Respublika aholisini ijtimoiy muhofaza qilishni taʼminlash va mehnat haqining ragʻbatlantiruvchi ahamiyatini oshirish maqsadida:

1. 1995-yil 1-sentabrdan boshlab Oʻzbekiston Respublikasining hududida:

ish haqining eng oz miqdori — oyiga 250 soʻm;

mehnat pensiyasining eng oz miqdori — oyiga 645 soʻm;

fuqarolarning soliqqa tortilmaydigan daromadi eng oz miqdori — oyiga 400 soʻm;

yagona tarif setkasi boʻyicha boshlangʻich (nulinchi) razryadining eng oz miqdori — oyiga 400 soʻm miqdorida belgilansin.

2. 1995-yilning 1-sentabridan:

budjet muassasalari va tashkilotlari xodimlarining ish haqi oʻrta hisobda 1,33 baravar;

maktablar, oliy va oʻrta maxsus oʻquv yurtlari, boshqa xalq taʼlimi muassasalari oʻqituvchilarining, professor-oʻqituvchilar tarkibi va rahbarlarning ish haqi mehnatga haq toʻlash yagona tarif setkasi boʻyicha razryadni oshirish hisobiga oʻrtacha 1,5 baravar koʻpaytirilsin.

3. 1995-yil 1-sentabrdan boshlab hozirgi vaqtda amalda boʻlgan barcha turdagi pensiyalarning, oliy oʻquv yurtlari talabalari, oʻrta maxsus va hunar-texnika bilim yurtlari oʻquvchilari stipendiyalarining miqdorlari oʻrta hisobda 1,33 baravar oshirilsin.

4. 1995-yil 1-sentabrdan quyidagilar belgilab qoʻyilsin:

bola ikki yoshga toʻlgunga qadar uni parvarish qilish uchun onalarga nafaqalar miqdori oyiga 350 soʻm;

bolaligidan nogironlar uchun nafaqalar miqdori oyiga 645 soʻm;

zarur ish stajiga ega boʻlmagan keksa va mehnatga qobiliyatsiz fuqarolar uchun nafaqalar miqdori oyiga 400 soʻm.

5. Ish haqiga ustama va qoʻshimcha haqlarning barcha turlari, shuningdek bolali oilalarga nafaqalar hamda eng oz ish haqiga nisbatan belgilangan boshqa toʻlovlar ushbu Farmonda koʻrsatilgan eng oz ish haqi miqdori asosida 1995-yil 1-sentabrdan boshlab amalga oshiriladi.

6. Oʻzbekiston Respublikasi Ijtimoiy taʼminot vazirligi, Mehnat vazirligi, budjetdan pul bilan taʼminlanadigan vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, tashkilotlar va muassasalar mazkur Farmon qoidalariga asoslanib pensiyalar, nafaqalar, stipendiyalarning va xodimlar mansab okladlarini miqdorlari oʻz vaqtida qayta hisoblab chiqilishini taʼminlasinlar.

7. Budjet muassasalari va tashkilotlari xodimlarining ish haqini, pensiyalar, nafaqalar va stipendiyalar miqdorini oshirish bilan bogʻliq xarajatlar respublika davlat budjeti va ijtimoiy sugʻurta fondi hisobidan qoplansin.

8. Budjet hisobidan pul bilan taʼminlanuvchi muassasalar va tashkilotlarning xodimlarini ragʻbatlantirish maqsadida ularga mehnat haqi fondining 15 foizi miqdorida xodimlarni moddiy ragʻbatlantirish maxsus fondini tashkil qilishga ruxsat berilsin.

Budjet muassasalari va tashkilotlari rahbarlariga mazkur fond mablagʻlari hisobidan xodimlarning ish haqiga shaxsiy ustama haqlarini belgilash huquqi berilsin.

Ana shu fondni tashkil etish bilan bogʻliq sarf-xarajatlar 1995-yilda mehnat haqi fondini tejash hisobidan qoplansin.

Moliya vazirligi budjet muassasalari va tashkilotlari xodimlarini moddiy ragʻbatlantirish maxsus fondi toʻgʻrisidagi Nizomni tasdiqlasin hamda unda aniq maqsadni koʻzlab foydalanilishi ustidan taʼsirchan nazoratni amalga oshirsin.

9. Xoʻjalik hisobidagi korxonalar va tashkilotlar ish haqini oʻzlarining daromad manbalari hisobidan mehnat haqi fondi doirasida oshirsinlar va bunda mazkur Farmon bilan belgilangan eng oz ish haqi koʻpaytirilishini taʼminlasinlar.

10. Oʻzbekiston Respublikasi Prezidentining 1995-yil 7-fevraldagi 1080-son Farmoni (4-bandi bundan mustasno) oʻz kuchini yoʻqotgan deb hisoblansin.

11. Vazirlar Mahkamasi ushbu Farmonning bajarilishini nazorat qilishni taʼminlasin.