|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
BUXORO VILOYATIDA NEFTNI QAYTA IShLASh ZAVODI QURILIShI TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Buxoro viloyatida neftni qayta ishlash zavodi qurilishini jadallashtirish maqsadida Vazirlar Mahkamasi qaror qiladi:
1. “Oʻzbekneftgaz” milliy korporatsiyasining zavodning texnologiya qismini Fransiyaning “Teknip” firmasi foydalanishga tayyor holda qurishi toʻgʻrisidagi taklifi qabul qilinsin.
2. “Oʻzbekneftgaz” milliy korporatsiyasi “Teknip” firmasi bilan, kreditlarni sugʻurta qilish xarajatlarini hisobga olmagan holda, jami qiymati 672,1 mln. fransuz franki, 9864,7 mln. yapon yeni va 53,4 mln. Amerika dollari (Kontraktda qayd etilgan hisob-kitob kurslari boʻyicha 262 mln. AQSh dollariga teng) boʻlgan Buxoro neftni qayta ishlash zavodi qurilishi toʻgʻrisidagi Kontraktni imzolasin.
3. Belgilab qoʻyilsinki, loyiha boʻyicha valyuta xarajatlarini mablagʻ bilan taʼminlash:
ushbu loyiha uchun KOFAS (Fransiya) kredit agentligi hamda Yaponiya va AQShning eksport-import banklari tomonidan ochiladigan kredit liniyalari;
Respublika valyuta jamgʻarmasining kreditlari hisobidan amalga oshiriladi.
Xorijiy davlatlarning kreditlarini va Respublika valyuta jamgʻarmasining kreditini toʻlash 1998 — 2006-yillarda “Oʻzbekneftgaz” korporatsiyasi mablagʻlari hisobidan amalga oshiriladi.
4. Oʻzbekiston Respublikasi Tashqi iqtisodiy faoliyat milliy banki:
ikki oy muddatda eksport-kredit agentliklari bilan kredit bitimlari ishlab chiqilishi va tuzilishini tugallasin;
olingan kreditlarni zavod qurilishining buyurtmachisi — “Oʻzneftqaytaishlash” davlat ishlab chiqarish birlashmasiga mablagʻ sifatida bersin.
5. Oʻzbekiston Respublikasi moliya vaziriga ushbu loyiha uchun olinadigan kreditlar boʻyicha Oʻzbekiston Respublikasi Hukumati kafolatlarini imzolash vakolati berilsin.
6. Oʻzbekiston Respublikasi Adliya vazirligi belgilangan tartibda eksport-kredit agentliklarining talablariga muvofiq Oʻzbekiston Respublikasi Hukumati kafolatlari boʻyicha yuridik xulosalarni rasmiylashtirsin.
7. Oʻzbekiston Respublikasi Moliya vazirligi Respublika valyuta jamgʻarmasidan Kontraktda qayd etilgan kurs boʻyicha 138,5 mln. AQSh dollariga teng boʻlgan, shu jumladan, avans toʻlash va kontrakt boʻyicha birinchi navbatdagi toʻlovlar uchun 1995-yilda 69,7 mln (may — 42,7 mln, avgust — 27,0 mln); loyihani mablagʻ bilan taʼminlash jadvaliga muvofiq 1996-yilda — 49,2 mln va 1997-yilda — 19,6 mln AQSh dollariga teng miqdordagi Kontrakt valyutalaridagi Kreditni “Oʻzneftqaytaishlash” birlashmasiga bersin.
8. “Oʻzbekneftgaz” milliy korporatsiyasi “Oʻzistiqbolstat” davlat qoʻmitasi, Moliya vazirligi, Qimmatbaho metallar va qimmatbaho toshlar qoʻmitasi bilan birgalikda zavodning texnologik qurilmalari uchun katalizatorlar tayyorlashga litsenziarlardan texnik talablar olingandan keyin qimmatbaho metallar bilan taʼminlashga oid taklif kiritsin.
9. “Teknip” firmasi bosh kontraktor sifatida va ushbu loyiha boʻyicha uning xorijiy subpudratchilari soliq toʻlashdan ozod qilinsin, obyektda ishlovchi ajnabiy fuqarolardan olinadigan daromad soligʻi, import qilinadigan asbob-uskunalar va materiallardan boj poshlinasi va yigʻimlar undirish ham shu jumlaga kiradi.
10. Mazkur qarorning bajarilishini nazorat qilish Bosh vazirning oʻrinbosarlari Q.J. Haqqulov, R.R. Yunusov, B.S. Hamidov va Oʻ.T. Sultonov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1995-yil 28-aprel,
155-son
