O‘zbekiston Respublikasining Oliy Majlisi respublikada qonun chiqaruvchi hokimiyatni amalga oshiruvchi oliy davlat vakillik organidir.

Oliy Majlis O‘zbekiston Respublikasi Konstitutsiyasiga muvofiq o‘z vakolatiga berilgan har qanday masalani o‘z muhokamasiga qabul qilish huquqiga ega.

O‘zbekiston Respublikasining Oliy Majlisi bir palatali organdir.

Oliy Majlis hududiy bir mandatli saylov okruglari bo‘yicha ko‘p partiyalilik asosida saylanadigan 250 nafar deputatdan iborat.

Oliy Majlis faoliyatining doimiy va samarali bo‘lishi uning sessiyalari, Oliy Majlis Kengashi, Oliy Majlis qo‘mitalari va komissiyalari hamda deputatlarning ishi bilan ta’minlanadi.

Oliy Majlis sayloviga tayyorgarlik ko‘rish va uni o‘tkazish tartibi “O‘zbekiston Respublikasi Oliy Majlisiga saylov to‘g‘risida”gi O‘zbekiston Respublikasi Qonuni va unga muvofiq chiqariladigan boshqa qonun hujjatlari bilan belgilanadi.

O‘zbekiston Respublikasi Oliy Majlisining vakolat muddati — besh yil.

Vakolat muddati tugagach, Oliy Majlis yangi chaqiriq Oliy Majlis ish boshlagunga qadar o‘z faoliyatini davom ettirib turadi.

O‘zbekiston Respublikasi Oliy Majlisining vakolatlari jumlasiga:

1) O‘zbekiston Respublikasining Konstitutsiyasini qabul qilish, unga o‘zgartish va qo‘shimchalar kiritish;

2) O‘zbekiston Respublikasi qonunlarini qabul qilish hamda ularga o‘zgartish va qo‘shimchalar kiritish;

Z) Vazirlar Mahkamasining taklifiga binoan O‘zbekiston Respublikasi ichki va tashqi siyosatining asosiy yo‘nalishlarini belgilash hamda davlat strategik dasturlarini qabul qilish;

4) O‘zbekiston Respublikasining qonun chiqaruvchi, ijro etuvchi va sud hokimiyatlari organlari tizimini va vakolatlarini O‘zbekiston Respublikasining Konstitutsiyasiga muvofiq belgilash;

5) O‘zbekiston Respublikasi tarkibiga yangi davlat tuzilmalarini qabul qilish va ularning O‘zbekiston Respublikasi tarkibidan chiqishi haqidagi qarorlarni tasdiqlash;

6) boj, valyuta va kredit ishlarini qonun yo‘li bilan tartibga solish;

7) ma’muriy-hududiy tuzilish masalalarini qonun yo‘li bilan tartibga solish, O‘zbekiston Respublikasining chegaralarini o‘zgartirish;

8) Vazirlar Mahkamasining taqdimiga binoan O‘zbekiston Respublikasining budjetini qabul qilish va uning ijrosini nazorat etish, soliqlar va boshqa majburiy to‘lovlarni joriy qilish;

9) O‘zbekiston Respublikasining Oliy Majlisiga va mahalliy vakillik organlariga saylov tayinlash; Markaziy saylov komissiyasini tuzish;

10) O‘zbekiston Respublikasi Konstitutsiyasiga muvofiq vakolati tugashi munosabati bilan O‘zbekiston Respublikasi Prezidenti saylov kunini tayinlash;

11) O‘zbekiston Respublikasi Oliy Majlisining Raisini va uning o‘rinbosarlarini saylash;

12) O‘zbekiston Respublikasi Konstitutsiyaviy sudini saylash;

1Z) O‘zbekiston Respublikasi Oliy sudini saylash;

14) O‘zbekiston Respublikasining Oliy xo‘jalik sudini saylash;

14-1) Oliy Majlisning Inson huquqlari bo‘yicha vakilini va uning o‘rinbosarini saylash;

15) O‘zbekiston Respublikasi Prezidentining taqdimiga muvofiq O‘zbekiston Respublikasi Tabiatni muhofaza qilish davlat qo‘mitasining raisini tayinlash va vazifasidan ozod etish;

16) O‘zbekiston Respublikasi Prezidentining Bosh Vazir, uning birinchi o‘rinbosari va o‘rinbosarlarini, Vazirlar Mahkamasi a’zolarini tayinlash va lavozimidan ozod etish to‘g‘risidagi farmonlarini tasdiqlash;

17) O‘zbekiston Respublikasi Prezidentining O‘zbekiston Respublikasi Bosh prokurori va uning o‘rinbosarlarini tayinlash va lavozimlaridan ozod etish to‘g‘risidagi farmonlarini tasdiqlash;

18) O‘zbekiston Respublikasi Prezidentining taqdimiga binoan O‘zbekiston Respublikasi Markaziy banki boshqaruvining raisini tayinlash va lavozimidan ozod etish;

19) O‘zbekiston Respublikasi Prezidentining vazirliklar, davlat qo‘mitalarini va davlat boshqaruvining boshqa organlarini tuzish va tugatish haqidagi farmonlarini tasdiqlash;

20) O‘zbekiston Respublikasi Prezidentining umumiy yoki qisman safarbarlik e’lon qilish, favqulodda holat joriy etish, uning muddatini uzaytirish va to‘xtatish to‘g‘risidagi farmonlarini tasdiqlash;

21) xalqaro shartnomalarni va bitimlarni ratifikatsiya (tasdiqlash) va denonsatsiya (barvaqt to‘xtatish) qilish;

22) davlat mukofotlari va unvonlarini ta’sis etish;

2Z) tumanlar, shaharlar, viloyatlarni tashkil etish, tugatish, ularning nomini va chegaralarini o‘zgartirish;

24) O‘zbekiston Respublikasi Konstitutsiyasida hamda ushbu Qonunda nazarda tutilgan boshqa vakolatlarni amalga oshirish kiradi.

Oliy Majlis deputati o‘z saylovchilarining, shuningdek uni deputatlikka nomzod etib ko‘rsatgan tegishli siyosiy partiya yoki tegishli hokimiyat vakillik organining vakili hisoblanadi.

Deputat o‘z burchlarini ijro etishda O‘zbekiston Respublikasining Konstitutsiyasiga hamda qonun hujjatlariga amal qiladi.

Oliy Majlis deputatining vakolat muddati besh yil.

Oliy Majlis deputatining vakolatlari:

u vakolatini zimmasidan soqit qilgan;

qonunga ko‘ra deputatlik vakolatini bajarishiga nomuvofiq bo‘lgan lavozimga saylangan yoki tayinlangan;

unga nisbatan sudning ayblov hukmi qonuniy kuchga kirgan;

sud uni muomalaga layoqatsiz deb topgan;

chaqirib olingan;

O‘zbekiston Respublikasi fuqaroligini yo‘qotgan;

vafot etgan taqdirda muddatidan ilgari to‘xtatiladi.

Oliy Majlis deputatining vakolatlari qonunda nazarda tutilgan boshqa hollarda ham muddatidan ilgari to‘xtatilishi mumkin.

Oliy Majlis deputatining huquqlari, burchlari va faoliyatining kafolatlari O‘zbekiston Respublikasi qonunlari bilan belgilanadi.

Oliy Majlis deputatlariga belgilangan tartibda ularning deputatlik faoliyati bilan bog‘liq bo‘lgan xarajatlar qoplanadi. Oliy Majlisda doimiy ishlaydigan deputatlar o‘z vakolatlari davrida haq to‘lanadigan boshqa biron-bir lavozimni egallashlari va tadbirkorlik faoliyati bilan shug‘ullanishlari mumkin emas.

Oliy Majlis deputati daxlsizlik huquqidan foydalanadi. U Oliy Majlisning, sessiyalar oralig‘idagi davrda esa — Oliy Majlis Kengashining (navbatdagi sessiyada buni deputatlar e’tiboriga yetkazish sharti bilan) roziligisiz jinoiy javobgarlikka tortilishi, hibsga olinishi yoki sud tomonidan beriladigan ma’muriy jazoga tortilishi mumkin emas.

O‘zbekiston Respublikasi Oliy Majlisi ishining tashkiliy shakli sessiya hisoblanadi.

Oliy Majlis sessiyasi uning majlislarida ochiladi va yopiladi.

Oliy Majlis sessiyasi uning majlislaridan, shuningdek Oliy Majlis qo‘mitalari va komissiyalarining, boshqa organlarining sessiya majlislari oralig‘idagi davrda o‘tkaziladigan majlislaridan iborat bo‘ladi.

Oliy Majlis sessiyalari bir yilda kamida ikki marta chaqiriladi.

Oliy Majlisning saylovdan keyingi birinchi majlisi Markaziy saylov komissiyasi tomonidan saylovdan so‘ng ikki oydan kechiktirmay chaqiriladi.

Oliy Majlis birinchi sessiyasining birinchi majlisi Markaziy saylov komissiyasining Raisi tomonidan ochiladi va O‘zbekiston Respublikasi Oliy Majlisining Raisi saylangunga qadar olib boriladi.

O‘zbekiston Respublikasi Oliy Majlisining majlisi uning ishida jami deputatlarning kamida uchdan ikki qismi ishtirok etgan taqdirdagina vakolatli hisoblanadi.

Qonunlar va Oliy Majlisning boshqa qarorlari faqatgina majlislarda qabul qilinadi.

Oliy Majlis va uning organlari majlisida O‘zbekiston Respublikasining Prezidenti, Bosh Vazir va Vazirlar Mahkamasining a’zolari, Konstitutsiyaviy sudi, Oliy sudi, Oliy xo‘jalik sudining raislari, Bosh prokurori, Markaziy banki boshqaruvining raisi ishtirok etishlari mumkin.

O‘zbekiston Respublikasi Oliy Majlisining navbatdan tashqari sessiyasi Oliy Majlisning Raisi tomonidan uning tashabbusi bilan yoki O‘zbekiston Respublikasi Prezidentining, Qoraqalpog‘iston Respublikasi Jo‘qorg‘i Kengesining yoxud Oliy Majlis deputatlari kamida uchdan bir qismining taklifi bilan chaqiriladi.

O‘zbekiston Respublikasining Oliy Majlisi O‘zbekiston Respublikasi Konstitutsiyasini, konstitutsiyaviy qonunlarni, qonunlarni, qarorlar va boshqa hujjatlarni qabul qiladi.

O‘zbekiston Respublikasining Konstitutsiyasi, Konstitutsiyani o‘zgartiruvchi va to‘ldiruvchi qonunlar, shuningdek boshqa konstitutsiyaviy qonunlar Oliy Majlis jami deputatlarining kamida uchdan ikki qismidan iborat ko‘pchiligi tomonidan qabul qilinadi.

O‘zbekiston Respublikasi Oliy Majlisi tegishli taklif kiritilgandan keyin olti oy mobaynida Konstitutsiyaga o‘zgartishlar hamda tuzatishlar kiritish to‘g‘risida keng va har taraflama muhokamani hisobga olgan holda qonun qabul qilishi mumkin. Agar O‘zbekiston Respublikasining Oliy Majlisi Konstitutsiyaga o‘zgartish kiritish to‘g‘risidagi taklifni rad etsa, taklif kamida bir yil o‘tgandan keyin qayta kiritilishi mumkin.

Qonunlar, qarorlar va boshqa hujjatlar Oliy Majlis jami deputatlarining ko‘pchilik ovozi bilan qabul qilinadi.

O‘zbekiston Respublikasi qonunlarini va Oliy Majlisning boshqa normativ hujjatlarini e’lon qilish ularni qo‘llanishning majburiy sharti hisoblanadi.

O‘zbekiston Respublikasining qonunlari, Oliy Majlisning boshqa normativ hujjatlari ular imzolanganidan keyin uzog‘i bilan bir haftalik muddat ichida e’lon qilinadi hamda agar, hujjatlarning o‘zida boshqa qoida belgilanmagan bo‘lsa, ular e’lon qilinganidan keyin o‘n kun o‘tgach, kuchga kiradi.

O‘zbekiston Respublikasi Oliy Majlisi qonunlarning va O‘zbekiston Respublikasi Oliy Majlisi boshqa hujjatlarining ijrosini nazorat qiladi.

Oliy Majlisning Raisi O‘zbekiston Respublikasi Oliy Majlisi tomonidan deputatlar orasidan yashirin ovoz berish yo‘li bilan Oliy Majlis vakolati muddatiga saylanadi.

Oliy Majlisning Raisi etib bir shaxsni surunkasiga ikki muddatdan ortiq saylash mumkin emas.

Oliy Majlisning Raisi deputatlarning uchdan ikki qismidan ko‘prog‘i yashirin ovoz berishi orqali qabul qilingan Oliy Majlis qaroriga binoan muddatidan ilgari chaqirib olinishi mumkin.

O‘zbekiston Respublikasi Oliy Majlisining Raisi:

1) Oliy Majlis muhokamasiga qo‘yiladigan masalalarni tayyorlashga umumiy rahbarlik qiladi;

2) Oliy Majlis sessiyalarini chaqiradi, sessiyaning kun tartibiga doir takliflarni qo‘mitalar va komissiyalarning raislari bilan birgalikda belgilangan tartibga (Oliy Majlis Reglamentiga) muvofiq tayyorlaydi;

3) Oliy Majlis va uning Kengashi majlislarida raislik qiladi;

4) Oliy Majlis qo‘mitalari va komissiyalarining faoliyatini muvofiqlashtirib boradi;

5) qonunlarning va Oliy Majlis qarorlarining bajarilishini nazorat qilishni tashkil etadi;

6) parlamentlararo aloqalarni amalga oshirish ishlariga va xalqaro parlament tashkilotlari ishi bilan bog‘liq guruhlar faoliyatiga rahbarlik qiladi;

7) Oliy Majlis Raisining o‘rinbosarlari, Oliy Majlis qo‘mitalari va komissiyalari raislari etib saylash uchun Oliy Majlisga nomzodlarni taqdim etadi;

8) qo‘mitalar va komissiyalar raislarining taqdimiga muvofiq Oliy Majlis Kengashi bilan kelishgan holda qo‘mitalar va komissiyalarning rais o‘rinbosarlari hamda kotiblarini tayinlaydi;

9) qo‘mitalar va komissiyalar raislarining taklifiga binoan qo‘mitalar va komissiyalar tarkibini o‘zgartirib, so‘ngra bu o‘zgartishlarni Oliy Majlis tasdig‘iga kiritadi;

10) Oliy Majlisning matbuot organlari faoliyatiga rahbarlikni amalga oshiradi;

11) Oliy Majlis matbuot organlari nizomlarini va tahrir hay’atlari tarkibini hamda ularning ishlashi uchun zarur xarajatlar smetasini tasdiqlaydi;

12) Oliy Majlisga qarashli matbuot organlari muharrirlarini Oliy Majlis Kengashi bilan kelishilgan holda tayinlaydi va lavozimlaridan ozod qiladi;

13) Oliy Majlis deputatlari va devonining ishlashi uchun zarur xarajatlar smetasini tasdiqlaydi;

14) Oliy Majlis va uning Kengashi qarorlarini imzolaydi.

Oliy Majlis Raisi o‘z vakolatiga kiradigan masalalarni Kengash muhokamasiga kiritishga haqlidir.

O‘zbekiston Respublikasi Oliy Majlisining Raisi o‘z vakolatiga kiradigan masalalar yuzasidan farmoyishlar chiqaradi.

Oliy Majlis Raisining o‘rinbosarlari Oliy Majlis deputatlari orasidan yashirin ovoz berish yo‘li bilan Oliy Majlis vakolati muddatiga saylanadilar.

Oliy Majlis Raisining o‘rinbosarlaridan biri Qoraqalpog‘iston vakili — Oliy Majlis deputati bo‘ladi.

O‘zbekiston Respublikasi Oliy Majlisi Raisining o‘rinbosarlari Raisning topshirig‘iga binoan uning ayrim vazifalarini bajaradilar va u yo‘qligida yoki uning o‘z vazifalarini amalga oshirishi mumkin bo‘lmagan hollarda Raisning vazifasini bajarib turadilar.

Oliy Majlis ishini tashkil etish hamda ushbu Qonunda nazarda tutilgan boshqa vakolatlarni amalga oshirish uchun birinchi sessiyada O‘zbekiston Respublikasi Oliy Majlisining Kengashi tuziladi.

O‘zbekiston Respublikasi Oliy Majlisi Kengashining tarkibiga Oliy Majlis Raisi, Oliy Majlis Raisining o‘rinbosarlari, Oliy Majlis qo‘mitalarining, komissiyalarining (muvaqqatlaridan tashqari) raislari, Oliy Majlis deputatlari fraksiyalarining, bloklarining rahbarlari kiradi.

O‘zbekiston Respublikasi Oliy Majlisining Kengashi:

1) Oliy Majlis sessiyasi kun tartibiga va ish tartibiga doir takliflarni tayyorlaydi;

2) Oliy Majlis qo‘mitalari va komissiyalarining amalga oshirilayotgan ishlar to‘g‘risidagi ma’lumotlarini hamda qonunlar va Oliy Majlisning boshqa qarorlari ijrosi to‘g‘risidagi axborotlarni eshitadi;

3) qonun loyihalarini tayyorlash ishini rejalashtirishni uyushtiradi;

4) Oliy Majlis Raisining taklifiga binoan qonun loyihalarini va boshqa hujjatlarni dastlabki tarzda ko‘rib chiqadi;

5) Oliy Majlis sessiyasida deputatlar bildirgan taklif va mulohazalarni tahlil etadi hamda ular yuzasidan tegishli qarorlar qabul qiladi;

6) sessiyalar oralig‘idagi davrda qonun hujjatlarida belgilangan hollarda va tartibda Oliy Majlis deputatlarini javobgarlikka tortishga rozilik berish to‘g‘risidagi masalalarni qarab chiqadi;

6-1) O‘zbekiston Respublikasi Markaziy banki boshqaruvi a’zolarini, O‘zbekiston Respublikasi Tabiatni muhofaza qilish davlat qo‘mitasi raisining o‘rinbosarlarini tayinlaydi va lavozimdan ozod qiladi.

7) Oliy Majlis ishi va deputatlar o‘z vakolatlarini samarali amalga oshirishlari bilan bog‘liq bo‘lgan boshqa masalalarni ko‘rib chiqadi.

Oliy Majlis Kengashi o‘z vakolatiga kiradigan masalalar yuzasidan qarorlar qabul qiladi, ular belgilangan tartibda e’lon qilinadi.

O‘zbekiston Respublikasi Oliy Majlisi birinchi sessiyada deputatlar orasidan o‘z vakolati muddatiga qo‘mitalar, komissiyalarni va ularning raislarini saylaydi. Qo‘mitalar va komissiyalar qonun loyihalari tayyorlash ishlarini olib borish, Oliy Majlis muhokamasiga kiritiladigan masalalarni dastlabki tarzda ko‘rib chiqish va tayyorlash, qonunlarning va Oliy Majlis boshqa qarorlarining ijrosini nazorat qilib turish uchun tuziladi. Qo‘mitalar va komissiyalarning ro‘yxati va miqdor tarkibi Oliy Majlis tomonidan belgilanadi.

Oliy Majlis deputati, qoida tariqasida, Oliy Majlisning faqat bitta qo‘mitasi yoki komissiyasining a’zosi etib saylanishi mumkin.

Qo‘mita yoki komissiya tarkibiga Oliy Majlis Raisi va uning o‘rinbosarlari saylanishlari mumkin emas.

Qo‘mita, komissiya tarkibiga saylanmagan deputat ular ishida maslahat ovozi bilan ishtirok etishga haqlidir.

Qo‘mitalar va komissiyalarning barcha a’zolari teng huquqlardan foydalanadilar.

Zarurat bo‘lgan hollarda Oliy Majlis yangi qo‘mitalar va komissiyalar tuzishi va saylashi, ilgari tuzilgan qo‘mitalar va komissiyalarni tugatishi va qayta tashkil etishi mumkin.

Oliy Majlis qo‘mitalari va komissiyalari Oliy Majlis oldida mas’ul va unga hisobdordirlar.

Qo‘mitalar va komissiyalar Oliy Majlis tomonidan rais va boshqa a’zolardan iborat tarkibda saylanadi. Qo‘mita, komissiyaning rais o‘rinbosari va kotibi qo‘mita, komissiya raisining taqdimiga muvofiq tegishli qo‘mita, komissiya a’zolari orasidan Oliy Majlis Raisi tomonidan Oliy Majlis Kengashi bilan kelishilgan holda tayinlanadi.

Qo‘mita, komissiyalarning (muvaqqatlardan tashqari) raislari, rais o‘rinbosarlari va kotiblari o‘z faoliyatlarini, qoida tariqasida, doimiy asosda amalga oshiradilar.

Oliy Majlis va uning Kengashi aniq topshiriqlarni bajarish uchun deputatlar orasidan muvaqqat komissiyalar tuzishi mumkin. Muvaqqat komissiyalar o‘z zimmalariga yuklangan vazifalarni bajarib bo‘lganlaridan keyin yoxud Oliy Majlis yoki uning Kengashi qaroriga binoan o‘z faoliyatlarini muddatidan ilgari to‘xtatadilar.

Oliy Majlis qo‘mitalari va komissiyalari ishni o‘z rejalariga, Oliy Majlis, uning Raisi va Oliy Majlis Kengashi topshiriqlariga hamda tavsiyalariga muvofiq tashkil etadilar.

Oliy Majlis qo‘mitalari va komissiyalarining majlislari zaruratga qarab chaqiriladi va Oliy Majlis majlislari o‘rtasida ham, shuningdek sessiyalar oralig‘idagi davrda ham o‘tkaziladi.

Oliy Majlis qo‘mitalari va komissiyalarining majlislari, basharti ularda qo‘mita yoki komissiya tarkibining kamida yarmi hozir bo‘lsa, vakolatli hisoblanadi.

Oliy Majlis qo‘mitalari, komissiyalarining majlislari, qoida tariqasida, ochiq o‘tkaziladi. Majlislarga davlat organlari va jamoat birlashmalarining, ilmiy muassasalarning vakillari, mutaxassislar va olimlar maslahat ovozi huquqi bilan, shuningdek qo‘mitalar va komissiyalarning faoliyatidan jamoatchilikni keng xabardor qilish uchun matbuot organlari, televideniye, radio va boshqa ommaviy axborot vositalarining vakillari taklif etilishi mumkin.

Zarurat bo‘lganda qo‘mita yoki komissiya yopiq majlis o‘tkazish to‘g‘risida qaror qabul qilishi mumkin.

Oliy Majlis qo‘mitalari va komissiyalari:

1) Oliy Majlis, uning Raisi, Oliy Majlis Kengashi topshirig‘iga binoan yoki o‘z tashabbuslari bilan tasarruflaridagi masalalar bo‘yicha qonunlarning va Oliy Majlis boshqa qarorlarining loyihalarini ishlab chiqadilar;

2) qonun hujjatlarini takomillashtirish bilan bog‘liq masalalarni tayyorlaydilar, Oliy Majlis sessiyasi kun tartibiga doir takliflar kiritadilar;

3) qo‘mita, komissiya ishida ishtirok etish uchun davlat organlari, jamoat birlashmalari vakillarini, mutaxassislar va olimlarni taklif etadilar;

4) qo‘mitaning yoki komissiyaning o‘zi tomonidan ishlab chiqilgan qonun loyihalarini ham, qonun chiqarish tashabbusi tartibida tushgan qonun loyihalarini ham ilmiy ekspertizaga yuboradilar, ular yuzasidan Vazirlar Mahkamasining xulosasini, tegishli vazirliklar, davlat qo‘mitalari, idoralar, jamoat birlashmalari, shuningdek olimlar va mutaxassislarning fikrini so‘raydilar;

5) o‘rganib chiqish uchun o‘zlariga berilgan qonun loyihalarini dastlabki tarzda ko‘rib chiqish natijalari yuzasidan Oliy Majlisga yoki uning Kengashiga xulosalar, takliflar va mulohazalar taqdim etadilar;

6) Oliy Majlis majlislarida o‘z tasarruflaridagi masalalar bo‘yicha ma’ruzalar va qo‘shimcha ma’ruzalar bilan so‘zga chiqadilar;

7) Oliy Majlisning Raisi yoki Oliy Majlisning Kengashi yo‘llagan respublika budjeti loyihalarini, uning ijrosi to‘g‘risidagi hisobotlarni, shuningdek davlat strategik dasturlari loyihalarini qarab chiqadilar;

8) o‘z tasarruflaridagi masalalar yuzasidan O‘zbekiston Respublikasi Hukumatiga takliflar kiritadilar;

9) o‘z tasarruflaridagi masalalar bo‘yicha davlat organlari va jamoat birlashmalaridan, mansabdor shaxslardan hujjatlarni, yozma xulosalarni, hisobot ma’lumotlarini va boshqa materiallarni talab qiladilar;

10) qonunlarning va respublika Oliy Majlisi boshqa qarorlarining ijro etilishi ustidan nazoratni amalga oshiradilar;

11) vazirliklar, davlat qo‘mitalari va idoralar rahbarlarining, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, korxonalar, muassasalar, tashkilotlar rahbarlarining qonunlar, Oliy Majlisning boshqa hujjatlari, qo‘mitalar, komissiyalar tavsiyalari bajarilishi yuzasidan axborotlarini eshitadilar.

Qarab chiqilayotgan masalalar yuzasidan qo‘mita yoki komissiya tavsiya yo‘sinida qaror qabul qiladi yoxud xulosa beradi. Bir nechta qo‘mita va komissiya tomonidan qarab chiqiladigan masalalar yuzasidan qo‘shma qaror yoki xulosa qabul qilinadi.

Qo‘mita va komissiyalarda barcha masalalar qo‘mita yoki komissiya a’zolari umumiy tarkibining oddiy ko‘pchilik ovozi bilan hal etiladi.

Qo‘mitalar va komissiyalarning davlat organlariga, jamoat birlashmalariga yo‘llanadigan qarorlari ular tomonidan ko‘rib chiqilishi shart, natijalar yoki ko‘rilgan choralar haqida, basharti qarorda o‘zgacha qoida belgilanmagan bo‘lsa, uzog‘i bilan bir oy muddat ichida xabar berilishi lozim.

O‘zbekiston Respublikasi Oliy Majlisi faoliyat ko‘rsatishini ta’minlash uchun Oliy Majlis Kotibiyati tuziladi.

Kotibiyatning tuzilishi, shtatlari va ishlash tartibi Oliy Majlis Raisi tomonidan tasdiqlanadi.

Kotibiyat xodimlarining mehnat munosabatlari Oliy Majlis vakolati muddatiga bog‘liq emas.

O‘zbekiston Respublikasi Oliy Majlisining xarajatlari respublika budjetini tasdiqlash chog‘ida nazarda tutiladi.

O‘zbekiston Respublikasi Oliy Majlisi va uning organlari faoliyati tartiboti Oliy Majlisning Reglamenti bilan belgilanadi.