Kichik biznes, xususiy tadbirkorlik subyektlari va fermer xoʻjaliklarining eksport salohiyatini yanada kengaytirish, ularga zamonaviy, chet el bozorlarida raqobatdosh mahsulot ishlab chiqarishni koʻpaytirishda va uni eksportga chiqarishda zarur huquqiy, moliyaviy va tashkiliy yordam koʻrsatish, mamlakatimizning eksport qiluvchi tadbirkorlarini tashqi bozor konyunkturasi oʻzgarishlari xavf-xatarlaridan ishonchli himoya qilishni taʼminlash maqsadida:

1. Oʻzbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligining, Tashqi iqtisodiy faoliyat milliy banki, Oʻzbekiston Savdo-sanoat palatasi va Fermerlar kengashining Tashqi iqtisodiy faoliyat milliy banki huzurida respublika mintaqalarida hududiy filiallari, shuningdek xorijiy davlatlardagi vakolatxonalari boʻlgan Kichik biznes va xususiy tadbirkorlik subyektlarining eksportini qoʻllab-quvvatlash jamgʻarmasini tashkil etish toʻgʻrisidagi taklifi qabul qilinsin.

2. Quyidagilar Kichik biznes va xususiy tadbirkorlik subyektlarining eksportini qoʻllab-quvvatlash jamgʻarmasi faoliyatining asosiy vazifalari va yoʻnalishlari hisoblansin:

talab-ehtiyojga boʻlgan joriy va istiqboldagi konyunkturani oʻrganish yuzasidan tashqi bozorlarning chuqur marketing tadqiqotlarini oʻtkazish hamda mamlakatimizning kichik biznes, xususiy tadbirkorlik subyektlari va fermer xoʻjaliklari tomonidan ishlab chiqariladigan mahsulotni eksport qilish uchun potensial imkoniyatlarni aniqlash;

kichik biznes, xususiy tadbirkorlik subyektlari va fermer xoʻjaliklari ishlab chiqarayotgan mahsulotlarning assortimenti va turlarini tizimli asosda tahlil qilish, ularning tashqi bozorlardagi raqobatdoshlik darajasini aniqlash, tegishli maʼlumotlar bazasini shakllantirish, buning asosida eksportga ishlab chiqarilayotgan mahsulotning jahon va mintaqaviy bozorlardagi talab-ehtiyojga mos kelishini taʼminlashga qaratilgan takliflar ishlab chiqish;

kichik biznes, xususiy tadbirkorlik subyektlari va fermer xoʻjaliklarining mahsulotlarini tashqi bozorlarga chiqarishda, ehtimol tutilgan xaridorlarni izlashda, shartnomalarni tayyorlash va tuzishda, eksport operatsiyalarini amalga oshirishda, eksport qiluvchilarni ehtimol tutilgan xavf-xatarlardan ishonchli himoya qilishda, shuningdek, xorijiy mamlakatlarning qonunchiligi boʻyicha talab etiladigan zarur litsenziyalar, sertifikatlar hamda boshqa ruxsatnoma va yigʻimlarni olish va toʻlashda yuridik, moliyaviy va tashkiliy xizmatlar koʻrsatish;

kichik biznes, xususiy tadbirkorlik subyektlari va fermer xoʻjaliklarining chet ellardagi tender savdolaridagi ishtirokini kengaytirishga, shuningdek, yarmarkalar, “davra stollari” va boshqalarni tashkil etish yoʻli bilan mamlakatimiz tovar ishlab chiqaruvchilari bilan xorijiy xaridorlarning muloqotlarini tashkil etishga koʻmaklashish.

3. Belgilab qoʻyilsinki:

Kichik biznes va xususiy tadbirkorlik subyektlarining eksportini qoʻllab-quvvatlash jamgʻarmasi nodavlat muassasasi shaklidagi yuridik shaxs hisoblanadi;

Jamgʻarma faqat kichik biznes va xususiy tadbirkorlik subyektlari hamda fermer xoʻjaliklariga xizmat koʻrsatadi va yordam beradi;

Jamgʻarma Kengashi Jamgʻarmani boshqarish yuqori organi hisoblanadi, ijro etuvchi direksiya Jamgʻarmaning ijrochi organi va uning mablagʻlarini tasarruf etuvchi hisoblanadi;

Jamgʻarma mablagʻlarining boshlangʻich miqdori 5,0 milliard soʻmni tashkil etadi, buning 2,5 milliard soʻmi davlat budjeti mablagʻlaridan beriladigan bir yoʻla badal hisobiga, qolgan qismi esa muassislar — kichik biznes, xususiy tadbirkorlik subyektlari va fermer xoʻjaliklari, Oʻzbekiston Respublikasi Tashqi iqtisodiy faoliyat milliy banki, shuningdek, boshqa tijorat banklari, moliyaviy institutlar va donorlarning ixtiyoriy badallari hisobiga shakllantiriladi;

kichik biznes, xususiy tadbirkorlik subyektlari va fermer xoʻjaliklariga tashqi iqtisodiy operatsiyalarni amalga oshirish bilan bogʻliq yuridik, moliyaviy va tashkiliy xizmatlar koʻrsatishdan shartnoma qiymatining 1 foizigacha, ammo 100 ming soʻmdan kam boʻlmagan boʻlgan komission ajratmalar tarzida olingan daromadlar, shuningdek qonun hujjatlarida taqiqlanmagan boshqa manbalar Jamgʻarma mablagʻlarining manbalari hisoblanadi.

4. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Moliya vazirligi hamda Tashqi iqtisodiy faoliyat milliy bankining Jamgʻarma tomonidan kichik biznes va xususiy tadbirkorlik subyektlari, fermer xoʻjaliklariga:

eksportga moʻljallangan mahsulotning mamlakatimiz brendlarini rivojlantirish, eksportga yetkazib berishni olgʻa siljitish, jumladan, xorijiy mamlakatlarning qonunchiligiga muvofiq zarur litsenziyalar, ruxsatnomalar, sertifikatlar, shuningdek kichik biznes, xususiy tadbirkorlik subyektlari va fermer xoʻjaliklarining xalqaro tender savdolarida ishtirok etishi bilan bogʻliq roʻyxatdan oʻtish yigʻimlari hamda boshqa toʻlovlarni toʻlash;

eksport shartnomalarini tuzgan, yangi bozorlarga chiqish va yangi mahsulot turlarini eksport qilishni taʼminlagan holda chet ellardagi koʻrgazma va yarmarkalarda ishtirok etish uchun begʻaraz moliyaviy yordam koʻrsatish toʻgʻrisidagi taklifiga rozilik berilsin.

4¹. Jamgʻarma quyidagi huquqlarga ega ekanligi belgilab qoʻyilsin:

qonunchilikka muvofiq, eksportga yoʻnaltirilgan mahsulotlar ishlab chiqarishni tashkil etish uchun yetarli mablagʻlari boʻlmagan kichik tadbirkorlik subyektlarining taʼsischilari (ishtirokchilari) tarkibiga kirish, keyinchalik Jamgʻarma ulushini tayyor mahsulot ishlab chiqarish va eksportga yetkazib berish boshlangandan soʻng ikki yil mobaynida bozor qiymatida sotish;

kichik biznes, xususiy tadbirkorlik subyektlari va fermer xoʻjaliklariga ishlab chiqarishni modernizatsiyalash va kengaytirish, mahsulotning dizayn darajasini xalqaro standartlarga yetkazish maqsadida xorijiy mutaxassislarni jalb etish hamda chet elda mahalliy mahsulotga boʻlgan talabni inobatga olib, ularni tashqi bozorlarga olib chiqish bilan bogʻliq xarajatlarning bir qismini qoplagan holda moliyaviy yordam koʻrsatish. Jamgʻarma tomonidan moliyaviy yordam koʻrsatish kichik biznes, xususiy tadbirkorlik subyektlari va fermer xoʻjaliklari tomonidan keyinchalik qaytarish sharti bilan amalga oshiriladi.

5. Kichik biznes va xususiy tadbirkorlik subyektlarining eksportini qoʻllab-quvvatlash jamgʻarmasi, jumladan uning hududiy filiallari 2019-yilning 1-yanvariga qadar barcha turdagi soliqlar, yigʻimlar, boj hamda davlat maqsadli jamgʻarmalariga majburiy ajratmalar toʻlashdan ozod qilinsin, yagona ijtimoiy toʻlov bundan mustasno.

7. Oʻzbekiston Tashqi iqtisodiy faoliyat milliy banki, Savdo-sanoat palatasi, Fermerlar kengashi kichik biznes va xususiy tadbirkorlik subyektlari bilan birgalikda ikki hafta muddatda Jamgʻarma muassislarining tashkiliy yigʻilishini oʻtkazish, uning nizomini tasdiqlash hamda Jamgʻarma Kengashini shakllantirish boʻyicha zarur chora-tadbirlarni amalga oshirsin.

Jamgʻarma Kengashi bir oy muddatda:

Oʻzbekiston Respublikasi Adliya vazirligi bilan birgalikda Kichik biznes va xususiy tadbirkorlik subyektlarining eksportini qoʻllab-quvvatlash jamgʻarmasini belgilangan tartibda davlat roʻyxatidan oʻtkazsin;

Jamgʻarma ijro etuvchi direksiyasi va uning hududiy filiallari tuzilmasini tasdiqlasin, Jamgʻarmani marketing, tashqi savdo operatsiyalari va xalqaro huquq sohasidagi yuqori malakali mutaxassislar bilan toʻliq taʼminlasin;

Oʻzbekiston Respublikasi Moliya vazirligi bilan kelishilgan holda, belgilangan tartibda, Kichik biznes va xususiy tadbirkorlik subyektlarining eksportini qoʻllab-quvvatlash jamgʻarmasining mablagʻlarini shakllantirish va foydalanish tartibi toʻgʻrisidagi nizomni tasdiqlasin.

7¹. Jamgʻarma Kengashi iqtisodiy jihatdan maqsadga muvofiqlikdan kelib chiqqan holda, Jamgʻarmaning, shuningdek uning respublika mintaqalaridagi hududiy filiallarining hamda xorijiy mamlakatlardagi vakolatxonalari shtatlar birligi va tuzilmasini belgilasin.

8. Toshkent shahar hokimligi va Oʻzbekiston Respublikasi Tashqi iqtisodiy faoliyat milliy bankining Jamgʻarma ijro etuvchi direksiyasini Toshkent shahar, Gʻ. Gʻulom koʻchasi, 1-uyda joylashtirish toʻgʻrisidagi taklifi qabul qilinsin, uni zarur texnika, asbob-uskunalar va aloqa turlari bilan jihozlash koʻzda tutilsin.

Jamgʻarma Kengashi Qoraqalpogʻiston Respublikasi Vazirlar Kengashi va viloyatlar hokimliklari, Oʻzbekiston Respublikasi Tashqi iqtisodiy faoliyat milliy banki bilan birgalikda ikki oy muddatda Jamgʻarmaning hududiy filiallari shakllantirilishi va joylashtirilishini taʼminlasin.

Jamgʻarmaning ijro etuvchi direksiyasini va uning hududiy filiallarini joylashtirish ijara haqi undirilmasdan amalga oshirilishi belgilab qoʻyilsin.

9. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.