Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuniga muvofiq, Oʻzbekiston Respublikasi Markaziy banki Boshqaruvi qaror qiladi:

1. “Oʻzbekiston Respublikasi Markaziy banki tomonidan tijorat banklari va ularning filiallari rahbarlari, bosh buxgalterlari, boshqaruv aʼzolari, kredit uyushmalari hamda mikrokredit tashkilotlari ijro organlari rahbarlari lavozimlariga tavsiya etilayotgan nomzodlarga nisbatan malaka talablari qoʻyish tartibi toʻgʻrisida nizom”ga (2006-yil 14-noyabr, roʻyxat raqami 1641 — Oʻzbekiston Respublikasi qonun hujjatlari toʻplami, 2006-yil, 46-47-son, 467-modda) ilovaga muvofiq oʻzgartirish va qoʻshimchalar kiritilsin.

2. Ushbu qaror Oʻzbekiston Respublikasi Adliya vazirligida davlat roʻyxatiga olingan kundan boshlab oʻn kun oʻtgach kuchga kiradi.

1. 3-band quyidagi mazmundagi ikkinchi xatboshi bilan toʻldirilsin:

“Tijorat banklari va ularning filiallari rahbarlari, bosh buxgalterlari, boshqaruv aʼzolari lavozimlariga tavsiya etilayotgan nomzodlarning lavozimga muvofiqligini baholash maqsadida Tijorat banklarining Bosh banklarida kasbga muvofiqlikni aniqlash boʻyicha ichki komissiya tashkil etiladi. Ushbu komissiya tarkibiga Bank Kengashining aʼzolaridan biri kiritilishi shart”.

2. 7-bandning ikkinchi xatboshidagi “Tijorat banklari rahbar xodimlarini tanlash va ular bilan ishlash Bosh boshqarmasiga” soʻzlari “Kredit tashkilotlari rahbar xodimlari bilan ishlash departamentiga” soʻzlari bilan almashtirilsin.

3. 15 va 16-bandlardagi “Tijorat banklari rahbar xodimlarini tanlash va ular bilan ishlash Bosh boshqarmasi” soʻzlari “Kredit tashkilotlari rahbar xodimlari bilan ishlash departamenti” soʻzlari bilan almashtirilsin.

4. Quyidagi tahrirdagi 23 va 24-bandlar bilan toʻldirilsin:

“23. Xodim tijorat banklarining Qoraqalpogʻiston Respublikasi, viloyatlar, shahar va tuman filiallari, Amaliyot boshqarma (boʻlim)lariga rahbar yoki bosh buxgalter lavozimiga tayinlanganidan soʻng (Markaziy bank nomenklaturasiga kiruvchi lavozimga teng yoki yuqori lavozimga tayinlangan xodimlar bundan mustasno) tijorat banklarining Bosh banki tomonidan mazkur filialning iqtisodiy koʻrsatkichlari boʻyicha 1 yil davomida monitoring oʻrnatilib, uning tahlili har chorak yakuni boʻyicha bank Boshqaruvi muhokamasiga kiritib boriladi.

24. Tijorat banklarining Qoraqalpogʻiston Respublikasi, viloyat, shahar, tuman filiali, Amaliyot boshqarmasi (boʻlimi)ga rahbar yoki bosh buxgalter (Markaziy bank nomenklaturasiga kiruvchi lavozimga teng yoki yuqori lavozimga tayinlangan xodimlar bundan mustasno) lavozimiga tavsiya etilayotgan nomzod Oʻzbekiston Respublikasi Markaziy bankining Kasbga muvofiqlikni aniqlash komissiyasining suhbat va (yoki) test sinoviga taklif etilishidan avval bank tizimining oʻquv markazlarida tashkil etilgan kurslarda yoki tegishli oliy oʻquv yurtlari huzuridagi malaka oshirish kurslarida oʻz malakasini oshirishi hamda malaka oshirganligi toʻgʻrisidagi hujjat nusxasini Markaziy bankka taqdim etishi lozim”.

5. 1-ilovada:

toʻrtinchi xatboshi “va malaka oshirganligi toʻgʻrisida hujjat nusxasi” degan soʻzlar bilan toʻldirilsin;

oltinchi xatboshi quyidagi tahrirda bayon etilsin:

“tavsiya etilayotgan nomzod bilan Bosh bankda oʻtkazilgan suhbat natijalari boʻyicha rasmiylashtirilgan bayonnoma nusxasi va nomzod bilan oʻtkazilgan suhbat varaqasi”;

oʻninchi xatboshi “hamda nomzodning pasporti nusxasi” degan soʻzlar bilan toʻldirilsin.

6. 2-ilovadagi toʻqqizinchi xatboshi “hamda nomzodning pasporti nusxasi” degan soʻzlar bilan toʻldirilsin.