Hozirgi vaqtda mazkur hujjatga o‘zgartirish kiritilmoqda

Hujjat 21.04.2014 00 sanasi holatiga
Amaldagi versiyaga o‘tish

Oʻzbekiston Respublikasi Vazirlar Mahkamasining

Nodavlat telekoʻrsatuvlar va radioeshittirishlar obyektlarini qoʻriqlash, muhofaza qilish hamda ularning xavfsiz faoliyat koʻrsatishi qoidalarini tasdiqlash toʻgʻrisida

Telekoʻrsatuvlar va radioeshittirishlar obyektlarining xavfsiz faoliyat koʻrsatishini taʼminlash, teleradio dasturlarining efirga ruxsatsiz chiqarilishi imkoniyatlarini istisno etish maqsadida Vazirlar Mahkamasi qaror qiladi:

1. Telekoʻrsatuvlar va radioeshittirishlar obyektlarini qoʻriqlash, muhofaza qilish hamda ularning xavfsiz faoliyat koʻrsatishi qoidalari ilovaga muvofiq tasdiqlansin.

2. Elektron ommaviy axborot vositalari milliy assotsiatsiyasi hamda nodavlat teleradiokompaniyalari bir oy muddatda nodavlat telekoʻrsatuvlar va radioeshittirishlar obyektlarini ushbu qaror bilan tasdiqlangan Telekoʻrsatuvlar va radioeshittirishlar obyektlarini qoʻriqlash, muhofaza qilish hamda ularning xavfsiz faoliyat koʻrsatishi qoidalari talablariga muvofiqlashtirsinlar.

3. Oʻzbekiston Respublikasi Ichki ishlar vazirligi Oʻzbekiston milliy teleradiokompaniyasi, Aloqa, axborotlashtirish va telekommunikatsiya texnologiyalari davlat qoʻmitasi, Aloqa, axborotlashtirish va telekommunikatsiya texnologiyalarini nazorat qilish davlat inspeksiyasi, Elektron ommaviy axborot vositalari milliy assotsiatsiyasi bilan birgalikda uch oy muddatda nodavlat telekoʻrsatuvlar va radioeshittirishlarning barcha obyektlari qoʻriqlanishi, xavfsiz faoliyat koʻrsatishi va ularning yongʻin xavfsizligi taʼminlanishi holati yuzasidan tekshirish oʻtkazsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Respublikasi Vazirlar Mahkamasining Axborot tizimlari va telekommunikatsiyalar masalalari kompleksi rahbari zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2014-yil 14-aprel,

92-son

Vazirlar Mahkamasining 2014-yil 14-apreldagi 92-son qaroriga
ILOVA

Telekoʻrsatuvlar va radioeshittirishlar obyektlarini qoʻriqlash, muhofaza qilish hamda ularning xavfsiz faoliyat koʻrsatishi

QOIDALARI

I. Umumiy qoidalar

1. Ushbu Qoidalar nodavlat telekoʻrsatuvlar va radioeshittirishlar obyektlari qoʻriqlanishi, muhofaza qilinishi va ularning xavfsiz faoliyat koʻrsatishini taʼminlash tartibini belgilaydi.

2. Qoidalar nodavlat telekoʻrsatuvlar va radioeshittirishlarning barcha obyektlariga tatbiq etiladi hamda ularning oʻz faoliyatini belgilangan tartibda olingan litsenziyalar asosida Oʻzbekiston Respublikasi hududida teleradio dasturlarni shakllantirish va tarqatish sohasida amalga oshiruvchi mulkchilikning nodavlat shaklidagi yuridik shaxslar tomonidan bajarilishi majburiydir.

LexUZ sharhi

Qarang: Vazirlar Mahkamasining 2022-yil 21-fevraldagi 80-sonli “Maxsus elektron tizim orqali ayrim faoliyat turlarini litsenziyalash tartibi toʻgʻrisidagi yagona nizomni tasdiqlash haqida”gi qarori.

3. Ushbu Qoidalarda quyidagi atamalar va taʼriflardan foydalaniladi:

nodavlat telekoʻrsatuvlar va radioeshittirishlar subyekti — qonun hujjatlarida belgilangan tartibda telekoʻrsatuvlar va radioeshittirishlarni tarqatish (uzatish, qayta uzatish) boʻyicha faoliyatni amalga oshirish uchun vakolatli organning litsenziyasiga ega boʻlgan yuridik shaxs;

Keyingi tahrirga qarang.

nodavlat telekoʻrsatuvlar va radioeshittirishlar obyekti — nodavlat telekoʻrsatuvlar va radioeshittirishlar subyektining maʼmuriy va texnik maqsaddagi obyekti (binolari, inshootlari va alohida xonalari);

kirish cheklangan bino — nodavlat telekoʻrsatuvlar va radioeshittirishlar obyektining teleradio uzatuvchi apparatlar, kabel televideniye studiyasi joylashgan, shuningdek tele- va radio dasturlarni toʻgʻridan-toʻgʻri uzatish imkoniyatiga ega boʻlgan tele-, radio dasturlar, efirga chiqish studiyalari, ovoz yozish va video yozuvlar studiyalari shakllantiriladigan xonasi;

efirga chiqish studiyasi — yozuvlarni amalga oshirish va tele- va radio dasturlarni toʻgʻridan-toʻgʻri uzatish uchun texnik xona;

ovoz yozish va video yozuvlar studiyasi — telekoʻrsatuvlar va radioeshittirishlar uchun ovoz yozish va video yozuvlarni amalga oshirish uchun texnik xona;

kabel televideniye studiyasi — erkin koʻrib boʻlmaydigan, faqat kabel televizion kanallardan foydalangan holda muayyan hududda tele-, radio dasturlar va elektr aloqasining boshqa xabarlari shakllantiriladigan va tarqatiladigan bino.

II. Nodavlat telekoʻrsatuvlar va radioeshittirishlar obyektlarini qoʻriqlash

4. Nodavlat telekoʻrsatuvlar va radioeshittirishlar obyektlari ham oʻz mulki boʻlgan hududlar va binolarda, ham ijaraga beruvchilarning binolarida yoki qonun hujjatlariga muvofiq xoʻjalik yurituvchi subyektlar tomonidan foydalaniladigan boshqa mulkdorlarning binolarida joylashishi mumkin.

Keyingi tahrirga qarang.

5. Nodavlat telekoʻrsatuvlar va radioeshittirishlar obyektlari belgilangan tartibda Ichki ishlar vazirligi huzuridagi “Qoʻriqlash” respublika birlashmasiga qoʻriqlash uchun berilishi, kirish cheklangan xonalari majburiy tartibda ichki ishlar organlari huzuridagi texnik qoʻriqlash va harakat qilish punktlari (PTOR)ga qoʻriqlash uchun topshirilishi kerak.

Keyingi tahrirga qarang.

6. Kirish cheklangan xonaning tashqi kirish eshigi koʻrish koʻzchasi yoki videodomofon oʻrnatilgan yaxlit metalldan yasalgan, shuningdek bittasi kodli boʻlgan kamida ikkita oʻyma qulfli boʻlishi kerak. Xonada qoʻriqlash postiga va PTORga trevoga signali beruvchi qoʻriqlash hamda yongʻin signalizatsiyasi mavjud boʻlishi zarur.

7. Nodavlat telekoʻrsatuvlar va radioeshittirishlar obyektlariga tutash hudud, kirish cheklangan bino va xonalarga kirish joylari kirish cheklangan binoda tasvir monitorda navbatchi xodim tomonidan koʻriladigan va yozuv kamida bir hafta saqlanadigan videokuzatuv tizimi bilan jihozlangan boʻlishi kerak.

8. Nodavlat telekoʻrsatuvlar va radioeshittirishlar obyektlari binosining birinchi qavati xonalarining tashqi deraza oʻyiqlari, shuningdek kirish cheklangan xonalaridagi barcha deraza oʻyiqlari ichki tomondan kamida 15 mm diametrli simdan yasalgan va teshiklari koʻpi bilan 150 x 150 mm boʻlgan, devorga mahkamlangan metall shtirlarga kavsharlangan metall panjaralar bilan himoyalangan boʻlishi kerak.

9. Kirish cheklangan xona orqali tranzit quvurlar, havo kiritgichlar va boshqa kommunikatsiyalarni oʻtkazish qatʼiyan taqiqlanadi.

10. Nodavlat telekoʻrsatuvlar va radioeshittirishlar obyektlarining alohida joylashgan binolari hududi balandligi kamida ikki metrli beton yoki gʻisht toʻsiq bilan toʻsilgan va u toʻliq yoritilgan boʻlishi kerak.

Zarur hollarda, aholi punktlarining meʼmoriy koʻrinishini oʻzgartirishga cheklashlar mavjud boʻlgan taqdirda Milliy xavfsizlik xizmati, Ichki ishlar vazirligi, Oʻzbekiston Respublikasi Davlat yongʻin xavfsizligi xizmati organlari bilan kelishilgan holda beton va gʻisht toʻsiqlarni dekorativ metall panjara devor bilan almashtirishga yoʻl qoʻyiladi.

Keyingi tahrirga qarang.

Nodavlat telekoʻrsatuvlar va radioeshittirishlar obyektlari hududiga va u toʻsib qoʻyilgan joyga nazorat qilinmaydigan kirish yoʻllari boʻlmasligi kerak.

11. Nodavlat telekoʻrsatuvlar va radioeshittirishlar obyekti uchun ushbu Qoidalarga ilovaga muvofiq roʻyxat boʻyicha maxsus hujjatlar ishlab chiqiladi.

Nodavlat telekoʻrsatuvlar va radioeshittirishlar obyektining maxsus hujjatlari uning rahbari tomonidan Oʻzbekiston Respublikasi Milliy xavfsizlik xizmati, Ichki ishlar vazirligi, Oʻzbekiston Respublikasi Davlat yongʻin xavfsizligi xizmati, Aloqa, axborotlashtirish va telekommunikatsiya texnologiyalari davlat qoʻmitasi hamda Favqulodda vaziyatlar vazirligi bilan kelishilgan holda tasdiqlanadi.

Keyingi tahrirga qarang.

12. Yongʻin, avariya yuz berganda va boshqa favqulodda vaziyatlarda obyekt boʻyicha navbatchi yoki Ichki ishlar vazirligi huzuridagi “Qoʻriqlash” respublika birlashmasi xodimi darhol yongʻin, avariya komandasini chaqiradi, nodavlat telekoʻrsatuvlar va radioeshittirishlar obyektining rahbariga va ijaraga beruvchiga, Ichki ishlar vazirligi, Milliy xavfsizlik xizmati boʻlinmalariga xabar beradi va ularni bartaraf etish chora-tadbirlarini koʻradi.

Keyingi tahrirga qarang.

13. Nodavlat telekoʻrsatuvlar va radioeshittirishlar obyektlariga hujum boʻlganda, ularni egallab olish uchun tahdid qilinganda yoki asbob-uskunalaridan ruxsat berilmagan tarzda foydalanishga urinilganda tasdiqlangan yoʻriqnomalar va sxemalar boʻyicha ularni ishdan chiqarish chora-tadbirlari koʻriladi.

III. Obyektga kiritish tartibi va uning ichki tartibi

14. Nodavlat telekoʻrsatuvlar va radioeshittirishlar obyektlarida kirish tartibi va obyektning ichki tartibi belgilanadi.

15. Obyektga kirish tartibi:

nazorat-kiritish punkti va ruxsatnomalar byurosi tashkil etilishini;

doimiy, vaqtinchalik va bir martalik ruxsatnomalar tizimi joriy etilishini;

xizmat xonalariga va kirish cheklangan xonalarga kirish huquqini beruvchi maxsus shifrlar va vkladishlar qoʻllanilishini;

ruxsatnomaning tegishli turini, vkladishlarni berishga, shifrlar qoʻyishga ruxsat berish huquqiga ega boʻlgan mansabdor shaxslarni belgilashni;

obyektga olib kirish taqiqlangan buyumlar va ashyolar roʻyxati belgilanishini;

keluvchilarni qabul qilish va ular bilan muzokaralar olib borish uchun joylar jihozlanishini taʼminlashi kerak.

16. Obyektning ichki tartibi:

ushbu obyektda ishlash uchun shaxslarni tanlash, oʻrganish va rasmiylashtirishning zarur tartibiga rioya qilinishini;

xizmat xonalariga va kirish cheklangan xonalarga kiritiladigan shaxslar roʻyxati belgilanishini;

bajaruvchilar oʻrtasida tartib talablarini tushuntirish, xushyorlikni oshirish va topshirilgan ish uchastkasi uchun javobgarlik boʻyicha ishlar olib borilishini;

favqulodda vaziyatlar yuz berganda obyektni ishga tayyorlash ishlari oʻtkazilishini va favqulodda vaziyatlar yuz berganda xatti-harakatlar belgilanishini;

texnologik uskunadan foydalanish mumkin emasligini taʼminlash yoki uni foydalanishdan chiqarish boʻyicha zarur chora-tadbirlarni nazarda tutuvchi obyekt xodimlarining xatti-harakatlari rejasi ishlab chiqilishini;

texnologik uskunani foydalanishdan chiqarish va uning u yoki bu elementlarini, ularsiz uning normal ishini tiklash mumkin boʻlmagan bloklarni yoʻq qilish uchun masʼul xodimlar roʻyxati belgilanishini;

ovoz yozish va efirga uzatish uchun foydalaniladigan texnika vositalari qoʻllanilishi nazorat qilinishini taʼminlashi kerak.

IV. Nodavlat telekoʻrsatuvlar va radioeshittirishlar obyektlarini tekshirish

17. Nodavlat telekoʻrsatuvlar va radioeshittirishlar obyektlari yoki kirish cheklangan xonalar foydalanishga topshirishdan oldin ushbu Qoidalar talablariga muvofiqlik yuzasidan Idoralararo komissiya tomonidan tekshiriladi.

18. Idoralararo komissiya nodavlat telekoʻrsatuvlar va radioeshittirishlar obyekti, Oʻzbekiston Respublikasi Milliy xavfsizlik xizmati, Ichki ishlar vazirligi, Oʻzbekiston Respublikasi Davlat yongʻin xavfsizligi xizmati, Milliy teleradiokompaniya boʻlinmalari, Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi, Aloqa, axborotlashtirish va telekommunikatsiya texnologiyalarini nazorat qilish davlat inspeksiyasi, shuningdek mahalliy davlat hokimiyati organi vakillaridan iborat tarkibda Oʻzbekiston Respublikasi Vazirlar Mahkamasi huzuridagi Axborot faoliyati va maʼlumotlar uzatishni takomillashtirish va samaradorligini oshirish idoralararo muvofiqlashtirish komissiyasining vakili rahbarligida shakllantiriladi.

Keyingi tahrirga qarang.

19. Komissiya tomonidan nodavlat telekoʻrsatuvlar va radioeshittirishlar obyektining ushbu Qoidalar talablariga muvofiqligi va yaroqliligi yuzasidan dalolatnoma tuziladi. Kamchiliklar aniqlangan taqdirda dalolatnomada ularni bartaraf etish muddatlari koʻrsatiladi. Tuzilgan dalolatnoma telekommunikatsiyalar sohasida litsenziyalash masalalari boʻyicha vakolatli organga taqdim etiladi.

V. Yakunlovchi qoidalar

20. Nodavlat telekoʻrsatuvlar va radioeshittirishlar obyekti rahbari ushbu Qoidalarga rioya etilishi yuzasidan javob beradi.

21. Ushbu Qoidalar buzilishida aybdor boʻlgan shaxslar qonun hujjatlariga muvofiq javob beradi.

Keyingi tahrirga qarang.

Telekoʻrsatuvlar va radioeshittirishlar obyektlarini qoʻriqlash, muhofaza qilish va ularning xavfsiz faoliyat koʻrsatishi qoidalariga
ILOVA

Nodavlat telekoʻrsatuvlar va radioeshittirishlar obyekti rahbari tomonidan tasdiqlanadigan maxsus hujjatlar

roʻyxati

1. Favqulodda vaziyatlar roʻy bergan taqdirda maʼmuriyat va xodimlarning xatti-harakatlari boʻyicha yoʻriqnoma.

2. Nodavlat telekoʻrsatuvlar va radioeshittirishlar obyekti boʻyicha navbatchining yoʻriqnomasi.

3. Kalitlarni topshirish va olish, barcha xonalarni qoʻriqlash uchun topshirish va ularni qoʻriqlashdan chiqarish, shuningdek favqulodda vaziyatlar roʻy bergan taqdirda ushbu xonalarni ochish boʻyicha yoʻriqnoma.

4. Favqulodda vaziyatlarda telekoʻrsatuvlar va radioeshittirishlarni, darhol toʻxtatish elektr taʼminotini uzib qoʻyish boʻyicha tegishli vakolatli tuzilmalar bilan oʻzaro hamkorlik qilish rejasi.

5. Favqulodda vaziyatlar roʻy bergan taqdirda nodavlat telekoʻrsatuvlar va radioeshittirishlar obyekti xodimlarini va mol-mulkini evakuatsiya qilish sxemasi va tartibi.

6. Obyektga kirish tartibini taʼminlash boʻyicha yoʻriqnoma.

7. Obyektning ichki tartibini taʼminlash boʻyicha yoʻriqnoma.

(Oʻzbekiston Respublikasi qonun hujjatlari toʻplami, 2014-y., 16-son, 180-modda; 2015-y., 26-son, 338-modda; Qonun hujjatlari maʼlumotlari milliy bazasi, 23.04.2018-y., 09/18/297/1096-son, 01.06.2018-y., 09/18/396/1287-son; 11.07.2019-y., 09/19/568/3403-son; Qonunchilik maʼlumotlari milliy bazasi, 05.04.2022-y., 09/22/153/0266-son; 16.12.2025-y., 09/25/791/1167-son)