1-modda. Oʻzbekiston Respublikasining 2002-yil 5-aprelda qabul qilingan “Sugʻurta faoliyati toʻgʻrisida”gi 358-II-sonli Qonuniga (Oʻzbekiston Respublikasi Oliy Majlisining Axborotnomasi, 2002-yil, № 4-5, 68-modda; Oʻzbekiston Respublikasi Oliy Majlisi palatalarining Axborotnomasi, 2006-yil, № 10, 536-modda; 2007-yil, № 9, 415-modda; 2008-yil, № 4, 192-modda) quyidagi oʻzgartish va qoʻshimchalar kiritilsin:

1) 6¹-moddaning birinchi qismi:

quyidagi mazmundagi beshinchi xatboshi bilan toʻldirilsin:

“qimmatli qogʻozlar bozorida investitsiya vositachisi sifatida professional faoliyatni amalga oshirish. Bunda mazkur faoliyat turini amalga oshirish uchun sugʻurtalovchining litsenziya olishi talab qilinmaydi”;

beshinchi—oʻn beshinchi xatboshilari tegishincha oltinchi—oʻn oltinchi xatboshilar deb hisoblansin;

2) 10-moddaning ikkinchi qismi:

oltinchi xatboshisi quyidagi tahrirda bayon etilsin:

“sugʻurtalovchining, sugʻurta brokerining rahbariga va bosh buxgalteriga qoʻyiladigan malaka talablarini belgilaydi”;

quyidagi mazmundagi toʻqqizinchi xatboshi bilan toʻldirilsin:

“sugʻurta faoliyati toʻgʻrisidagi qonun hujjatlari, shu jumladan belgilangan iqtisodiy normativlar sugʻurtalovchi tomonidan buzilganligi uchun sugʻurtalovchining ustav fondi eng kam miqdorining 0,1 foizigacha miqdorda belgilangan tartibda jarima soladi”;

toʻqqizinchi—oʻn beshinchi xatboshilari tegishincha oʻninchi—oʻn oltinchi xatboshilar deb hisoblansin;

3) 12-moddaning birinchi qismidagi “Oʻzbekiston Respublikasi Vazirlar Mahkamasi tomonidan” degan soʻzlar “qonun hujjatlari bilan” degan soʻzlar bilan almashtirilsin.

2-modda. Ushbu Qonun rasmiy eʼlon qilingan kundan eʼtiboran kuchga kiradi.