Kichik tadbirkorlikni jadal rivojlantirish, mamlakat iqtisodiyotida xususiy sektor ulushini oshirish, ishlab chiqarish sohasida aholi bandligini to‘laroq ta’minlash uchun yanada qulay sharoit yaratish maqsadida:

1. O‘zbekiston Respublikasi Prezidentining 1998-yil 9-apreldagi “Xususiy tadbirkorlik, kichik va o‘rta biznesni rivojlantirishni yanada rag‘batlantirish chora-tadbirlari to‘g‘risida”gi Farmonining 1-bandi quyidagi tahrirda berilsin:

“1. Belgilab qo‘yilsinki, 2004-yilning 1-yanvaridan kichik tadbirkorlik (biznes) subyektlari toifasiga quyidagilar kiradi:

yakka tartibdagi tadbirkorlar;

ishlab chiqarish tarmoqlarida band bo‘lgan xodimlarining o‘rtacha yillik soni 20 kishidan, xizmat ko‘rsatish sohasi va boshqa ishlab chiqarishga aloqador bo‘lmagan tarmoqlarda 10 kishidan, ulgurji, chakana savdo va umumiy ovqatlanish sohasida 5 kishidan oshmagan mikrofirmalar;

quyidagi tarmoqlarning o‘rtacha yillik xodimlari soni:

yengil va oziq-ovqat sanoati, metallga ishlov berish va asbobsozlik, yog‘ochni qayta ishlash, mebel sanoati va qurilish materiallari sanoati — 100 kishidan;

mashinasozlik, metallurgiya, yoqilg‘i-energetika va kimyo sanoati, qishloq xo‘jaligi mahsulotlari yetishtirish va qayta ishlash, qurilish hamda boshqa sanoat-ishlab chiqarish sohalari — 50 kishidan;

fan, ilmiy xizmat ko‘rsatish, transport, aloqa, xizmat ko‘rsatish sohasi (sug‘urta kompaniyalaridan tashqari), savdo va umumiy ovqatlanish hamda boshqa ishlab chiqarishga aloqador bo‘lmagan sohalar — 25 kishidan oshmagan kichik korxonalar”.

2. Belgilab qo‘yilsinki, 2004-yil 1-yanvardan:

mazkur Farmonning 1-bandida ko‘rsatib o‘tilgan mikrofirma va kichik korxonalarga amaldagi qonunchilik bilan mikrofirmalar va kichik korxonalar uchun belgilangan soliq imtiyozlari va preferensiyalari tatbiq etiladi;

mikrofirmalar va kichik korxonalar xodimlarining o‘rtacha yillik sonini aniqlashda o‘rindoshlik, pudrat shartnomasi va boshqa fuqarolik-huquqiy shartnomalar bo‘yicha ishga qabul qilingan xodimlar soni, shuningdek unitar korxonalar, vakolatxonalar hamda filiallarda ishlayotganlar soni ham hisobga olinadi.

3. O‘zbekiston Respublikasi Iqtisodiyot vazirligi Davlat statistika qo‘mitasi, Davlat mulkini boshqarish va tadbirkorlikni qo‘llab-quvvatlash davlat qo‘mitasi hamda Tovar ishlab chiqaruvchilar va tadbirkorlar palatasi bilan birgalikda ikki hafta muddatda kichik tadbirkorlik (biznes) subyektlari toifasiga kiruvchi ro‘yxatga olingan korxonalarning aniq tasnifini ishlab chiqsin va O‘zbekiston Respublikasi Vazirlar Mahkamasiga kiritsin.

4. Quyidagilar o‘z kuchini yo‘qotgan deb hisoblansin:

O‘zbekiston Respublikasi Prezidentining 1998-yil 9-apreldagi “Xususiy tadbirkorlik, kichik va o‘rta biznesni rivojlantirishni yanada rag‘batlantirish chora-tadbirlari to‘g‘risida”gi Farmoni 1-bandining beshinchi xatboshi;

O‘zbekiston Respublikasi Prezidentining 2001-yil 19-iyundagi “O‘zbekiston Respublikasi Prezidentining ayrim farmonlariga o‘zgartish va qo‘shimchalar kiritish haqida”gi Farmoni ilovasining 2-bandi.

5. O‘zbekiston Respublikasi Adliya vazirligi Moliya vazirligi, Davlat mulkini boshqarish va tadbirkorlikni qo‘llab-quvvatlash davlat qo‘mitasi, Tovar ishlab chiqaruvchilar va tadbirkorlar palatasi hamda boshqa tegishli tashkilotlar bilan birgalikda bir oy muddatda amaldagi qonunchilik va me’yoriy hujjatlarni mazkur Farmon bandlariga muvofiqlashtirish bo‘yicha takliflarni O‘zbekiston Respublikasi Vazirlar Mahkamasiga kiritsin.

6. Mazkur Farmon ijrosini nazorat qilish O‘zbekiston Respublikasi Bosh vaziri O‘. Sultonov zimmasiga yuklansin.