Oʻzbekiston Respublikasining “Xorijiy sarmoyalar va xorijiy sarmoyadorlar faoliyatining kafolatlari toʻgʻrisida”gi Qonunga muvofiq hamda eksportga yoʻnaltirilgan va import oʻrnini bosadigan mahsulot ishlab chiqaradigan, shuningdek respublika iqtisodiyotiga sarmoya qoʻyadigan xorijiy sarmoyalar ishtirokidagi ishlab chiqarish korxonalari barpo etilishini hamda ularning samarali faoliyat koʻrsatishini ragʻbatlantirish maqsadida:

1. Belgilab qoʻyilsinki, 1997-yilning 1-yanvaridan boshlab quyidagi shartlarga javob beradigan yangidan tashkil etiladigan korxonalar Oʻzbekiston Respublikasi Adliya vazirligida va uning hududiy organlarida davlat roʻyxatidan oʻtkazilishi lozim boʻlgan xorijiy sarmoyalar ishtirokidagi korxonalar jumlasiga kiradi:

korxonaning nizom jamgʻarmasi 300 ming AQSh dollariga teng summadan kam boʻlishi mumkin emas;

korxona ishtirokchilaridan biri albatta xorijiy yuridik shaxs boʻlishi shart;

xorijiy sarmoyalar ulushi korxona nizom jamgʻarmasining kamida 30 foizini tashkil etishi zarur.

Yangi tashkil etilayotgan korxonalar mazkur shartlarga javob bermagan taqdirda xorijiy sarmoyalar ishtirokidagi korxonalar jumlasiga kirmaydi hamda korxona joylashgan hududdagi shahar va tuman hokimliklarida belgilangan tartibda davlat roʻyxatidan oʻtkazilishi lozim.

2. Shu narsa belgilab qoʻyilsinki, yuqorida koʻrsatilgan shartlarga muvofiq boʻlgan hamda xoʻjalik faoliyatidan tushadigan jami mablagʻning 60 foizdan koʻprogʻi nizom faoliyatida ularning oʻzlari ishlab chiqarayotgan mahsulot va (yoki) koʻrsatayotgan servis xizmati ulushiga toʻgʻri keladigan xorijiy, shuʼba va qoʻshma korxonalar xorijiy sarmoyalar ishtirokidagi ishlab chiqarish korxonalari jumlasiga kiradi.

3. Ushbu Farmon qabul qilingunga qadar roʻyxatga olingan xorijiy sarmoyalar ishtirokidagi korxonalar uchun hozir amalda boʻlgan soliq imtiyozlari belgilangan muddat tugaguncha saqlab qolinsin.

4. 1997-yilning 1-yanvaridan boshlab xorijiy sarmoyalar ishtirokidagi ishlab chiqarish korxonalari uchun amaldagi kafolatlar va imtiyozlarga qoʻshimcha ravishda soliq imtiyozlarining quyidagi turlari joriy etilsin:

4.1. Respublika investitsiya dasturiga kiritilgan loyihalarga mablagʻ sarflayotgan xorijiy sarmoyalar ishtirokidagi ishlab chiqarish korxonalari uchun foydadan olinadigan soliqdan ozod qilish muddati 5 yildan 7 yilga qadar uzaytirilsin.

Ilgari Respublika investitsiya dasturiga kiritilgan xorijiy sarmoyalar ishtirokidagi ishlab chiqarish korxonalari uchun mazkur Farmonning 1-bandida koʻzda tutilgan shartlarga rioya etilgani holda avval berilgan imtiyozli muddatni hisobga olib, soliqqa tortish imtiyozli rejimining umumiy davri 7 yilgacha oshiriladi.

4.2. Nizom jamgʻarmasidagi xorijiy sarmoya ulushi 50 foizdan va undan koʻproq boʻlgan xorijiy sarmoyalar ishtirokidagi ishlab chiqarish korxonalari uchun foydadan olinadigan soliqning amaldagi stavkalari kamaytirilib, ular nizom jamgʻarmasining kattaligiga qarab quyidagi miqdorlarda belgilansin:

300 ming AQSh dollaridan 1 mln. dollarigacha teng boʻlgan summadan — 20 foiz miqdorida;

1 mln. AQSh dollariga teng va undan koʻproq boʻlgan summadan — 16 foiz miqdorida.

4.3. Eksportga yoʻnaltirilgan va importning oʻrnini bosadigan mahsulot ishlab chiqaruvchi xorijiy sarmoyalar ishtirokidagi yangidan tashkil etiladigan ishlab chiqarish korxonalari:

agar ishlab chiqarish hajmida 25 foizdan koʻprogʻini bolalarga moʻljallangan tovarlar tashkil etgan taqdirda ishlab chiqarish boshlangan paytdan 5 yil muddat mobaynida foydadan olinadigan soliqni toʻlashdan ozod qilinsin. Shundan keyingi yillarda mazkur korxonalarning foydasidan soliq amaldagiga nisbatan 2 baravar kamaytirilgan stavka boʻyicha undirib olinsin;

agar korxonaning nizom jamgʻarmasida xorijiy sarmoya ulushi 50 foiz va undan koʻproqni tashkil etgan taqdirda ishlab chiqarish boshlangan paytdan 2 yil muddat mobaynida foydadan olinadigan soliqni toʻlashdan ozod qilinsin.

Foydadan olinadigan soliq toʻlashdan ozod qilingan xorijiy sarmoyalar ishtirokidagi ishlab chiqarish korxonasini tugatish chogʻida belgilangan imtiyozli davrdan soʻng bir yil oʻtgunga qadar soliq summasi uning butun faoliyat davri uchun toʻliq miqdorda undirib olinadi.

4.4. Nizom jamgʻarmasida xorijiy sarmoyalar ulushi 50 foiz va undan koʻproq boʻlgan xorijiy sarmoyalar ishtirokidagi ishlab chiqarish korxonalarining ishlab chiqarishni rivojlantirish va kengaytirishga sarflanadigan foydasi soliqqa tortishdan ozod qilinsin.

4.5. Qoʻshimcha soliq imtiyozlari 1997-yilning 1-yanvariga qadar ishlab turgan va roʻyxatga olingan xorijiy sarmoyalar ishtirokidagi ishlab chiqarish korxonalariga nisbatan ham joriy etilsin, bunda ular oʻzlarining taʼsis hujjatlarini ushbu Farmon qoidalariga muvofiq holga keltirishlari va Oʻzbekiston Respublikasining Adliya vazirligida qayta roʻyxatdan oʻtishlari shart.

5. Belgilab qoʻyilsinki, 1997-yilning 1-yanvaridan boshlab xorijiy sarmoyalar ishtirokidagi ishlab chiqarish korxonalari jumlasiga kirmaydigan yangidan tashkil etilayotgan xorijiy sarmoyalar ishtirokidagi korxonalarga nisbatan amaldagi va qoʻshimcha ravishda joriy etilayotgan soliq imtiyozlari tatbiq qilinmaydi.

6. Davlat roʻyxatidan oʻtgan sanadan boshlab bir yil mobaynida belgilangan tartibda oʻzining nizom jamgʻarmasini taʼsis hujjatlarida koʻzda tutilgan miqdorlarda tuza olmagan xorijiy sarmoyalar ishtirokida korxonalar tarkib topmagan deb hisoblansin.

7. Oʻzbekiston Respublikasining Vazirlar Mahkamasi ikki hafta muddatda Oʻzbekiston Respublikasining amaldagi qonunlari va meʼyoriy hujjatlariga ushbu Farmondan kelib chiqadigan oʻzgartish hamda qoʻshimchalar kiritish yuzasidan takliflar tayyorlasin.