Oliy taʼlim muassasalari xodimlarining mehnatiga haq toʻlash tizimini yanada takomillashtirish va taʼlim-tarbiya ishlari darajasi hamda sifatini oshirishda ularni moddiy ragʻbatlantirishning samarali mexanizmini joriy etish, mamlakat iqtisodiyoti tarmoqlari hamda sohalarida ehtiyoj sezilayotgan yuqori malakali, raqobatdosh kadrlar tayyorlashda professor-oʻqituvchilar tarkibi qoʻshayotgan hissasi munosib baholanishini taʼminlash maqsadida:

1. Oʻzbekiston Respublikasi Oliy va oʻrta maxsus taʼlim vazirligi, Mehnat va aholini ijtimoiy muhofaza qilish vazirligi hamda Moliya vazirligining 2008-yil 1-sentabrdan boshlab oliy taʼlim muassasalari professor-oʻqituvchilar tarkibi va rahbar xodimlari mehnatiga haq toʻlashning bazaviy lavozim maoshlariga amaldagi doimiy ustama va qoʻshimcha toʻlovlarni qoʻshgan holda takomillashtirilgan tizimini joriy etish toʻgʻrisidagi takliflari maʼqullansin.

2. Oʻzbekiston Respublikasi Moliya vazirligi, Oliy va oʻrta maxsus taʼlim vazirligi oliy taʼlim muassasalari xodimlarining bazaviy lavozim maoshlari miqdorini shakllantirishda Oʻzbekiston Respublikasi Prezidentining 2008-yil 21-iyuldagi PF-4014-sonli Farmoniga muvofiq budjet muassasalari va tashkilotlari xodimlarining ish haqi oʻrta hisobda 1,2 barobar oshirilishi bilan bir qatorda oliy taʼlim muassasalarining professor-oʻqituvchilar tarkibi va rahbar xodimlariga joriy etilayotgan bazaviy lavozim maoshlarini oʻrtacha 25 foiz miqdorida, jami esa 1,5 barobarga oshirishni nazarda tutsin.

3. Oliy taʼlim muassasalari professor-oʻqituvchilar tarkibi va rahbar xodimlarining lavozim maoshlariga alohida ish sharoitlari, xorijiy tillarni bilishi, muayyan xizmat muddatini ado etganligi uchun qoʻshimcha haq toʻlash va qonun hujjatlarida belgilangan boshqa qoʻshimcha haq toʻlashning amaldagi turlari va miqdorlari saqlab qolinsin.

4. Oʻzbekiston Respublikasi Moliya vazirligi, Oliy va oʻrta maxsus taʼlim vazirligi, oliy taʼlim muassasalariga ega boʻlgan vazirliklar va idoralar mazkur qarorda belgilangan tadbirlarni amalga oshirish bilan bogʻliq xarajatlarning oʻz vaqtida va toʻliq moliyalashtirilishini taʼminlasin.

5. Oʻzbekiston Respublikasi Vazirlar Mahkamasi ikki hafta muddatda:

oliy taʼlim muassasalarining professor-oʻqituvchilar tarkibi va rahbar xodimlari mehnatiga haq toʻlashning bazaviy lavozim maoshlarini;

Oliy taʼlim muassasalari xodimlari mehnatiga haq toʻlash toʻgʻrisidagi nizomni tasdiqlasin.

6. Oʻzbekiston Respublikasi Oliy va oʻrta maxsus taʼlim vazirligi manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin;

idoraviy normativ hujjatlarni ushbu qarorga muvofiqlashtirsin.

7. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.