Oʻzbekiston Respublikasi Prezidentining “2010/2011 oʻquv yilida Oʻzbekiston Respublikasi oliy taʼlim muassasalariga qabul toʻgʻrisida” 2010-yil 28-maydagi PQ-1345-son qarorini bajarish yuzasidan, respublikaning oliy taʼlim muassasalarini moliyalashtirish tartibini yanada takomillashtirish, budjet mablagʻlaridan oqilona, samarali va maqsadli foydalanilishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligi hamda Oliy va oʻrta maxsus taʼlim vazirligining 2010-yil 1-sentabrdan boshlab:

bir talabani oʻqitish xarajatlarining bazaviy normatividan kelib chiqib har bir oliy taʼlim muassasasi uchun budjetdan moliyalashtirish hajmini belgilashni;

bir talabani oʻqitish xarajatlarining bazaviy normativlariga oliy taʼlim muassasalari taʼminoti xarajatlarini, shu jumladan mehnatga haq toʻlashga va unga tenglashtirilgan toʻlovlarga xarajatlarni, ish haqiga, stipendiyalarga hisoblangan, taʼlim muassasalarini moddiy ragʻbatlantirish maxsus jamgʻarmasini shakllantirishga, shuningdek boshqa xarajatlarga, shu jumladan oliy taʼlim muassasalarini rivojlantirishga va ularning moddiy-texnika bazasini yaxshilashga xarajatlarni kiritishni;

oliy taʼlim muassasalarini xarajatlarning bazaviy normativlarini belgilashda talabalar tayyorlashning asosiy yoʻnalishlariga, taʼlim muassasalarining moddiy-texnika bazasi taʼminoti boʻyicha shakllanayotgan xarajatlarga qarab guruhlarga boʻlishni, shuningdek ayrim taʼlim muassasalarida barcha taʼlim muassasalarini ishonchli moliyaviy taʼminlashga koʻmaklashadigan xarajatlarning bazaviy normativlariga tuzatish koeffitsiyentlarini qoʻllashni;

oliy taʼlim muassasalariga ajratilayotgan budjet mablagʻlaridan oqilona foydalanishdan ularning manfaatdorligini oshirishni, budjet mablagʻlaridan maqsadli foydalanilishi uchun masʼuliyatini kuchaytirishni va budjet intizomini mustahkamlashni nazarda tutadigan bir talabani oʻqitish xarajatlaridan kelib chiqib budjet mablagʻlari hisobiga oliy taʼlim muassasalari xarajatlarini normativ rejalashtirish va moliyalashtirish tartibini joriy etish toʻgʻrisidagi takliflari maʼqullansin.

2. Oʻzbekiston Respublikasi Moliya vazirligi Oliy va oʻrta maxsus taʼlim vazirligi bilan birgalikda:

bir hafta muddatda Bir talabani oʻqitish xarajatlaridan kelib chiqib budjet mablagʻlari hisobiga oliy taʼlim muassasalarining xarajatlarini normativ-rejalashtirish va moliyalashtirish tartibi toʻgʻrisidagi Nizomni belgilangan tartibda tasdiqlasin;

budjet mablagʻlari hisobiga moliyalashtiriladigan respublika oliy taʼlim muassasalari boʻyicha bir talabani oʻqitish xarajatlarining bazaviy normativlarini har yili tasdiqlasin, zaruriyat boʻlganda, unga oʻzgartirishlar kiritsin.

3. Oʻzbekiston Respublikasi Oliy va oʻrta maxsus taʼlim vazirligi Mehnat va aholini ijtimoiy muhofaza qilish vazirligi hamda Moliya vazirligi bilan birgalikda ikki oy muddatda oliy taʼlim muassasalarining takomillashtirilgan namunaviy shtatlarini tasdiqlasin va 2010-yil 1-noyabrdan boshlab amalga kiritsin, budjet mablagʻlari hisobiga moliyalashtiriladigan oliy taʼlim muassasalarining maʼmuriy-boshqaruv va yordamchi xodimlari sonini maqbullashtirishni nazarda tutsin.

4. Oʻzbekiston Respublikasi Davlat mulki qoʻmitasi Oliy va oʻrta maxsus taʼlim vazirligi, oliy taʼlim muassasalariga ega boʻlgan vazirliklar va idoralar bilan birgalikda:

budjet mablagʻlari hisobiga moliyalashtiriladigan oliy taʼlim muassasalarining barcha mavjud maydonlarining bandligini va ulardan samarali foydalanilishini bir oy muddatda yalpi xatlovdan oʻtkazsin;

xatlov yakunlari boʻyicha oliy taʼlim muassasalarining ortiqcha va foydalanilmayotgan koʻchmas mulkini sotish yoxud undan boshqa samarali foydalanishning usullari boʻyicha takliflar kiritsin.

5. Oʻzbekiston Respublikasi Moliya vazirligi huzuridagi Davlat moliyaviy nazorati inspeksiyasi oliy taʼlim muassasalarida budjet intizomiga rioya qilinishi ustidan qatʼiy nazoratni taʼminlasin, zaruriyat boʻlganda, xarajatlarning bazaviy normativlari hisob-kitobida taqdim etilgan koʻrsatkichlarning ishonchliligini tekshirsin.

6. Oʻzbekiston Respublikasi Moliya vazirligi Oliy va oʻrta maxsus taʼlim vazirligi, Adliya vazirligi hamda boshqa manfaatdor vazirliklar va idoralar bilan birgalikda bir oy muddatda idoraviy normativ-huquqiy hujjatlarni ushbu qarorga muvofiqlashtirsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.