O‘zbekistonga qo‘shni bo‘lgan davlatlar hududidagi terrorchi guruhlar tarkibiga adashib kirib qolgan, og‘ir jinoyatlar sodir etmagan, Vataniga, ota-onasi bag‘riga qaytib, tinch hayot kechirishni niyat qilgan shaxslarga yana bir bor imkoniyat berish, ularning behuda qurbon bo‘lishiga yo‘l qo‘ymaslik maqsadida hamda gumanistik tuyg‘u va intilishlardan kelib chiqqan holda:

1. Turli xil ekstremistik oqimlar ta’sirida chet ellarga ketib, terrorchi guruhlarga qo‘shilib qolgan, qo‘li qonga botmagan, o‘z qilmishidan nadomat chekib, pushaymon bo‘lib bosh egib kelgan shaxslar jinoiy javobgarlikdan ozod etilsin.

2. Ushbu Farmon mazkur shaxslarning O‘zbekiston Respublikasi hududiga kirishi uchun huquqiy asos bo‘lishi belgilab qo‘yilsin.

3. O‘zbekiston Respublikasi Prokuraturasi, Ichki ishlar vazirligi, Davlat xavfsizlik xizmati, Mudofaa vazirligi, Davlat xavfsizlik xizmatining chegara qo‘shinlari, Davlat bojxona qo‘mitasi ushbu Farmon talablaridan kelib chiqib, terrorchilik, bosqinchilik bilan bog‘liq xavf-xatarlarning oldini olish, xalqimizning tinch hayotini ta’minlash maqsadida o‘z faoliyatini yanada kuchaytirsin. Huquqni muhofaza qiluvchi idoralar, mahalliy hokimiyatlar, mahalla faollari hushyorlik va ogohlikni oshirish bo‘yicha aholi o‘rtasida tushuntirish ishlarini olib borishga jiddiy e’tibor qaratsin.

4. Mazkur Farmonning ijrosini nazorat qilish O‘zbekiston Respublikasi Milliy xavfsizlik kengashi kotibi M. Rahmonqulov va Prezidentning Davlat maslahatchisi O‘. Komilov zimmasiga yuklatilsin.