Gaz taqsimlash tarmoqlarini rivojlantirish va ulardan foydalanish sohasida yagona siyosatni shakllantirish, respublika isteʼmolchilariga tabiiy gazni yetkazib berish va sotish boʻyicha samarali boshqaruv tizimini yaratish, shuningdek, tabiiy gazdan oqilona foydalanish va gaz uchun toʻlov intizomini mustahkamlash maqsadida:

1. Iqtisodiyot vazirligi, Moliya vazirligi, Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi, “Oʻzkommunxizmat” agentligi va “Oʻzbekneftgaz” milliy xolding kompaniyasining:

hududiy gaztaʼminoti korxonalarini (bundan keyin HGK deb ataladi) “Oʻzkommunxizmat” agentligi tarkibidan “Oʻzbekneftgaz” MXKga qarashli “Oʻztransgaz” AK tarkibiga oʻtkazish;

barcha toifadagi isteʼmolchilarni gaz bilan taʼminlash uchun HGK negizida “Oʻztransgaz” AKning unitar korxonalari shaklida 6 ta hududlararo korxona tashkil etish orqali respublika isteʼmolchilariga tabiiy gaz yetkazib berish va sotish boʻyicha yagona texnologik tizimni yaratish;

hududlararo gaz taʼminoti korxonalariga “Oʻztransgaz” AK shartnoma topshirigʻi asosida gaz taqsimlash tarmoqlarini ishlatish va tabiiy gazni sotish boʻyicha vakolatlarni berish toʻgʻrisidagi taklifi qabul qilinsin.

2. “Oʻztransgaz” AJning asosiy vazifalari etib quyidagilar belgilansin:

tabiiy gazni keyinchalik yagona operator sifatida yetkazib berish, jumladan eksport va import qilish uchun gaz qazib oluvchi va qayta ishlovchi tashkilotlar, shu jumladan mahsulotni taqsimlash toʻgʻrisidagi bitimlar asosida faoliyat yurituvchi qoʻshma korxonalar va xorijiy kompaniyalardan xarid qilish;

tabiiy gazni oldi-sotdi shartnomasi boʻyicha “Hududgaztaʼminot” AJ va magistral gaz uzatish tizimiga ulangan isteʼmolchilarga sotish;

magistral gaz quvurlari, kompressor stansiyalari, yer osti gaz omborlari va ularning uskunalaridan foydalanishda xavfsizlik qoidalarining meʼyoriy talablariga amal qilgan holda magistral gaz quvurlariga ulangan elektr ishlab chiqaruvchi elektr stansiyalarini belgilangan tartibda tabiiy gaz bilan uzluksiz taʼminlash;

magistral gaz quvurlari tizimida ularni modernizatsiya qilish va texnik jihatdan qayta jihozlashni hisobga olib hamda tabiiy gazni uzatish texnologiyasi va gidravlik balansiga rioya etgan holda yagona texnik siyosatni olib borish;

magistral gaz quvurlari tizimida tabiiy gazdan oqilona foydalanishni taʼminlash;

magistral gaz quvurlari tizimida zamonaviy hisoblash priborlari va usullarini joriy etgan holda gazning qatʼiy hisobga olinishini taʼminlash, tabiiy gazning isrof qilinishi va asossiz ishlatilishini kamaytirish boʻyicha choralar koʻrish;

eksportga tabiiy gaz yetkazib berish hajmini oshirish va uni uzatish boʻyicha koʻrsatilayotgan xizmatlarni kengaytirish.

4. Belgilab qoʻyilsin:

“Oʻztransgaz” AK “Oʻzkommunxizmat” agentligi tomonidan faoliyatning tegishli yoʻnalishida tuzilgan shartnoma va majburiyatlar boʻyicha huquqiy voris hisoblanadi;

“Oʻztransgaz” AKning hududlararo unitar korxonalari HGK shartnoma va majburiyatlari boʻyicha huquqiy voris hisoblanadi.

6. Idoralararo komissiya (E.R. Shoismatov) “Oʻzbekneftgaz” MXK va “Oʻztransgaz” AK bilan birgalikda:

ikki oy muddatda hududiy gaztaʼminoti korxonalarining qabul qilingan mol-mulkini 2006-yil 1-iyul holatiga koʻra inventarizatsiyadan oʻtkazsin va qonunchilikda belgilangan tartibda baholasin;

2006-yil 1-sentabrgacha boʻlgan muddatda HGKni qayta tashkil etish boʻyicha zarur chora-tadbirlar majmuini amalga oshirsin va ularning negizida “Oʻztransgaz” AKning hududlararo unitar korxonalarini tashkil etsin;

HGK qayta tashkil etilayotgan davrda tabiiy va suyultirilgan gaz isteʼmolchilarga uzluksiz yetkazib berilishi, belgilangan texnik va yongʻin xavfsizligi normalariga rioya etilishini taʼminlasin;

“Oʻztransgaz” AKning hududlararo unitar korxonalarini yuqori malakali kadrlar bilan taʼminlasin.

7. “Oʻzbekneftgaz” MXK, “Oʻzkommunxizmat” agentligi Oʻzbekiston Respublikasi Moliya vazirligi, Oʻzbekiston Respublikasi Tashqi iqtisodiy faoliyat Milliy banki va “Ipotekabank” ATIB bilan birgalikda bir oy muddatda “Oʻzkommunxizmat” agentligining xorijiy kreditlar va Hukumat qarorlariga koʻra berilgan Oʻzbekiston Respublikasi Moliya vazirligining kreditlari boʻyicha qarz majburiyatlari yuzasidan kredit hujjatlariga tegishli oʻzgarishlar va qoʻshimchalarni belgilangan tartibda rasmiylashtirsin.

Oʻzbekiston Respublikasi Moliya vazirligi yuqorida koʻrsatilgan oʻzgarishlarni hisobga olgan holda Oʻzbekiston Respublikasi kafolatiga tegishli qoʻshimchalarni belgilangan tartibda rasmiylashtirsin.

8. Belgilab qoʻyilsinki, “Oʻzkommunxizmat” agentligi HGKning berilayotgan mulki “Oʻztransgaz” AKning soliqlarini hisoblashda soliq bazasiga qoʻshilmaydi.

Oʻzbekiston “Oʻzkommunxizmat” agentligining hududiy gaz taʼminoti korxonalariga ilgari berilgan mulk soligʻi boʻyicha imtiyozlar “Oʻztransgaz” aksiyadorlik kompaniyasining mintaqalararo unitar korxonalariga joriy etilsin.

10. “Oʻzbekneftgaz” MXK va Oʻzbekiston Respublikasi Adliya vazirligi manfaatdor vazirlik va idoralar bilan birgalikda ikki oy muddatda mazkur qarordan kelib chiqib qonunchilikka oʻzgartish va qoʻshimchalar kiritish yuzasidan takliflarni Vazirlar Mahkamasiga taqdim etsin.

11. Mazkur qaror ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.