Oʻzbekiston Respublikasi Prezidentining “Oʻzbekiston Respublikasining BMT Oziq-ovqat va qishloq xoʻjaligi tashkiloti, BMT Qishloq xoʻjaligini rivojlantirish xalqaro jamgʻarmasi hamda BMT Butunjahon oziq-ovqat dasturi bilan hamkorligini kengaytirish va chuqurlashtirish chora-tadbirlari toʻgʻrisida” 2020-yil 15-dekabrdagi PQ-4922-son hamda “Yerlar degradatsiyasiga qarshi kurashishning samarali tizimini yaratish chora-tadbirlari toʻgʻrisida” 2022-yil 10-iyundagi PQ-277-son qarorlari ijrosini taʼminlash maqsadida Vazirlar Mahkamasi qaror qiladi:

1. Quyidagilar:

Global ekologik jamgʻarma (keyingi oʻrinlarda — GEJ) tomonidan “Oʻzbekistonning qurgʻoqchilikka uchragan ekotizimlarida yaylovlar va oʻrmonlarni barqaror boshqarish” loyihasini (keyingi oʻrinlarda — Loyiha) moliyalashtirish uchun 5 yil muddatga grant ajratilishi belgilanganligi;

Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi hamda Qishloq xoʻjaligi vazirligi Loyihani amalga oshirish uchun umumiy ijrochi va texnik yordam koʻrsatuvchi etib belgilanganligi;

Loyihani amalga oshirish davrida BMTning Oziq-ovqat va qishloq xoʻjaligi tashkilotining (keyingi oʻrinlarda — FAO) Oʻzbekistondagi vakolatxonasi masʼul ijro etuvchi organ sifatida faoliyat koʻrsatishi;

Loyiha Buxoro va Navoiy viloyatlarida amalga oshirilishi nazarda tutilganligi maʼlumot uchun qabul qilinsin.

2. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi Qishloq xoʻjaligi vazirligi bilan birgalikda:

ikki hafta muddatda FAOning Oʻzbekistondagi vakolatxonasi bilan Loyihani amalga oshirish yuzasidan kelishuvni imzolasin;

bir oy muddatda Loyihani amalga oshirish uchun shartnoma asosida jalb qilinadigan mahalliy maslahatchi-ekspertlarning soni va ularga toʻlanadigan ish haqi miqdorini FAOning Oʻzbekistondagi vakolatxonasi bilan kelishgan holda tasdiqlasin;

ikki oy muddatda manfaatdor vazirlik va idoralar, Buxoro va Navoiy viloyatlari hokimliklari bilan birgalikda Loyihani amalga oshirish boʻyicha chora-tadbirlar rejasini ishlab chiqsin va tasdiqlasin;

Loyihani amalga oshirish doirasida bajarilgan ishlar holati va oʻzlashtirilgan mablagʻlar yuzasidan hisobotlarni har chorakda Oʻzbekiston Respublikasi Investitsiyalar, sanoat va savdo vazirligi hamda Vazirlar Mahkamasiga kiritib borsin.

3. Belgilab qoʻyilsinki:

Loyiha bilan bogʻliq tadbirlar masʼul vazirliklar va FAOning Oʻzbekistondagi vakolatxonasi oʻrtasidagi kelishuvlar doirasida amalga oshiriladi;

Loyiha bilan bogʻliq tadbirlarni amalga oshirish uchun GEJning granti FAOning Oʻzbekistondagi vakolatxonasi orqali Loyihaning yillik budjetida tasdiqlangan miqdorda va muddatlarda tegishli vazirlik uchun Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida ochilgan hisobvaraqlarga oʻtkazib boriladi;

Loyiha doirasida hisobot yilida GEJning oʻzlashtirilmagan granti FAOning Oʻzbekistondagi vakolatxonasi bilan kelishgan holda keyingi yilga toʻliq oʻtkaziladi;

GEJ granti hisobidan xaridlar Oʻzbekiston Respublikasining “Davlat xaridlari toʻgʻrisida”gi Qonuni talablari asosida ochiq va shaffof usulda amalga oshiriladi. Bunda respublika hududidan tashqaridagi xaridlar FAOning Oʻzbekistondagi vakolatxonasi bilan kelishgan holda amalga oshiriladi;

GEJ granti hisobidan xarid qilingan asbob-uskunalar, qurilma va jihozlar Loyihani amalga oshirish muddati tugaganidan soʻng mahalliy hamkor tashkilotlarga bepul oʻtkazib beriladi.

4. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi hamda Qishloq xoʻjaligi vazirligiga Loyiha doirasidagi tadbirlarning oʻz muddatida va sifatli bajarilishini, xaridlarning ochiq va shaffofligini taʼminlash, shuningdek, ularning ustidan doimiy nazorat oʻrnatish maqsadida “yoʻl xaritalari”ni tasdiqlash hamda idoralararo muvofiqlashtiruvchi kengash va ishchi guruhlarni tuzish vakolatlari berilsin.

5. Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga ushbu qarorning ijrosi bilan bogʻliq tadbirlarni muntazam yoritib borish tavsiya etilsin.

6. Mazkur qarorning bajarilishini nazorat qilish Oʻzbekiston Respublikasi ekologiya, atrof-muhitni muhofaza qilish va iqlim oʻzgarishi vaziri A.A. Abduxakimov hamda Oʻzbekiston Respublikasi qishloq xoʻjaligi vaziri I.Y. Abduraxmonov zimmasiga yuklansin.