|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
“BOING” (AQSh) KOMPANIYASIDA IShLAB ChIQARILGAN IKKITA “BOING”-767-300 ER SAMOLYOTINI XARID QILISh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Aviatsiya xizmatlari xalqaro bozorida “Oʻzbekiston havo yoʻllari” milliy aviakompaniyasining raqobatdoshliligini qoʻllab-quvvatlash maqsadida Vazirlar Mahkamasi qaror qiladi:
1. Quyidagilar:
“Oʻzbekiston havo yoʻllari” aviakompaniyasi tomonidan ikkita Boing-767-ZOO ER samolyoti va RW-4062 rusumli dvigatel komplekti yuzasidan “Boing” (AQSh) va “Pratt end Uitney” (AQSh) kompaniyalari bilan kontraktlar imzolanganligi;
respublika budjetidan qaytariladigan asoslarda Oʻzbekiston Respublikasi Moliya vazirligining “Oʻzbekiston havo yoʻllari” milliy aviakompaniyasiga berilgan mablagʻlari hisobidan 30,273,900 AQSh dollari summasida 15 foiz avans toʻlanganligi;
kontraktlar summasining qolgan 85 foizi (171, 552, 100 AQSh dollari) AQShning Eksim banki kafolati ostida Cheyz Manxetten bank krediti hisobidan mablagʻ bilan taʼminlanishi maʼlumot uchun qabul qilinsin.
2. AQShning Eskim banki tomonidan taklif etilgan samolyotlarni komplekt holda yetkazib berish sxemasiga rozilik berilsin, bunda:
kredit resurslarini Cheyz Manxetten bank beradi;
“Oʻzbekiston Faynens Ltd” maxsus korporatsiyasi kredit yuzasidan qarz oluvchi hisoblanadi;
Oʻzbekiston Respublikasi Tashqi iqtisodiy faoliyat milliy banki samolyotlar ijarachisi, “Oʻzbekiston havo yoʻllari” milliy aviakompaniyasi subijarachi hisoblanadi.
3. Oʻzbekiston Respublikasi Tashqi iqtisodiy faoliyat milliy banki va “Oʻzbekiston havo yoʻllari” milliy aviakompaniyasi:
“Oʻzbekiston Faynens Ltd” maxsus korporatsiyasi, AQShning Eksim banki, Cheyz Manxetten bank, “Ferst Sekyuriti Bank Neshnl Assosieyshn” garovining ishonchli egasi va “Kodan Trast Kompani” trast kompaniyasi bilan qatnashish toʻgʻrisida bitim tuzsinlar;
“Oʻzbekiston Faynens Ltd” bilan Ijara toʻgʻrisida asosiy bitim hamda ehtiyot dvigatel va ehtiyot qismlarni toʻliq sotib olish huquqi bilan subijara toʻgʻrisida asosiy bitim tuzsinlar;
Boing-767-300 EK samolyotlarini roʻyxatdan oʻtkazsinlar va Garov toʻgʻrisidagi bitim, Ijara toʻgʻrisidagi asosiy bitim, subijara toʻgʻrisidagi asosiy bitim talablariga muvofiq Bermudda samolyotlar, ehtiyot dvigatel va ehtiyot qismlar garovini rasmiylashtirsinlar.
4. Oʻzbekiston Respublikasi Bosh vazirining oʻrinbosari, Moliya vaziri B. S. Hamidov Oʻzbekiston Respublikasi Hukumati nomidan:
mazkur moliya lizingining amalga oshirilishini tasdiqlovchi kafolat xatini;
Oʻzbekiston Respublikasi Tashqi iqtisodiy faoliyat milliy banki “Oʻzbekiston havo yoʻllari” milliy aviakompaniyasi va “Oʻzbekiston Faynens Ltd” maxsus korporatsiyasining barcha majburiyatlari yuzasidan kafolat bitimini imzolash va AQShning Eksim bankiga yuborishga vakil qilinsin.
5. Oʻzbekiston Respublikasi Adliya vazirligi:
ikkita Boyung-767-300 samolyoti, ehtiyot dvigatel va ularga ehtiyot qismlar yetkazib berishni mablagʻ bilan taʼminlash yuzasidan Oʻzbekiston Respublikasi Hukumati tomonidan Kafolat bitimi hamda AQShning Eksim banki tomonidan berilgan shakl boʻyicha Tashqi iqtisodiy faoliyat milliy banki va “Oʻzbekiston havo yoʻllari” milliy aviakompaniyasining majburiyatlari boʻyicha Yuridik xulosa bersin;
Ijara toʻgʻrisidagi asosiy bitim, Subijara toʻgʻrisidagi asosiy bitim, Garov toʻgʻrisidagi bitim talablariga muvofiq samolyotlar, ehtiyot dvigatel va ularga ehtiyot qismlar garovi roʻyxatdan oʻtkazilganligini tasdiqlasin.
6. Belgilansinki, kreditni toʻlash Ijara toʻgʻrisidagi asosiy bitim, Subijara toʻgʻrisidagi asosiy bitim shartlariga muvofiq “Oʻzbekiston havo yoʻllari” milliy aviakompaniyasining tijorat faoliyati hisobidan ijara toʻlovlarini toʻlash yoʻli bilan amalga oshiriladi.
Pul-kredit siyosati boʻyicha respublika komissiyasi ijara toʻlovlarini va lizing boʻyicha boshqa xarajatlarni oʻz vaqtida toʻlash uchun soʻmlardagi mablagʻlar Respublika valyuta birjasi savdolarida birinchi navbatda konvertatsiya qilinishini taʼminlasin.
7. Oʻzbekiston Respublikasi Tashqi iqtisodiy faoliyat milliy banki, “Oʻzbekiston havo yoʻllari” milliy aviakompaniyasi va mazkur moliya lizingining boshqa qatnashchilari soliqlar, yigʻimlar, poshlinalarning barcha turlaridan, roʻyxatdan oʻtkazganlik uchun toʻlovlardan hamda mazkur moliya lizingini amalga oshirish bilan bogʻliq boʻlgan boshqa barcha toʻlovlardan ozod qilinsin.
8. “Oʻzbekiston havo yoʻllari” milliy aviakompaniyasi samolyotlar tayyorgarlik koʻrgan ekipajlar va muhandis-texnik xodimlar tomonidan ishlatilishini, shuningdek mahsulot yetkazib beruvchi firmalar bilan ehtiyot qismlar va Boing samolyotlarini xavfsiz ishlatish uchun zarur boʻlgan boshqa buyumlar xarid qilish yuzasidan shartnomalar tuzilishini taʼminlasin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov va K.R. Rahimov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1996-yil 25-noyabr,
412-son
