Fuqarolarning daromadlaridan olinadigan soliqlar darajasini kamaytirish maqsadida:

1. 1995-yilning 1-martidan boshlab fuqarolar daromadining soliq olinmaydigan eng kam miqdori oyiga 300 soʻm miqdorida belgilansin.

2. 1995-yilning 1-martidan boshlab fuqarolarning daromadlaridan olinadigan soliqlar progressiv stavkasining cheklangan miqdori 45 foizdan 40 foizgacha kamaytirilsin.

3. Oʻzbekiston Respublikasi Vazirlar Mahkamasi:

1995-yil 1-martgacha mehnat qilish sharoitlari alohida zararli boʻlgan ishlab chiqarishlarda ishlaydigan, amaldagi qonunchilikka muvofiq ular uchun soliq olishning imtiyozli tartibi belgilangan fuqarolarning ayrim toifalari roʻyxatini ular daromadlarining ushlab qolinadigan darajasi 25 foizdan oshmasligini nazarda tutgan holda tasdiqlasin;

fuqarolardan olinadigan daromad soligʻi toʻgʻrisida Oʻzbekiston Respublikasi qonunchiligiga tegishli oʻzgartirishlar kiritish haqida Oʻzbekiston Respublikasi Oliy Majlisiga belgilangan tartibda takliflar kiritsin.

4. Oʻzbekiston Respublikasi Prezidentining 1994-yil 30-noyabrdagi PF-1014-son Farmonining 5-bandi 1995-yil 1-yanvardan boshlab va Oʻzbekiston Respublikasi Prezidentining 1995-yil 7-fevraldagi PF-1080-son Farmoni 1-bandining toʻrtinchi xatboshi 1995-yil 1-martdan boshlab oʻz kuchini yoʻqotgan deb hisoblansin.

5. Mazkur Farmonning bajarilishini nazorat qilish Oʻzbekiston Respublikasi Vazirlar Mahkamasiga yuklatilsin.