Oʻzbekiston Respublikasi Vazirlar Mahkamasining “Isteʼmolchilar huquqlarini himoya qilishda jamoatchilik ishtirokini kengaytirish chora-tadbirlari toʻgʻrisida” 2002-yil 28-noyabrdagi 414-son qaroriga muvofiq Vazirlar Mahkamasi qaror qiladi:

Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

1. Vazirlar Mahkamasining 1997-yil 22-iyuldagi 368-son qarori bilan tasdiqlangan Narxlarni boshqarish jamgʻarmasi toʻgʻrisidagi nizomning III boʻlimi ikkinchi xatboshi “15 foizdan tashqari” soʻzlaridan keyin “hamda isteʼmolchilar huquqlarini himoya qilish toʻgʻrisidagi qonun hujjatlari buzilganligi uchun solinadigan va Isteʼmolchilar huquqlarini himoya qilish jamiyatlari federatsiyasi huzuridagi Isteʼmolchilar huquqlarini himoya qilish ijtimoiy harakatini rivojlantirishni qoʻllab-quvvatlash jamgʻarmasiga oʻtkaziladigan jarimalarning 42,5 foizidan” soʻzlari bilan toʻldirilsin.

2. Vazirlar Mahkamasining 1998-yil 26-avgustdagi 370-son qarori bilan tasdiqlangan Isteʼmolchilar huquqlarini himoya qilish toʻgʻrisidagi qonun hujjatlari buzilganligi uchun monopoliyaga qarshi faoliyatni amalga oshiruvchi davlat organi tomonidan solinadigan jarimalarni xoʻjalik yurituvchi subyektlarga qoʻllash tartibida:

3-band quyidagi tahrirda bayon qilinsin:

“3. Monopoliyaga qarshi faoliyatni amalga oshiruvchi davlat organi (Oʻzbekiston Respublikasi Davlat monopoliyadan chiqarish va raqobatni rivojlantirish davlat qoʻmitasi) isteʼmolchilar huquqlarini himoya qilish toʻgʻrisidagi qonun hujjatlarining quyidagi buzilishlari uchun ishlab chiqaruvchiga, ijrochiga va sotuvchiga:

a) yaroqlilik muddati oʻtib ketgan yoki qonun hujjatlarida yaroqlilik muddatlari majburiy ravishda koʻrsatilishi belgilangan tovarlarni sotish uchun qabul qilganlik va sotganlik uchun eng kam oylik ish haqining besh yuz baravari miqdorida;

b) tovarning sotib olinganligini yoki ishning haqi toʻlanganligini tasdiqlovchi, tovar (ish, xizmat)ning bahosi haqidagi maʼlumot koʻrsatilgan kassa va tovar cheklari hamda boshqa hujjatlar isteʼmolchiga berilmasdan tovarlar sotilganligi yoki xizmatlar koʻrsatilganligi uchun eng kam oylik ish haqining yuz baravari miqdorida;

v) isteʼmolchilar huquqlarining quyidagi buzilishlarini bartaraf etish toʻgʻrisidagi yozma koʻrsatmalarni bajarishdan boʻyin tovlangan yoki ular oʻz vaqtida bajarilmagan hollarda:

ishlab chiqaruvchi (ijrochi, sotuvchi) toʻgʻrisidagi zarur axborot, tovar (ish, xizmat) toʻgʻrisidagi axborot mavjud emasligi, shuningdek tovarni almashtirish tartibi va shartlari bajarilmaganligi uchun eng kam oylik ish haqining yetmish baravari miqdorida;

tovar (ish, xizmat) toʻgʻrisida ishonchli boʻlmagan yoki yetarlicha toʻliq boʻlmagan axborot berilganligi, kafolat muddati belgilanadigan tovarlar kafolat majburiyatlarisiz sotilganligi va tovarlarning ayrim turlarini sotish (xizmatlar koʻrsatish)ning belgilangan tartibda tasdiqlanadigan tartibi talablari buzilishining boshqa hollari uchun eng kam oylik ish haqining ellik baravari miqdorida jarima solishga haqlidir”;

6-band quyidagi tahrirda bayon qilinsin:

“6. Qonun hujjatlariga muvofiq oʻz tekshirishlari va monitoringlar materiallari, isteʼmolchilar, isteʼmolchilar huquqlarini himoya qilish jamiyatlari, ommaviy axborot vositalari, xoʻjalik yurituvchi subyektlar, davlat boshqaruvi organlari, joylardagi davlat hokimiyati organlarining arizalari isteʼmolchilarning huquqlarini himoya qilish hamda reklama toʻgʻrisidagi qonun hujjatlari buzilganligi toʻgʻrisidagi ishni koʻrib chiqishi asos hisoblanadi.

Monopoliyaga qarshi faoliyatni amalga oshiruvchi davlat organining mansabdor shaxsi isteʼmolchilarning huquqlarini himoya qilish va reklama toʻgʻrisidagi qonun hujjatlari buzilganligi haqidagi ishni koʻrib chiqadi va qaror chiqaradi, unda quyidagilar koʻrsatiladi:

qaror chiqarilgan sana;

qarorni chiqargan mansabdor shaxsning familiyasi, ismi, otasining ismi;

xoʻjalik yurituvchi subyekt nomi;

qonun buzilish turi;

qonun buzilganligi uchun javobgarlikni nazarda tutuvchi normativ hujjatga havola;

jarimaning aniq miqdori, shikoyat qilish tartibi, toʻlov muddati.

Oʻz tekshirishlari natijalari koʻrib chiqilganda shuningdek xoʻjalik yurituvchi subyektni tekshirish dalolatnomasining tartib raqami va sanasi koʻrsatiladi.

Qaror yozma shaklda chiqariladi va ushbu qarorni qabul qilgan mansabdor shaxs tomonidan imzolanadi”.

3. Vazirlar Mahkamasining 1999-yil 14-yanvardagi 18-son qarori bilan tasdiqlangan Oʻzbekiston Respublikasi Sogʻliqni saqlash vazirligi toʻgʻrisidagi nizomda:

7-band quyidagi tahrirdagi xatboshi bilan toʻldirilsin:

“isteʼmolchilarning huquqlari va manfaatlarini himoya qilish uchun jamoatchilikni jalb etish;

8-band quyidagi tahrirdagi oʻn yettinchi va oʻn sakkizinchi xatboshi bilan toʻldirilsin:

“isteʼmolchilarning huquqlarini himoya qilish, sanitariyaga oid qonun hujjatlari, davlat standartlari va sertifikatlash qoidalari talablarini tekshirish ishlariga isteʼmolchilar jamoat tashkilotlari vakillarini jalb etadi;

isteʼmolchilarning jamoat tashkilotlari taqdimnomalariga koʻra oʻziga qarashli laboratoriyalarda tovarlarning (ishlar, xizmatlarning) xavfsizlik talablariga muvofiqligini shartnoma asosida sinovdan oʻtkazadi”.