Onalik va bolalikni muhofaza qilish manfaatlarini koʻzlab, bolali oilalarga davlat tomonidan yordamni kuchaytirish, yosh avlodni kamol toptirish va tarbiyalash uchun sharoitlar yaratish maqsadida:

1. 1996-yil 1-aprelidan boshlab 16 yoshgacha boʻlgan bolasi bor oilalarga har oylik nafaqalar miqdorlari oshirilsin va ular eng kam oylik ish haqiga nisbatan quyidagi miqdorlarda belgilansin:

bir nafar bolasi bor oilalarga — 40 foiz;

ikki nafar bolasi bor oilalarga — 80 foiz;

uch nafar bolasi bor oilalarga — 120 foiz;

toʻrt nafar va undan koʻp bolasi bor oilalarga — 150 foiz.

2. 1996-yil 1-apreldan boshlab bola ikki yoshga toʻlgunga qadar uni parvarish qilish uchun har oylik nafaqalar miqdorlari koʻpaytirilsin va ular eng kam oylik ish haqining 150 foiz miqdorida belgilansin.

3. Bolali oilalarga koʻrsatib oʻtilgan nafaqalar miqdorlarining oshirilishi bilan bogʻliq xarajatlar belgilangan tartibda respublika davlat budjeti hamda korxonalar, tashkilotlar va muassasalar mablagʻlari hisobidan qoplansin.

4. Oʻzbekiston Respublikasi Moliya vazirligi eng kam oylik ish haqi va mehnat pensiyalari miqdorlarini oshirish yuzasidan oʻn kun muddatda takliflar kiritsin.

5. Oʻzbekiston Respublikasi Prezidentining 1995-yil 16-avgustdagi PF-1213-son Farmoni 4-bandining bola ikki yoshga toʻlgunga qadar parvarish qilish uchun onalarga nafaqalar miqdoriga doir birinchi xatboshi hamda Oʻzbekiston Respublikasi Prezidentining 1995-yil 20-noyabrdagi PF-1288-son Farmonining 1-bandi 1996-yilning 1-aprelidan boshlab oʻz kuchini yoʻqotgan deb hisoblansin.

6. Ushbu Farmonning bajarilishini nazorat qilish Oʻzbekiston Respublikasi Vazirlar Mahkamasiga yuklansin.