|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
AVTOMOTOTRANSPORT VOSITALARIDAN FOYDALANISh VA ULARNI TASARRUF ETISh HUQUQIGA IShONChNOMALARNI GERBLI (MAXSUS) BLANKALARDA QAYTA RASMIYLAShTIRIShGA DOIR QOʻShIMChA ChORA-TADBIRLAR TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Vazirlar Mahkamasining “Avtomototransport vositalarini sotib olish, ulardan foydalanish va ularni boshqa shaxsga berishni tartibga solishga doir qoʻshimcha chora-tadbirlar toʻgʻrisida” 2006-yil 7-martdagi 38-son qarori yanada toʻliq amalga oshirilishini taʼminlash, shuningdek avtomototransport vositalari egalari va haydovchilarning istaklarini hisobga olib Vazirlar Mahkamasi qaror qiladi:
1. Oʻzbekiston Respublikasi Adliya vazirligi va Ichki ishlar vazirligining avtomototransport vositalaridan foydalanish va ularni tasarruf etish huquqi uchun 2006-yil 1-iyulgacha berilgan ishonchnomalarni gerbli (maxsus) blankalarda qayta rasmiylashtirish uchun qoʻshimcha imkoniyat berish toʻgʻrisidagi taklifi qabul qilinsin.
2. Belgilansinki:
koʻrsatib oʻtilgan ishonchnomalarni gerbli (maxsus) blankalarda qayta rasmiylashtirish 2007-yil 1-iyulgacha amalga oshiriladi;
ishonchnomalar gerbli (maxsus) blankalarda qayta rasmiylashtirilganligi uchun davlat boji undirilmaydi;
qayta rasmiylashtirish uchun ishonchnoma ishonch bildiruvchi yoki ishonchli vakil tomonidan pasport koʻrsatilgan holda oldin rasmiylashtirilgan notarial idoraga taqdim etiladi;
gerbli (maxsus) blankalarda qayta rasmiylashtirilmagan ishonchnomalar boʻyicha avtomototransport vositalarini boshqarishga yoʻl qoʻyilmaydi.
3. Oʻzbekiston Respublikasi Ichki ishlar vazirligi, Adliya vazirligi:
mazkur qaror talablari avtomototransport vositalari egalari va aholi eʼtiboriga belgilangan tartibda yetkazilishini, ular orasida shu jumladan ommaviy axborot vositalari orqali zarur tushuntirish ishlari olib borilishini taʼminlasinlar;
ishonchnomalar qayta rasmiylashtirilishi va hisobga qoʻyilishi ustidan qatʼiy nazoratni taʼminlasinlar, shuningdek ishonchnomalar notariuslar tomonidan qayta rasmiylashtirilishida va Yoʻl harakati xavfsizligi davlat xizmati organlarida hisobga qoʻyilishida aholi uchun qulay shart-sharoitlar yaratilgan holda oldin berilgan ishonchnomalarni gerbli (maxsus) blankalarda oʻz vaqtida qayta rasmiylashtirishga doir zarur chora-tadbirlar koʻrsinlar.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.M. Xanov zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2007-yil 4-may,
91-son
(Oʻzbekiston Respublikasi qonun hujjatlari toʻplami, 2007-y., 17-18-son, 185-modda)
