Oʻzbekiston Respublikasi qonunlariga oʻzgartirish va qoʻshimchalar kiritilganligi hamda sudlar amaliyotida qonunchilikni toʻgʻri va bir xil qoʻllanilishini taʼminlash maqsadida, “Sudlar toʻgʻrisida”gi Qonunning 17-moddasiga muvofiq, Oʻzbekiston Respublikasi Oliy sudi Plenumi qaror qiladi:

Oʻzbekiston Respublikasi Oliy sudi Plenumi tomonidan qabul qilingan quyidagi qarorlarga oʻzgartirish va qoʻshimchalar kiritilsin:

1. 1993-yil 16-apreldagi “Sudlar tomonidan mulkni roʻyxat (arest)dan chiqarish haqidagi ishlarni koʻrishda qonunchilikning qoʻllanishi toʻgʻrisida”gi 13-sonli qarorining

a) oʻn birinchi bandi quyidagi uchinchi va toʻrtinchi xatboshi bilan toʻldirilsin:

“Sudlar mulkni roʻyxatdan chiqarish toʻgʻrisidagi daʼvoni koʻrishda sud hukmi yoki ajrimi bilan mol-mulk jinoiy yoʻl bilan qoʻlga kiritilgan mablagʻ evaziga olingan yoki jinoyat quroli deb topilgan-topilmaganligiga eʼtibor qaratishlari lozim. Sud hukmi yoki ajrimi bilan mulk jinoiy yoʻl bilan orttirilgan mablagʻ evaziga olingan (JK 243-moddasi) yoki jinoyat quroli deb (JPK 211-moddasi 1-bandi) topilganligi yetkazilgan zarar qoplangan-qoplanmaganligidan qatʼi nazar, daʼvoni rad etish uchun asos boʻladi.

Bunda sud ushbu mol-mulklarni roʻyxatdan chiqarish haqidagi daʼvoni rad etish bilan birga, manfaatdor shaxslarga jinoyat natijasida yetkazilgan zararni aybdor shaxslardan undirish masalasida umumiy tartibda sudga murojaat qilish huquqini tushuntiradi”.

2. 2000-yil 28-apreldagi “Maʼnaviy zararni qoplash haqidagi qonunlarni qoʻllashning ayrim masalalari toʻgʻrisida”gi 7-sonli qarorining

a) birinchi bandiga “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi Qonunning 115-moddasi” degan soʻzlardan keyin “Tadbirkorlik faoliyati erkinligining kafolatlari toʻgʻrisida”gi Qonunining 35-moddasi” degan soʻzlar bilan toʻldirilsin.

b) mazkur qarorning 12-bandi quyidagi uchinchi xatboshi bilan toʻldirilsin:

“Tadbirkorlik faoliyati subyekti oʻz ishchanlik obroʻsiga putur yetkazadigan maʼlumotlar tarqatilganda, bunday maʼlumotlarga raddiya berilishi bilan bir qatorda ularning tarqatilishi oqibatida yetkazilgan zararning oʻrni qoplanishi va maʼnaviy zarar kompensatsiya qilinishini talab etishga haqli”.

3. 2008-yil 12-dekabrdagi “Fuqarolik ishlari boʻyicha ekspertiza tayinlash, oʻtkazish va ekspert xulosasiga baho berishda sud amaliyotida kelib chiqadigan ayrim masalalar haqida”gi 24-sonli qarorining

a) 4-bandidagi “FPK 84-moddasining 5 va 6-qismlari” soʻzlari “FPK 84¹-moddasi” soʻzlariga almashtirilsin:

b) 5-banddagi “FPK 84-moddasi” soʻzlari “FPK 84¹-moddasi” soʻzlariga almashtirilsin;

v) mazkur qarorning 14-bandining 3-xatboshisi quyidagi tahrirda bayon qilinsin:

“Shu bilan birga FPKning 87-moddasi 2-qismi mazmunidan kelib chiqqan holda, ekspert qoʻyilgan savollarni uning maxsus bilimlari asosida hal qilish mumkin boʻlmasligiga yoki unga taqdim etilgan tekshirish obyektlarining yoxud materiallarning yaroqsizligiga yoki xulosa berish uchun yetarli emasligiga va ularni toʻldirib boʻlmasligiga yoxud fan va sud-ekspertlik amaliyotining holati qoʻyilgan savollarga javob topish imkoniyatini bermasligiga ishonch hosil qilsa, u xulosa berishning iloji yoʻqligi toʻgʻrisida asoslantirilgan hujjat tuzadi hamda uni ekspertizani tayinlagan sudga yuboradi”.

4. 1991-yil 20-dekabrdagi “Yuridik ahamiyatga ega boʻlgan faktlarni belgilash haqidagi ishlar boʻyicha sud amaliyoti toʻgʻrisida”gi 5-sonli Plenum qarorining

a) 2-bandi quyidagi mazmundagi 9-xatboshi bilan toʻldirilsin:

“ish staji toʻgʻrisidagi hujjatlar mavjud boʻlmagan taqdirda, mehnat faoliyati davrlarini”

b) 3-bandida:

“a” kichik bandi chiqarilsin;

“b”, “v”, “g”, “d” kichik bandlari tegishlicha “a”, “b”, “v”, “g” kichik bandlar deb hisoblansin.

v) 10-bandidagi “Oliy sud Plenumining 2000-yil 22-dekabrdagi “Meros huquqiga oid qonunlarni qoʻllashning ayrim masalalari toʻgʻrisida”gi qarorining 4-5-bandlari” jumlasi “Oliy sud Plenumining 2011-yil 20-iyuldagi “Sudlar tomonidan meros huquqiga oid qonunchilikning qoʻllanilishi toʻgʻrisida”gi qarorining 16-17-bandlari” jumlasiga oʻzgartirilsin;

g) 17-bandi 4-xatboshisidagi “maʼmuriy tartibda” soʻzlari “boshqacha tartibda” soʻzlari bilan almashtirilsin.