Ijodkor yoshlarning maʼnaviy kamol topish sharoitlarini yaxshilash, ularning faoliyatini kuchaytirish hamda respublikaning madaniy texnikaviy potensialiga qoʻshadigan hissasini oshirish maqsadida:

1. Qoraqalpogʻiston Respublikasining Vazirlar Kengashi, viloyatlar va Toshkent shahar hokimliklari 1993-yilning 1-sentabrigacha boʻlgan muddat ichida Nukus shahrida, barcha viloyat markazlarida respublika yoshlarining eng muhtoj qismi uchun 30 xonali, Toshkent shahrida esa 60 xonali uy-joy binolarini loyihalash va qurishni taʼminlasinlar.

Oʻzbekiston Respublikasi Prezidenti huzuridagi Vazirlar Mahkamasi ana shu uylardagi turar joylarni tegishli ijodiy uyushmalar va ilmiy tashkilotlarning tavsiyalari asosida berish tartibini oʻrnatsin.

Oʻzbekiston Respublikasi Istiqbolni belgilash va statistika komiteti hamda Moliya vazirligi Qoraqalpogʻiston Respublikasi Vazirlar Kengashi bilan birgalikda, viloyatlar va Toshkent shahar hokimliklari 10 kun muddat ichida mazkur uylarni, loyihalash hamda qurishni pul bilan taʼminlash manbalariga oid masalalarni koʻrib chiqib hal qilsinlar.

2. Oʻzbekiston Respublikasining Xalq taʼlimi, Oliy va oʻrta maxsus taʼlim, Sogʻliqni saqlash, Madaniyat ishlari vazirliklariga, Kinematografiya davlat kompaniyasiga va Fanlar akademiyasiga ijodiy uyushmalar hamda boshqa manfaatdor vazirliklar va idoralar bilan birgalikda Vazirlar Mahkamasiga bir oy muddat ichida quyidagi takliflarni kiritish topshirilsin:

— yosh mualliflarning eng yaxshi asarlari va ilmiy ishlanmalar Davlat mukofotini taʼsis etish toʻgʻrisida;

— respublika maktab olimpiadalarining ijodkor yoshlar xalqaro va respublika tanlovlarining gʻoliblarini moddiy ragʻbatlantirish, ularni kirish imtihonlarisiz oʻz sohasi boʻyicha oliy oʻquv yurtlariga qabul qilish toʻgʻrisida;

— aʼlochi talabalar va aspirantlar uchun Oʻzbekistonning atoqli madaniyat arboblari sharafiga qoʻshimcha stipendiyalarni taʼsis etish haqida;

— ijodkor yoshlarning asarlari va ishlarini bosib chiqarishini yaxshilash toʻgʻrisida;

— kommunal va maishiy xizmat haqini toʻlashda, jamoat transportidan foydalanishda ijodkor yoshlar uchun imtiyozlar berish haqida;

— isteʼdodli yoshlarni chet ellarda oʻqish va malaka oshirish uchun yuborish toʻgʻrisida.

3. Moliya vazirligi va Oʻzbekiston Respublikasining Vazirlar Mahkamasi huzuridagi Bosh soliq boshqarmasi 10 kun muddat ichida Vazirlar Mahkamasiga Oʻzbekiston ijodiy uyushmalarini asosiy ishlab chiqarish faoliyati boʻyicha soliqlardan ozod qilish haqida takliflar kiritsinlar.

4. Vazirlar Mahkamasi 20 kun muddat ichida ushbu Farmonni bajarishga oid tashkiliy chora-tadbirlarni taʼminlovchi qaror qabul qilsin.