Oʻzbekistonning ilmiy salohiyatini yuksaltirish, uning jahon ilmiy hamjamiyatidagi oʻrnini mustahkamlash, mintaqalarda fanni yanada rivojlantirish hamda isteʼdodli va fidoyi olimlarni har tomonlama qoʻllab-quvvatlash, yuqori intellektual muhit yaratishdagi milliy anʼanalarni rivojlantirish, qadimda fan, maʼrifat va madaniyat olamining markazi hisoblangan, odamzot tarixidagi ilk akademiyalardan boʻlmish Xorazm Maʼmun akademiyasini qaytadan tashkil etish maqsadida:

1. Xorazm Maʼmun akademiyasi — Oʻzbekiston Respublikasi Fanlar akademiyasining mintaqaviy boʻlimi Xiva shahrida tashkil etilsin.

Xorazm Maʼmun akademiyasining asosiy ilmiy va tashkiliy vazifalari quyidagilar deb belgilansin:

— ilm-fan sohasidagi qadimgi ulugʻ milliy meros asoslarida yuqori intellektual muhitni yaratishdagi boy anʼanalarni tiklash va rivojlantirish, yosh isteʼdodli olimlarni izlab topish, ularni Akademiya faoliyatiga jalb etish va ilmiy ijodlarining samaradorligini yuksaltirish;

— qadimgi milliy ilm-fan sohasidagi boy merosni har tomonlama oʻrganish va tahlil qilish, tarix, arxeologiya, falsafa, til va adabiyot, biologiya va bio-texnologiya sohalarida fundamental izlanishlarni olib borish, zamonaviy ilmiy maktablar yaratish va fan yutuqlarini amaliyotga tatbiq etish;

— mintaqada ilm-fan bilan bogʻliq barcha ishlarni zamon talablari darajasida muvofiqlashtirish;

— oliy malakali ilmiy va ilmiy-pedagog kadrlarni tayyorlash;

— Uzluksiz taʼlim tizimi va fan oʻrtasidagi uzviy, oʻzaro manfaatli aloqalarni oʻrnatish, akademik litseylarda ilmiy-pedagogik faoliyatni yuqori saviyada olib borish;

— xalqaro ilmiy hamkorlikni rivojlantirish.

2. Oʻzbekiston Respublikasi Fanlar akademiyasi (T. Joʻrayev):

— Xorazm Maʼmun akademiyasi tarkibida tarix, arxeologiya, falsafa, til va adabiyot, biologiya yoʻnalishlari boʻyicha ilmiy boʻlinmalarni tashkil etsin, ikki hafta muddatda Xorazm Maʼmun akademiyasining tuzilmasi va Ustavini tasdiqlasin;

— bir oy muddatda Xorazm Maʼmun akademiyasining asosiy ilmiy yoʻnalishlar hamda ilmiy-tadqiqot ishlarining dasturini ishlab chiqsin;

— bir oy muddatda Moliya vazirligi bilan birgalikda Xorazm Maʼmun akademiyasi shtat jadvalini, ilmiy-tadqiqot ishlari hamda uning faoliyati bilan bogʻliq sarf-xarajatlarning hisobini tayyorlasin;

— 1998-yilning birinchi choragida oʻz Ustaviga muvofiq ustuvor ilmiy yoʻnalishlar sohasida samarali ishlayotgan olimlardan Xorazm Maʼmun akademiyasi tarkibiga saylov oʻtkazsin.

3. Xorazm Maʼmun akademiyasini davlat tomonidan qoʻllab-quvvatlash maqsadida Oʻzbekiston Respublikasi Fanlar akademiyasining haqiqiy aʼzolari (akademiklari) ikki nafarga koʻpaytirilsin.

4. Oʻzbekiston Respublikasi Moliya vazirligi (J. Sayfiddinov) Xorazm Maʼmun akademiyasining ilmiy izlanishlari va ilmiy-tashkiliy faoliyat olib borishi uchun Oʻzbekiston Respublikasi Fanlar akademiyasi tomonidan tayyorlangan sarf-xarajatlar hisobiga muvofiq budjetdan mablagʻ ajratsin.

5. Oʻzbekiston Respublikasi Fan va texnika davlat qoʻmitasi (P. Habibullayev) 1998 va undan keyingi yillardagi Xorazm Maʼmun akademiyasining ilmiy izlanishlar mavzularini Davlat ilmiy-texnikaviy dasturlari tarkibida rejalashtirsin.

6. Oʻzbekiston Respublikasi Fanlar akademiyasi Oliy va oʻrta maxsus taʼlim vazirligi hamda Xorazm viloyat xokimligi bilan birgalikda Xorazm Maʼmun akademiyasi va uning boʻlinmalariga isteʼdodli yosh olimlar va yuqori malakali mutaxassislarni jalb qilishni taʼminlasin.

7. Xorazm viloyati hokimligiga (I. Yusupov) bir oy muddatda Xorazm Maʼmun akademiyasi uchun maʼmuriy bino ajratish, uni taʼmirlash, transport, aloqa va boshqa zarur jihozlar hamda viloyatga taklif etilgan ilmiy xodimlarni uy-joy bilan taʼminlash yuklatilsin.

8. Ushbu Farmonning bajarilishini nazorat qilish Oʻzbekiston Respublikasi Vazirlar Mahkamasi zimmasiga yuklansin.