Bozor munosabatlariga oʻtish sharoitida sanoat va xoʻjalik qurilishi boshqaruvini tashkil qilish samaradorligini oshirish, qurilish tashkilotlari va korxonalarining ishlab chiqarish quvvatini kuchaytirish, ularning iqtisodiy mustaqilligini kengaytirish, investitsiya dasturlarini amalga oshirish chogʻida tashabbuskorlik va tadbirkorlikni rivojlantirish maqsadida:

1. Oʻzbekiston Respublikasining Qurilish vazirligi tugatilsin.

Tugatilayotgan vazirlik tarkibiga kirgan pudrat va ixtisoslashtirilgan qurilish trestlarining, ishlab chiqarish birlashmalari va korxonalarining ixtiyoriylik asosida Oʻzbekiston sanoat va xoʻjalik qurilishi (“Oʻzsanoatxoʻjalikqurilish”) davlat korporatsiyasi tashkil etish toʻgʻrisidagi taklifi qabul qilinsin.

2. Belgilab qoʻyilsinki, Oʻzbekiston sanoat va xoʻjalik qurilishi davlat korporatsiyasi:

sanoat va xoʻjalik inshootlari qurilishini taʼminlaydigan barcha mulkchilik shaklidagi qurilish tashkilotlarini, binokorlik sanoati korxonalarini, transport, loyiha-konstruktorlik tashkilotlari hamda ixtisoslashtirilgan boshqa tashkilotlarni aksionerlik qoidalari asosida ixtiyoriy ravishda birlashtiradi;

yuridik shaxs hisoblanadi va oʻz faoliyatini Oʻzbekiston Respublikasining amaldagi qonunlari, Vazirlar Mahkamasi tasdiqlaydigan korporatsiya Ustavi asosida amalga oshiradi;

Oʻzbekiston Respublikasining Qurilish vazirligi ilgari tuzgan barcha shartnomalar va qabul qilgan majburiyatlar boʻyicha javobgar boʻladi;

bevosita korporatsiya tarkibiga kiruvchi birlashmalar, korxonalar va tashkilotlarning davlat mulkini boshqaradi, ularni davlat tasarrufidan chiqarish va xususiylashtirishda belgilangan tartibda ishtirok etadi.

3. Quyidagilar “Oʻzsanoatxoʻjalikqurilish” korporatsiyasi faoliyatining asosiy vazifalari etib belgilansin:

sanoat va xoʻjalik inshootlarini barpo etish hamda ularni qayta qurish boʻyicha korporatsiyaga kirgan kompaniyalar, korxonalar va tashkilotlarning faoliyatini muvofiqlashtirish;

investitsiya sohasida yagona ilmiy-texnikaviy va normativ siyosatni oʻtkazish, investitsiya siklining tubdan qisqarishini taʼminlaydigan qurilish hamda binokorlik konstruksiyalari tayyorlash yangi texnologiyalarini ishlab chiqish;

inshootlarni loyihalash va qurish masalalarida ilgʻor tajribani oʻrganish va yoyish;

qurilish mashinalari, mexanizmlarini, transport vositalari hamda maxsus uskunalarni ishlab chiqish, foydalanish va taʼmirlashni tashkil etish;

investitsiya sohasida bozor munosabatlarini keng joriy etish, pudrat ishlari bozorini vujudga keltirish, qurilish ishlarini boshqarishning ilgʻor, iqtisodiy usullariga oʻtish, davlatga qarashli pudrat qurilish tashkilotlarini, hamda qurilish sanoati korxonalarini boshqa mulkchilik shakllariga aylantirish borasidagi chora-tadbirlarni amalga oshirish;

binokorlik materiallari va konstruksiyalarini, asbob-uskunalar, butlovchi buyumlarni yetkazib beruvchilar bilan bevosita shartnomaviy munosabatlarni oʻrnatishda korporatsiya tarkibiga kirgan korxonalar va tashkilotlarga koʻmaklashish, eng muhim xalq xoʻjaligi inshootlari qurilishini belgilangan tartibda maʼlum miqdorlarda ajratib beriladigan moddiy-texnika resurslari bilan taʼminlash;

korporatsiyaga kirgan korxonalar va tashkilotlar tadbirkorlik faoliyati hamda tashqi iqtisodiy faoliyatni amalga oshirishlarida, xorijiy sheriklar va Mustaqil Davlatlar Hamdoʻstligi mamlakatlaridagi korxonalar bilan qoʻshma korxonalar barpo etishda ularga amaliy yordam berish.

4. Oʻzbekiston Respublikasi Prezidenti huzuridagi Vazirlar Mahkamasi 10 kun muddat ichida Oʻzbekiston sanoat va xoʻjalik qurilishi (“Oʻzsanoatxoʻjalikqurilish”) davlat korporatsiyasini tashkil etish va uning faoliyati masalalariga oid qarorni qabul qilib, korporatsiyaning tuzilmasi va Ustavini tasdiqlasin.