Kimyo sanoatida ishlarni barqarorlashtirish, ishlab chiqarish quvvatlaridan yanada toʻliq foydalanish va investitsiya jarayonlarini faollashtirish maqsadida Vazirlar Mahkamasi qaror qiladi:

1. “Oʻzkimyosanoat” uyushmasining xoʻjaliklarga tegishli firmalar, savdo uylari, servis markazlari tashkilotlari tashkil etish orqali, shuningdek “Oʻzagrokimyoservis” davlat-aksionerlik uyushmasi korxonalari, tashkilotlari orqali shartnoma asosida mineral oʻgʻitlar va oʻsimliklarni himoya qilishning kimyoviy vositalari sotish boʻyicha ular bilan toʻgʻridan-toʻgʻri oʻzaro foydali aloqalar oʻrnatish toʻgʻrisidagi taklifi qoʻllab-quvvatlansin.

2. Moliya vazirligi 1995-yilning birinchi yarim yilida Respublika valyuta jamgʻarmasidan jami 10,764 mln AQSh dollari miqdorida kreditlar, shu jumladan:

fosforli oʻgʻitlar ishlab chiqaruvchi korxonalarni jadal kapital tuzatishni amalga oshirish uchun “Oʻzkimyosanoat” uyushmasi korxonalariga 5 yil muddat bilan 8,6 mln AQSh dollari;

“Foskarat” qoʻshma korxonasining ustav fondiga badal sifatida qoʻshish uchun Olmaliq “Ammofos” ishlab chiqarish birlashmasiga va Samarqand kimyo zavodiga 1995-yil oxirigacha toʻlash muddati bilan, yiliga 7 foizli foyda stavkasi boʻyicha 2,164 mln AQSh dollari ajratsin. Kreditni oʻz vaqtida toʻlash uchun Olmaliq “Ammofos” ishlab chiqarish birlashmasi va Samarqand kimyo zavodi 1995-yilda ammofos eksport qilish miqdorini 65 ming tonnaga (tegishli ravishda 40 ming tonna va 25 ming tonna) koʻpaytirsin. “Oʻzistiqbolstat” davlat qoʻmitasi, Tashqi iqtisodiy aloqalar vazirligi 1995-yilgi eksport koʻrsatkichlariga oʻzgartirish kiritsin.

3. “Oʻzkimyosanoat” uyushmasi korxonalariga “Oʻzkimyosanoat” uyushmasining ilmiy-tadqiqot va konstruktorlik ishlari tarmoq jamgʻarmasiga tovar mahsulot (ishlar, xizmatlar) tannarxining 1 foizi miqdorida mablagʻ ajratishga, ushbu chiqimlarni ishlab chiqarish xarajatlariga qoʻshishga ruxsat etilsin.

4. Mehnat vazirligi “Oʻzkimyosanoat” uyushmasi bilan birgalikda bir oy muddatda uyushma korxonalari uchun mehnatga haq toʻlash boʻyicha Yagona tarif setkasining oshirilgan tarmoq koeffitsiyentlarini ishlab chiqsin va tasdiqlasin.

5. Oʻzbekiston Respublikasi Davlat soliq qoʻmitasi chetdan keltiriladigan buyurtmachi tomonidan berilgan hamda tolling usulida mis hamda rux xom ashyosidan ishlab chiqariladigan mahsulotlarni Oʻzbekiston Respublikasining bojxona chegarasidan litsenziyasiz tashib ketish toʻgʻrisidagi Vaqtinchalik nizomning amal qilishini:

buyurtmachining xom ashyosidan ishlab chiqarilgan fosforli oʻgʻitlarga;

shuningdek qayd etilgan nizom qoidalarining qayta ishlash uchun xom ashyoni vaqtinchalik tashib keltirishni va chetdan keltiriladigan kompensatsiya tovarlarini bojxona rasmiylashtiruviga oid qismini buyurtmachining xom ashyosidan ishlab chiqarilgan kaprolaktamga joriy etsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Y.F. Paygin zimmasiga yuklansin.