Hujjat 28.12.2010 00 sanasi holatiga
Amaldagi versiyaga o‘tish
PDF-faylidagi rasmiy manba
Oʻzbekiston Respublikasining Qonuni
Dafn etish va dafn ishi toʻgʻrisida
Qonunchilik palatasi tomonidan 2010-yil 18-noyabrda qabul qilingan
Senat tomonidan 2010-yil 3-dekabrda maʼqullangan
1-bob. Umumiy qoidalar
1-modda. Ushbu Qonunning maqsadi va asosiy vazifalari
Ushbu Qonunning maqsadi dafn etish va dafn ishi sohasidagi munosabatlarni tartibga solishdan iborat.
Ushbu Qonunning asosiy vazifalari quyidagilardan iborat:
shaxsning oʻlimidan keyin uning jasadiga (saqlanib qolgan tana qismlariga) munosib munosabatda boʻlish toʻgʻrisidagi xohish-irodasini (bundan buyon matnda vafot etgan shaxsning xohish-irodasi deb yuritiladi) inobatga olgan holda vafot etgan shaxsni dafn etish kafolatlarini belgilash;
dafn etish uchun nafaqa berish hamda moddiy va boshqa yordam koʻrsatish kafolatlarini belgilash;
dafn etish joylarini tanlash va saqlashda ekologik normalarning, sanitariya, shaharsozlik normalari va qoidalarining hamda boshqa normalar va qoidalarning bajarilishini taʼminlash;
dafn ishini tashkil etish asoslarini belgilash.
2-modda. Dafn etish va dafn ishi toʻgʻrisidagi qonun hujjatlari
Dafn etish va dafn ishi toʻgʻrisidagi qonun hujjatlari ushbu Qonun va boshqa qonun hujjatlaridan iboratdir.
Agar Oʻzbekiston Respublikasining xalqaro shartnomasida Oʻzbekiston Respublikasining dafn etish va dafn ishi toʻgʻrisidagi qonun hujjatlarida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.
Keyingi tahrirga qarang.
3-modda. Dafn etish
Dafn etish vafot etgan shaxsning jasadini (saqlanib qolgan tana qismlarini) uning xohish-irodasini inobatga olgan holda sanitariya normalari va qoidalariga hamda boshqa normalar va qoidalarga zid boʻlmagan urf-odatlar va anʼanalarga muvofiq koʻmishga doir marosim harakatidir.
Dafn etish vafot etgan shaxsning jasadini (saqlanib qolgan tana qismlarini) yerga (qabrga yoki sagʻanaga) koʻmish orqali amalga oshiriladi.
Dafn etish qonun hujjatlariga muvofiq boshqa usullar bilan ham amalga oshirilishi mumkin.
Keyingi tahrirga qarang.
4-modda. Dafn etish joylari
Dafn etish joylari qabrlar, sagʻanalar, shuningdek dafn etishni amalga oshirishga moʻljallangan boshqa binolar va inshootlarni barpo etish uchun ekologik normalarga, sanitariya, shaharsozlik normalari va qoidalariga hamda boshqa normalar va qoidalarga muvofiq ajratib berilgan yer uchastkalaridir. Dafn etish joylari moddiy madaniy meros obyektlari jumlasiga kiritilishi mumkin.
Dafn etish joylari tuman, shahar davlat hokimiyati organlarining bevosita tasarrufida boʻladi.
Yangi dafn etish joylarini barpo etish va mavjud boʻlganlarini rekonstruksiya qilish ekologik ekspertizaning xulosasi va sanitariya-gigiyenik xulosa boʻlgan taqdirda fuqarolarning oʻzini oʻzi boshqarish organlari hamda diniy tashkilotlarning takliflari inobatga olingan holda qonun hujjatlarida belgilangan tartibda amalga oshiriladi.
Keyingi tahrirga qarang.
Dafn etish joylari buzib tashlanishi mumkin emas va doimiy ravishda suv ostida qolish, koʻchkilar hamda boshqa tabiiy ofatlar tahdid etgan taqdirda belgilangan tartibda faqat tuman, shahar davlat hokimiyati organlarining qaroriga binoan koʻchirilishi mumkin.
 LexUZ sharhi
Qarang: Oʻzbekiston Respublikasi Vazirlar Mahkamasining 2011-yil 4-apreldagi 101-son qarori bilan tastiqlangan “Dafn etish joylarini saqlash, ulardan foydalanish va qabr usti yodgorliklarini oʻrnatish tartibi toʻgʻrisida”gi nizomning 18-bandi.
Ilgari dafn etish joylari joylashgan hududlardan foydalanishga ular koʻchirilgan paytdan eʼtiboran yigirma yil oʻtgach ruxsat beriladi. Bunday holda ushbu hududlardan faqat manzarali dov-daraxt koʻchatlari oʻtqazish uchun foydalanilishi mumkin. Bu hududlarda binolar va inshootlarni qurish taqiqlanadi.
Dafn etish joylarida marosim va ibodat inshootlari Oʻzbekiston Respublikasi Vazirlar Mahkamasi tomonidan belgilanadigan tartibda barpo etilishi mumkin.
 LexUZ sharhi
Qarang: Oʻzbekiston Respublikasi Vazirlar Mahkamasining 2011-yil 4-apreldagi 101-son qarori bilan tastiqlangan “Dafn etish joylarini saqlash, ulardan foydalanish va qabr usti yodgorliklarini oʻrnatish tartibi toʻgʻrisida”gi nizomning 59, 71—73-bandlari.
Qabr usti yodgorliklarini oʻrnatish qonun hujjatlarida belgilanadigan tartibda amalga oshirilishi mumkin.
Keyingi tahrirga qarang.
5-modda. Vafot etgan shaxsning xohish-irodasi
Vafot etgan shaxsning xohish-irodasi ogʻzaki (guvohlar hozirligida) yoki yozma shaklda ifodalangan, patologik-anatomik yorib koʻrishga roziligi yoki rozi emasligi haqidagi, oʻz jasadidan (saqlanib qolgan tana qismlaridan) organlar va (yoki) toʻqimalar ajratib olinishiga, u yoxud bu joyga, u yoki bu urf-odatlar va anʼanalar boʻyicha, ilgari vafot etgan u yoki bu shaxslarning yoniga dafn etilishiga roziligi yoxud rozi emasligi toʻgʻrisidagi, oʻz xohish-irodasini bajarishni u yoxud bu shaxsga ishonib topshirish haqidagi istagidir.
Keyingi tahrirga qarang.
Vafot etgan shaxsning jasadiga (saqlanib qolgan tana qismlariga) munosib munosabatda boʻlishga doir harakatlar, agar xohish-irodani bajarish mumkin boʻlmaydigan holatlar yuzaga kelmagan boʻlsa yoki qonun hujjatlarida boshqacha qoida belgilanmagan boʻlsa, uning xohish-irodasiga toʻla muvofiq ravishda amalga oshirilishi lozim.
Keyingi tahrirga qarang.
Vafot etgan shaxsning xohish-irodasi mavjud boʻlmagan taqdirda vafot etgan shaxsning eri (xotini), ota-onasi, farzandlari va boshqa qarindoshlari yoki qonuniy vakili, ular boʻlmaganda esa dafn etishni amalga oshirish majburiyatini oʻz zimmasiga olgan boshqa shaxs ushbu moddaning birinchi qismida koʻrsatilgan harakatlarga ijozat berish huquqiga ega.
6-modda. Vafot etgan shaxsning xohish-irodasini bajaruvchilar
Vafot etgan shaxsning xohish-irodasida koʻrsatilgan shaxslar uning xohish-irodasini bajaruvchilardir.
Vafot etgan shaxsning xohish-irodasida bajaruvchilar koʻrsatilmagan yoki ular vafot etgan shaxsning xohish-irodasini bajarishni rad etgan taqdirda, mazkur xohish-iroda uning eri (xotini), ota-onasi, farzandlari va boshqa qarindoshlari yoxud qonuniy vakili tomonidan amalga oshiriladi, shuningdek dafn etishni amalga oshirish majburiyatini oʻz zimmasiga olgan boshqa shaxs tomonidan bajarilishi mumkin.
2-bob. Dafn etishni amalga oshirish kafolatlari
7-modda. Vafot etgan shaxsning xohish-irodasini bajarish
Oʻzbekiston Respublikasi hududida har bir insonga uning oʻlimidan keyin jasadini (saqlanib qolgan tana qismlarini) vafot etgan shaxsning xohish-irodasini inobatga olgan holda ushbu Qonunga muvofiq dafn etish va dafn etish uchun joyni tekin berish kafolatlanadi.
Vafot etgan shaxsning uning jasadini (saqlanib qolgan tana qismlarini) ilgari vafot etgan shaxslar yoniga dafn etish toʻgʻrisidagi xohish-irodasini bajarish dafn etish uchun boʻsh joy yoki ilgari vafot etgan yaqin qarindoshining qabri mavjud boʻlgan taqdirda taʼminlanadi.
Shaxs boshqa aholi punktida yoki xorijiy davlat hududida vafot etgan taqdirda vafot etgan shaxsning uning jasadini (saqlanib qolgan tana qismlarini) dafn etish toʻgʻrisidagi xohish-irodasini bajarish dafn etishni amalga oshirish va dafn etish bilan bogʻliq xarajatlarni toʻlash majburiyatini oʻz zimmasiga olgan shaxsga qonun hujjatlarida belgilangan tartibda oʻlim haqidagi guvohnomani (maʼlumotnomani), vafot etgan shaxsning jasadini (saqlanib qolgan tana qismlarini) olib ketish uchun ruxsatnomani, yoʻl hujjatlarini, shu jumladan Oʻzbekiston Respublikasining Davlat chegarasini kesib oʻtishga doir hujjatlarni olishga koʻmaklashish qismida kafolatlanadi. Mazkur koʻmakni mahalliy davlat hokimiyati organlari, shuningdek oʻz faoliyati turiga koʻra shunday hollarda zarur xizmatlar koʻrsatuvchi boshqa yuridik shaxslar koʻrsatishi shart.
Keyingi tahrirga qarang.
Keyingi tahrirga qarang.
8-modda. Dafn etishni amalga oshirishdagi kafolatlar
Vafot etgan shaxsning eri (xotini), ota-onasi, farzandlari va boshqa qarindoshlariga yoki qonuniy vakiliga, ular boʻlmaganda esa dafn etishni amalga oshirish majburiyatini oʻz zimmasiga olgan boshqa shaxsga quyidagilar kafolatlanadi:
vafot etgan shaxsni dafn etish uchun zarur boʻlgan hujjatlarni oʻlim sababi aniqlangan paytdan eʼtiboran darhol berish. Vafot etgan shaxsning jasadini (saqlanib qolgan tana qismlarini) oʻlim sababini aniqlash uchun oʻlikxonaga joylashtirish asoslari vujudga kelgan hollarda, uning jasadini (saqlanib qolgan tana qismlarini) eri (xotini), ota-onasi, farzandlari va boshqa qarindoshlari yoki qonuniy vakilining, ular boʻlmaganda esa dafn etishni amalga oshirish majburiyatini oʻz zimmasiga olgan boshqa shaxsning talabiga koʻra berish bir sutkadan ortiq muddatga kechiktirilishi mumkin emas;
agar vafot etgan shaxsning eri (xotini), ota-onasi, farzandlari va boshqa qarindoshlari yoki qonuniy vakili, ular boʻlmaganda esa dafn etishni amalga oshirish majburiyatini oʻz zimmasiga olgan boshqa shaxs oʻlim haqida xabardor qilingan, ammo dafn etishni ular tomonidan amalga oshirishni qiyinlashtiruvchi obyektiv holatlar mavjud boʻlsa, vafot etgan shaxsning jasadi (saqlanib qolgan tana qismlari) oʻlim sababi aniqlangan paytdan eʼtiboran ikki sutkagacha oʻlikxonada turishiga imkoniyat berish. Vafot etgan shaxsning eri (xotini), ota-onasi, farzandlari va boshqa qarindoshlari yoki qonuniy vakili, ular boʻlmaganda esa dafn etishni amalga oshirish majburiyatini oʻz zimmasiga olgan boshqa shaxs qidirilgan taqdirda bu muddat uch sutkagacha uzaytirilishi mumkin.
9-modda. Dafn etish uchun nafaqa hamda moddiy va boshqa yordam koʻrsatish
Vafot etgan shaxsning eri (xotini), ota-onasi, farzandlari va boshqa qarindoshlariga yoki qonuniy vakiliga, ular boʻlmaganda esa dafn etishni amalga oshirish majburiyatini oʻz zimmasiga olgan boshqa shaxsga dafn etish uchun Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi mablagʻlari hisobidan nafaqa berish kafolatlanadi.
Keyingi tahrirga qarang.
Dafn etish uchun nafaqani toʻlash murojaat etilgan kunda Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimi tomonidan:
vafot etgan shaxs pensiya yoki ijtimoiy nafaqa olib turgan yoxud ishlamagan va pensioner boʻlmagan hollarda — oʻlim haqidagi guvohnoma asosida;
oʻlik bola tugʻilgan yoki bola hayotining birinchi haftasi davomida vafot etgan (perinatal oʻlim) taqdirda — qonun hujjatlarida belgilangan tartibda beriladigan perinatal oʻlim toʻgʻrisidagi maʼlumotnoma asosida amalga oshiriladi.
Keyingi tahrirga qarang.
Keyingi tahrirga qarang.
 LexUZ sharhi
Qarang: Vazirlar Mahkamasining 2023-yil 20-oktabrdagi 550-son qarori bilan tasdiqlangan Fuqarolik holati dalolatnomalarini qayd etish qoidalarining 31-bandi, Oʻzbekiston Respublikasi sogʻliqni saqlash vazirining 2010-yil 27-fevraldagi 56-son buyrugʻi bilan tasdiqlangan Oʻzbekiston Respublikasi sogʻliqni saqlash muassasalarida tugʻilganlik haqidagi tibbiy maʼlumotnoma, perinatal oʻlim va oʻlim haqidagi tibbiy guvohnomalarni berish tartibi toʻgʻrisidagi yoʻriqnoma (roʻyxat raqami 2089, 23.03.2010-y.).
Korxona, muassasa, tashkilotning xodimi yoki xodimning qaramogʻida boʻlgan oila aʼzosi vafot etgan taqdirda dafn etish uchun nafaqani toʻlash mazkur xarajatlarning oʻrni keyinchalik Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi mablagʻlari hisobidan qoplangan holda korxona, muassasa yoki tashkilot tomonidan amalga oshiriladi.
Keyingi tahrirga qarang.
Vafot etgan xodimning oila aʼzolariga yoki oila aʼzosi vafot etganligi munosabati bilan xodimga korxona, muassasa va tashkilot tomonidan qonun hujjatlariga muvofiq moddiy va boshqa yordam koʻrsatilishi mumkin.
Keyingi tahrirga qarang.
 LexUZ sharhi
Qarang: Vazirlar Mahkamasining 2023-yil 20-oktabrdagi 550-sonli “Nikoh, oila va fuqarolik holati dalolatnomalarini qayd etish sohasidagi normativ-huquqiy hujjatlarni tizimlashtirish toʻgʻrisida”gi qarori.
10-modda. Vafot etgan shaxsni uning eri (xotini), ota-onasi, farzandlari va boshqa qarindoshlari yoki qonuniy vakili yoxud dafn etishni amalga oshirish majburiyatini oʻz zimmasiga olgan boshqa shaxs boʻlmaganda dafn etish
Vafot etgan shaxsning eri (xotini), ota-onasi, farzandlari va boshqa qarindoshlari yoki qonuniy vakili yoxud dafn etishni amalga oshirish majburiyatini oʻz zimmasiga olgan boshqa shaxs boʻlmaganda yoki ularning dafn etishni amalga oshirish imkoniyati boʻlmaganda, vafot etganning shaxsini ichki ishlar organlari aniqlaganidan keyin uni dafn etishni, shuningdek qonun hujjatlarida belgilangan muddatlarda ichki ishlar organlari tomonidan shaxsi aniqlanmagan vafot etganni dafn etishni mahalliy davlat hokimiyati organlari tomonidan tashkil etiladigan maxsus xizmat qonun hujjatlarida belgilangan tartibda amalga oshiradi.
Keyingi tahrirga qarang.
11-modda. Vafot etgan harbiy xizmatchilarni, harbiy yigʻinlarga chaqirilgan fuqarolarni, ichki ishlar organlari xodimlarini dafn etish
Keyingi tahrirga qarang.
Tinchlik vaqtida harbiy xizmatni (harbiy yigʻinlarni), ichki ishlar organlaridagi xizmatni oʻtayotganda vafot etgan yoki mayib boʻlish (yaralanish, shikastlanish, kontuziya boʻlish), kasallanish natijasida vafot etgan harbiy xizmatchilarni, harbiy yigʻinlarga chaqirilgan fuqarolarni, ichki ishlar organlari xodimlarini, shuningdek xizmatda boʻlish yoshining chegarasiga yetganligiga, sogʻligʻining holatiga koʻra yoxud tashkiliy-shtat tadbirlari munosabati bilan harbiy xizmatdan yoki ichki ishlar organlaridagi xizmatdan boʻshatilgan vafot etgan fuqarolarni dafn etish vafot etgan shaxs harbiy xizmatni (harbiy yigʻinlarni), ichki ishlar organlaridagi xizmatni oʻtagan vazirliklar, davlat qoʻmitalari va idoralarning mablagʻlari hisobidan ushbu Qonunga muvofiq amalga oshiriladi. Mazkur shaxslarning dafn etilishini tashkil etish qonun hujjatlarida belgilangan tartibda amalga oshiriladi.
Urush davrida xizmatni oʻtash vaqtida va jangovar harakatlar olib borilayotgan davrda vafot etgan harbiy xizmatchilar, ichki ishlar organlari xodimlarini dafn etish qonun hujjatlariga muvofiq amalga oshiriladi.
Keyingi tahrirga qarang.
12-modda. Qamoqda yoki jazoni ijro etish muassasalarida saqlab turilgan vafot etgan shaxslarni dafn etish
Qamoqda yoki jazoni ijro etish muassasalarida saqlab turilgan vafot etgan shaxslarni dafn etish ushbu Qonunga muvofiq amalga oshiriladi. Qamoqda yoki jazoni ijro etish muassasalarida saqlab turilgan vafot etgan shaxslarni ularning eri (xotini), ota-onasi, farzandlari va boshqa qarindoshlari yoki qonuniy vakillari yoxud dafn etishni amalga oshirish majburiyatini oʻz zimmasiga olgan boshqa shaxslar boʻlmaganda yoki dafn etishni ular tomonidan amalga oshirish imkoniyati boʻlmaganda yoxud ular dafn etishni amalga oshirishni rad etganda dafn etish, shuningdek umrbod ozodlikdan mahrum qilish tarzidagi jazoni oʻtagan vafot etgan shaxslarni dafn etish qonun hujjatlarida belgilangan tartibda amalga oshiriladi.
Keyingi tahrirga qarang.
3-bob. Dafn etish joyini tashkil etish
13-modda. Dafn etish joyini tashkil etish uchun yer uchastkasini tanlash va ajratish
Dafn etish joyini tashkil etish uchun yer uchastkasini tanlash joyning gidrogeologik tavsiflari, relyefi xususiyatlari, tuprogʻi tarkibi, atrof tabiiy muhitga tushadigan ekologik yukning yoʻl qoʻyiladigan eng yuqori chegarasi hisobga olingan holda shaharsozlik hujjatlariga, aholi punktlarini va hududlarini barpo etish qoidalariga, shuningdek sanitariya normalari va qoidalariga muvofiq amalga oshiriladi hamda u dafn etish joyining nomuayyan uzoq muddat mavjud boʻlishini taʼminlashi kerak.
Dafn etish joyini tashkil etish uchun yer uchastkasi ajratish mahalliy davlat hokimiyati organlari tomonidan yer toʻgʻrisidagi qonun hujjatlariga muvofiq amalga oshiriladi.
Keyingi tahrirga qarang.
Dafn etish joyini tashkil etish uchun yer uchastkasining oʻlchami muayyan aholi punktida yashovchilarning soni hisobga olingan holda belgilanadi.
 LexUZ sharhi
Qarang: Oʻzbekiston Respublikasi Vazirlar Mahkamasining 2011-yil 4-apreldagi 101-son qarori bilan tastiqlangan “Dafn etish joylarini saqlash, ulardan foydalanish va qabr usti yodgorliklarini oʻrnatish tartibi toʻgʻrisida”gi nizomning 55-bandi.
Dafn etish uchun beriladigan joyning oʻlchami Oʻzbekiston Respublikasi Vazirlar Mahkamasi tomonidan belgilanadi.
 LexUZ sharhi
Qarang: Oʻzbekiston Respublikasi Vazirlar Mahkamasining 2011-yil 4-apreldagi 101-son qarori bilan tastiqlangan “Dafn etish joylarini saqlash, ulardan foydalanish va qabr usti yodgorliklarini oʻrnatish tartibi toʻgʻrisida”gi nizomning 45-bandi.
14-modda. Dafn etish joylarini saqlash va obodonlashtirish
Dafn etish joylarini lozim boʻlgan holatda saqlash va obodonlashtirish majburiyati mahalliy davlat hokimiyati organlari zimmasiga yuklanadi hamda ushbu maqsadlar uchun ajratiladigan alohida xarajatlar moddasi boʻyicha mahalliy budjet mablagʻlari hisobidan amalga oshiriladi. Ushbu maqsadlar uchun yuridik va jismoniy shaxslarning xayr-ehsonlaridan ham foydalanish mumkin boʻlib, ulardan foydalanish tartibi Oʻzbekiston Respublikasi Vazirlar Mahkamasi tomonidan belgilanadi.
 LexUZ sharhi
Qarang: Vazirlar Mahkamasining 2011-yil 4-apreldagi 101-sonli qarori bilan tasdiqlangan Dafn etish joylarini saqlash va obodonlashtirishga yuridik va jismoniy shaxslarning xayr-ehsonlaridan foydalanish tartibi toʻgʻrisidagi nizom.
Dafn etish joylarini obodonlashtirish fuqarolarning oʻzini oʻzi boshqarish organlari koʻmagida hashar yoʻli bilan ham amalga oshirilishi mumkin.
Dafn etish joylari oʻralgan boʻlishi, qoʻriqlanishi, suv, elektr, zarur binolar va ashyo-anjomlar, shuningdek kirib boriladigan yoʻl bilan taʼminlanishi lozim.
Dafn etish joylarida mol va boshqa uy jonivorlarini boqish, mevali koʻchatlar ekish, qishloq xoʻjaligi ekinlarini oʻstirish taqiqlanadi.
 LexUZ sharhi
Qoʻshimcha maʼlumot uchun qarang: Oʻzbekiston Respublikasi Vazirlar Mahkamasining 2011-yil 4-apreldagi 101-son qarori bilan tastiqlangan “Dafn etish joylarini saqlash, ulardan foydalanish va qabr usti yodgorliklarini oʻrnatish tartibi toʻgʻrisida”gi nizom.
15-modda. Dafn etish joylarining saqlanishi ustidan ekologik nazorat va sanitariya-epidemiologiya nazorati
Dafn etish joylarining saqlanishi ustidan ekologik nazorat va sanitariya-epidemiologiya nazorati qonun hujjatlarida belgilangan tartibda Oʻzbekiston Respublikasi Tabiatni muhofaza qilish davlat qoʻmitasi hamda Oʻzbekiston Respublikasi Sogʻliqni saqlash vazirligi tomonidan amalga oshiriladi.
Keyingi tahrirga qarang.
 LexUZ sharhi
Qarang: Oʻzbekiston Respublikasining “Ekologik nazorat toʻgʻrisida”gi va “Aholining sanitariya-epidemiologik osoyishtaligi toʻgʻrisida”gi Qonunlari.
Dafn etish joylarida ishlarni bajarish va xizmatlar koʻrsatish ekologik normalarga, sanitariya normalari va qoidalariga, shuningdek dafn etish joylarini saqlashning mahalliy davlat hokimiyati organlari tomonidan belgilanadigan qoidalariga muvofiq amalga oshiriladi.
 LexUZ sharhi
Qoʻshimcha maʼlumot uchun qarang: Toshkent shahar hokimining 2016-yil 10-oktabrdagi 921-sonli “Dafn etish joylarini saqlash qoidalarini tasdiqlash toʻgʻrisida”gi qarori hamda 2018-yil 3-maydagi 708-son “Toshkent shahri qabristonlarida goʻr qazish va marosim xizmatlari uchun pulli xizmatlar koʻrsatish tariflarini belgilash toʻgʻrisida”gi qarori.
Ekologik normalar, sanitariya normalari va qoidalari, shuningdek dafn etish joylarini saqlash qoidalari buzilgan taqdirda mahalliy davlat hokimiyati organlari dafn etish joyida ishlar bajarilishi va xizmatlar koʻrsatilishini toʻxtatib turishi yoki tugatishi hamda yoʻl qoʻyilgan qoidabuzarliklarni bartaraf etish va dafn etish joyining inson sogʻligʻi hamda atrof tabiiy muhitga nomaqbul taʼsiriga barham berish, zarur hollarda esa yangi dafn etish joyini barpo qilish choralarini koʻrishi shart.
16-modda. Eski va ilgari nomaʼlum boʻlgan qabrlar
Mavjudligi haqida ishonchli maʼlumotlar boʻlmagan qabrlar eski va ilgari nomaʼlum boʻlgan qabrlar deb hisoblanadi.
Qabrlar borligi ehtimoli boʻlgan hududlarda har qanday ishlarni amalga oshirishdan oldin mahalliy davlat hokimiyati organlari bu hududni tekshiruvdan oʻtkazishi shart.
Eski va ilgari nomaʼlum boʻlgan qabrlar aniqlangan taqdirda mahalliy davlat hokimiyati organlari qabrlarni belgilab qoʻyishi va roʻyxatga olishi, zarur hollarda esa dafn etilganlarning saqlanib qolgan tana qismlari qayta koʻmilishini tashkil etishi shart.
Mahalliy davlat hokimiyati organlarining tegishli ruxsatnomasiga ega boʻlmagan yuridik yoki jismoniy shaxslarning eski va ilgari nomaʼlum boʻlgan qabrlarni qidirishi hamda ochishi taqiqlanadi.
Arxeologiya merosi obyektlari boʻlgan eski va ilgari nomaʼlum boʻlgan qabrlarni qidirish hamda ochish arxeologiya merosi obyektlarini muhofaza qilish va ulardan foydalanish toʻgʻrisidagi qonun hujjatlariga muvofiq amalga oshiriladi.
Keyingi tahrirga qarang.
4-bob. Dafn ishi
17-modda. Dafn ishini tashkil etish
Dafn ishini tashkil etish mahalliy davlat hokimiyati organlari zimmasiga yuklanadi.
Dafn etish boʻyicha xizmatlar mahalliy davlat hokimiyati organlari tashkil etadigan maxsus xizmatlar tomonidan koʻrsatilishi mumkin.
Mahalliy davlat hokimiyati organlari tomonidan tashkil etiladigan maxsus xizmatlarning faoliyati qonun hujjatlarida belgilangan tartibda amalga oshiriladi.
Keyingi tahrirga qarang.
18-modda. Dafn ishini moliyalashtirish manbalari
Dafn ishini moliyalashtirish manbalari quyidagilardan iborat:
Oʻzbekiston Respublikasining Davlat budjeti mablagʻlari;
Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi mablagʻlari;
Keyingi tahrirga qarang.
qonun hujjatlarida taqiqlanmagan boshqa manbalar.
Keyingi tahrirga qarang.
5-bob. Yakunlovchi qoidalar
19-modda. Nizolarni hal etish
Dafn etish va dafn ishi sohasidagi nizolar qonun hujjatlarida belgilangan tartibda hal etiladi.
Keyingi tahrirga qarang.
20-modda. Dafn etish va dafn ishi toʻgʻrisidagi qonun hujjatlarini buzganlik uchun javobgarlik
Dafn etish va dafn ishi toʻgʻrisidagi qonun hujjatlarini buzganlikda aybdor shaxslar belgilangan tartibda javobgar boʻladi.
Keyingi tahrirga qarang.
21-modda. Qonun hujjatlarini ushbu Qonunga muvofiqlashtirish
Keyingi tahrirga qarang.
Oʻzbekiston Respublikasi Vazirlar Mahkamasi:
hukumat qarorlarini ushbu Qonunga muvofiqlashtirsin;
davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.
22-modda. Ushbu Qonunning kuchga kirishi
Ushbu Qonun rasmiy eʼlon qilingan kundan eʼtiboran kuchga kiradi.
 LexUZ sharhi
Ushbu Qonun “Xalq soʻzi” gazetasining 2010-yil 28-dekabrdagi 249 (5164)-sonida eʼlon qilingan.
Oʻzbekiston Respublikasining Prezidenti I. KARIMOV
Toshkent sh.,
2010-yil 27-dekabr,
OʻRQ-276-son

(Oʻzbekiston Respublikasi qonun hujjatlari toʻplami, 2010-y., 52-son, 508-modda; 2017-y., 37-son, 978-modda; Qonun hujjatlari maʼlumotlari milliy bazasi, 15.11.2019-y., 03/19/584/4025-son; Qonunchilik maʼlumotlari milliy bazasi, 21.04.2021-y., 03/21/683/0375-son, 30.10.2021-y., 03/21/726/1001-son, 24.06.2022-y., 03/22/780/0560-son; 29.11.2023-y., 03/23/880/0905-son; 19.10.2024-y., 03/24/977/0831-son; 07.02.2026-y., 03/26/1117/0116-son)