|
Hujjat kuchini yo‘qotgan " " 09.10.2006
|
Hujjat 05.03.2004 00 sanasi holatiga
Amaldagi versiyaga o‘tish |
Oʻzbekiston Respublikasi Vazirlar Mahkamasining
qarori
OʻZBEKISTON “OʻZKOMMUNXIZMAT” AGENTLIGI FAOLIYATINI TAKOMILLAShTIRISh ChORA-TADBIRLARI TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2006-yil 9-oktabrdagi 213-sonli “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Prezidentining “Oʻzbekiston “Oʻzkommunxizmat” agentligi faoliyatini takomillashtirish va kommunal xoʻjalik korxonalarini moliyaviy sogʻlomlashtirish chora-tadbirlari toʻgʻrisida” 2006-yil 17-avgustdagi PQ–445-son )” qaroriga asosan oʻz kuchini yoʻqotgan.
Oʻzbekiston Respublikasi Prezidentining “Respublika davlat boshqaruvi organlari tizimini takomillashtirish toʻgʻrisida” 2003-yil 9-dekabrdagi PF-3358-son Farmonini bajarish yuzasidan, Oʻzbekiston “Oʻzkommunxizmat” agentligining kommunal xizmat koʻrsatish tizimida iqtisodiy islohotlarni yanada chuqurlashtirish boʻyicha faoliyatini takomillashtirish va uning samaradorligini oshirishni taʼminlash maqsadida Vazirlar Mahkamasi qaror qiladi:
1. Quyidagilar Oʻzbekiston “Oʻzkommunxizmat” agentligining asosiy vazifalari hisoblansin:
kommunal xizmat koʻrsatish sohasidagi Oʻzbekiston Respublikasi qonunlarini, Oʻzbekiston Respublikasi Prezidentining farmonlarini, boshqa normativ-huquqiy hujjatlarni amalda bajarish va ularning ijrosi ustidan taʼsirchan nazoratni amalga oshirish;
respublika kommunal xizmat koʻrsatish tizimida iqtisodiy islohotlarni chuqurlashtirish boʻyicha davlat siyosatini va Hukumat tomonidan qabul qilingan chora-tadbirlarni amalga oshirish;
kommunal xizmat koʻrsatish tizimini isloh qilish boʻyicha ishlarni muvofiqlashtirish, kommunal xizmat koʻrsatish sohasidagi normativ-huquqiy hujjatlarni, texnik-iqtisodiy shartlarni ishlab chiqish va belgilangan tartibda tasdiqlash;
respublika aholisini va iqtisodiyot tarmoqlarini tabiiy va suyultirilgan gaz bilan uzluksiz taʼminlashni amalga oshirish, mintaqalararo suv quvurlarining barqaror va ishonchli ishlashini taʼminlash;
mintaqalararo suv quvurlarini, kommunal gaz sotish tarmoqlarini ishlatish va rivojlantirish, shuningdek maishiy chiqindilarni toʻplash, foydalaniladigan qilish va qayta ishlash sohasida yagona texnika siyosatini shakllantirish va oʻtkazish;
tarmoqqa xorijiy investitsiyalar va texnologiyalarni, shu jumladan qoʻshma korxonalar tashkil qilish hisobiga jalb etish.
2. Quyidagilar:
Oʻzbekiston “Oʻzkommunxizmat” agentligi toʻgʻrisidagi nizom 3-ilovaga muvofiq tasdiqlansin.
Oʻzbekiston “Oʻzkommunxizmat” agentligi bosh direktoriga Agentlikning markaziy apparati tuzilmasiga xodimlarning belgilangan umumiy soni doirasida oʻzgartirishlar kiritish huquqi berilsin.
3. Vazirlar Mahkamasining “Kommunal xizmat koʻrsatish tizimi faoliyatini tashkil etishni takomillashtirish toʻgʻrisida” 2000-yil 21-dekabrdagi 493-son qarorining 7-bandidagi “va ularni rivojlantirish” soʻzlari chiqarib tashlansin.
4. Oʻzbekiston Respublikasi Hukumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.F. Fayzullayev zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2004-yil 5-mart,
110-son
Vazirlar Mahkamasining
2004-yil 5-martdagi 110-son qaroriga
1-ILOVA
2004-yil 5-martdagi 110-son qaroriga
1-ILOVA
Oʻzbekiston “Oʻzkommunxizmat” agentligining tashkiliy tuzilmasi
Oʻzbekiston “Oʻzkommunxizmat” agentligi markaziy apparatining tuzilmasi
Oʻzbekiston “Oʻzkommunxizmat” agentligi toʻgʻrisida
NIZOM
I. Umumiy qoidalar
1. Oʻzbekiston “Oʻzkommunxizmat” agentligi (keyingi oʻrinlarda agentlik deb ataladi) kommunal xizmat koʻrsatish sohasidagi vazifalarni bajarish uchun maxsus vakolatli davlat boshqaruvi organi hisoblanadi
Agentlik oʻz faoliyatida Oʻzbekiston Respublikasi Vazirlar Mahkamasiga hisobot beradi.
2. Agentlik tizimiga quyidagilar kiradi:
Mintaqalararo suv quvurlaridan foydalanish bosh direksiyasi;
hududiy gaz taʼminoti korxonalari;
Oʻzbekiston “Oʻzkommunxizmat” agentligi obyektlarini qurish injiniring kompaniyasi;
“Oʻzbekkommunalloyiha” loyihalash instituti;
“Oʻzgazloyiha” loyihalash instituti;
“Oʻzkommunoʻquvtashkilotchi” markazi.
3. Agentlik oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi qarorlari va boshqa hujjatlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek mazkur Nizomga amal qiladi.
4. Agentlik oʻz faoliyatini davlat boshqaruvi boshqa organlari, mahalliy davlat hokimiyati organlari, jamoat birlashmalari va boshqa tashkilotlar bilan oʻzaro hamkorlikda amalga oshiradi.
5. Agentlik markaziy apparatini moddiy-texnik taʼminlash uning tarkibiga kiradigan korxonalar va tashkilotlarning har oydagi ajratmalari, shuningdek qonun hujjatlariga zid boʻlmagan boshqa tushumlar hisobiga, Oʻzbekiston Respublikasi Moliya vazirligi bilan kelishilgan xarajatlar smetasiga muvofiq amalga oshiriladi.
6. Agentlik yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladi.
II. Agentlikning vazifalari va funksiyalari
7. Quyidagilar agentlikning asosiy vazifalari hisoblanadi:
kommunal xizmat koʻrsatish sohasidagi Oʻzbekiston Respublikasi qonunlarini, Oʻzbekiston Respublikasi Prezidentining farmonlarini, boshqa normativ-huquqiy hujjatlarni amalda bajarish va ularning ijrosi ustidan taʼsirchan nazoratni amalga oshirish;
respublika kommunal xizmat koʻrsatish tizimida iqtisodiy islohotlarni chuqurlashtirish boʻyicha davlat siyosatini va hukumat tomonidan qabul qilingan chora-tadbirlarni amalga oshirish;
kommunal xizmat koʻrsatish tizimini isloh qilish boʻyicha ishlarni muvofiqlashtirish, kommunal xizmat koʻrsatish sohasidagi normativ-huquqiy hujjatlarni, texnik-iqtisodiy shartlarni ishlab chiqish va belgilangan tartibda tasdiqlash;
respublika aholisini va iqtisodiyot tarmoqlarini tabiiy va suyultirilgan gaz bilan uzluksiz taʼminlashni amalga oshirish, mintaqalararo suv quvurlarining barqaror va ishonchli ishlashini taʼminlash;
mintaqalararo suv quvurlarini, kommunal gaz sotish tarmoqlarini ishlatish va rivojlantirish, shuningdek maishiy chiqindilarni toʻplash, foydalaniladigan qilish va qayta ishlash sohasida yagona texnika siyosatini shakllantirish va oʻtkazish;
tarmoqqa xorijiy investitsiyalar va texnologiyalarni, shu jumladan qoʻshma korxonalar tashkil qilish hisobiga jalb etish.
8. Agentlik oʻziga yuklangan vazifalarni bajarish uchun quyidagi funksiyalarni amalga oshiradi:
kommunal tarmoqni iqtisodiy isloh qilish masalalarini tartibga soluvchi qonunlar va boshqa normativ-huquqiy hujjatlar loyihalarini ishlab chiqadi va tasdiqlash uchun Vazirlar Mahkamasiga belgilangan tartibda kiritadi;
kommunal gaz sotish xoʻjaliklarini va mintaqalararo suv quvurlarini rivojlantirish tendensiyalarini oʻrganadi hamda qonuniyatlari va tendensiyalarini umumlashtiradi, ushbu sohadagi yagona texnik siyosatni shakllantiradi va oʻtkazadi;
mahalliy hokimiyat va boshqaruv organlari, xoʻjalik yurituvchi subyektlar va fuqarolar tomonidan kommunal xizmat koʻrsatish sohasida amalda boʻlgan qonun hujjatlariga, texnik shartlar va talablarga rioya etilishi monitoringini amalga oshiradi;
balanslarni ishlab chiqish uchun respublika ulgurji isteʼmolchilari va aholisining tabiiy va suyultirilgan gazga boʻlgan ehtiyoji parametrlarini aniqlashda belgilangan tartibda qatnashadi;
hududiy gaz taʼminoti korxonalarining yuridik shaxslar daromad (foyda) soligʻi boʻyicha har choraklik yigʻma hisob-kitoblarini amalga oshiradi va daromad (foyda) soligʻi boʻyicha yigʻma hisob-kitobni soliq organiga taqdim etadi;
mintaqalararo suv quvurlarini, shuningdek hukumat topshirigʻiga binoan kommunal maqsadlardagi boshqa obyektlarni qurish boʻyicha buyurtmachi funksiyasini belgilangan tartibda amalga oshiradi;
kommunal maqsadlardagi ilgʻor texnologiyalarni, asbob-uskunalar, priborlar, mashina va mexanizmlarni yaratadi va joriy etishni tashkil qiladi, ularni ishlab chiqarish ishlarini amalga oshiradi, Oʻzbekiston Respublikasi kommunal xoʻjaligi ehtiyojlari uchun yangi mashinalar, asbob-uskunalar va priborlar yaratish boʻyicha buyurtmachi vazifasini bajaradi;
kommunal xizmatlar koʻrsatish sohasida raqobat muhitini, injiniring, konsalting, auditorlik va uy-joy-kommunal tarmoqdagi boshqa tashkilotlar shoxobchalarini yaratishga koʻmaklashadi;
kommunal xoʻjaligi va mashinalar, priborlar, asbob-uskunalar ishlab chiqarish masalalari yuzasidan xorijiy mamlakatlar hamda xalqaro tashkilotlar bilan ilmiy-texnik va iqtisodiy hamkorlikni amalga oshiradi, mahalliy korxonalar va tashkilotlarga xorijiy firmalar hamda boshqa korxonalar va tashkilotlar bilan toʻgʻridan toʻgʻri aloqalarni oʻrnatishda koʻmaklashadi;
ushbu sektor korxonalari faoliyatining muntazam monitoringini olib borish, rivojlantirish tendensiyalarini va ilgʻor tajribani oʻrganish, uni joriy etishga koʻmaklashish yoʻli bilan maishiy chiqindilarni toʻplash, foydalaniladigan qilish va qayta ishlash boʻyicha yagona texnika siyosatini amalga oshiradi;
oʻz vakolatlari doirasida kommunal xizmat koʻrsatish korxonalari uchun mutaxassislarni oʻqitish, tayyorlash va qayta tayyorlash hamda kadrlar malakasini oshirishni tashkil qiladi;
gaz taʼminoti tizimlarini rivojlantirish hamda hukumat topshirigʻiga binoan suv taʼminoti, kanalizatsiya, issiqlik taʼminoti, sanitariya jihatidan tozalash, irrigatsiya va hududlarni, aholi punktlarini drenajlashni rivojlantirish konsepsiyalari, istiqbolli dasturlari va sxemalarini ishlab chiqadi, ularni roʻyobga chiqarishni amalga oshiradi;
joylardagi moliya va boshqa manfaatdor mahalliy boshqaruv organlari hamda hokimiyat organlari bilan oʻzaro hamkorlikda tarif siyosatini, uy-joy-kommunal xizmatlar isteʼmoli normalarini ishlab chiqish va takomillashtirish boʻyicha metodologik ishlarni amalga oshiradi;
mintaqalararo suv quvurlari obyektlari va kommunal gaz sotish shoxobchalari boʻyicha ilmiy-tadqiqot hamda loyihalash-qidiruv ishlarini amalga oshirish strategiyasini shakllantiradi va ularning bajarilishini taʼminlaydi;
qonun hujjatlariga muvofiq boshqa funksiyalarni amalga oshiradi.
9. Agentlik oʻziga yuklangan vazifalar va funksiyalarni bevosita, shuningdek oʻziga qarashli korxonalar, tashkilotlar va muassasalar orqali hal qiladi.
III. Agentlikning huquqlari va javobgarligi
10. Agentlik oʻziga yuklangan vazifalar va funksiyalarni bajarish uchun quyidagi huquqlarga ega:
kommunal sohadagi eng muhim muammolarni ishlab chiqish va koʻrib chiqish boʻyicha idoralararo komissiyalar va kengashlar tashkil etish, materiallarni ishlab chiqishga ilmiy-tadqiqot, texnologiya, loyiha-konstruktorlik tashkilotlarini, oliy-oʻquv yurtlari va boshqa muassasalarning xodimlarini, shuningdek alohida olimlar va mutaxassislarni belgilangan tartibda jalb etish;
hududiy gaz taʼminoti korxonalarining xarajatlari va daromadlari smetasini belgilangan tartibda tasdiqlash;
oʻz faoliyati uchun zarur statistik va boshqa axborotlarni statistika tashkilotlari va boshqa tashkilotlardan belgilangan tartibda olish.
Agentlik qonun hujjatlariga muvofiq boshqa huquqlarga ham ega boʻlishi mumkin.
11. Agentlik oʻz vakolatlari doirasida vazirliklar, davlat qoʻmitalari, idoralar, xoʻjalik boshqaruvi organlari, mahalliy davlat hokimiyati organlari, korxonalar, muassasalar, tashkilotlar, mansabdor shaxslar va fuqarolarning bajarishi uchun majburiy boʻlgan normativ-huquqiy hujjatlarni qabul qilishga haqlidir.
Agentlik zarur hollarda boshqa vazirliklar, qoʻmitalar va idoralar bilan birga qoʻshma qarorlar va boshqa hujjatlar chiqarish huquqiga ega.
12. Agentlik oʻziga yuklangan vazifalarning samarali bajarilishi uchun qonun hujjatlarida belgilangan tartibda javob beradi.
IV. Agentlik faoliyatini tashkil etish
13. Agentlikni qonun hujjatlarida belgilangan tartibda lavozimga tayinlanadigan va lavozimdan ozod qilinadigan bosh direktor boshqaradi.
Bosh direktorning bir nafar oʻrinbosari boʻladi.
Bosh direktor maqomiga koʻra vazirning birinchi oʻrinbosariga, bosh direktor oʻrinbosari vazir oʻrinbosariga tenglashtiriladi.
Mintaqalararo suv quvurlaridan foydalanish bosh direksiyasi direktori maqomiga koʻra agentlikning bosh direktori oʻrinbosari hisoblanadi.
14. Agentlikning bosh direktori:
Agentlik faoliyatiga yakka boshchilik asosida umumiy rahbarlikni amalga oshiradi;
agentlik vakolatiga kiruvchi masalalar boʻyicha qarorlar qabul qiladi hamda agentlikka yuklangan vazifalar va funksiyalarning bajarilishi uchun shaxsan javob beradi;
oʻz oʻrinbosarlarining vakolatlarini belgilaydi, ular oʻrtasida vazifalarni taqsimlaydi, agentlik tizimidagi boshqa mansabdor shaxslarning vakolatlarini, oʻz oʻrinbosarlari va boshqa mansabdor shaxslarning agentlik faoliyati alohida uchastkalariga rahbarlik qilish hamda tasarrufidagi korxonalarning ishlari uchun javobgarligi darajasini belgilaydi;
agentlik tizimi rahbarlari tomonidan bajarilishi majburiy boʻlgan buyruqlar chiqaradi va koʻrsatmalar beradi;
agentlikning markaziy apparati shtatlar jadvalini tasdiqlaydi, uning tuzilmasiga xodimlarning belgilangan umumiy soni doirasida, shuningdek agentlik markaziy apparati xarajatlari smetasiga oʻzgartirishlar kiritadi;
agentlik markaziy apparatining tarkibiy boʻlinmalari toʻgʻrisidagi nizomlarni, tasarrufidagi korxonalarning nizomlari (ustavlari)ni belgilangan tartibda tasdiqlaydi;
agentlik markaziy apparati xodimlarini, tasarrufidagi korxonalar rahbarlarini belgilangan tartibda lavozimga tayinlaydi va lavozimdan ozod qiladi.
Bosh direktor qonun hujjatlariga muvofiq boshqa vakolatlarni amalga oshiradi.
15. Agentlikda tarkibiga bosh direktor (hayʼat raisi), lavozimiga koʻra bosh direktor oʻrinbosarlari va agentlikning boshqa rahbar xodimlari kiradigan 5 kishidan iborat hayʼat tuziladi.
Agentlik hayʼatining shaxsiy tarkibi bosh direktor taqdimnomasiga koʻra Vazirlar Mahkamasi tomonidan tasdiqlanadi.
Agentlik hayʼati agentlik faoliyatining asosiy masalalarini koʻrib chiqadi, tarkibiy boʻlinmalar rahbarlarining hisobotlarini eshitadi, agentlikning eng muhim buyruqlari va boshqa hujjatlari loyihalarini muhokama qiladi.
Hayʼat qarorlari bosh direktor buyruqlari bilan hayotga tatbiq etiladi. Bosh direktor va hayʼat oʻrtasida kelishmovchiliklar paydo boʻlgan taqdirda bosh direktor oʻz qarorini amalga oshiradi. Bosh direktor paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasini xabardor qiladi.
16. Hududiy gaz taʼminoti korxonalari agentlikka hisobot berishadi va oʻz faoliyatini Vazirlar Mahkamasining 2003-yil 2-oktabrdagi 421-son qarori bilan tasdiqlangan Namunaviy nizomga muvofiq amalga oshiradi.
Hududiy gaz taʼminoti korxonalari direktorlari tegishli ravishda Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari taqdimnomasiga binoan agentlik bosh direktorining qarori bilan tayinlanadilar.
17. Agentlikni qayta tashkil etish va tugatish qonun hujjatlarida belgilangan tartibda amalga oshiriladi.
Oʻzbekiston Respublikasi Hukumatining oʻz kuchini yoʻqotgan qarorlari roʻyxati
1. Vazirlar Mahkamasining “Oʻzkommunxizmat” agentligi toʻgʻrisidagi nizomni, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining hududiy kommunal-foydalanish birlashmasi toʻgʻrisidagi Namunaviy nizomni tasdiqlash haqida” 2001-yil 13-fevraldagi 74-son qarori (Oʻzbekiston Respublikasi QT, 2001-y., 2-son, 10-modda) 1-bandining ikkinchi xatboshi hamda qarorga 1-ilova.
2. Vazirlar Mahkamasining “Tabiiy gaz yetkazib berish va uning uchun hisob-kitob qilish tizimini yanada takomillashtirish toʻgʻrisida” 2002-yil 20-martdagi 90-son qaroriga (Oʻzbekiston Respublikasi QT, 2002-y., 3-son, 16-modda) 3-ilovaning 4-bandi.
3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2003-yil 28-fevraldagi 112-son qaroriga (Oʻzbekiston Respublikasi QT, 2003-y., 2-son, 19-modda) ilovaning 40-bandi.
4. Vazirlar Mahkamasining “Respublika gaz taʼminoti tizimini boshqarishni takomillashtirish chora-tadbirlari toʻgʻrisida” 2003-yil 2-oktabrdagi 421-son qarori (Oʻzbekiston Respublikasi QT, 2003-y., 10-son, 94-modda) 6-bandining toʻrtinchi xatboshi, shuningdek ushbu qarorga 4-ilova, 5-ilovaning 4-bandi.
(Oʻzbekiston Respublikasi Qonun hujjatlari toʻplami, 2004-y., 10-son, 115-modda)
