Oʻzbekiston Respublikasi Prezidentining “Kichik biznes va xususiy tadbirkorlik yili” davlat dasturi toʻgʻrisida” 2011-yil 7-fevraldagi PQ–1474-son qaroriga muvofiq, tadbirkorlik faoliyatini amalga oshirish uchun qulay shart-sharoitlar yaratish maqsadida Vazirlar Mahkamasi qaror qiladi:

1. 2011-yil 1-maydan boshlab tadbirkorlik faoliyati subyektlari, shu jumladan kichik biznes subyektlarining quvvati 50 kVt va undan past boʻlgan elektr qurilmalarini elektr tarmoqlariga ulashning soddalashtirilgan tartibi joriy etilsin.

2. Oʻzbekiston Respublikasi Elektr energetikada nazorat boʻyicha davlat inspeksiyasi (Nimatullayev), “Oʻzbekenergo” davlat-aksiyadorlik kompaniyasi (Teshaboyev) manfaatdor vazirliklar va idoralar bilan birgalikda bir oy muddatda Tadbirkorlik faoliyati subyektlarining quvvati 50 kVtgacha boʻlgan elektr qurilmalarini elektr tarmoqlariga ulashning soddalashtirilgan tartibini ishlab chiqsinlar va belgilangan tartibda tasdiqlasinlar, bunda:

tadbirkorlik faoliyati subyektlarining ixtiyoriga koʻra hududiy elektr tarmoqlari korxonalariga elektr tarmoqlariga ulashga texnik shartlar olish uchun bevosita, tumanlar (shaharlar) hokimliklari huzuridagi tadbirkorlik faoliyati subyektlarini roʻyxatga olish inspeksiyalari orqali yoki loyiha tashkilotlari orqali buyurtmalar berishi;

hududiy elektr tarmoqlari korxonalari tomonidan elektr tarmoqlariga ulash uchun texnik shartlar berish muddati — 3 kun boʻlishi;

Oʻzbekiston Respublikasi Elektr energetikada nazorat boʻyicha davlat inspeksiyasi tomonidan elektr qurilmalarini koʻrikdan oʻtkazish dalolatnomalarini berish muddati — 3 kun boʻlishi;

tadbirkorlik subyektlari elektr qurilmalarini foydalanishga topshirish imkonini aniqlashda taqdim etilishi lozim boʻlgan hujjatlar roʻyxatini 79 tadan 13 tagacha kamaytirish nazarda tutilsin.

3. Oʻzbekiston Respublikasi Vazirlar Mahkamasining 2009-yil 22-avgustdagi 245-son qarori (Oʻzbekiston Respublikasi QT, 2009-y., 8-son, 64-modda) bilan tasdiqlangan Elektr energiyasidan foydalanish qoidalari 31-bandining ikkinchi xatboshi quyidagi tahrirda bayon qilinsin:

“Bunda, isteʼmolchilarning quvvati 10 kVtgacha boʻlgan, tadbirkorlik faoliyati subyektlari, shu jumladan kichik biznes subyektlari uchun esa quvvati 50 kVt va undan past boʻlgan elektr qurilmalarini elektr tarmoqlariga ulash qonun hujjatlariga muvofiq soddalashtirilgan tartibda amalga oshiriladi.”.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.