Shaharsozlik toʻgʻrisidagi qonun hujjatlarining talablari qatʼiyan hamda soʻzsiz bajarilishini taʼminlash, milliy meʼmoriy-madaniy anʼanalarni, respublika aholi punktlarining, ayniqsa qishloq joylarda, zamonaviy qiyofasini shakllantirishni hisobga olgan holda aholi punktlari bosh rejalarini sifatli ishlab chiqish va tasdiqlash, shuningdek Oʻzbekiston Respublikasi Davlat arxitektura va qurilish qoʻmitasi tizimi hududiy tarkibiy boʻlinmalari rahbarlarining shaxsiy javobgarligini oshirish maqsadida:

1. Belgilansinki:

Qoraqalpogʻiston Respublikasi Davlat arxitektura va qurilish qoʻmitasi raisi, viloyatlar va Toshkent shahar arxitektura va qurilish bosh boshqarmalari boshliqlari Oʻzbekiston Respublikasi Vazirlar Mahkamasining farmoyishiga binoan Oʻzbekiston Respublikasi Prezidenti devonining Tashkiliy-kadrlar xizmati bilan kelishilgan holda lavozimlarga tayinlanadilar va ozod etiladilar;

shaharlar va tumanlar arxitektura va qurilish boshqarmalari (boʻlimlari) boshliqlari Qoraqalpogʻiston Respublikasi Vazirlar Kengashining, viloyatlar va Toshkent shahar hokimlarining qarorlariga binoan Oʻzbekiston Respublikasi Vazirlar Mahkamasining Kommunal soha, transport, kapital qurilish va qurilish industriyasi majmuasi Rahbari bilan kelishilgan holda lavozimlarga tayinlanadilar va ozod etiladilar.

2. Oʻzbekiston Respublikasi Vazirlar Mahkamasi (Sh. Mirziyoyev) bir oy muddatda, ushbu Qarordan kelib chiqqan holda, Hukumat qarorlariga oʻzgartish va qoʻshimchalar kiritsin.

3. Mazkur Qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev va Oʻzbekiston Respublikasi Prezidentining Davlat maslahatchisi — Tashkiliy-nazorat xizmati rahbari I.B. Abdullayev zimmasiga yuklansin.