Adliya organlarining roli va masʼuliyatini oshirish, qonun chiqarish faoliyatini kuchaytirish, aholiga huquqiy xizmatni yaxshilash, fuqarolarning konstitutsiyaviy huquqlari va qonuniy manfaatlarini himoya qilish maqsadida:

1. Oʻzbekiston SSRning ittifoq-respublika Adliya vazirligi Oʻzbekiston Respublikasining Adliya vazirligiga aylantirilsin.

2. Oʻzbekiston Respublikasi Prezidenti huzuridagi Vazirlar Mahkamasi Oʻzbekiston Respublikasi Adliya vazirligining faoliyatini tashkil etish yuzasidan tegishli qaror qabul qilsin. Qarorda quyidagilarni tuzish koʻzda tutilsin:

Oʻzbekiston Respublikasining Adliya vazirligi huzurida ixtisoslashtirilgan “Adolat” nashriyoti hamda “Hayot va qonun” yuridik jurnalini chiqarish.

3. Belgilab qoʻyilsinki, Oʻzbekiston Respublikasining Adliya vazirligi:

Oʻzbekiston Respublikasining huquqqa doir siyosatini oʻtkazishda respublika davlat organlarining faoliyatini muvofiqlashtiradi;

respublika organlari bilan birgalikda Oʻzbekiston Respublikasi hamda uning fuqarolarining huquqlari va qonuniy manfaatlari himoya qilinishini taʼminlaydi;

tegishli huquqiy masalalarni yechish, Oʻzbekiston Respublikasi Prezidentining shaʼni va qadr-qimmatini himoya qilish chogʻida Prezident manfaatlarining ifodachisi boʻladi;

boshqa davlatlarning sudlarida tomonlardan biri Oʻzbekiston Respublikasi boʻlgan nizolarni koʻrib chiqish chogʻida Oʻzbekiston Respublikasidan vakillik qiladi.

Oʻzbekiston Respublikasining Adliya vazirligi mana shu vazifalarni amalga oshirish uchun boshqa respublikalar hamda ajnabiy davlatlarning tegishli davlat organlari va yuridik muassasalari bilan, shuningdek xalqaro tashkilotlar bilan belgilangan tartibda muzokaralar olib borishga hamda shartnomalar va bitimlar tuzishga haqlidir.

Oʻzbekiston Respublikasining Adliya vazirligi ikki oy muddat ichida huquqiy muhofaza qiluvchi boshqa organlarning ishtirokida Oʻzbekiston Respublikasining huquqiy siyosatini muvofiqlashtiruvchi Kengash toʻgʻrisidagi Nizomni tayyorlashi zarur.

4. Oʻzbekiston Respublikasining Adliya vazirligi zimmasiga quyidagi vazifalar yuklansin:

davlat va xoʻjalik organlarining huquqiy xizmat xodimlarini tayyorlash, qayta tayyorlash va attestatsiyadan oʻtkazishni tashkil qilish, shuningdek fuqarolarga huquqiy yordam berish bilan bogʻliq tadbirkorlik faoliyatiga litsenziya berish;

vazirliklar, davlat komitetlari va idoralar oʻzlarining huquq doirasida qabul qiladigan hamma uchun majburiy tusdagi meʼyoriy hujjatlarni huquqiy jihatdan ekspertiza qilish hamda roʻyxatdan oʻtkazish;

Oʻzbekiston Respublikasi Adliya vazirligining ixtiyoriga oʻtkazilgan masalalarga doir qonun hujjatlarini oʻzgartirish va ularga qoʻshimchalar kiritish toʻgʻrisida takliflar ishlab chiqib, ularni Oʻzbekiston Respublikasi Oliy Kengashining Rayosatiga taqdim etish;

Buxoro viloyat sudining doimiy sessiyasiga, respublika hududida alohida tartib bilan ishlaydigan obyektlarga xizmat koʻrsatuvchi davlat notarial idorasi va huquqiy maslahat berish xonalariga tashkiliy rahbarlikni amalga oshirish.

5. Oʻzbekiston Respublikasining vazirliklari, davlat komitetlari va idoralari zimmasiga oʻzlarining huquq doirasida meʼyoriy hujjatlarni chiqarish chogʻida fuqarolarning konstitutsiyaviy huquqlari va qonuniy manfaatlarini taʼminlashga qaratilgan yagona huquqiy siyosatni oʻtkazish majburiyati yuklansin.

6. Xalq deputatlari mahalliy Kengashlarining ijroiya komitetlari uch oy muddat ichida sudlarni, notarial idoralarni, ZAGS organlarini va advokatlarning huquqiy maslahat berish xonalarini binolar, inshootlar, transport vositalari hamda tashkiliy texnika bilan taʼminlashga yordam bersinlar.

7. Adliya vazirligiga qonun chiqarish tashabbusi huquqini berish masalasini muhokama qilish toʻgʻrisida Oʻzbekiston Respublikasi Oliy Kengashiga taklif kiritilsin.

Ushbu Farmon imzolangan paytdan boshlab kuchga kiradi.