Kommunal xizmat tizimida islohotlarni yanada chuqurlashtirish, aholini ichimlik suv, tabiiy gaz va kommunal xizmatlar bilan barqaror taʼminlash, aholiga kommunal xizmat koʻrsatish masalalarida mahalliy davlat boshqaruvi hamda fuqarolarning oʻzini oʻzi boshqarish organlarining ahamiyati va masʼuliyatini oshirish maqsadida:

1. Oʻzbekiston Respublikasi Kommunal xizmat koʻrsatish vazirligini qayta tashkil etish boʻyicha Vazirlar Mahkamasining 2000-yil 2-noyabrdagi 429-son qarori bilan tuzilgan Maxsus komissiyaning quyidagi takliflari maʼqullansin:

Oʻzbekiston Respublikasi Kommunal xizmat koʻrsatish vazirligini tugatish va uning negizida Oʻzbekiston “Oʻzkommunxizmat” Agentligini tashkil qilish;

hududiy kommunal-foydalanish birlashmalarini Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining bevosita qaramogʻiga topshirish;

shaharlar va tumanlarda kommunal-foydalanish boshqarmalari faoliyati samaradorligini oshirish hamda bozor mexanizmlarini kuchaytirish.

2. Quyidagilar “Oʻzkommunxizmat” Agentligining asosiy vazifalari etib belgilansin:

aholini tabiiy va suyultirilgan gaz bilan uzluksiz taʼminlash, mintaqalararo suv quvurlarining barqaror va ishonchli ishlashini taʼminlash;

mintaqalararo suv quvurlaridan, kommunal gaz sotish tarmoqlaridan foydalanish hamda ularni rivojlantirish sohasida yagona texnikaviy siyosatni shakllantirish va oʻtkazish, ularni barpo etish borasida buyurtmachi vazifalarini amalga oshirish;

kommunal xizmatni isloh qilish boʻyicha ishlarni muvofiqlashtirish, kommunal xizmat sohasidagi meʼyoriy-huquqiy hujjatlarni, texnikaviy-iqtisodiy shartlarni ishlab chiqish hamda belgilangan tartibda tasdiqlash;

davlat boshqaruv mahalliy organlari, xoʻjalik yurituvchi subyektlar va fuqarolar tomonidan kommunal xizmat sohasida amaldagi qonunchilikka, belgilangan texnik shartlar va talablarga rioya etilishi ustidan nazoratni amalga oshirish;

roʻzgʻor chiqindilarini yigʻish, ularni foydali suratda ishlatish va qayta ishlash borasidagi holatni oʻrganish hamda shu masalalar boʻyicha yagona siyosatni shakllantirish;

tarmoqqa xorijiy sarmoyalar va texnologiyalarni, jumladan, qoʻshma korxonalar barpo etish yoʻli bilan jalb qilish.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining hududiy-kommunal foydalanish birlashmalari zimmasiga quyidagi asosiy vazifalar yuklansin:

aholiga uy-joy-kommunal xizmatlarning jami kompleksini koʻrsatish, uni ichimlik suvi, markaziy isitish, kanalizatsiya bilan taʼminlash;

uy-joy-kommunal xoʻjaligi obyektlarini mavsumiy foydalanishga tayyorlash borasidagi ishlarni oʻtkazish;

koʻp xonadonli uylarni tubdan taʼmirlash boʻyicha ishlarni belgilangan tartibda tashkil etish;

uy-joy egalarining shirkatlarini hamda Yagona buyurtmachi xizmatlarini, uy-joy fondiga xizmat qilish va kommunal xizmatlar koʻrsatish boʻyicha muqobil pudrat tashkilotlarini tuzish uchun zarur tashkiliy-iqtisodiy shart-sharoitlarni yaratish;

mahalliy budjet va oʻz mablagʻlari hisobidan kommunal obyektlar qurilishi boʻyicha buyurtmachi vazifalarini amalga oshirish;

shaharlar va aholi manzilgohlarini obodonlashtirish hamda sanitariya jihatidan tozalash borasidagi ishlarni tashkil etish;

shaharlar va tumanlar kommunal-foydalanish boshqarmalarining faoliyatini muvofiqlashtirish.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining aholiga kommunal xizmatni tashkil qilish sohasidagi asosiy vazifalari quyidagilardan iborat etib belgilansin:

kommunal xizmatlar bozorida raqobatchilik muhitini shakllantirish, uy-joy fondi va boshqa kommunal obyektlarni boshqarish hamda ularga xizmat koʻrsatish vazifalarini ajratish maqsadida mintaqadagi kommunal xizmat tizimida islohotlarni amalga oshirish;

aholini toza ichimlik suvi va gaz bilan taʼminlash uchun suv quvurlari va gaz tarmoqlarini rivojlantirish borasidagi maqsadli davlat dasturlarini oʻz qaramogʻidagi hududda roʻyobga chiqarish;

Oʻzbekiston Respublikasi Moliya vazirligi bilan kelishilgan holda oʻz qaramogʻidagi hududda kommunal xizmatlarga boʻlgan tarif siyosatini shakllantirish;

suv, gaz, issiqlik hamda boshqa energiya manbalarni sarfini yakka tartibda hisobga olish va tartibga solish asbob-uskunalarini joriy etish boʻyicha ishlarni muvofiqlashtirish;

oʻz qaramogʻidagi hududda texnikaviy inventarizatsiya byurosining faoliyatini tashkil qilish.

5. “Oʻzbekiston Respublikasida kommunal xizmat koʻrsatishni boshqarishni takomillashtirish toʻgʻrisida” Oʻzbekiston Respublikasi Prezidentining 1993-yil 15-iyuldagi PF-617-son Farmonining 1-3-bandlari oʻz kuchini yoʻqotgan deb hisoblansin.

6. Oʻzbekiston Respublikasi Adliya vazirligi, Davlat mulki qoʻmitasi bir oy muddatda Oʻzbekiston Respublikasining qonunchiligiga mazkur Farmondan kelib chiqadigan oʻzgartish va qoʻshimchalar toʻgʻrisidagi takliflarni kiritsinlar.

7. Oʻzbekiston Respublikasi Vazirlar Mahkamasi oʻn kun muddatda ushbu Farmonni amalga oshirish yuzasidan qaror qabul qilsin.