida

Namunaviy nizom

I. Umumiy qoidalar

1. Ushbu Nizom Oʻzbekiston Respublikasi Shaharsozlik kodeksining 25-moddasiga muvofiq ishlab chiqilgan hamda Oʻzbekiston Respublikasi Davlat arxitektura va qurilish qoʻmitasining (keyingi oʻrinlarda “Davarxitektqurilish” qoʻmitasi deb ataladi) davlat arxitektura-qurilish nazorati hududiy inspeksiyasining (keyingi oʻrinlarda Inspeksiya deb ataladi) maqomi, vazifalari, funksiyalari, vakolatlari va javobgarligini belgilaydi.

Inspeksiya oʻz faoliyatida Oʻzbekiston Respublikasi “Davarxitektqurilish” qoʻmitasiga hisob beradi.

2. Inspeksiya oʻz faoliyatida Oʻzbekiston Respublikasi Konstitutsiyasiga va qonunlariga, Oliy Majlis qarorlariga, Oʻzbekiston Respublikasi Prezidentining farmonlari va farmoyishlariga, Vazirlar Mahkamasining qarorlari va farmoyishlariga, Oʻzbekiston Respublikasi “Davarxitektqurilish” qoʻmitasining buyruqlari va farmoyishlariga, boshqa normativ-huquqiy hujjatlarga hamda mazkur Nizomga amal qiladi.

3. Inspeksiya Oʻzbekiston Respublikasi “Davarxitektqurilish” qoʻmitasi tizimiga kiradi, qonun hujjatlarida belgilangan oʻz vakolatlari doirasida Oʻzbekiston Respublikasi hududida davlat standartlariga, shaharsozlik normalari va qoidalariga rioya etilishini nazorat qiladi.

4. Inspeksiya davlat mulki shaklidagi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi oʻzbek va rus tillarida yozilgan muhrga, mustaqil balansga, banklarda hisob raqamlariga ega boʻladi.

II. Inspeksiyaning asosiy vazifalari va funksiyalari

5. Quyidagilar Inspeksiyaning asosiy vazifalari hisoblanadi:

yuridik va jismoniy shaxslar tomonidan shaharsozlik toʻgʻrisidagi qonun hujjatlari, belgilangan shaharsozlik normalari va qoidalari talablariga rioya etilishi ustidan nazoratni amalga oshirish;

obyektlar qurilishini moliyalashtirish manbalaridan qatʼi nazar, qurilishning barcha bosqichlarida loyihalashtirish va qurilish-montaj ishlari sifatiga, davlat standartlariga, qurilish normalari va qoidalariga, ishlarni amalga oshirish texnologiyasiga rioya etilishi ustidan nazoratni amalga oshirish;

moliyalashtirish manbalaridan va buyurtmachining mulkchilik shakllaridan qatʼi nazar, yakka tartibdagi uy-joy qurilishidan tashqari, barcha qurilish obyektlarini roʻyxatdan oʻtkazish va hisobga olish, qurilish-montaj ishlarini boshlashga ruxsatnomalar berish;

bajarilayotgan qurilish-montaj ishlarining, qoʻllanayotgan qurilish materiallari, buyumlari va konstruksiyalarining davlat standartlari talablariga va texnik shartlarga muvofiqligi ustidan nazoratni amalga oshirish;

qurilish industriyasi korxonalarida qurilish materiallari, konstruksiyalari, buyumlarini ishlab chiqarish shart-sharoitlarining davlat standartlariga, normativ-texnik va loyiha hujjatlariga muvofiqligini nazorat qilish;

qurilishi tugallangan obyektlarni foydalanishga qabul qilish boʻyicha komissiyalar ishlarida majburiy ravishda qatnashish;

ish hujjatlarini ishlab chiqish, obyektlarni qurish va qurilish materiallari, konstruksiyalari va buyumlarini ishlab chiqarish sifati ustidan nazoratni tashkil etish va amalga oshirish masalalari boʻyicha normativ-metodik hujjatlarni ishlab chiqishda qatnashish;

qurilishda standartlashtirish va qurilish materiallari, buyumlari va konstruksiyalarini sertifikatlash boʻyicha ishlarni amalga oshirish.

6. Inspeksiya oʻziga yuklangan vazifalarga muvofiq quyidagi nazorat funksiyalarini bajaradi:

a) kapital qurilish obyektlarini roʻyxatdan oʻtkazadi (yakka tartibdagi uy-joy qurilishi obyektlari bundan mustasno) va qurilish-montaj ishlarini boshlashga ruxsatnoma beradi;

b) quyidagilarni:

aholi yashash punktlarini qurishning bosh rejasi amalga oshirilishiga rioya qilinishini;

yer uchastkalari ajratishning aholi yashash punktlarini qurishning bosh rejasi qoidalariga muvofiqligini;

loyiha hujjatlarining normativ talablarga muvofiqligini;

qizil chiziqlarga rioya qilinishini;

ajratilgan yer uchastkalaridan maqsadli foydalanilishini nazorat qiladi;

boshlangʻich — ruxsat berish hujjatlari mavjudligini nazorat qiladi va bosh rejalarga rioya etilishini nazorat qilishda aniqlangan oʻzboshimchalik bilan amalga oshirilayotgan qurilishni toʻxtatib qoʻyadi, bosh rejalarning aniqlangan buzilishlarini tahlil qiladi, tendensiyalarni hududlar boʻyicha umumlashtiradi hamda hududiy arxitektura va qurilish bosh boshqarmasiga, hokimlikka va “Davarxitektqurilish” qoʻmitasiga tahliliy axborot va bosh rejalar buzilishini bartaraf etish yuzasidan takliflar taqdim etadi;

loyihalash va pudrat tashkilotlarida — ishlar va xizmatlarni bajaruvchilarda loyihalash va qurilish faoliyatining qonun hujjatlarida nazarda tutilgan litsenziyalanadigan turlarini amalga oshirish huquqiga litsenziyalarning mavjudligini;

bajarilayotgan qurilish-montaj ishlarining sifatli va qurilish normalari va qoidalariga, normativ-texnik va loyiha hujjatlariga muvofiqligini, shuningdek pudrat tashkiloti tomonidan ijro hujjatlari yuritilishini;

umumiy foydalaniladigan avtomobil yoʻllari, tegishli yoʻl infratuzilmasi qurilishi va taʼmirlanishini;

normativ-texnik va loyiha hujjatlarida nazar tutilgan sinovlar, suratga olishlar va oʻlchashlar oʻtkazilishini;

qoʻllanayotgan qurilish materiallari, buyumlari va konstruksiyalarining davlat standartlariga, normalar va texnik shartlarga muvofiqligini;

qurilish industriyasi korxonalarida qurilish materiallari, buyumlari va konstruksiyalari ishlab chiqarish sharoitlarining davlat standartlari, normalariga va texnik shartlarga muvofiqligini nazorat qiladi;

v) texnika komissiyalarining binolar, inshootlar, ularning qismlari va konstruktiv elementlarining avariya holatlarini va avariyalari sabablarini tekshirish boʻyicha ishlarida qatnashadi;

g) shartnoma asosida mavjud binolar va inshootlarning texnik ahvolini ularni tiklash yoki rekonstruksiya qilish maqsadida tekshiradi va xulosalar beradi;

d) zarur hollarda bajarilgan qurilish-montaj ishlari hajmlarining nazorat oʻlchovini amalga oshirishda qatnashadi;

e) qurilish mahsulotlarining sifatini taʼminlash, qonun hujjatlariga rioya qilish masalalari boʻyicha davlat nazoratining boshqa vakolatli organlari, ilmiy-tadqiqot, loyihalashtirish va jamoat tashkilotlari bilan oʻzaro hamkorlik qiladi;

j) qonun hujjatlariga muvofiq, Oʻzbekiston Respublikasi “Davarxitektqurilish” qoʻmitasiga davlat standartlari, qurilish normalari va qoidalari talablarining buzilishiga yoʻl qoʻyayotgan tashkilotlar va korxonalarning muhandislik-texnik qidiruvlarni oʻtkazish, loyihalashtirish va qurilish faoliyatini amalga oshirishga berilgan litsenziyalarining amal qilishini toʻxtatib turish toʻgʻrisida takliflar kiritadi;

z) qonun hujjatlariga muvofiq qurilish sohasidagi qonun buzilishlari uchun jarima sanksiyalari belgilash toʻgʻrisida qaror qabul qiladi;

i) oʻtkazilgan nazorat natijalarini umumlashtiradi va tahlil qiladi, qurilish sifatini yaxshilash boʻyicha normativ talablarni, metodik va yoʻriqnoma hujjatlarni takomillashtirishga doir takliflarni ishlab chiqadi;

k) qurilishda standartlash va qurilish materiallari, buyumlari va konstruksiyalarini sertifikatlash ishlarini olib boradi.

7. Inspeksiya:

loyihalashtirish va qurilish-montaj ishlarining zarur sifati taʼminlanishi;

binolar va inshootlarning seysmik barqarorligini taʼminlash tadbirlarining bajarilishi, roʻyxatdan oʻtkazilgan qurilish obyektlarini arxitektura jihatidan jihozlash normalariga, qoidalar va standartlar, texnik shartlarga rioya etilishi;

loyihalashtirish va qurilish-montaj ishlarining, ishlab chiqarilayotgan qurilish materiallari, buyumlari va konstruksiyalarining sifatini yaxshilash masalalarini tartibga soluvchi normativ talablar, metodik va yoʻriqnoma hujjatlar ishlab chiqilishi va takomillashtirilishi;

qoʻllanayotgan qurilish materiallari, buyumlari va konstruksiyalarining davlat standartlariga, normalar va texnik shartlarga muvofiqligi ustidan zarur nazorat taʼminlanishi;

8. Markazlashtirilgan manbalar hisobiga amalga oshirilgan, qurilishi tugallangan obyektlarni foydalanishga qabul qilib olishda Inspeksiya vakili, agar qonun hujjatlarida boshqacha qoida nazarda tutilmagan boʻlsa, Davlat qabul komissiyasi raisining oʻrinbosari etib tayinlanadi.

9. Markazlashtirilgan manbalar hisobiga obyektlarni qurishda uni roʻyxatdan oʻtkazgan Inspeksiya har oyda buyurtmachiga bajarilgan ishlarning shaharsozlik normalari, qoidalariga, standartlarga va texnik shartlarga muvofiqligi toʻgʻrisida xulosa beradi.

Qurilish tugallangandan keyin yakuniy xulosa beriladi.

10. Inspeksiya muntazam asosda “Davarxitektqurilish” qoʻmitasining Loyihalashtirish va qurilish-montaj ishlari sifati ustidan davlat nazorati bosh boshqarmasiga belgilangan shakllar boʻyicha axborot va zarur materiallar taqdim etadi.

III. Inspeksiyaning huquqlari

11. Inspeksiya quyidagi huquqlarga ega:

yuklangan vazifalarni bajarish maqsadida tashkilotlarda, qurilish obyektlarida hamda qurilish materiallari, buyumlari va konstruksiyalari ishlab chiqaruvchi korxonalarda boʻlish;

loyihalashtirish, pudrat tashkilotlari va buyurtmachi tashkilotlardan loyiha, texnologiya va ijro hujjatlarini hamda qoʻllanilayotgan materiallar, buyumlar, konstruksiyalar va bajarilayotgan qurilish-montaj ishlari sifatini tekshirish uchun zarur boʻlgan boshqa materiallarni olish;

pudrat tashkilotlariga konstruksiyalar, uzellar va detallarning ayrim elementlarini ochishni, tagzamindagi tuproqni sinashni va qayta yopib qoʻyishni, qoʻllanilgan qurilish materiallari, buyumlari, konstruksiyalarini, muhandislik tizimlarini sinab koʻrishni topshirish, zarurat boʻlganda tegishli xulosa tayyorlash uchun ekspertlarni jalb qilish;

qurilishi tugallangan obyektlarni foydalanishga qabul qilib olish boʻyicha komissiyalar ishida qatnashish;

yoʻl qoʻyilgan buzilishlarni bartaraf etish toʻgʻrisida oʻz vakolatlari doirasida qurilish qatnashchilari va qurilish materiallari, buyumlari, konstruksiyalarini tayyorlovchilar (yetkazib beruvchilar) tomonidan bajarilishi majburiy boʻlgan yozma koʻrsatmalar berish;

vazirliklar, idoralar va tashkilotlarning obyektlar qurilishi sifatini nazorat qiluvchi texnik nazorat ishlab chiqarish xizmatlari hamda sinov laboratoriyalari ishini tanlab nazoratdan oʻtkazish;

loyihani ishlab chiqqan mualliflar tomonidan mualliflik nazorati yuritilishini nazorat qilish, asoslangan hollarda ularga nisbatan qonun hujjatlariga muvofiq sanksiyalar qoʻllash toʻgʻrisida Oʻzbekiston Respublikasi “Davarxitektqurilish” qoʻmitasiga takliflar kiritish;

Oʻzbekiston Respublikasi “Davarxitektqurilish” qoʻmitasiga kapital qurilish sohasidagi normativ-huquqiy hujjatlar talablarini buzuvchilarga nisbatan qonun hujjatlariga muvofiq sanksiyalar qoʻllash toʻgʻrisida taqdimnomalar kiritish;

qurilish materiallari, konstruksiyalari, buyumlarini tayyorlash, yuklash-tushirish, tashish, saqlash boʻyicha davlat standartlari talablari va texnik shartlar buzilishlari aniqlanganda ularni ishlab chiqarish, sotish va qoʻllashni toʻxtatib turish;

tasdiqlangan loyiha yechimlari va normativ-huquqiy hujjatlar talablari buzilganda, ushbu buzilishlar pishiqlik va mustahkamlik tavsiflarini pasaytirishga olib kelganda, shuningdek binolar va inshootlarda avariya xavfi paydo boʻlganda, obyektlar oʻzboshimchalik bilan qurilganda qurilish-montaj ishlari amalga oshirilishini toʻxtatib turish, yakka tartibdagi uy-joy qurilishi bundan mustasno;

buyurtmachi va pudratchining tashkilotlariga kapital qurilish sohasida qonun hujjatlari talablarini buzayotgan mansabdor shaxslarni javobgarlikka tortish haqida taqdimnomalar kiritish;

bajarilgan qurilish-montaj ishlarining sifati va qurilish obyektlarining holati haqida ekspert xulosalari berish;

qurilishi tugallangan obyektlarni foydalanishga qabul qilishda qoidalar buzilganligi toʻgʻrisidagi materiallarni tegishli organlarga va qonun hujjatlarida belgilangan qabul qilish qoidalari buzilgan holda topshirilgan obyektlarni statistika hisobotidan chiqarish toʻgʻrisidagi materiallarni statistika organlariga berish.

IV. Inspeksiya faoliyatini tashkil etish

12. Davlat arxitektura-qurilish nazorati hududiy inspeksiyasining davlat inspektorlari oʻz funksional faoliyatini Oʻzbekiston Respublikasi “Davarxitektqurilish” qoʻmitasi tomonidan har yili oʻtkaziladigan attestatsiya natijalariga koʻra beriladigan sertifikatlar asosida amalga oshiradilar.

13. Qurilish obyektlarida nazorat ishlari buyurtmachi va pudratchining buyruqlari bilan tayinlanadigan ularning masʼul vakillari ishtirokida oʻtkaziladi.

Zarur hollarda nazorat maqsadlari uchun loyihalashtirish, bank va (yoki) boshqa manfaatdor tashkilotlar mutaxassislari shartnoma asosida jalb etilishi mumkin.

14. Qurilish materiallari, konstruksiyalari, buyumlari sanoati korxonalarida nazorat ishlari ishlab chiqarishning texnik shartlariga rioya etilishi uchun masʼul boʻlgan mansabdor shaxslar (bosh muhandis, sex boshligʻi, texnika nazorati boʻlimi boshligʻi va boshqalar) ishtirokida oʻtkaziladi.

15. Nazorat ishlari natijalariga koʻra ishlarni bajarish daftariga tegishli yozuv yoziladi, Inspeksiya inspektori, buyurtmachi va pudratchining vakillari imzolaydigan dalolatnoma tuziladi, zarur hollarda yozma koʻrsatma beriladi.

Buyurtmachi yoki pudratchi vakillari dalolatnomada bayon qilingan xulosalarga rozi boʻlmagan taqdirda, uni oʻz eʼtirozlarini yozma shaklda qayd etgan holda imzolaydilar.

16. Inspeksiya inspektorlari oʻz funksional vazifalarini bajarishda davlat nazoratining boshqa vakolatli organlari, soliq inspeksiyasi, bank muassasalari, prokuratura organlari, sudlar, hokimliklarning tegishli xizmatlari, isteʼmolchilar huquqlarini himoya qilish jamiyatlari va ommaviy axborot vositalari organlari bilan oʻzaro hamkorlik qiladilar.

17. Inspeksiyalarning mansabdor shaxslari xatti-harakatlari yuzasidan Oʻzbekiston Respublikasi “Davarxitektqurilish” qoʻmitasiga yoki sudga shikoyat qilinishi mumkin.

18. Inspeksiya inspektorlari gʻayriqonuniy xatti-harakatlari va yetkazilgan zarar uchun qonun hujjatlariga muvofiq javobgarlikka tortiladilar.

19. Inspeksiyaning moliya-xoʻjalik faoliyati qonun hujjatlariga muvofiq shartnoma asosida amalga oshiriladi.

Inspeksiya har oyda Oʻzbekiston Respublikasi “Davarxitektqurilish” qoʻmitasiga oʻz daromadlarining 10 foizi miqdorida ajratma oʻtkazadi.

20. Inspeksiyaga Oʻzbekiston Respublikasi “Davarxitektqurilish” qoʻmitasi raisining buyrugʻi bilan lavozimga tayinlanadigan va lavozimdan ozod qilinadigan boshliq rahbarlik qiladi.

21. Davlat arxitektura-qurilish nazorati hududiy inspeksiyasini qayta tashkil etish va tugatish qonun hujjatlarida belgilangan tartibda amalga oshiriladi.

Keyingi tahrirga qarang.

Vazirlar Mahkamasining
2003-yil 2-dekabrdagi
538-son qaroriga
6b-ILOVA

Qurilishda tanlov savdolari va narxlarni shakllantirish hududiy konsalting markazi toʻgʻrisida

namunaviy nizomi

I. Umumiy qoidalar

1. Ushbu Nizom Oʻzbekiston Respublikasi Davlat arxitektura va qurilish qoʻmitasi (keyingi oʻrinlarda “Davarxitektqurilish” qoʻmitasi deb ataladi) qurilishda tanlov savdolari va narxlarni shakllantirish hududiy konsalting markazining (keyingi oʻrinlarda Markaz deb ataladi) maqomi, vazifalari, funksiyalari, vakolatlari va javobgarligini belgilaydi.

2. Markaz Oʻzbekiston Respublikasi “Davarxitektqurilish” qoʻmitasiga hisob beradi.

3. Markaz oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi qarorlariga, Oʻzbekiston Respublikasi Prezidentining farmonlari va farmoyishlariga, Vazirlar Mahkamasining qarorlari va farmoyishlariga, boshqa normativ-huquqiy hujjatlarga, Oʻzbekiston Respublikasi “Davarxitektqurilish” qoʻmitasining buyruqlari va farmoyishlariga hamda mazkur Nizomga amal qiladi.

4. Markaz davlat mulki shaklidagi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga, mustaqil balansga, bankda hisob raqamlariga ega boʻladi.

II. Markazning asosiy vazifalari

5. Quyidagilar Markazning asosiy vazifalari hisoblanadi:

tanlov hujjatlarini ishlab chiqish, shartnoma asosida qurilishda tanlov savdolarini tashkil etish va oʻtkazish;

tanlov savdolarini tashkil etish va oʻtkazish, shartnomalar tuzish, tanlov savdolari shartlari va investitsiya loyihasini amalga oshirishda ishlarni bajarish va moliyalashtirish jadvalining bajarilishi, shuningdek markazlashtirilgan manbalar hisobiga moliyalashtirilayotgan qurilishi tugallangan obyektning oʻz vaqtida foydalanishga topshirilishi monitoringini olib borish;

shartnoma asosida qurilishda tanlov savdolari mavzuining dastlabki qiymatini belgilash boʻyicha xizmatlar koʻrsatish;

qurilish mahsulotining, shu jumladan “elementlar qiymati” usuli bilan, shartnomaviy joriy narxini aniqlash boʻyicha metodik tavsiyalarni, narxlarni shakllantirishni yanada takomillashtirish, qurilishni tashkil etish va kapital qurilishda yangi texnologiyalarni joriy etish boʻyicha normativ-metodik hujjatlarni ishlab chiqish va joriy etishda qatnashish;

qurilishda va qurilish materiallari, buyumlari va konstruksiyalari sanoatida narxlar shakllanishiga taʼsir qiluvchi omillarni toʻplash, tahlil qilish, ularni qayta ishlash va umumlashtirish;

qurilish ishlariga va tayyor qurilish mahsulotiga narxlar, yuklarni tashishga tariflar, materiallarni tashish shartlari va masofalarining oʻzgarishi monitoringini olib borish va tahlil qilish;

mahalliy tayyorlovchi zavodlar tomonidan ishlab chiqarilayotgan qurilish materiallari, buyumlari va konstruksiyalarining narxi toʻgʻrisidagi maʼlumotlarni toʻplash;

narxlarni shakllantirish boʻyicha yangi smeta normativlarini yaratish uchun boshlangʻich axborotlarni toʻplash va dastlabki tahlil qilish;

kapital qurilish, loyihalashtirish va qiymatni aniqlash yuzasidan kompleks masalalar boʻyicha vazirliklar, idoralar va xoʻjalik birlashmalariga, shuningdek yuridik va jismoniy shaxslarga, shu jumladan xorijiy yuridik va jismoniy shaxslarga konsalting xizmatlari koʻrsatish;