Oliy ta’lim darajasi va sifatini yanada oshirish, iqtisodiyotda talab qilinayotgan yuqori malakali mutaxassislar tayyorlash uchun zamonaviy shart-sharoitlar yaratish, oliy ta’lim muassasalarida innovatsiya faoliyatini rivojlantirish maqsadida Vazirlar Mahkamasi qaror qiladi:

1. Vazirlar Mahkamasining “Respublika oliy ta’lim muassasalari xodimlari mehnatiga haq to‘lashning takomillashtirilgan tizimini tasdiqlash to‘g‘risida” 2008-yil 1-avgustdagi 164-son qarorining (O‘zbekiston Respublikasi QT, 2008-y., 8-son, 40-modda) 4-bandi quyidagi tahrirda bayon qilinsin:

“4. O‘zbekiston Respublikasi Oliy va o‘rta maxsus ta’lim vazirligi, Iqtisodiyot vazirligi, Moliya vazirligi, oliy ta’lim muassasalariga ega bo‘lgan vazirliklar va idoralarning kunduzgi o‘qish bo‘yicha oliy ta’lim yo‘nalishlari va mutaxassisliklariga qarab bir o‘qituvchiga to‘g‘ri keladigan talabalar soni nisbatining cheklangan normativlarini:

2009/2010 o‘quv yilidan boshlab — 1:10,5;

2014/2015 o‘quv yilidan boshlab — 1:12,5 nisbatida belgilash to‘g‘risidagi taklifiga rozilik berilsin”.

2. O‘zbekiston Respublikasi Oliy va o‘rta maxsus ta’lim vazirligi, oliy ta’lim muassasalariga ega bo‘lgan vazirliklar va idoralar, 2014/2015 o‘quv yilidan boshlab bir o‘qituvchiga to‘g‘ri keladigan talabalar soni nisbatining cheklangan normativlarini 1:12,5 nisbatida belgilash uchun respublika oliy ta’lim muassasalarida tashkiliy-metodik va tushuntirish ishlari olib borsinlar hamda zarur shart-sharoitlar yaratishni ta’minlasinlar.

3. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari A.N. Aripov zimmasiga yuklansin.