Oʻzbekiston Respublikasi Prezidentining “Oʻzbekiston Respublikasi Qurolli Kuchlari harbiy xizmatchilarini uy-joy bilan taʼminlash tartibi toʻgʻrisidagi Nizomni tasdiqlash haqida” 2007-yil 14-sentabrdagi PQ-694-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Qurolli Kuchlarining harbiy xizmatchilariga uzoq muddatli ipoteka kreditlaridan foydalangan holda kvartiralar sotib olish va yakka tartibdagi uy-joylar qurish uchun yer uchastkalari ajratish tartibi toʻgʻrisidagi Nizom ilovaga muvofiq tasdiqlansin.

2. Oʻzbekiston Respublikasi Mudofaa vazirligi, Ichki ishlar vazirligi, Favqulodda vaziyatlar vazirligi va Milliy xavfsizlik xizmatiga kamida 10 kalendar yil xizmat qilgan va yangi kontrakt tuzgan harbiy xizmatchi uchun sotib olinadigan kvartira yoki qurilayotgan yakka tartibdagi uy qiymatining 25 foizi miqdoridagi dastlabki badalni oʻzlarining budjetdan tashqari mablagʻlari hisobiga toʻlashga ruxsat berilsin.

3. Belgilansinki, kvartira sotib olish yoki yakka tartibda uy-joy qurishga ular uchun tegishli vazirliklar va idoralar tomonidan dastlabki badal toʻlanayotgan harbiy xizmatchilar davlat hisobiga uy-joy bilan taʼminlanmaganlar roʻyxatlaridan chiqariladi.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Markaziy banki raisi F.M. Mullajonov zimmasiga yuklansin.

1. Ushbu Nizom Oʻzbekiston Respublikasi Qurolli Kuchlarining harbiy xizmatchilariga uzoq muddatli ipoteka kreditlaridan foydalangan holda kvartiralar sotib olish va yakka tartibdagi uy-joylar qurish uchun yer uchastkalari ajratish tartibini belgilaydi.

2. Ushbu Nizom kamida 10 kalendar yil xizmat qilgan va yangi kontrakt tuzgan uy-joy bilan taʼminlanmagan yoki uy-joy sharoitlarini yaxshilashga muhtoj boʻlgan kontrakt boʻyicha harbiy xizmatchilarga (keyingi oʻrinlarda “harbiy xizmatchilar” deb ataladi) tatbiq etiladi.

3. Harbiy xizmatchilar tomonidan uzoq muddatli ipoteka kreditlaridan foydalangan holda kvartiralar sotib olish va yakka tartibda uy-joylar qurish uchun ipoteka krediti olishda uy-joy maydonining belgilangan ijtimoiy normasi doirasida sotib olinadigan yoki quriladigan uy-joy qiymatining 25 foizi miqdoridagi dastlabki badal Oʻzbekiston Respublikasi Mudofaa vazirligi, Ichki ishlar vazirligi, Favqulodda vaziyatlar vazirligi va Milliy xavfsizlik xizmati (keyingi oʻrinlarda “tegishli vazirliklar” deb ataladi) tomonidan ularning budjetdan tashqari mablagʻlari hisobiga toʻlanadi.

4. Ipoteka krediti harbiy xizmatchilarga xizmat joyi yoki harbiy xizmat belgilangan joy (chaqiriq) boʻyicha beriladi.

5. Harbiy xizmatchilarga tijorat banklari tomonidan ipoteka krediti berish Oʻzbekiston Respublikasi Vazirlar Mahkamasining “Uy-joy qurilishiga, uni rekonstruksiya qilishga va sotib olishga ipoteka krediti berish toʻgʻrisidagi Nizomni tasdiqlash haqida” 2007-yil 3-yanvardagi 2-son qarorida nazarda tutilgan Ipoteka krediti berishni qoʻllab-quvvatlash jamgʻarmasi mablagʻlari hisobiga amalga oshiriladi.

6. Harbiy xizmatchi kvartira sotib olish yoki yakka tartibda uy-joy qurish uchun tegishli vazirlikdan dastlabki badalni olish uchun harbiy qismning turar joy komissiyasiga quyidagi hujjatlarni taqdim etadi:

dastlabki badalni olish uchun harbiy qism komandiri nomiga raport;

oilaning tarkibi toʻgʻrisida turar joydan maʼlumotnoma;

harbiy xizmatchining uy-joy bilan taʼminlanish huquqini tasdiqlaydigan hujjat hisoblanadigan uy-joy attestati;

nikoh tuzilganligi va bolalar tugʻilganligi toʻgʻrisidagi (bolalar boʻlsa) guvohnomalarining notarial tasdiqlangan nusxalari;

harbiy xizmatchining pul taʼminoti va u bilan birga yashaydigan oila aʼzolarining ish haqi, doimiy ish joyi boʻyicha (doimiy ish joyi boʻlgan taqdirda) keyingi 12 oy uchun amalga oshirilgan chegirmalar miqdori toʻgʻrisidagi maʼlumotnoma yoki yashash joyi boʻyicha davlat soliq xizmati organi tomonidan tasdiqlangan oʻsha davr uchun oila aʼzolarining daromadlari toʻgʻrisidagi deklaratsiyalarning nusxalari;

kalendar boʻyicha hisoblab chiqilgan uzoq muddatli xizmat toʻgʻrisidagi maʼlumotnoma;

harbiy qism komandirining kontrakt tuzilganligi toʻgʻrisidagi buyrugʻidan koʻchirma.

7. Harbiy qismning turar joy komissiyasi 10 kun muddatda taqdim etilgan hujjatlarni oʻrganadi va ularda koʻrsatilgan maʼlumotlarning haqiqiyligini tekshiradi.

Harbiy xizmatchi uchun dastlabki badalni toʻlash toʻgʻrisida ijobiy qaror qabul qilingan taqdirda turar joy komissiyasining qarori zarur hujjatlar ilova qilingan holda ikki kun muddatda tegishli vazirlikning markaziy turar joy komissiyasiga koʻrib chiqish uchun yuboriladi.

Dastlabki badalni toʻlashning rad etilishi toʻgʻrisida qaror qabul qilingan taqdirda harbiy qismning turar joy komissiyasi qaror qabul qilingan kundan boshlab bir kun muddatda sabablarini koʻrsatib, harbiy xizmatchini bu haqda yozma shaklda xabardor qiladi.

8. Tegishli vazirlikning markaziy turar joy komissiyasi tomonidan bir hafta muddatda harbiy qism turar joy komissiyasining qarori va unga ilova qilingan hujjatlar koʻrib chiqiladi va koʻrib chiqish natijalari boʻyicha ikki nusxada bayonnoma tuziladi. Bayonnomaning har ikkala nusxasi markaziy turar joy komissiyasining raisi imzosi va gerbli muhr bilan tasdiqlanadi.

Tegishli vazirlikning markaziy turar joy komissiyasi bayonnomasining bir nusxasi barcha hujjatlar ilova qilingan holda tekshirish, umumlashtirish va dastlabki badalni toʻlash uchun pul mablagʻlari ajratish toʻgʻrisida tegishli vazirlikning rahbari buyrugʻi loyihasini tayyorlash uchun ikki kun muddatda tegishli vazirlikning kvartiralardan foydalanish organiga yuboriladi.

9. Tegishli vazirlik rahbarining buyrugʻi asosida ushbu vazirlikning kvartiralardan foydalanish organi harbiy xizmatchiga tilxat bilan dastlabki badal toʻlanganligi toʻgʻrisida kafolat xati beradi.

Tegishli vazirliklar tomonidan dastlabki badalni toʻlash pul mablagʻlarini harbiy xizmatchining bankda ochilgan maxsus depozit hisob raqamiga oʻtkazish yoʻli bilan, harbiy xizmatchi tomonidan kredit shartnomasi tuzilgandan keyin, amalga oshiriladi.

10. Harbiy xizmatchilarning arizasi va tegishli vazirliklarning mahalliy davlat hokimiyati organlariga iltimosnomasi boʻyicha harbiy xizmatchilarga ajratiladigan uy-joy oʻrniga ularga yakka tartibda uy-joy qurish uchun bepul asosda yer uchastkasi belgilangan tartibda berilishi mumkin. Yer uchastkasini oʻzlashtirish davrida harbiy xizmatchilar va uning oila aʼzolariga ikki yilgacha boʻlgan muddatda xizmat kvartirasi saqlab qolinadi.

Uy-joy sharoitlarini yaxshilash oʻrniga harbiy xizmatchilarga ularning arizasi boʻyicha, belgilangan tartibda yer uchastkasi berilishi mumkin.

11. Yakka tartibda uy-joy qurish uchun yer uchastkalari berish Oʻzbekiston Respublikasi Vazirlar Mahkamasining “Yakka tartibdagi uy-joy qurilishi toʻgʻrisidagi Nizomni tasdiqlash haqida” 2006-yil 30-dekabrdagi 272-son qarorida belgilangan tartibda amalga oshiriladi.

12. Kvartira sotib olish yoki yakka tartibda uy-joy qurishga oʻzlari uchun tegishli vazirliklar tomonidan dastlabki badal oʻtkazilgan harbiy xizmatchilar davlat hisobiga uy-joy bilan taʼminlanmaganlar roʻyxatlaridan chiqariladi.

13. Ushbu Nizomga muvofiq ipoteka krediti olgan va qonun hujjatlarida nazarda tutilgan asoslar boʻyicha harbiy xizmatdan boʻshatilgan harbiy xizmatchilar tegishli vazirliklar tomonidan toʻlangan badalning qonun hujjatlarida belgilangan tartibda indeksatsiya qilish yoʻli bilan qayta baholangan summasini qaytaradilar, Oʻzbekiston Respublikasi Prezidentining 2007-yil 14-sentabrdagi PQ-694-son qarori bilan tasdiqlangan Oʻzbekiston Respublikasi Qurolli Kuchlari harbiy xizmatchilarini uy-joy bilan taʼminlash tartibi toʻgʻrisidagi Nizomning 4-bandida koʻrsatilgan shaxslar bundan mustasno.

14. Harbiy xizmatchi halok boʻlgan yoki xizmat vazifalarini bajarishda ogʻir tan jarohatlari olishi oqibatida mehnat qobiliyatini yoʻqotgan taqdirda qaytarilmagan kredit va u boʻyicha hisoblangan foizlar summasi tegishli vazirlikning rahbari qarori asosida vazirlikning budjetdan tashqari mablagʻlari hisobiga qoplanadi.