Maxsus industrial zonalar qatnashchilariga yer uchastkalari berishning yagona tartibini belgilash va ularning huquqlarini himoya qilishni taʼminlash maqsadida Vazirlar Mahkamasi qaror qiladi:

1. Maxsus industrial zonalar qatnashchilariga yer uchastkalari berish tartibi toʻgʻrisidagi nizom ilovaga muvofiq tasdiqlansin.

2. Hududida maxsus industrial zonalar tashkil etiladigan viloyatlar hokimliklari, vazirliklar va idoralar maxsus industrial zonalar qatnashchilariga yer uchastkalari berish boʻyicha materiallarni kelishish va rasmiylashtirishni belgilangan muddatlarda taʼminlasinlar.

3. Toshkent, Jizzax va Sirdaryo viloyatlari hokimliklari hamda “Yergeodezkadastr” davlat qoʻmitasi uch oy muddatda “Angren” maxsus industrial zonasi va “Jizzax” maxsus industrial zonasi hududida qishloq xoʻjaligi ekin maydonlarining sifatini belgilagan holda turar joylar, binolar, inshootlar va koʻp yillik dov-daraxtlarning dastlabki qiymatini belgilasinlar.

4. Vazirlar Mahkamasining “Angren” maxsus industrial zonasi faoliyatini tashkil etish chora-tadbirlari toʻgʻrisida” 2012-yil 29-maydagi 146-son qarorining 3-bandi beshinchi xatboshidagi (Oʻzbekiston Respublikasi QT, 2012-y., 5-son, 35-modda) “va” hamda “yer uchastkalaridan foydalanish toʻgʻrisida” soʻzlari chiqarib tashlansin.

5. Ushbu qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom Oʻzbekiston Respublikasi Prezidentining farmonlariga va boshqa qarorlariga muvofiq tashkil etiladigan maxsus industrial zonalar (keyingi oʻrinlarda MIZ deb ataladi) qantashchilariga yer uchastkalari berishning maxsus huquqiy rejimi va tartibini belgilaydi.

2. Ushbu Nizom maqsadlari uchun quyidagi tushunchalardan foydalaniladi:

MIZning maʼmuriy kengashi — Oʻzbekiston Respublikasi Prezidentining farmonlari bilan MIZ faoliyatini muvofiqlashtirish va davlat tomonidan tartibga solish funksiyalarini amalga oshiruvchi davlat va xoʻjalik boshqaruvi organlari vakillaridan tuziladigan kollegial organ;

MIZ direksiyasi — MIZ faoliyatini tezkor boshqarish uchun tashkil etiladigan davlat unitar korxonasi shaklidagi yuridik shaxs;

investor — belgilangan tartibda tanlovdan oʻtgan va MIZ hududida investitsiyalashni amalga oshiruvchi investitsion faoliyat subyekti;

MIZ hududida investitsiyalash toʻgʻrisidagi bitim (keyingi oʻrinlarda investitsiyalash toʻgʻrisidagi bitim deb ataladi) — Direksiya va investor oʻrtasida tuziladigan va ularning huquqlari, majburiyatlari va javobgarligini belgilaydigan bitim;

MIZ qatnashchisi — belgilangan tartibda MIZ hududida roʻyxatdan oʻtkazilgan va Direksiya tomonidan MIZ qatnashchilari reyestriga kiritilgan xoʻjalik yurituvchi subyekt;

yer uchastkasidan foydalanish toʻgʻrisidagi shartnoma — tegishli viloyat hokimligi bilan MIZ qatnashchilari oʻrtasida tuziladigan MIZ hududida yer uchastkasidan muddatli foydalanish toʻgʻrisidagi shartnoma.

3. MIZ tarkibiga kiritiladigan yer uchastkalari chegaralari Oʻzbekiston Respublikasi Prezidentining farmonlariga muvofiq belgilanadi.

MIZ hududidagi yer uchastkalari hududida MIZ tashkil etiladigan viloyatlar hokimliklarining toʻgʻridan toʻgʻri yurituvida boʻladi va MIZ maʼmuriy kengashlari qarorlari asosida tegishli viloyatlar hokimlari tomonidan MIZ qatnashchilariga beriladi.

4. MIZ hududida meʼmoriy va shaharsozlik faoliyati qurilishning dastlabki rejalariga yoki belgilangan tartibda tasdiqlangan MIZni rivojlantirishning bosh rejalariga muvofiq amalga oshiriladi.

5. MIZ qatnashchilariga yer uchastkalari Oʻzbekiston Respublikasi Prezidentining farmonlari va boshqa qarorlari bilan belgilanadigan MIZ faoliyat koʻrsatishi davrida 30 yilgacha muddatga muddatli foydalanish uchun beriladi.

MIZ qatnashchilariga MIZning faoliyat koʻrsatish muddati tegishli muddatga uzaytirilganda yer uchastkasidan muddatli foydalanish muddatini uzaytirish huquqi beriladi.

MIZ qatnashchisi maqomini olgan va dastlabki qurilish rejasiga yoki MIZni rivojlantirishning bosh rejasiga muvofiq MIZning maʼmuriy kengashi qarori bilan korxonasi joylashtirish uchun joy berilgan tadbirkorlik subyektiga yer uchastkasini berish rad etilishiga yoʻl qoʻyilmaydi.

6. MIZ qatnashchilarining korxonalarini joylashtirish qurilishning dastlabki rejalariga yoki MIZni rivojlantirishning bosh rejalariga muvofiq investitsiya qoʻyish toʻgʻrisida bitimlar tuzilgan taqdirda MIZning maʼmuriy kengashlari tomonidan amalga oshiriladi.

Birinchi navbatda MIZ qatnashchilarining korxonalari qurilish uchun zarur boʻlgan oʻlchamda yer uchastkasi ajratilgan holda sanoat zonalarining foydalanilmayotgan hududida joylashtiriladi.

7. Yer uchastkalari ajratish haqidagi materiallarni tayyorlash, shu jumladan vakolatli organlar va tashkilotlarda kelishish ishlari yer uchastkalari ajratilayotgan MIZ qatnashchilarining mablagʻlari hisobiga MIZning maʼmuriy kengashlari bilan kelishilgan baholar boʻyicha tegishli viloyatning xoʻjalik hisobidagi yer tuzish va koʻchmas mulk kadastri xizmati tomonidan shartnoma asosida bajariladi.

8. Investor MIZ direksiyasi bilan birgalikda qurilishning dastlabki rejasiga yoki MIZni rivojlantirishning bosh rejasiga muvofiq MIZ hududida joylashtiriladigan korxonaning joylashadigan joyini oʻrganadi va belgilaydi.

9. MIZ qatnashchilari obyekt qurilishi uchun yer uchastkasi ajratish toʻgʻrisida tegishli viloyat hokimining nomiga arizani tayyorlaydi. Arizada yer uchastkasi qanday maqsadlar uchun va qanday muddatga zarurligi, u joylashgan joy va talab etiladigan joy asoslangan holda yer uchastkasi oʻlchamlari, yuridik shaxsning pochta manzili, rekvizitlari yoki jismoniy shaxsning pasportiga oid maʼlumotlar koʻrsatiladi.

MIZ qatnashchilari tayyorlangan arizani MIZ direksiyalariga taqdim etadilar. MIZ direksiyalari ariza olingan kundan boshlab bir ish kuni mobaynida uni oʻzining iltimosnomasi bilan birgalikda tegishli viloyat hokimiga va tegishli viloyatning xoʻjalik hisobidagi yer tuzish va koʻchmas mulk kadastri xizmatiga yuboradi. Iltimosnomaga MIZ maʼmuriy kengashining tanlangan yer uchastkasi joylashgan joy koʻrsatilgan holda qurilishning dastlabki rejasidan yoki MIZni rivojlantirishning bosh rejasidan nusxa koʻchirilgan holda korxonani joylashtirish toʻgʻrisidagi qarorining nusxasi (yoki qarordan koʻchirma) ilova qilinadi.

10. Viloyatning xoʻjalik hisobidagi yer tuzish va koʻchmas mulk kadastri xizmati yer uchastkasi ajratish boʻyicha materiallarni besh ish kuni mobaynida tayyorlaydi.

11. MIZ direksiyasi yer uchastkasini tanlash ishlarini bajarish davomida:

investitsiya buyurtmanomalaridan va MIZni rivojlantirishning bosh rejasidan kelib chiqib yangi investitsiya loyihalarini amalga oshirish uchun yer uchastkasi, shuningdek muhandislik-kommunikatsiya va transport infratuzilmasi obyektlarini tanlash boʻyicha takliflarni Iqtisodiyot vazirligiga, Moliya vazirligiga hamda Tashqi iqtisodiy aloqalar, investitsiyalar va savdo vazirligiga tayyorlaydi va ular keyinchalik takliflarni Maʼmuriy kengashning koʻrib chiqishi uchun kiritadilar;

yer uchastkasini investorga ajratish tadbirlarini oʻz vaqtida taʼminlash uchun investorlar tomonidan kiritiladigan investitsiya buyurtmanomalari asosida ular joylashtiriladigan joylar va yer uchastkalari oʻlchamlari koʻrsatilgan holda kelgusi yilda amalga oshirilishi nazarda tutilayotgan investitsiya loyihalari, shuningdek muhandislik-kommunikatsiya va transport infratuzilmasi obyektlari roʻyxatini viloyat hokimligi nomiga yuboradi;

tegishli viloyat hokimligiga loyiha investorining yer uchastkasi ajratish toʻgʻrisidagi buyurtmanomasi, shu jumladan MIZni rivojlantirishning bosh rejasini ishlab chiquvchi bilan kelishilgan hududning xaritasidan koʻchirma bilan birgalikda MIZ qatnashchisi maqomini berish toʻgʻrisida Maʼmuriy kengashning qarori loyihasini yuboradi.

12. Yer uchastkasi ajratish ishlarini bajarish davomida viloyatlarning xoʻjalik hisobidagi yer tuzish va koʻchmas mulk kadastri xizmatlari:

Maʼmuriy kengashning qarorlari va MIZ direksiyasi tomonidan yuborilgan materiallar asosida investitsiya loyihalari va muhandislik-kommunikatsiya infratuzilmasi obyektlari uchun ajratiladigan yer maydonining chegaralarini va umumiy maydonini aniqlaydi;

yer uchastkalari egalari, foydalanuvchilari, ijarachilari va mulkdorlarining tarkibini, shuningdek qishloq xoʻjaligi va boshqa ekin maydonlari turlarini aniqlaydi;

ajratiladigan yer uchastkasida binolar va inshootlar, turar joylar, shu jumladan oʻzboshimchalik bilan qurilgan turar joylar mavjudligini aniqlaydi;

qonun hujjatlarida belgilangan tartibda yer uchastkalari egalari, foydalanuvchilari, ijarachilari va mulkdorlaridan yer olib qoʻyilishi (sotib olinishi) munosabati bilan yuzaga keladigan ularning zararlari miqdorlarini aniqlaydi;

qishloq xoʻjaligi va oʻrmon yer maydonlari olib qoʻyilganda qonun hujjatlarida belgilangan tartibda qishloq xoʻjaligi va oʻrmon xoʻjaligi ishlab chiqarishining nobudgarchiligi miqdorini aniqlaydi;

ajratiladigan yer uchastkasida buziladigan binolar, inshootlar va turar joylar mavjud boʻlgan taqdirda ularning qiymatini aniqlash uchun baholash tashkilotlari jalb etiladi;

mavjud boʻlgan taqdirda yangi yer uchastkalari yoki kvartiralar olishni xohlovchilar koʻrsatilgan holda fuqarolarning koʻchiriladigan oilalari roʻyxatini tuzadi;

yer uchastkasini unumdor qilishning (qishloq, oʻrmon, baliqchilik xoʻjaligida yoki boshqa maqsadlarda foydalanish uchun), tuproqning unumdor qatlamini koʻchirib olishning zarurligi va yoʻnalishini aniqlaydi;

yer uchastkasining har bir egasi, foydalanuvchisi, ijarachisi va mulkdori bilan ulardan yerni olib qoʻyish (sotib olish)ga rozilik va uning shartlari toʻgʻrisidagi bayonnomalarni rasmiylashtiradi;

investitsiya loyihalari va muhandislik-kommunikatsiya infratuzilmasi obyektlari uchun yer uchastkalari ajratish boʻyicha materiallarni tayyorlaydi;

investitsiya loyihalari va muhandislik-kommunikatsiya infratuzilmasi obyektlari uchun ajratiladigan yer uchastkasi chegaralari chizmasini tuzadi.

Yer uchastkalari egalari, foydalanuvchilari va mulkdorlarining zararlari, shuningdek Oʻzbekiston Respublikasining Yer kodeksida nazarda tutilgan qishloq xoʻjaligi va oʻrmon xoʻjaligi nobudgarchiliklari tegishli viloyatlar hokimliklari tomonidan mahalliy budjet mablagʻlari hisobiga qoplanadi.

13. Materiallar yer uchastkasi ajratish dalolatnomasi bilan rasmiylashtiriladi, unda ushbu Nizomning 12-bandida sanab oʻtilgan maʼlumotlar aks ettiriladi. Dalolatnomaga:

yer uchastkalari egalari, foydalanuvchilari, ijarachilari va mulkdorlarining zararlari (mavjud boʻlganda) hisob-kitobi;

qishloq xoʻjaligi va oʻrmon ekin maydonlari olib qoʻyilganda qishloq xoʻjaligi va oʻrmon xoʻjaligi ishlab chiqarishi nobudgarchiliklari hisob-kitobi;

buziladigan binolar va inshootlarni (ular mavjud boʻlganda) baholash toʻgʻrisida baholash tashkilotining hisoboti;

oʻrmon xoʻjaligi korxonalaridan oʻrmon ekin maydonlari olib qoʻyilgan taqdirda ular tomonidan tuzilgan ajratiladigan yer uchastkasining texnik tekshiruvi dalolatnomasi;

yer egalari, foydalanuvchilari, ijarachilari va mulkdorlarining olib qoʻyiladigan (sotib olinadigan) yeri aks ettirilgan holda ajratiladigan yer uchastkasining chegaralari chizmasi ilova qilinadi.

14. Yer uchastkasi ajratish dalolatnomasi:

tegishli viloyatning arxitektura va qurilish bosh boshqarmasi, yer resurslari va davlat kadastri boshqarmasi, tabiatni muhofaza qilish qoʻmitasi, MIZni rivojlantirishning bosh rejasini ishlab chiquvchi, davlat sanitariya va yongʻin nazorati organlari bilan, yer uchastkasi sugʻoriladigan yerlarda joylashgan taqdirda — tegishli viloyatning qishloq va suv xoʻjaligi boshqarmasi bilan;

yer uchastkasi muhofaza qilinadigan tabiiy hududlar, suv muhofazasi va sanitariya-himoya zonalaridan, magistral quvurlar, temir yoʻl va avtomobil yoʻllari, elektr quvvati uzatish va aloqa liniyalari, madaniy meros obyektlarining qoʻriqlanadigan, suv muhofazasi va sanitariya-himoya zonalaridan, shuningdek chiqindilarni va boshqa zaharli moddalarni koʻmish joylaridan ajratilganda — ushbu hududlar va inshootlardan foydalanuvchi va ularni ishlatuvchi tashkilotlar bilan kelishiladi.

15. Yer uchastkasi ajratish dalolatnomasini kelishuvchi organlar va tashkilotlar materiallar olingan kundan boshlab uch ish kunidan kechikmay ularni koʻrib chiqadilar va oʻzlarining asoslangan xulosalarini tegishli viloyatning xoʻjalik hisobidagi yer tuzish va koʻchmas mulk kadastri xizmatiga taqdim etadilar.

16. Viloyatning xoʻjalik hisobidagi yer tuzish va koʻchmas mulk kadastri xizmati yer uchastkasi ajratish boʻyicha materiallarni viloyat hokimliklari huzurida tashkil etilgan viloyat yer uchastkalarini berish (realizatsiya qilish) masalalarini koʻrib chiqish boʻyicha komissiyasiga (keyingi oʻrinlarda viloyat Komissiyasi deb ataladi) quyidagi hujjatlarning asl nusxalarini:

belgilangan tartibda rasmiylashtirilgan yer uchastkasi chegaralari chizmasi bilan birgalikda yer uchastkasi ajratish dalolatnomasini;

ushbu Nizomning 14-bandida belgilangan tashkilotlar bilan yer uchastkasi ajratish boʻyicha materiallarni kelishishga doir hujjatlarni;

yangi yer uchastkalari va yoki kvartiralar olishni xohlovchilar koʻrsatilgan holda fuqarolarning koʻchiriladigan oilalari roʻyxatini, shuningdek turar joylari va boshqa imoratlari buzilishi kerak boʻlgan (ular mavjud boʻlganda) tegishli yuridik va jismoniy shaxslarning roʻyxatini;

yuridik yoki jismoniy shaxslardan olib qoʻyish (sotib olish) shartlarini ular bilan kelishish boʻyicha hujjatlarni kiritadi.

17. Yer uchastkasi ajratish dalolatnomasi uning kelishilganligi haqida vakolatli organlarning xulosalari ilova qilingan holda kiritilgan kundan boshlab uch ish kuni mobaynida viloyat Komissiyasi tomonidan koʻrib chiqiladi. Viloyat Komissiyasining xulosasi bayonnoma bilan rasmiylashtiriladi.

18. Tegishli viloyatning xoʻjalik hisobidagi yer tuzish va koʻchmas mulk kadastri xizmati viloyat Komissiyasining xulosasi asosida bir ish kuni mobaynida viloyat hokimining qarori loyihasini tayyorlaydi.

19. Viloyat hokimi bir ish kuni mobaynida taqdim etilgan materiallarni koʻrib chiqadi va MIZ qatnashchisiga yer uchastkasi ajratish toʻgʻrisida qaror qabul qiladi. Qarorda quyidagi masalalar aks ettirilishi kerak:

yer uchastkasi ajratilayotgan MIZ qatnashchisining nomi, qurilayotgan obyektning nomi, yer uchastkasini berish muddati, shuningdek yer uchastkalarining mulkdorlari, egalari, foydalanuvchilari va ijarachilari boʻyicha ekin maydonlari boʻyicha ajratiladigan yer uchastkasining umumiy maydoni, olib qoʻyiladigan qishloq xoʻjaligi ekin maydonlarining sifati (bonitet ballari);

yer uchastkalarining har bir egasiga, foydalanuvchisiga, ijarachisiga va mulkdoriga (mavjud boʻlganda) qoplanishi kerak boʻlgan zararlar miqdori;

qishloq xoʻjaligi va oʻrmon ekin maydonlari olib qoʻyilganda qishloq xoʻjaligi va oʻrmon xoʻjaligi ishlab chiqarishi nobudgarchiligi miqdori;

yer uchastkasini unumdor qilish zarurligi, ularni ular olib qoʻyilgan mulkdorlariga, egalariga, foydalanuvchilariga va ijarachilariga qaytarish shartlari (zarur boʻlganda);

tuproqning unumdor qatlamini koʻchirib olish zarurligi;

suv muhofazasi, ekologik, yongʻinga qarshi, sanitariya shartlari va talablari boshqa shartlar va talablar.

Viloyat hokimining yer uchastkasi ajratish toʻgʻrisidagi qaroriga uning tarkibiy qismi sifatida ajratiladigan yer uchastkasi chegaralari chizmasi ilova qilinadi.

20. Yer uchastkasi ajratish toʻgʻrisida qaror qabul qilingandan keyin bir ish kuni mobaynida ishlarni bajaruvchi, yer uchastkasi ajratiladigan MIZ qatnashchisi tomonidan imzolanadigan dalolatnoma rasmiylashtirilgan holda yer uchastkasining chegaralari naturaga koʻchiriladi, turdosh foydalanuvchilar, tuman (shahar) arxitektura va qurilish boʻlimi (boshqarmasi) hamda xoʻjalik hisobidagi yer tuzish va koʻchmas mulk kadastri xizmati rahbarlari bilan kelishiladi.

21. Yer uchastkasi chegaralari naturaga koʻchirilgandan keyin bir ish kuni mobaynida yer uchastkasi ajratish boʻyicha hujjatlar yigʻma jildi uch nusxada tuziladi, ularning bir nusxasi yer uchastkasi ajratish boʻyicha materiallar tayyorlash xarajatlari toʻlangandan keyin MIZ qatnashchisiga, shuningdek tuman arxitektura va qurilish boʻlimiga (boshqarmasiga) hamda yer resurslari va davlat kadastriga beriladi. Yer uchastkasi ajratish boʻyicha hujjatlarning asl nusxalari viloyatning xoʻjalik hisobidagi yer tuzish va koʻchmas mulk kadastri xizmatida saqlanadi.

22. Viloyat hokimining yer uchastkasi ajratish toʻgʻrisidagi qarori asosida viloyatning xoʻjalik hisobidagi yer tuzish va koʻchmas mulk kadastri xizmati tomonidan bir ish kuni mobaynida MIZ qatnashchisining yer uchastkasiga boʻlgan huquqi davlat roʻyxatidan oʻtkaziladi va yer uchastkasiga boʻlgan huquq davlat roʻyxatidan oʻtkazilganligi uchun roʻyxatdan oʻtkazish yigʻimi toʻlangandan keyin unga yer uchastkasiga boʻlgan huquq davlat roʻyxatidan oʻtkazilganligi toʻgʻrisidagi guvohnoma beriladi.

23. Yer uchastkasi ajratish materiallari rasmiylashtirilgandan keyin viloyat hokimi MIZ qatnashchisi bilan yer uchastkasidan foydalanish toʻgʻrisida shartnoma tuzadi.

Yer uchastkasidan foydalanish toʻgʻrisidagi shartnomada yer uchastkasidan foydalanish shartlari, yerdan foydalanish boʻyicha tomonlarning huquqlari va majburiyatlari, yer uchastkasiga boʻlgan huquqning toʻxtatilishi holatlari va tomonlarning xohishiga koʻra boshqa masalalar belgilanadi.

24. Yer uchastkasi ajratish boʻyicha materiallarni tayyorlashning umumiy muddati ishlarning oʻrtacha murakkabligida 16 kunni tashkil etadi.

MIZ qatnashchilariga yer uchastkalari berish sxemasi ushbu Nizomga ilovada keltiriladi.

25. MIZ direksiyasi bilan MIZ qatnashchisi oʻrtasida tuzilgan ishlamayotgan korxonalar va davlat mulki boʻlgan mol-mulkning oldi-sotdi shartnomasi asosida koʻrsatib oʻtilgan obyektlar bilan band boʻlgan hamda ekologik talablar va xavfsizlik normalari hisobga olingan holda asoslangan hisob-kitoblar boʻyicha ulardan foydalanish uchun zarur boʻlgan yer uchastkasidan muddatli foydalanish huquqi MIZ qatnashchisiga oʻtadi.

Yer uchastkasidan muddatli foydalanish huquqining oʻtishi MIZ direksiyasining taqdimnomasi boʻyicha uch ish kuni mobaynida viloyat hokimining yer uchastkasini oldingi yerdan foydalanuvchidan olib qoʻyish va MIZ qatnashchisiga berish toʻgʻrisidagi qarori bilan rasmiylashtiriladi.

26. Viloyat hokimining qarori asosida belgilangan tartibda MIZ qatnashchisining yer uchastkasiga boʻlgan huquqi davlat roʻyxatidan oʻtkaziladi va unga yer uchastkasiga boʻlgan huquq davlat roʻyxatidan oʻtkazilganligi toʻgʻrisidagi guvohnoma beriladi.

27. Tadbirkorlik subyekti MIZ qatnashchisi maqomidan mahrum etilgan taqdirda uning yer uchastkasidan muddatli foydalanish huquqi MIZ direksiyasining taqdimnomasi boʻyicha viloyat hokimining qarori bilan muddatidan oldin toʻxtatiladi.

28. Yer uchastkalaridan foydalanish boʻyicha qatnashchilar va MIZ direksiyalari oʻrtasidagi nizolar qonun hujjatlariga va yer uchastkasidan foydalanish toʻgʻrisidagi shartnomaga muvofiq hal etiladi.

29. Ushbu Nizomning buzilishida aybdor boʻlgan shaxslar qonun hujjatlariga muvofiq javob beradilar.